Yohana 20

Kifyukha kwa Yeesu

(Mataayo 28:1-8; Maluko 16:1-8; Luuka 24:1-12)

1Palwansheelo mandu pina kusinahenje kunena, mu lisiku lya Nguluvi, uMaliya uwa ku Magidala wáaluta ku lijooja lya Yeesu. Wáawona ilingʼanga lila libilusiiwe palubali pa mulyango gwa lijooja. 2Lino wáasiga pala, wáaluta kwa Simoni Petulo na kwa mumanyisiwa yula, yuna uYeesu akhandi amugeene mandu. Wávajovela wáaja, “Avaanu vamonga vaguwuusa umufimba gwa Mutwa weesu mu lijooja, khanji tisimeenye kuna vaguviikha!” 3UPetulo nu mumanyisiwa uyunji yula, vawuukha, vaaluta ku lijooja. 4Woona vavili vakhandi viisiga pina viiluta, leelo umumanyisiwa yula wásigaga kimushila uPetulo, na kilongola kifikha ku lijooja. 5Wásungama, wáhunjisa mu lijooja, wágaaga menda gina vamusililaga uYeesu, leelo asikhayinjiile mukhati.

6Lino uSimoni Petulo wámufwata, wáafikha pala, wáhuluta mu lijooja na kigwaga umwenda guna vamusililaga uYeesu. 7Khanji wáshaaga nashi shitambala shina vamupinyaga uYeesu ku mutwe. Shisikhandi lumo na menda aganji, leelo shagonjwagwa paayo, palubali. 8Ino umumanyisiwa uyunji yula, yuna wálongolaga kifikha pala, woope wáhuluta mu lijooja. Wáloleela, wágahuviilila gina akhandi apuliishe, 9hata nda vakhandi vasinagamanye aMayandikhwa aManofu gina giijova, uYeesu mbakha afyushe. 10Ino avamanyisiwa vala vaaluta kunyaanave.

UYeesu ikimutwiwushila uMaliya uwa ku Magidala

(Mataayo 28:9-10; Maluko 16:9-11)

11Leelo uMaliya uwa ku Magidala, wásigala ayiimile panja pa lijooja, akhandi ikhoola. Uluhaavi pina ikhoola, wásungama na kihunjisa mu lijooja, 12wávaaga avamalayikha vavili vina vafwele amenda mavalafu. Vakheele pina pakhandi nu mufimba gwa Yeesu. Umalayikha yumonga akheele kuna gukhandi gukwali umutwe, uyunji akheele kuna gakhandi gakwali amagulu. 13Avamalayikha vala vamuposa vaajova, “Nyineesu, kwashi wikhoola?” Woope wávagomosesa wáaja, “Avaanu vamonga vaguwuusa umufimba gwa mutwa wangu, khanji nisimeenye kuna vaguviikha!”

14UMaliya wáganile kilogola amaswi ago, wáseetukha, wámwaga umuunu yumonga ayiimile bahala. Humbe umuunu yula akhandi yu Yeesu, leelo uMaliya asamumeenye kiija yu Yeesu. 15UYeesu wámuposa wáaja, “Nyineesu, kwashi wikhoola? Wuli, yu naani ukimusakula?” UMaliya akhahiivile kiija, umuunu yula musenga nsengo wa mu mugunda, lino wámugomosesa wáaja, “Wee mutwa, nda yuuwe waguwuusa umufimba gwakwe, nijovela kuna waguviikha, na yuune nisiilute kigutoola.” 16UYeesu wámushemeela ilitaawa lyakwe wáaja, “Wee Maliya!” Lino uMaliya wáseetukha, wámwaga uYeesu, wálogola kwa shilogolo shaakwe sha Shihebulaniya wáaja, “Laboni!” Ilitaawa ili uluganulo lwakwe, “Mumanyisaaji.” 17UYeesu wámujovela wáaja, “Nileshela, usikhanikhatililaga. Nishaanali nisinaalute kushaanya kwa Daada. Lino lutaga uvajovele avalukholo lwangu#20:17 Avalukholo lwangu: Uluganulo lwakwe, vamanyisiwa vangu. kiija, niiluta kushaanya kwa Daada wangu, yuna Wiheenyu, kwa Nguluvi wangu yuna Nguluvi weenyu.” 18Lino uMaliya uwa ku Magidala wáaluta kwa vamanyisiwa va Yeesu, wávajovela imola isi, wáaja, “Loleela, one namwaga uMutwa!” Lino wávataviilila goona gina uYeesu wámulajisa.

