Shiyanso 22

UMutwa uNguluvi ikimujovela uAbulahamu amuhumye uIsaaka ave shadanda

1Paanyuma, uNguluvi wámujelaga uAbulahamu. Wámushemeela wáaja, “Abulahamu!” UAbulahamu wáyiitikha wáaja, “One nili panu.” 2UNguluvi wámujovela, “Nisakula umutoole umwanaakho umugani umubaagule uIsaaka, ulute nawo mbakha ku nyi ya Moliya#22:2 Yimba mu litaafili lya 2 Njowo sa Luhaavi 3:1. kushaanya ya shidunda shina nisikusoonele. Baheene ulute umuhumye ishadanda sha kinyaanywa kunyangu.” 3Kwaganile kiisha hela, uAbulahamu wálamukha, wáyansa kiteenya inyanjala isa kinyaanyila ishadanda, wátansa pa dogovi, wávatoola avavanda vaakwe vavili nu muswamu waakwe uIsaaka. Vayansa kishuula, viiluta uluvala luna uNguluvi wámusonelaga uAbulahamu. 4Vaganaga kijenda, ilisiku lya wutatu uAbulahamu wáyiinukha kiloleela kushaanya, wálwaga uluvala lula kwa kutali. 5Baheene uAbulahamu wávajovela avavanda vaakwe wáaja, “Khalaji baaha muyiyangalilaje idogovi. One nu Isaaka tiiluta kula kimufuunya uNguluvi, paanyuma tisiitine.”

6Lino, uAbulahamu wátoola inyanjala isa kinyaanyila ishadanda, wámutwikha uIsaaka, umwene wásumula umooto ni shimaaji, baheene vawuukha lumo. 7Mu nsila, uIsaaka wámuposa uwiihe, “Daada wangu!” Woope wáyiitikha wáaja, “Wuli muswamu wangu!” UIsaaka wámujovela, “Loleela! Umooto tinago, inyanjala tinaso. Lino, inyana nkholo iya shadanda iya kinyaanya yili kwi?” 8UAbulahamu wámujovela uIsaaka wáaja, “Muswamu wangu, uNguluvi asitupeele inyana nkholo iya shadanda iya kinyaanya.” Baheene vayitenekha kijenda. 9Vaganile kifikha uluvala luna uNguluvi akhandi amusoneele uAbulahamu, wásenga uluvala ulwa kihumisa ishadanda. Wásiviikha inyanjala pashaanya, wámupinya umuswamu waakwe uIsaaka, wámuviikha pashaanya pa nyanjala sila. 10Wátoola ishimaaji shaakwe, kiija amushinje uIsaaka.

11Leelo, uMalayikha wa Mutwa uNguluvi wámushemeela uAbulahamu kihuma kushaanya wáaja, “Abulahamu! Abulahamu!” Woope wáyiitikha wáaja, “One nili panu!”

12UMalayikha wámujovela, “Usikhajelaga kimubuda umwana! Lino naamanya kiija ukimutiila uNguluvi, kwa kiiva usakhaana kimupeela hata umuswamu waakho uyu uwa lufingo yuna uNguluvi wáfingaga!”

13Baheene uAbulahamu wáloleela kunyuma yaakwe, wáyaaga iduuvi, yikhatiilwe amapembe gaakwe mu lisita! UAbulahamu wáaluta kiyitoola inkholo iyo, wáyihumya ishadanda isha kinyaanywa kwa Nguluvi, yapyanila pa muswamuve uIsaaka. 14Kwa kiiva ya ilyo, uAbulahamu wápatambulila apo ilitaawa lya Yaahwe-Yiile, uluganulo lwakwe kiija, “UMutwa uNguluvi ikitupeela,” ngaja shina avaanu viijova mbakha iminsiyaano, “Mu shidunda sha Mutwa uNguluvi tiipata fina tisakula.”

15UMalayikha wa Nguluvi wámushemeela uAbulahamu ulwa wuvili kihuma kushaanya, 16wáaja, “UMutwa uNguluvi iija ndeeni, ‘Kwa kiiva wanipulikha, khanji wanipeela umwanaakho umugani umubaagule uIsaaka, nayiyiiga kwa litaawa lyangu yuune. 17Shiyooli nikiyiyiiga kiija, nisikuyimiilile na nisikuyoolose ishisafi shaakho shisiive shikhome. Shisiive shinshi ngaja nondwe isa ku wulanga na kiiva shinshi ngaja luhankha ulwa mu mbalamo ya bahali. Avanaakho vakhavamena avalugu vaanave, na vakhagagalula amajumbi gaanave. 18Kishilila ulusawo lwakho, nikhavayimiilila avaanu woona ava mu nyi, kwa kiiva wanipulikha.’” 19Baheene uAbulahamu wáatina kwa vavanda vaakwe vavili vala. Vawuukha woona mbakha ku Belisheeba, woope uAbulahamu wáava iikhala ukho.

Avaana va Naholi

20Gaganile kishila ago, uAbulahamu wápulikhaga imola kiija, uNaholi umunangʼana#22:20 Yimba mu litaafili lya Shiyanso 11:27-30. waakwe, wásavilwagwa avaana va shidiimi munaana nu mudala waakwe uMilika. 21Umwana uwa wutasi yu Usi, umaame yu Busi nu Kemweli uwiihe wa Alaamu. 22Avaana avanji ava Naholi vakhandi, uKesedi, uHaaso, uPilidashi, uYidilafu nu Betuweli. 23UBetuweli wámusavaga uLebeka. UMilika wámusavilaga uNaholi, ulukholo lwakwe uAbulahamu, avaana ava shidiimi munaana. 24UNaholi akhandi nu mudala uyunji umunangʼana yuna akhandi itambulwa Lewuma. Uyo wámusavilaga avaana avanji vana. Amataawa gaanave vakhandi vitambulwa Teeba, Gahamu, Takhashi nu Maaka.

Currently Selected:

Shiyanso 22: Shisangu

Highlight

Copy

Want to have your highlights saved across all your devices? Sign up or sign in

Learn More About IShiyanso nu Lufingo uLupya