Shiyanso 26

UIsaaka ihaamila ku Gelaali

1Uluhaavi lumonga injala inkhome yagwile mu nyi ya Kanaani, yikhandi nkhome kishila injala yina yikhagwile uluhaavi lwa Abulahamu.#26:1 Yimba mu litaafili lya Shiyanso 12:10. Kwa kiiva ya ilyo, uIsaaka wáaluta ku lijumbi lya Gelaali kwa Abimeleeki umutwa wa Vafilisiti. 2Ukho uMutwa uNguluvi wámutwiwushila uIsaaka na wámujovela wáaja, “Usikhalutaga ku Misili, leelo khala mu nyi yina nisikujovele. 3Khalaga kwa luhaavi lufupi mu nyi iyi, one nisiive noowe na nisikuyimiilile, kiiva nisikupeele owe na vanaakho inyi iyi iya Kanaani, pina nakwisa ulufingo luna nafingaga kwa wiiho uAbulahamu. 4Nisishiyoolose ishisafi shaakho shive shinshi ngaja inondwe isa ku wulanga, na nisivapeele inyi iyi yoona. Kwa kishilila ifisafi fyakho nikhava nikisiyimiilila inyi soona. 5Nikhakuyimiilila, kwa kiiva uAbulahamu wánipulisaaga, wágahaga goona gina namulajisaaga, na wásiyinatilaga indaji sangu, nu wulamulaaji wangu.” 6Baheene uIsaaka wáakhala nu mudala waakwe ku Gelaali.

7Paanyuma avaanu va ukho pina vamwajile uLebeka, vamuposa uIsaaka, “Wuli, uyu mudala waakho?” Umwene wákhaana wáaja, “Uyu wulumbu wangu.” Wátiilaga kilogola kiija mudala waakwe, kwa kiiva uLebeka akhandi munofu mandu, akhandi ihiiva kiija avaanu ava ukho vangamubuda, baheene vamutoole umudala waakwe.

8Leelo, uIsaaka wáganile kikhala ukho nsiku nyinshi, ilijuva limonga uAbimeleeki umutwa wa Vafilisiti, wálutile wáhunjisa pa ndwi ya nanda, wámwaga uIsaaka ikimukhata khata kuno ikimudigilinsa digilinsa uLebeka. 9Apo baheene uAbimeleeki wámushemeela uIsaaka wámujovela wáaja, “Humbe uyo mudala waakho! Kwashi wanijangaga wanijovela kiija, wulumbu waakho?” UIsaaka wámugomosesa wáaja, “Najovaga ndeeno kwa kiiva nikhandi nitiila kiija, avaanu vasinibude kwa kiiva yaakwe.” 10Baheene umutwa uAbimeleeki wámukhajila uIsaaka wáaja, “Shiinu shishi ishi shina watugahilaga? Yaali yiveesaje kiija, kuna muunu yoyoona yuna wágonaga nawo, ndi watuleetela ose toona uwunansi.” 11Apo, uAbimeleeki wáahumya indaji kwa vaanu woona, wáajova, “Umuunu yoyoona yuna asimupyase uIsaaka awu umudala waakwe, uyo shiyooli asiibudwe.”

12Umwakha ugo, uIsaaka wávyalaga imbeyu mu nyi yila, wámotaga mandu, kwa kiiva uMutwa uNguluvi wámuyimililaga. 13UIsaaka wáamota mandu, wákwava mbakha wáava munya wusi winshi mandu. 14Akhandi ana nkholo, mene ni ngʼombe, khanji akhandi ana vavanda vinshi, mbakha aVafilisiti vayansa kimuwifushila. 15Vasiilaga amasima goona ga malenga gina vahimbaga avavanda va Abulahamu, pina akhandi muumi. 16Apo, baheene uAbimeleeki wámujovela uIsaaka wáaja, “Waava ni ngufu kitushila ose, lino wuukha panyeesu apa.”

17Baheene uIsaaka wáwuukha apo, wáaluta kisenga ilitinga lyakwe ku lukwawo lwa Gelaali, wáakhala ukho. 18Wáatina kifukula amasima gala gina wáhimbaga uAbulahamu, pina akhandi muumi. Amasima ago gasilwagwa na Vafilisiti, wáganaga kiifwa uAbulahamu. UIsaaka wáganaga kigafukula, wágatambulilaga amataawa gagala gina uwiihe wáali agatambuliile.

