Luuka 1

Amaswi aga wutasi

1Kunyaakho mutiilwa Teofilo,

Avaanu vinshi vayandiishe imola sa Yeesu Kilisito ngaja shina sasenjekhaga kunyeesu. 2Vakhayandiishe imola isi ngaja shina tajovelwagwa na vina valoleelaga kwa meeho gaanave na vasiyalalisaaga kihuma shiyanso shaakwe. 3Lino na yuune, nisakwile finofu ishiyooli sha mola sa Yeesu kihuma pashiyanso, niiwona lunofu kikuyandishila aga goona kwa lugoto, 4baheene umanye ishiyooli sha mola soona sina umanyisiiwe.

Uwukuwamalago uwa kisawa uYohana uMutwiniaji

5Uluhaavi luna uHelode akhandi mutwa mu nyi ya Yudeya, akhandi akwali umutambule#1:5 Umutambule: Yimba iliswi Vatambule mu Maswi aMahensa. yumonga yuna akhandi itambulwa Sakaliya, kihuma mu shipuga sha shitambule sha Abiya. Umudala waakwe akhandi itambulwa Elisabeti. Woope wáhumile mu shikholo sha shitambule sha Haluni.#1:5 Haluni: Uyo akhandi lukholo lwakwe uMusa, akhandi mutambule mukhome uwa wutasi. Yimba mu litaafili lya Kihuma 28:1-3. 6USakaliya nu Elisabeti vakhandi vagolofu pa Nguluvi, vayinatilaga wunofu indaji soona sa Nguluvi, vasipiikhwa. 7Avaanu ava vakhandi vagaya mwana, kwa kiiva uElisabeti akhandi mugumba, khanji woona vavili vakhandi vagosiipe.

8-9Kukhandi nu lugoto lwa kisenga insengo mu nanda imbaagule iya kifuunyila.#1:8-9 Nanda imbaagule iya kifuunyila: Yimba iliswi ili mu Maswi aMahensa. Uluhaavi lumonga, mu lugoto ulo yikhandi lutando lwa shipuga sha Abiya. Ilijuva limonga uSakaliya wáhagulwagwa#1:8-9 Wáhagulwagwa: AVayahuudi vakhandi viyandikha amataawa ga vaanu mu mangʼanga amadoodo, na kigaviikha goona mu likhopo. Vadegensaaga mbakha ilingʼanga limo lihume na kiigwa pansi. Umuunu yuna ilingʼanga lina liyandiikhwe ilitaawa lyakwe nda litale kihuma, uyo iiva wáhaagulwa. kihuluta mu nanda imbaagule iya Mutwa#1:8-9 Mutwa: Yimba iliswi ili mu Maswi aMahensa. ngaja shina yikhandi ngʼoma ya vatambule, kiija anyaanye ifiinu fina finunshilila wunofu. 10Pina akhandi mukhati itinshilisa ingaagulwa sina sinunshilila, avaanu vinshi vakhandi vifuunya mu lukeeke lwa nanda imbaagule. 11Baheene umalayikha#1:11 Umalayikha: Yimba iliswi Malayikha mu Maswi aMahensa. wa Mutwa wámutwiwushila uSakaliya. Umalayikha uyo wáyiima ulubali ulwa kundiilo pa luvala ulwa kitinshilisisa ingaagulwa sina sinunshilila. 12USakaliya pina wámwajile umalayikha yula, wátungumeele na kitiila mandu. 13Baheene umalayikha yula wámujovile wáaja, “Usikhatiilaga Sakaliya, uNguluvi wápulikha ilifuunyo lyakho, kwa kiiva umudala waakho uElisabeti asikusavile umwana. Umwana uyo umupeelaje ilitaawa lya Yohana. 14Pina akhava wáasawa, ukhava ni limwemwe mandu, khanji avaanu vinshi vakhava ni limwemwe, 15kwa kiiva uMutwa akhamupeela uwutawulilwa wukhome. Uyo asikhangʼwesaga idivaayi#1:15 Idivaayi: Yimba iliswi Divaayi mu Maswi aMahensa. awu shoshoona shina shigaasa, khanji ingufu sa Numbula uMunofu#1:15 Numbula uMunofu: Yimba iliswi ili mu Maswi aMahensa. sikhava nu mwene kihuma pina ali mu wutumbu wa maayi waakwe. 16Akhavatinia aVaisilaheli vinshi valambiisile uwunansi waanave na kivagomosa kwa Mutwa uNguluvi waanave. 17Uyo asimulongole uMutwa mu ngufu sa Numbula uMunofu ngaja uEliya#1:17 UEliya: AVayahuudi vakhandi vahepeleese kiija akhayinsa khanji umukuwamalago uEliya, ayandaale kiyinsa kwa Kilisito. Yimba mu litaafili lya Malaaki 3:1; 4:5-6. shina akhandi akwali, kivalingaania avasafi na vaana vaanave. Khanji akhavatinia avaanu avanansi mu wugolofu na kivagaha vayipinyangaje kimuposheela uMutwa.”

