Luuka 3
3
UYohana uMutwiniaji iikhoma ku lunyikha
(Mataayo 3:1-12; Maluko 1:1-8; Yohana 1:19-28)
1Gukhandi mwakha gwa lishumi na gasaanu ugwa Kayisaali uTibeliyo pina akhandi atemile uwutwa wa Shiluumi. Uluhaavi ulo uPontiyo Pilaato akhandi atemile ku nyi ya Yudeya. UHelode#3:1 UHelode: Yimba ilitaawa Helode mu Maswi aMahensa. akhandi atemile inyi ya Galilaya, khanji ulukholo lwakwe uFilipo akhandi atemile ibooma ya Ituleya ni ya Tulakoniti. Woope uLisaniya akhandi atemile ibooma ya Abilene. 2UAnasi nu Kayafa vakhandi vatambule vakhome.#3:2 Vatambule vakhome: Yimba iliswi Vatambule mu Maswi aMahensa.
Uluhaavi ulo uYohana umuswamuve wa Sakaliya wáyanushiile iLiswi lya Nguluvi, kuna akhandi iikhala mu lunyikha. 3Baheene wáava iiluta imbali soona sina sikhandi nkholeela nu mukhoga gwa Yolodani, iikhoma imola iija, avaanu valambiisile uwunansi waanave na kitwinisiwa, baheene uNguluvi avasaajile. 4Ago gageene gina gayandikhwagwa pashiyanso mu litaafili lya maswi ga mukuwamalago uIsaaya ulwa Yohana kijova,
“Ishawuti ya muunu yipuliisikha mu lunyikha yiija,
‘Mumunosesaaje uMutwa insila yaakwe
na kimugolosesa muna akhashila.
5Inkhandilo ni fidunda fyona fiveesaje lunyikha,
pina papetile paveesaje pagolweshe,
insila inya tudunda tugumulwe na kipalankhania.
6Baheene avaanu woona vakhawaaga uwukulukho wa Nguluvi.’ ”#3:4-6 Yimba mu litaafili lya Isaaya 40:3-5.
7Avaanu vinshi vaava viiluta kwa Yohana baheene vatwinisiwe, umwene wáava ikivajova kiija, “Omwe muna muli vaana va njokha! Musikhahegukha uwuhigo kihuma kwa Nguluvi pina mulambiisila kwa wumyansi. 8Leelo, injendo seenyu siwonensaaje kiija mwalambiisila uwunansi weenyu. Musikhahiivaji kiija, ‘Takulukha kwa kiiva tili shisafi sha Abulahamu.’#3:8 Abulahamu: Yimba iliswi ili mu Maswi aMahensa. Shiyooli nikivajovela, uNguluvi akwiliile kiseetula amangʼanga aga, kiiva vaana va Abulahamu! 9Lino, uwuhigo wa Nguluvi waafikha, ngaja muunu yuna akheete inemo ayipinyile kidumula amapishi. Ilipishi lina lisiikhoma amakhomo amanofu, lidumulwa na kitaagwa mu mooto.”
10Baheene avaanu vala vamuposa uYohana vaajova, “Lino tigahe shishi?” 11Wávayankha wáaja, “Umuunu yuna ana menda gavili amupeele gumo yuna agaya mwenda, woope umunya shakiilya amupeele yuna agaya shakiilya.” 12Woope avatofya khoodi#3:12 Avatofya khoodi: Yimba iliswi Vatofya khoodi mu Maswi aMahensa. vina valutaga vatwinisiwe, vamuposa uYohana vaajova, “Mumanyisaaji, ose tigahe shishi?” 13Wávayankha wáaja, “Muleshe kitofya ikhoodi kishila ishijelo shina shivishiilwe kunyeenyu.” 14Na vasulukhali vamuposa vaajova, “Na ose tigahe shishi?” Wávajovela wáaja, “Muleshe kitoola ihela ku vaanu kwa ngufu, awu kwa wudehi, khanji mukwilanaje na mahombo ga nsengo seenyu.”
15Uluhaavi ulo avaanu vakhandi vahepeleese kiyinsa kwa Mukulusaaji.#3:15 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. UYohana shina akhandi ashwali, vakhandi vihiiva kiija pamonga yu Mukulusaaji. 16Baheene uYohana wávajovela woona wáaja, “One nikivatwinia kwa malenga, leelo iyinsa uyunji, umunya ngufu kishila one, yuna nisikwiliile kiiva muvanda waakwe wa kihudula ingalawo sa ndaatu saakwe. Uyo yumwene akhavatwinia kwa Numbula uMunofu nu mooto. 17Umwene akhavabagulania avagolofu na vanansi, ngaja umuunu pina iyeleelula ingano pa luuga, ikungaania ingano na kiyiviikha mu shihenje shaakwe. Leelo amapweleelo ikiganyaanya mu mooto gwa shiluta.”
UYohana uMutwiniaji idindilwa mu shifungo
18Kwa maswi ago na ganji aminshi uYohana wáava ikivapavila avaanu, ikivakhoma iMola iNofu iya Nguluvi. 19Baheene uYohana wámukhajila umutwa uHelode, kwa kiiva akhandi amutoolile uHelodiya umudala wa munangʼana waakwe uFilipo, na kwa mavi minshi gina wágahaga. 20Baheene uHelode wáyonjelesa uwuvi kwa kimudindila uYohana mu shifungo.