UYeesu ikivatwiwushila avamanyisiwa vaakwe

(Mataayo 28:16-20; Maluko 16:14-18; Luuka 24:36-49)

19Kwaganile kiiva shaamihe mu lisiku lilila, avamanyisiwa va Yeesu vakungaanile mu nanda yimonga, vadindile amalyango kwa kiiva vakhandi vikivatiila avakhome va Vayahuudi. Hata nda amalyango gakhandi gadindiilwe, baaho uYeesu wávatwiwushila, na kiyiima paakhati naakhati yaanave, wávahunjila wáaja, “Uwulindamafu wuve lumo noomwe!” 20Lino wávawonensa amavamba ga mu mawokho na mu luvafu lwakwe. Avamanyisiwa vaganile kimwaga uMutwa, vashendeeva mandu. 21UYeesu wávahunjila khanji wáaja, “Uwulindamafu wuve lumo noomwe. Ngaja shina uDaada wánifilikhaga one, shiisho ndeeno na yuune nikivafilikha omwe mu nyi iyi.” 22Lino wávapuuhila imuuhila, wávajovela wáaja, “Yanushili uNumbula uMunofu. 23Nda mukivasaajila avaanu uwunansi waanave, uNguluvi woope asivasaajile. Nda musikivasaajila, uNguluvi woope asikhavasaajila.”

UYeesu ikimutwiwushila uTomasi

24Umumanyisiwa yumonga mu vamanyisiwa va Yeesu, ilitaawa lyakwe Tomasi, yuna vamushemeelaga Lipasa, asikhandi lumo na vamanyisiwa avanji uluhaavi uYeesu ikivatwiwushila. 25Lino avamanyisiwa avanji vala vamujovela vaajova, “Ose tamwaga uMutwa.” Leelo umwene wávagomosesa wáaja, “One nisikwiliile kihuviilila ago nda nisigaajile tangusiina amavamba ga masumali mu mawokho gaakwe na mu luvafu lwakwe, na kimupyasa nu ludole lwangu.”

26Saganile kishila nsiku munaana, avamanyisiwa va Yeesu vakhandi mukhati ya nanda khanji. Ilisiku ilyo woope uTomasi akhandi akwali lumo na vayine. Amalyango gakhandi madinde, baaho uYeesu wávatwiwushila, wáyiima paakhati yaanave, wávahunjila wáaja, “Uwulindamafu wuve lumo noomwe!” 27Lino uYeesu wámujova uTomasi wáaja, “Wee Tomasi, yinsa unipyase nu ludole lwakho mu mawokho gangu. Khanji, unipyase ni liwokho lyakho mu luvafu lwangu. Usikhayitenekhaga kilekha kihuviilila, leelo uhuvililaje.” 28UTomasi wámugomosesa wáaja, “Owe yuuwe Mutwa wangu na Nguluvi wangu!” 29UYeesu wámugomosesa wáaja, “Wahuviilila kwa kiiva wanyaaga. Vayimiliilwe vina vanihuviliile hata nda vasinyaajile.”

Ulugulumilo ulwa litaafili ili

30UYeesu wágahaga amabikha aganji minshi, gina avamanyisiwa vaakwe vagaagaga, gina gasiyandiikhwe mu litaafili ili. 31Leelo amabikha gina gakwali mu litaafili ili, gayandiikhwe baheene muhuviilile kiija, uYeesu yumwene Mukulusaaji yuna uNguluvi wátahisaaga kimufilikha,#20:31 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. Lusawo lwa Nguluvi, na kiija kwa kimuhuviilila, muwupate uwuumi wa shiluta.

Currently Selected:

Yohana 20: Shisangu

Highlight

Copy