Luuka 8

Avashimaayi vina vikimutanjilisa uYeesu

1Kuunyuma uYeesu akhandi iishila mu majumbi amakhome na manangʼana, iikhoma iMola iNofu iya Wutwa wa Nguluvi. Akhandi lumo na vamanyisiwa vaakwe ishumi na vavili. 2Khanji akhandi lumo na vashimaayi vamonga vina wávaponiaga amatamu gaanave, na vina wávahumiise amalungu. Mu vashimaayi awo akhandi akwali uMaliya uwa ku Magidala, yuna uYeesu wámuhumiise amalungu fungati. 3Woope uYowana umudala wa Kuusa, akhandi akwali. UKuusa uyo, wáali muyangalilaaji wa fiinu fya Helode. Khanji, akhandi akwali uSusana na vashimaayi avanji vinshi. Avashimaayi ava vakhandi viihumya ifiinu fyanave ifya kimusunga uYeesu na vamanyisiwa vaakwe.

Ishihwano isha munyansa mbeyu

(Mataayo 13:1-9; Maluko 4:1-9)

4Ilijuva limonga avaanu vinshi kihuma mu majumbi minshi, vakungaanile kwa Yeesu. Apo uYeesu wávajovela mu shihwano, wáaja, 5“Umulimaaji yumonga wálutile kinyansa imbeyu. Pina wáali inyansaga imbeyu, isinji sagwiliile pa nsila, inyuni sayinsa sayilya. 6Isinji sagwiliile pa shivakwe. Pina saamela sayansa kikula, leelo sayuuma, kwa kiiva pagaya wiigu. 7Isinji sagwiliile mu mapishi ga mimfwa, pina samelile lumo na mimfwa saminyilisiiwe. 8Isinji sagwiliile pa lilongo ilinofu, saamela na kikula. Saakhoma wunofu mandu, shila shimelo mbumbulu ligana.”

UYeesu pina wáamala kilogola ilyo, wákhoosa ishawuti wáaja, “Umuunu yoyoona umunya makutu, apulishe!”

UYeesu iganula ishihwano sha munyansa mbeyu

(Mataayo 13:10-23; Maluko 4:10-20)

9Avamanyisiwa va Yeesu vamuposa vaaja, “Ishihwano ishi uluganulo lwakwe shishi?” 10Wávayankha wáaja, “Omwe mupeliilwe kimanya imbuusa isa Wutwa wa Nguluvi. Leelo avanji vijovelwa imola soona kwa fihwano kiija,

‘Valoleele gina nikigasenga, leelo vasikhagaaga.

Vipulikha gina nilogola, leelo vasikhagamanyaga.’#8:10 Yimba mu litaafili lya Isaaya 6:9.

11“Lino, ishihwano ishi uluganulo lwakwe ndeeni, imbeyu Liswi lya Nguluvi. 12Imbeyu sina sagwiliile mu nsila, sihwananisiwa na vaanu vina vipulikha iLiswi lya Nguluvi, leelo luhaavi luulo, uShetaani iyinsa kiliwuusa iLiswi ilyo mu numbula saanave, kiija vasilaave vahuviilile na kikulukha. 13Imbeyu sina sagwiliile pa shivakwe, sihwananisiwa na vaanu vina vipulikha iLiswi lya Nguluvi, baaho vikiliposheela kwa wushendeefu, leelo vasikiliviikha mu numbula. Ava vihuviilila luhaavi lufupi, nda vajelwe vikililekha ilihuuvi. 14Imbeyu sina sagwiliile pa mimfwa, sihwananisiwa na vaanu vina vipulikha iLiswi lya Nguluvi, leelo paanyuma mu wiikhasi waanave, umuninu, uwusi, nu wupafu wa kiyishendeefya mu fiinu fya mu nyi, fikivaminyiilisa. Ilyo likivagaha vapootwe kikhoma amakhomo. 15Leelo imbeyu sina sagwiliile pa lilongo ilinofu, sihwananisiwa na vaanu vina vipulikha iLiswi, viyinatila kwa numbula nofu na kwa kitiila, khanji viikhoma amakhomo kwa kigugumila mu malava goona.