UYeesu itwinisiwa nu Yohana
(Mataayo 3:13-17; Maluko 1:9-11)
21UYohana pina akhandi ashaanali kidindilwa mu shifungo, uluhaavi luna akhandi itwinia avaanu vinshi vina valambisiile, woope uYeesu wátwinisiiwe. UYeesu pina akhandi ifuunya, baheene uwulanga wadindukha, 22nayu Numbula uMunofu wáyiikhaga pamwene kwa shihwano sha nkunda. Baheene iliswi lyapuliisikha kihuma kushaanya liija, “Owe yuuwe Lusawo lwangu,#3:22 Lusawo lwangu: Yimba iliswi Lusawo lwa Nguluvi mu Maswi aMahensa. nikugeene na ukinishendeefya.”
Ishikholo sha Yeesu Kilisito
(Mataayo 1:1-17)
23UYeesu pina iyansa insengo yaakwe, akhandi ana maakha mashumi gatatu ndeeni. Avaanu vahiivaga kiija akhandi muswamuve wa Yusufu.
UYusufu uyu akhandi muswamuve wa Eli.
24UEli akhandi muswamuve wa Matati,
uMatati akhandi muswamuve wa Laawi,
uLaawi akhandi muswamuve wa Meliki,
uMeliki akhandi muswamuve wa Yanayi,
uYanayi akhandi muswamuve wa Yusufu.
25UYusufu akhandi muswamuve wa Matatiya,
uMatatiya akhandi muswamuve wa Amosi,
uAmosi akhandi muswamuve wa Nahumu,
uNahumu akhandi muswamuve wa Esili,
uEsili akhandi muswamuve wa Nagayi.
26UNagayi akhandi muswamuve wa Maati,
uMaati akhandi muswamuve wa Matatiya,
uMatatiya akhandi muswamuve wa Semeyini,
uSemeyini akhandi muswamuve wa Yoseki,
uYoseki akhandi muswamuve wa Yoda.
27UYoda akhandi muswamuve wa Yohanani,
uYohanani akhandi muswamuve wa Lesa,
uLesa akhandi muswamuve wa Selubabeeli,
uSelubabeeli akhandi muswamuve wa Sheyalitiheli,
uSheyalitiheli akhandi muswamuve wa Neeli.
28UNeeli akhandi muswamuve wa Meliki,
uMeliki akhandi muswamuve wa Adi,
uAdi akhandi muswamuve wa Kosamu,
uKosamu akhandi muswamuve wa Elimadamu,
uElimadamu akhandi muswamuve wa Eli.
29UEli akhandi muswamuve wa Yoshuwa,
uYoshuwa akhandi muswamuve wa Eliyeseeli,
uEliyeseeli akhandi muswamuve wa Yolimu,
uYolimu akhandi muswamuve wa Matati,
uMatati akhandi muswamuve wa Laawi.
30ULaawi akhandi muswamuve wa Simiyoni,
uSimiyoni akhandi muswamuve wa Yuuda,
uYuuda akhandi muswamuve wa Yusufu,
uYusufu akhandi muswamuve wa Yoonamu,
uYoonamu akhandi muswamuve wa Eliyakimu.
31UEliyakimu akhandi muswamuve wa Meleya.
UMeleya akhandi muswamuve wa Meena,
uMeena akhandi muswamuve wa Matata,
uMatata akhandi muswamuve wa Natani,
uNatani akhandi muswamuve wa Dawudi.
32UDawudi akhandi muswamuve wa Yeese,
uYeese akhandi muswamuve wa Obedi,
uObedi akhandi muswamuve wa Bowasi,
uBowasi akhandi muswamuve wa Salumooni,
uSalumooni akhandi muswamuve wa Nashoni.
33UNashoni akhandi muswamuve wa Aminadabu,
uAminadabu akhandi muswamuve wa Adimini,#3:33 Adimini: Mu mayandikhwa agamonga amakuulu yiyandiikhwe, Alaamu.
uAdimini akhandi muswamuve wa Alaamu,#3:33 Alaamu: Mu mayandikhwa agamonga amakuulu yiyandiikhwe, Alini.
uAlaamu akhandi muswamuve wa Hesiloni,
uHesiloni akhandi muswamuve wa Peleesi,
uPeleesi akhandi muswamuve wa Yuuda.
34Woope uYuuda akhandi muswamuve wa Yaakobo,
uYaakobo akhandi muswamuve wa Isaaka,
uIsaaka akhandi muswamuve wa Abulahamu,
uAbulahamu akhandi muswamuve wa Teela,
uTeela akhandi muswamuve wa Naholi.
35UNaholi akhandi muswamuve wa Seluugi,
uSeluugi akhandi muswamuve wa Lagawu,
uLagawu akhandi muswamuve wa Peleegi,
uPeleegi akhandi muswamuve wa Ebeeli,
uEbeeli akhandi muswamuve wa Saala.
36USaala akhandi muswamuve wa Kenani,
uKenani akhandi muswamuve wa Alifakisadi,
uAlifakisadi akhandi muswamuve wa Sheemu,
uSheemu akhandi muswamuve wa Nuhu,
uNuhu akhandi muswamuve wa Lameki.
37ULameki akhandi muswamuve wa Metuseela,
uMetuseela akhandi muswamuve wa Henoki,
uHenoki akhandi muswamuve wa Yaaledi,
uYaaledi akhandi muswamuve wa Mahalaleeli,
uMahalaleeli akhandi muswamuve wa Kenani.
38UKenani akhandi muswamuve wa Enoshi,
uEnoshi akhandi muswamuve wa Seeti,
uSeeti akhandi muswamuve wa Adamu.
Woope uAdamu akhandi lusawo lwa Nguluvi.
Currently Selected:
Luuka 3: Shisangu
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
