Shiyanso 30

UYaakobo na vadala vaakwe

1ULaheli wáganile kiwona asimusaviile uYaakobo avaana, wáyansa kimufyoshela umaame uLeya. Apo, wámujovela uYaakobo, “Nipeela avaana, nda usikinipeela nisiifwe!” 2UYaakobo wámukhalalila uLaheli wámujovela, “Wuli, one yuune Nguluvi, yuna akusiviile kisava avaana?” 3ULaheli wámujovela wáaja, “Akwali uBiliha umuvanda wangu, ugone nawo asave avaana, kiija kishilila kwa mwene, na yuune nipate avaana.”#30:3 Nipate avaana: Kwa ngʼoma ya luhaavi lula kwa Vahebulaniya, umushimaayi yuna asipaapukha akhandi akwiliile kitoola avaana vina umugoosi waakwe, wávasava kwa muvanda uwa washimaayi uyo, na kivatoola kiiva vanaakwe khabisa. Yimba mu litaafili lya Shiyanso 16:2. 4Apo, baheene uLaheli wámupeela uYaakobo uBiliha ave ngaja mudala waakwe. Woope uYaakobo wáagona na woope. 5UBiliha wáava nu lwanda, baheene wámusavila uYaakobo umwana wa shidiimi. 6Baheene uLaheli wáaja, “UNguluvi wáahiga wunofu amaswi gangu, kwa kiiva wánipulikha amafuunyo gangu, wánipeela umwana umudiimi.” Kwa kiiva ya ilyo, umwana uyo wámutambulila ilitaawa lya Dani.#30:6 Dani: Litaawa lya Shihebulaniya. Uluganulo lwakwe, UNguluvi wálamula. 7UBiliha, umuvanda wa Laheli, wáava nu lwanda khanji, wámusavila uYaakobo umwana umudiimi uwa wuvili. 8Baheene uLaheli wáaja, “Naalwa mandu nu muvaha wangu, namumena.” Kwa kiiva ya ilyo, umwana wámutambulila ilitaawa lya Nafutaali.#30:8 Nafutaali: Litaawa lya Shihebulaniya. Uluganulo lwakwe, Natovana.

9ULeya woope wáganile kiwona kiija wáalekha kisava, baheene wámupeela uYaakobo umuvanda waakwe uSilipa, ave ngaja mudala waakwe. 10Woope uSilipa umuvanda wa Leya wámusavila uYaakobo umwana umudiimi. 11Baheene uLeya wáaja, “Nayimiililwa mandu!” Baheene wámutambulila umwana uyo ilitaawa lya Gaadi.#30:11 Gaadi: Litaawa lya Shihebulaniya. Uluganulo lwakwe, Nayimiililwa. 12USilipa wámusavila uYaakobo umwana umudiimi uwa wuvili. 13Apo uLeya wáaja, “Nishendeevile mandu, kwa kiiva avashimaayi vasinishemeele, ‘One yuune lushendeewo.’” Baheene umwana uyo, wámutambulila ilitaawa lya Asheeli.#30:13 Asheeli: Litaawa lya Shihebulaniya. Uluganulo lwakwe, kishendeeva.

14Lino, ilisiku limonga uluhaavi lwa kikungula ingano, uLubeni wálutile ku mugunda, wáayava umugoda ugwa vashimaayi ugwa kipata ulwanda, baheene wámuleetela uLeya umaayi waakwe. ULaheli wáganile kigwaga, baheene wámujovela uLeya, “Nilomba umugoda ugo, ugwa mwanaakho.” 15Leelo, uLeya wámujovela wáaja, “Wuli, owe wihiiva kiija shiinu shidoodo ndenela shina wanipokhaga umugoosi wangu? Lino khanji wisakula uniposhe umugoda ugu ugwa mwanangu?” Apo, baheene uLaheli wámujovela, “Nda unipeele umugoda ugwa vashimaayi ugwa mwanaakho, uYaakobo asiigone noowe iminsiyaano.”

16Pashaamihe pina akhandi iiwuya uYaakobo kihuma ku mugunda, uLeya wáaluta kimusaajisa. Wáganaga kitangaana na woope wámujovela, “Iminsiyaano usiigone noone, kwa kiiva nakugula kwa Laheli kwa mugoda ugwa mwanangu.” Ndeeno, ishilo isho uYaakobo wáagona nu Leya. 17Apo, uNguluvi wápulikha amafuunyo ga Leya, wáava nu lwanda, wámusavila uYaakobo umwana wa wusaanu. 18Baheene uLeya wáaja, “UNguluvi wánihomba, kwa kiiva namupeela umugoosi wangu umuvanda wangu uwa shidala.” Ndeeno, uLeya wámutambulila umwana uyo ilitaawa lya Isakaali.#30:18 Isakaali: Litaawa lya Shihebulaniya. Uluganulo lwakwe, muunu wa shigoosi wa mahombo. 19ULeya wáava nu lwanda khanji, wámusavila uYaakobo umwana wa mutanda. 20Baheene wáaja, “UNguluvi wánipeela ulutono lwa shiyooli, lino umugoosi wangu asinitiile, kwa kiiva namusavila avaana mutanda va shidiimi.” Ndeeno, wámutambulila umwana uyo ilitaawa lya Sabulooni.#30:20 Sabulooni: Litaawa lya Shihebulaniya. Uluganulo lwakwe, lishima. 21Paanyuma, uLeya wáasava umwana umuhinja, wámutambulila ilitaawa lya Dina.