18Baheene uSakaliya wámujova umalayikha, “Wuli, shiinu shishi shina shisinigahe nimanye kiija amaswi aga ga shiyooli? Kiiva one nu mudala wangu tigosiipe.” 19Pina wámalaga kilogola ilyo, umalayikha wámuyankha wáaja, “One yuune Gabiliyeli, yuna niyiima pa Nguluvi, uyo yumwene yuna anifiliishe nikujovele imola inofu iyi. 20Lino puliisa! Kwa kiiva usikiyihuviilila gina nikikujovela, usiive mbwibwi. Usiiva wulogola mbakha ilijuva pina gakhava giwonekha aga, shiyooli gakhawonekha pina lukhava lwafikha uluhaavi lwakwe!”

21Uluhaavi ulo avaanu vala vina vakhandi mu lukeeke, vakhandi vamuhepeleese uSakaliya kuno viswiga, kwa kiiva wádiilaga mandu mu nanda imbaagule. 22Pina akhandi iihuma wágombolaga kilogola na woope, baheene aveene vaamanya kiija, lwawonekha ulujowo lwa mabikha umo. Umwene wáava ilogola injowo kwa shimanyilo sha mawokho, wásigala kiiva mbwibwi. 23Pina lwasilile uluhaavi lwakwe ulwa kisenga insengo isa shitambule mu nanda imbaagule, wáwuyile kukhaaya.

24Paanyuma umudala waakwe uElisabeti wáapata ulwanda, wáyaalama mu litembe meesi gasaanu. Umwene wáava ikiyilogolela mwene kiija, 25“Ili lilyene lina uMutwa wánisenjela one, wányaaga na kiniwuusisa insoni pa vaanu.”

Uwukuwamalago uwa kisawa uYeesu

26Uluhaavi ulwa mwesi gwa mutanda gwa lwanda lwa Elisabeti, uNguluvi wámufilikhaga umalayikha uGabiliyeli mu lijumbi lya Nasaleti, lina likhandi mu nyi ya Galilaya, 27kwa muhinja yuna akhandi itambulwa Maliya. Umuhinja uyo wáali abanyiilwe nu Yusufu uwa shikholo sha mutwa uDawudi.#1:27 Shikholo sha mutwa uDawudi: Yimba ilitaawa Dawudi mu Maswi aMahensa. 28Umalayikha pina wáyinjiile mu litembe wámuvejeela uMaliya, wámujova, “Nikikuhunjila owe yuna upeliilwe imota, uMutwa ali lumo noowe.”

29UMaliya wáganile kipulikha imola iso, wálavaga mandu mu numbula ikiyiposa iija, “Inyunjila iyi, uluganulo lwakwe shishi!” 30Baheene umalayikha wáajova, “Maliya, usikhatiilaga kwa kiiva uNguluvi wákusungupila. 31Loleela! Usiive nu lwanda usiisave umwana wa shidiimi, ilitaawa lyakwe usimutambulile Yeesu. 32Umwana uyo asiive mukhome, khanji asiive itambulwa Lusawo lwa Nguluvi uMukhome. UMutwa uNguluvi asimupeele uwutawulilwa wa shitwa, ngaja shina akhandi ashwali umbuye umutwa uDawudi. 33Khanji, asiive ikivatema aVaisilaheli luhaavi loona, uWutwa waakwe wusikhava nu wudugo.”#1:33 Yimba mu litaafili lya 2 Samweli 7:13, 16; Daniyeli 7:14; Isaaya 9:7.