Goona gasiive pa wuvalafu

(Maluko 4:21-25)

16“Akwasiina umuunu yuna ikunga ulumuli na kigubikha ni shiinu shimonga, na kiviikha mu lifungu. Leelo, iviikha pa liwumbila kiija avaanu pina vihuluta, valwaje ulumuli lwakwe. 17Shoshoona shina shifihiilwe shikhafumbulwa, khanji imbuusa yoyoona yikhamanyikha na kiwonekha, shiyooli fikhava bahawuvalafu.

18“Lino, munipuliise wunofu! Kiiva umuunu yoyoona yuna iimanya gina nilogola, uNguluvi asimupeele kimanya mandu. Leelo umuunu yoyoona yuna asikigamanya gina nilogola, hata uwumanyi uwudoodo wuna anawo, akhapokhwa.”#8:18 Kwa Shiyunaani yiyandiikhwe, Umuunu yuna anasho akhayonjelesewa finshi, yuna asiina shiinu, nashi shidoodo shina anasho akhapokhwa.

Unyina na valukholo lwakwe uYeesu

(Mataayo 12:46-50; Maluko 3:31-35)

19Baheene umaayi wa Yeesu na valukholo lwakwe, vaaluta kwa Yeesu. Leelo vapootwa kivejeela pamwene kwa kiiva avaanu vakhandi vinshi mandu. 20Avanji vamujovela uYeesu kiija, “Umaayi waakho na valukholo lwakho vali panja vikikusakula.” 21UYeesu wávayankha wáaja, “Avaanu woona vina vipulikha iLiswi lya Nguluvi na kigaha ngaja shina limanyisa, awo vava maayi na valukholo lwangu.”

UYeesu ivatamya ilipepo ilikhome na mavingu

(Mataayo 8:23-27; Maluko 4:35-41)

22Ilijuva limonga, uYeesu na vamanyisiwa vaakwe vayangeele mu shipugo shikhome, wávajovela, “Tilowoshe ku mwambwa yila iya lilamba ilikhome ilya Galilaya.” Baheene, vayansa kilowokha. 23Pina vilowokha, uYeesu wáagona utulo. Ilipepo ilikhome lyayansa kipuga na kiviikha amavingu makhome mu lilamba. Amalenga gayansa kimema mu shipugo, woope vakhasheele vafwe.

24Baheene avamanyisiwa vaaluta kwa Yeesu, vamulamusa, vaaja, “Wee Mutwa, Mutwa! Tiifwa!” UYeesu wálamukha, wálikhajila ilipepo na mavingu, fyavatama, kwava tototo! 25Baheene uYeesu wávaposa wáaja, “Ilihuuvi lyenyu lili kwi?” Avamanyisiwa vaswigaga na kitiila kuno viposania veene viija, “Uyu yu naani yuna nda akhajile ilipepo ilikhome na mavingu, fyona fikimutiila?”

UYeesu iiponia umunya malungu

(Mataayo 8:28-34; Maluko 5:1-20)

26UYeesu na vamanyisiwa vaakwe, valowokha ililamba ilikhome ilya Galilaya, vaafikha ku mwambwa ku nyi ya Vagelaasi. 27UYeesu wáganaga kihuma mu shipugo, umuunu yumonga wa lijumbi lila wáaluta kwa mwene.

Umuunu uyo akhandi na malungu. Nsiku nyinshi akhandi ijenda bwinda, khanji akhandi asiikhala kukhaaya yaakwe, leelo akhandi iikhala ku majooja. 28-29Amalungu ago gamulafyaga mandu. Wiila avaanu vakhandi vikimudindila mukhati na kimupinya kwa manyololo ni pingo kiija vamuyangalile. Leelo wiila akhandi idumulanga, baheene amalungu gakhandi gikimutwala mu lunyikha.