22Baheene uNguluvi wámukumbukha uLaheli, wápulikha amafuunyo gaakwe, wámudindula uwutumbu waakwe. 23ULaheli wáava nu lwanda, wáasava umwana umudiimi baheene wáaja, “UNguluvi wániwuusisa insoni sangu.” 24Ndeeno, umwana uyo umudiimi wámutambulila ilitaawa lya Yusufu#30:24 Yusufu: Litaawa lya Shihebulaniya. Uluganulo lwakwe, umwene aniyonjelese. kuno iijova, “UMutwa uNguluvi aniyonjelese umwana uyunji umudiimi.”

UYaakobo ikwava uwusi

25ULaheli wáganile kimusava uYusufu, baheene uYaakobo wámujovela uLabani wáaja, “Lino unitawule niwuye kunyeesu, ku nyi yeesu. 26Unipeele avadala vangu na vaana vangu vina navapataga kwa kikusenjela insengo. Owe umeenye shina nakusenjelaga insengo wunofu.” 27Leelo, uLabani wámujovela wáaja, “Nilomba unipuliise, nikikulomba ukhale baaha noone. Kiiva naamanya kwa kilagula kiija, uMutwa uNguluvi wániyimiilila kwa kiiva owe uli panu. 28Nijovela umukhole gwangu kunyaakho, kiija nikuhombe.” 29UYaakobo wámujovela wáaja, “Yuuwe umeenye shina nakusenjela insengo na shina ifidiimwa fyakho fyayoolokha. 30Uluhaavi pina nikhandi nisinayinse panyaakho apa, uwusi waakho wukhandi wusheefu. Leelo, kihuma nayinsaga, uwusi waakho wayonjelela mandu. UMutwa uNguluvi wákuyimiilila kwa nsengo soona sina nasisenga. Lino, nisakunsa kivasenjela avalukholo lwangu.”

31ULabani wámuposa wáaja, “Nikuhombe shiinu shishi?” UYaakobo wámujovela wáaja, “Usikhanihomba shiinu shoshoona, one hambi nikiyitenekha kifidiima ifidiimwa fyakho nda hambi ukinigahila iliswi ili. 32Nilomba unitawule nihulute mu fidiimwa fyakho fyona, iminsiyaano nibagulanie mu shipuga shaakho, imene ni nkholo iniitu inya nondwe nondwe ni nya madeeha, khanji ni nyana nkholo iniitu soona. Ifidiimwa ifyo fifyene fikhava mahombo gangu. 33Uluhaavi lwa nsiku sina siyinsa pina ukhava wiseesa amahombo gangu, baheene ukhawaaga uwugolofu wangu. Ilisiku ilyo shila mene yina ukhayaaga yigaya madeeha amatiitu awu yigaya madeeha awu inkholo yina yisili niitu, iyo ukhamanyaje kiija nahiija.”

34Apo, uLabani wámujovela wáaja, “Puliisa nayiitikha, gahaga ngaja shina walogola.” 35Leelo, ilisiku lilila uLabani yumwene wáaluta kisibaagula imene ipongo soona insheeto ni nya madeeha, imene itogota soona inya madeeha ni nya nondwe nondwe iniitu, shila shidiimwa shina shikhandi nu wuvalafu mu muvili gwakwe, na shila nkholo iniitu, wásibaagula wásitwala kwa vanaakwe vave vikisidiima. 36Apo, uLabani na vanaakwe vawuukha ni fidiimwa fila, vashuula ulujendo lwa nsiku sitatu. Woope uYaakobo wásigala idiima ifidiimwa fya Labani fina fikhandi fisigeele.

37Baheene, uYaakobo wáatema insito isa mapishi ga mayombo. Wásijubula insito sila kiija siwonense amavala. 38Wásiyiimikha insito iso mu litiinyi lya kingʼwesesa ifidiimwa. Kwa kiiva ifidiimwa fikhandi fitaanana uluhaavi lwa kiingʼwa amalenga, 39ifidiimwa ifyo pina fyasumula pa nsito iso, sajimbula inyaana sina sili na mavala, inondwe nondwe iniitu na sina sili nya madeeha. 40UYaakobo wásibaagula inyana nkholo seene duguli. Leelo, ifidiimwa fina fikhandi fisigeele pina sikhandi sishimbilana, wásileleesa ameeho ku fidiimwa fina fikhandi fisheeto na fina fikhandi fitiitu mu shipuga isha fidiimwa ifya Labani. Ndeeno, wásibaagula shipuga shaakwe paayo, asikhashihansiise ni shipuga sha Labani. 41Shila pina lwafikhaga uluhaavi lwa fidiimwa ifinofu amavili, pina sishimbilwa na kisumula, uYaakobo akhandi ikisiviikha insito sila mu litiinyi pina siingʼwa amalenga, baheene sishimbilane pamwandi ya nsito iso. 42Leelo, insito iso asikhandi ikisiviikha pamwandi ya fidiimwa fina fikhandi na mavili mavi. Ndeeno, ifidiimwa fila fina fikhandi na mavili amavi, fyava fya Labani, fyope ifidiimwa fina fikhandi na mavili manofu, fyava fya Yaakobo. 43Kuwudugo, uYaakobo wáyoolosa mandu, wáava ni fipuga fikhome ifya fidiimwa, ingamiya ni dogovi, lumo na vavanda va shidala na va shigoosi.

Currently Selected:

Shiyanso 30: Shisangu

Highlight

Copy