34UMaliya wámuposa umalayikha wáaja, “One nisimumeenye umugoosi, lino iliswi ili lisiive wuli?” 35Umalayikha wámugomosesa wáaja, “UNumbula uMunofu asikuyinsile, nasi ngufu sa Nguluvi uMukhome sisikugubishe ngaja mumepo, baheene umwana yuna hambi iisawa asiive Munofu, asitambulwe Lusawo lwa Nguluvi.#1:35 Lusawo lwa Nguluvi: Yimba iliswi ili mu Maswi aMahensa. 36Loleela! Woope ulukholo lwakho uElisabeti mu wugogolo waakwe ana lwanda lwa mwana wa shidiimi. Lino, ugu mwesi gwa mutanda, kwa yuna vakhandi vikimushemeela mugumba! 37Kwa kiiva kusiina lujowo luna lukwiliile kimumena uNguluvi.” 38Baheene uMaliya wáajova, “Loleela, one nili muvanda wa Mutwa, luve ndeeno kunyangu ngaja shina walogola.” Baheene umalayikha wámulekha.

UMaliya iiluta kimuhunjila uElisabeti

39Saganile kishila insiku nyasilinga ndeeni, uMaliya wáwuukha iiluta nyangu mu lijumbi limonga lina likhandi mu nyi inya fidunda iya ku Yudeya. 40Ukho wáhuluta mu litembe lya Sakaliya, wámuhunjila uElisabeti. 41UElisabeti pina ipulikha inyunjila ya Maliya, umwana wáneena mukhati mu wutumbu waakwe. Ingufu sa Numbula uMunofu samuyinsila uElisabeti, 42wáyansa kilogola kwa ngufu wáaja, “Uyimiliilwe owe kishila avashimaayi woona, khanji ayimiliilwe nayu mwana yuna usimusave. 43One nili naani pina nayu maayi wa Mutwa wangu ayinse kunyangu? 44Naagana kipulikha inyunjila yaakho, umwana mu wutumbu wangu, wáneena kwa wushendeefu. 45Shiba owe yuna uhuviliile kiija, ago gina uMutwa ilogola kunyaakho gasisenjeshe.”

Uluyeyemo lwa Maliya ulwa kimusufya uMutwa

46Woope uMaliya wáajova,

“Nikimusufya uMutwa

kwa numbula yangu yoona,

47inumbula yangu yishendeeva

mwa Nguluvi uMukulusaaji wangu.

48Kiiva wáwaaga uwupiina wa muvanda waakwe.

Loleela, kiyansa lino avaanu va fisafi fyona,

vasiive vikinitambula one muyimiililwa.

49UMutwa uMunya Ngufu Soona wánigahila miitu,

ilitaawa lyakwe linofu.

50Ulusungu lwakwe lwa nsiku soona,

ku fisafi fyona fina fikimutiila.

51Iliwokho lyakwe ilinya ngufu,

lisenjile insengo nkhome nyinshi,

avanya matuupa mu numbula saanave, avanyameenie.

52Avawusiise avatwa vamonga mu wutwa waanave,

na kivatupikha avapiina.

53Avanya njala avakutiise ifiinu finofu,

leelo avanya wusi avawusiise vawuushile mawokho shiishi.

54Avatanjile avavanda vaakwe aVaisilaheli,

na kiiva nu luuju lwa lufingo lwakwe lwa kivasungupila.

55Ngaja shina wájovaga ku vambuyeesu,

uAbulahamu ni shisafi shaakwe shoona uluhaavi loona.”

56UMaliya wákheele kwa Elisabeti meesi gatatu ndeeni, baheene wáwuukha iiwuya kunyaanave.

Kisawa kwa Yohana uMutwiniaji

57Uluhaavi lwa Elisabeti ulwa kisava lwafishile, baheene wásavile umwana wa shidiimi. 58Avashegamane nu lukholo lwakwe pina vapuliishe kiija uMutwa wámusungupila mandu, vaava vishendeeva lumo nu mwene.