Umuunu yula wáganaga kifikha kwa Yeesu, uYeesu wágakhajila amalungu gala, kiija gamuhume. Umuunu yula pina ikimuloleela uYeesu, wákhoola mandu. Wáagwa pa Yeesu wáajova kwa shawuti, “Wee Yeesu, Lusawo lwa Nguluvi uMukhome, wisakula shi kunyangu? Nikikulomba mandu, usikhanilafyaga.”

30UYeesu wámuposa wáaja, “Ilitaawa lyakho yuuwe naani?” Wámugomosesa wáaja, “Ilitaawa lyangu yuune Legiyoni.”#8:30 Legiyoni: Ili litaawa lya Shiluumi. Mu wutwa wa Shiluumi ishipuga sha vasulukhali magana mashumi mutanda (6,000) shitambulwa Legiyoni. Kwa kiiva amalungu gakhandi minshi kunyaakwe. 31Amalungu gala, gamulombile uYeesu kiija, asikhagatwalaga ku lilindi ilikhome ilya malungu.#8:31 Lilindi ilikhome ilya malungu: Yimba iliswi Wusimu mu Maswi aMahensa.

32Uluhaavi ulo palubali pa shidunda pakhandi pana shidiimilo shikhome sha ngubi, shidiimwa. Amalungu gala gamubembelesa uYeesu kiija, agatawule gayinjile mu ngubi sila. Baheene wágatawula. 33Gamupoola umuunu yula, gayinjila mu ngubi. Baheene ingubi soona sayiikha luvilo ku munjeema, sagwila mu lilamba ilikhome na kiifwa.

34Avadimaaji va ngubi sila vaganaga kigaaga ago, vasijile luvilo, vaaluta kiyalaalisa imola mu lijumbi na mu njinji, goona gina vakhagaweene. 35Avaanu vina vakhapuliishe valutaga kiloleela lina lyasenjekha. Vaganaga kifikha pina akhandi akwali uYeesu, vamwaga umuunu yuna wáhumisiwaagwa amalungu, akheele pansi nkholeela nu Yeesu, afwalile amenda, khanji ana luhala loona. Baheene avaanu awo vatiilile mandu. 36Avaanu vala vina vakhagabedeele gina gasenjekhaga, vavataviliilaga avanji shina wáponisiwaagwa umunya malungu yula. 37Avaanu va lilugu ilyo, vina vakhandi vakungaanile kihuma imbali iso isa nyi ya Vagelaasi, vatiilaga. Baheene vamulomba uYeesu awuushe kuveene. UYeesu wáyinjila mu shipugo, wáwuukha.

38UYeesu pina akhandi iwuukha, umuunu yula yuna wáhumisiwaagwa amalungu, wámulomba uYeesu kiija valutaniaje na kiiva lumo. Leelo uYeesu asikhamuyitiishe, wámujova, 39“Uwuyaje kukhaaya yaakho, uvataviilile goona gina uNguluvi wákusenjela.” Baheene umuunu yula wáwuukha pala, wáawuya kukhaaya. Ukho, ku lijumbi lyona, wáyalaalisa goona gina wámusenjelaga uYeesu.

UYeesu ikimuponia uwashimaayi na kimufyusa umuhinja

(Mataayo 9:18-26; Maluko 5:21-43)

40UYeesu pina wáatina imwambwa iyinji ya lilamba ilikhome, ishipuga sha vaanu shamuposheela kwa wushendeefu, kwa kiiva vakhandi vamuheepile. 41Apo, baheene wáyinsa umuyimililaaji yumonga uwa nanda iya kifuunyila, yuna akhandi itambulwa Yayilo. Wáfugama pamwandi ya Yeesu, wámulomba kiija alute kukhaaya yaakwe, 42kwa kiiva umwali waakwe uwa maakha ishumi na gavili, yuna akhandi mwene duguli kwa wiihe, akhandi mutamu mandu ali nkholeela kiifwa.