19Ilisiku limonga, avavanda va Isaaka vahimba ilisima pa lukwawo pala, vaapata ifisansa fya malenga fina fikhandi fiihumya amalenga amanofu. 20Leelo avadimaaji va Gelaali vadalinkhana na vadimaaji ava Isaaka vaaja, “Amalenga aga ga kunyeesu.” UIsaaka wálitambulila ilisima ilyo ilitaawa lya Eseki,#26:20 Eseki: Litaawa lya Shihebulaniya. Uluganulo lwakwe, libaatu. kwa kiiva vadalinkhanaga nawo. 21Ino avasenga nsengo va Isaaka vahimba ilisima ilinji khanji, ilyo lyope valwilanilaga khanji. UIsaaka wálitambula ilisima ilyo ilitaawa lya Sitina.#26:21 Sitina: Litaawa lya Shihebulaniya. Uluganulo lwakwe, kibagunkhana. 22Baheene uIsaaka wáwuukha, wáaluta ukunji kihimba ilisima ilinji. Lino ku lisima ili, vasikhalwilaniile. Baheene uIsaaka wálitambulila ilisima ilyo ilitaawa lya Lehoboti#26:22 Lehoboti: Litaawa lya Shihebulaniya. Uluganulo lwakwe, uluvala ulupapaate. kuno iijova, “Lino uMutwa uNguluvi wátupeela uluvala ulukhome, tisisingamale ku nyi iyi.”

23Kihuma apo, wáaluta mbakha ku Belisheeba. 24UMutwa uNguluvi wámutwiwushilaga ishilo shishila, wámujovela wáaja, “One yuune Nguluvi wa wiiho uAbulahamu. Usikhatiilaga, kwa kiiva one nili noowe. Nisikuyimiilile na kishiyoolosa ishisafi shaakho, kwa kiiva ya lufingo lwangu luna nalufingaga nu Abulahamu, umuvanda wangu.” 25Ndeeno, uIsaaka wásenga uluvala lwa kihumisa ishadanda, wámufuunya uMutwa uNguluvi. Ukho, wásenga ilitinga lyakwe, na vavanda vaakwe vahimba ilisima ilinji.

UIsaaka nu Abimeleeki vipulinkhana na kifingana

26Ilijuva limonga, umutwa uAbimeleeki wáahuma ku Gelaali nu mumanyi waakwe mandu uAhusati nu Fikoli, umukhome wa vasulukhali vaakwe, vaaluta kwa Isaaka. 27Baheene uIsaaka wávaposa kiija, “Muyinsile kigaha shishi kunyangu? Mbona mukhandi musinigeene mbakha mwanidaga kihuma mu nyi yeenyu?”

28Woope vamugomosesa vaajova, “Taawona kiija, uMutwa uNguluvi ali lumo noowe. Ndeeno, taawona lunofu tivishilane uluyiigo lwa wulindamafu na kifingana, 29kiija usikhatugahilaga amavi, ngaja ose shina tisikhakupyasiise. Tikhakugahiile amanofu, takulekha uyilutilaje kwa wulindamafu. Lino owe uyimiliilwe nu Mutwa uNguluvi.” 30Apo, baheene uIsaaka wávagahila ishiwungo, vaalya na kiingʼwa. 31Pamulaawu njine kwaganile kiisha hela, vafingana. Baheene, uIsaaka wávasindishila, vaaluta kwa wulindamafu. 32Ilijuva lilila, avavanda va Isaaka vayinsa vamujovela vaajova, “Taapata amalenga pa lisima pala pina tikhandi tihimba.” 33Ilisima ilyo, uIsaaka wálitambulila ilitaawa lya Sheeba.#26:33 Sheeba: Litaawa lya Shihebulaniya. Uluganulo lwakwe, kiyiyiiga. Ndeeno, ilijumbi ilyo litambulwa Belisheeba#26:33 Yimba mu litaafili lya Shiyanso 21:31. mbakha iminsiyaano.

UEsawu na vashimaayi vaakwe

34UEsawu wáganile kifisa maakha mashumi gana, wátoola avashimaayi vavili va Shihiti, uYuditi umwali wa Beeli nu Basemati umwali wa Eloni. 35Avashimaayi va Esawu awo, vapinsaaga uwiikhasi wa Isaaka nu Lebeka wuve wuvi mandu.

Currently Selected:

Shiyanso 26: Shisangu

Highlight

Copy

Want to have your highlights saved across all your devices? Sign up or sign in

Learn More About IShiyanso nu Lufingo uLupya