59Ilijuva lya munaana kihuma asawe umwana, vayinsa kimuyinjisa ijando#1:59 Kimuyinjisa ijando: Yimba iliswi Kiyinjila ijando mu Maswi aMahensa. ngaja shina yikhandi ngʼoma mu ndaji sa Nguluvi kwa Vayahuudi. Baheene vaava visakula kimupeela umwana ilitaawa lya wiihe, uSakaliya. 60Leelo umaayi wa mwana wávajovela wáaja, “Ndaali, asiive itambulwa Yohana.” 61Aveene vamugomosesa vaaja, “Mu shikholo shaakho kusiina hata muunu umunya litaawa ilyo.” 62Baheene vamuposa uwiihe kwa fimanyilo fya mawokho kiija, avajovele ilitaawa lina hambi ikimupeela umwanaakwe. 63USakaliya wálomba ulubawo ulwa kiyandikha, wáyandikha ndeeni, “Ilitaawa lyakwe ave yu Yohana.” Avaanu woona vaswiga. 64Baaho ulumili lwakwe lwahogokha, wáyansa kilogola na kimusufya uNguluvi. 65Apo avashegamane woona va Sakaliya, vatungumala. Imola isi sayalaalila mu nyi yoona iya fidunda fya ku Yudeya. 66Avaanu woona vina vapulikhaga, vakhandi vihiiva mu numbula saanave kiija, “Umwana uyu asiive wa wuli wuli?” Vahiivaga ilyo kwa kiiva vamanyaga kiija, uMutwa ali lumo nu mwene.

Uluyeyemo lwa Sakaliya ulwa kimusufya uMutwa

67Baheene ingufu sa Numbula uMunofu samuyinsila uSakaliya, uwiihe wa mwana, wáyansa kikuwa amalago wáaja,

68“Atunwajwe uMutwa uNguluvi wa Isilaheli,

kwa kiiva wáyinsa na kivakulusa avaanu vaakwe.

69Atupeelile uMukulusaaji uMunya Ngufu#1:69 UMukulusaaji uMunya Ngufu: Kwa Shiyunaani yiyandiikhwe, lipembe lya wukulukho. Mu Mayandikhwa aManofu lipembe lya nkhanu shihwano sha muunu umunya ngufu nyinshi.

kihuma mu shikholo sha muvanda waakwe uDawudi.

70Ngaja uNguluvi shina wájovaga kihuma pashiyanso

kishilila avakuwamalago vaakwe avabaagule kiija,

71akhatukulusa ku valugu veesu,

na kituhumya mu mawokho ga vaanu woona vina vikitukhalalila.

72UNguluvi atusungupiile ngaja shina wátahisaaga kwa vambuyeesu,

ana luuju luhaavi loona ulufingo#1:72 Ulufingo: Yimba iliswi Lufingo mu Maswi aMahensa. lwakwe lunofu.#1:72 Yimba mu litaafili lya Shiyanso 17:7; Njowo sa Valaawi 26:42; Sabuli 105:8; 106:45;

73Ulu lulwene luna wáyiyiigaga kwa mbuyeesu uAbulahamu kiija,

74akhatukulusa mu mawokho ga valugu veesu,

tive tikimusenjela umwene tisitiila,

75khanji tive vabaagule na vagolofu pamwene mu luhaavi loona ulwa wuumi weesu.

76Lino owe mwanangu,

usiive wishemeelwa mukuvamalago wa Nguluvi uMukhome,

kwa kiiva usiive ukimulongola uMutwa,

baheene umunosese umwene insila,

77uvajove avaanu vaakwe kiija,

viipata uwukulukho pina uNguluvi ikivasaajila uwunansi waanave.

78Kwa kiiva uNguluvi ana lusungu kunyeesu,

ulumuli lwakwe kihuma kushaanya luvejeela kitumulishila,

79lukitumulishila ose woona vina tili mu nshiisi ya wuhigo wa mfwa,#1:79 Yimba mu litaafili lya Isaaya 9:1-2.

na kitulongosa mu nsila ya wulindamafu.”

80Nayu Yohana wáava iikula, na kiyonjelela kiiva ni ngufu sa Numbula uMunofu. Wákhalaga mu lihakha mbakha pina wáyansaaga kikhoma iliswi ku Vaisilaheli.

Currently Selected:

Luuka 1: Shisangu

Highlight

Copy