Baheene uYeesu wáava iiluta kukhaaya kwa Yayilo. Pina akhandi mu nsila, avaanu vinshi vina vakhandi lumo nu mwene, vaava vikimuminyiilisa. 43Mu shipuga shila, akhandi akwali uwashimaayi, yuna akhandi nu wutamu wa kihuma idanda kwa maakha ishumi na gavili. [Khanji wámalile uwusi waakwe woona kivahomba avahusi]#8:43 Amaswi aga, gakusiina mu mayandikhwa agamonga amakuulu. leelo kusiina yuna wámuponiise.

44Baheene uwashimaayi yula wámufwata uYeesu kunyuma, wálupyasa ulupembo lwa mutote gwakwe,#8:44 Ulupembo lwa mutote gwakwe: Avagoosi va Shiyahuudi vifwalaga umutote guna gukhandi ni membo sina siwonensa kiija, vikimusenjela uNguluvi na kivakumbusa kisitiila indaji saakwe. Yimba mu litaafili lya Luvaso 15:37-41. baaho wáapona uwutamu waakwe. 45UYeesu wáaposa, “Yu naani yuna wánipyasa?” Avaanu woona vakhaana. Baheene uPetulo wámujovela uYeesu wáaja, “Wee Mutwa weesu, avaanu vinshi mandu vakupiliime, khanji vakuminyiliise!” 46Leelo uYeesu wáajova, “Akwali umuunu yuna wánipyasa, kwa kiiva mukhati yangu, nikiyiwona kiija ingufu isa kiponia umuunu sanipoola.” 47Uwashimaayi yula pina wáweene kiija uYeesu wámumanya, wáaluta kuno itetema.#8:47 Itetema: Umunya wutamu wa kihuma idanda akhandi mwafu, ndeeno asikhandi iyiitikhwa kipyasa hata kihansinkhana na vanji. Yimba mu litaafili lya Njowo sa Valaawi 15:25-33. Wáfugama pamwandi yaakwe, wámujovela pa vaanu woona shina shamugaha amupyase uYeesu na shina shamuponia nyangu. 48UYeesu wámujovela wáaja, “Mwali wangu, wahuviilila, lulwene waapona. Ulutaje kwa wulindamafu!”

49UYeesu pina wáali apilogola, wáyinsa umuunu ahumile ku nanda ya Yayilo, umuyimililaaji wa nanda iya kifuunyila. Wámujovela uYayilo, “Nilomba uleshe kimulafya uMumanyisaaji, kwa kiiva umwali waakho wáafwa.” 50Leelo uYeesu wáganaga kipulikha ago, wámujovela uYayilo wáaja, “Usikhatiilaga, nihuvililaga hela. Umwali waakho asiipone.”

51UYeesu wáganaga kifikha kukhaaya kwa Yayilo, wávakhaana avaanu avanji kiyinjila lumo nu mwene, leelo vayinjila nu Petulo, uYohana, uYaakobo, uwiihe nu maayi wa muhinja yula.

52Avaanu woona vina vakhandi vakwali pala, vaava vikhoola. UYeesu wávajovela wáaja, “Musikhakhoolaji! Umuhinja uyu asifwile, leelo agonile tulo hela.” 53Avaanu vala vaganile kipulikha ndeeno, vamuheshile uYeesu, kwa kiiva vakhandi vameenye kiija umuhinja yula afwile.

54Leelo umwene wámukhata iliwokho umuhinja yula, wámushemeela kwa shawuti wáaja, “Mwali wangu wee, lamukha!” 55Uluhaavi luulo, umwana yula, uwuumi waakwe wamugomoshela, wáyiima. UYeesu wáajova vamupeele ishakiilya. 56Avasafi vaakwe vaswigaga mandu. Leelo uYeesu wávalajisa kiija, vasikhamutavililaga umuunu yoyoona aga gina gasenjekha.

Currently Selected:

Luuka 8: Shisangu

Highlight

Copy