Luuka 9

UYeesu ikivafilikha avanandeje vaakwe ishumi na vavili

(Mataayo 10:5-15; Maluko 6:7-13)

1UYeesu wávashemeela avanandeje vaakwe ishumi na vavili. Wávapeela ingufu nu wutawulilwa uwa kigadaga amalungu, na kiponia amatamu. 2Khanji wávafilikha kiluta kikhoma uWutwa wa Nguluvi na kivaponia avatamu. 3Wávajovela wáaja, “Mu lushuulo lwenyu, musikhasumulaji shoshoona, hata nkwegu, hata mbukuli, hata shakiilya, hata ihela, hata mwenda gwa kipyanisa. 4Ilitembe lina musiyinjile, mukhalaje muumo mbakha pina muwuukha mu lijumbi ilyo. 5Leelo mu lijumbi lina avaanu vasikhavasaajisa, wuukhaji na kikungʼuuna amankundi gina gali mu nsayo sa magulu geenyu,#9:5 Kikungʼuuna amankundi gina gali mu nsayo sa magulu geenyu: Uluganulo lwakwe, aVayahuudi vinshi pina viiwuya kunyaanave, vakhandi vikungʼuuna amankundi ga nyi sina sisili sa Vayahuudi mu nsayo sa magulu gaanave, kwa kiiva vakhandi viijova kiija inyi isinji mwikho. Avanandeje va Yeesu vagahaga ndeeno, kivawonensa aVayahuudi vina vasikhaanaga imola sa Nguluvi kiija, uNguluvi ikivaaga vaafu, nda vasilambiisila, akhavahiga. yive shimanyilo sha kihigwa kwa kiyikhaana iMola iNofu.” 6Baheene avanandeje vala vaaluta mu njinji viikhoma iMola iNofu, na kivaponia avatamu mu mbali soona sina vakhandi viiluta.

UHelode iilava ni nsengo sa Yeesu

(Mataayo 14:1-12; Maluko 6:14-29)

7Insengo soona sina uYeesu akhandi isenga, umutwa uHelode#9:7 UHelode: Uyo asili yula yuna uwiihe wávabudaga avaana uluhaavi luna wásawaagwa uYeesu. Yimba mu litaafili lya Mataayo 2. akhandi ipulikha imola saakwe. Ago gamugaha kiiva nu muninu, kwa kiiva avaanu avanji vakhandi viija uYeesu yu Yohana uMutwiniaji wáfyukha kihuma kwa vina vafwile. 8Avanji vakhandi viija, “Umukuwamalago uEliya wáyinsa khanji.”#9:8 AVayahuudi vakhandi vahepeleese kiija akhayinsa khanji umukuwamalago uEliya, ayandaale kiyinsa kwa Kilisito. Yimba mu litaafili lya Malaaki 4:5-6. Avanji vaajova, “Yuyuumo wa vakuwamalago ava paanyuma wáfyukha.” 9Leelo uHelode wáajova, “One namudumulaga umutwe uYohana! Lino, yu naani yuna iigaha aga gina nipulikha?” Baheene uHelode, wáava isakula mandu kitangaana nu Yeesu.

UYeesu ikivaliisa avaanu magana mashumi gasaanu (5,000)

(Mataayo 14:13-21; Maluko 6:30-44; Yohana 6:1-14)

10Avanandeje vala vawuyaga kwa Yeesu, vamutavililaga goona gina vagahaga. Baheene wávatoola vaaluta ku lijumbi lina likhandi litambulwa Betisayida, kiija vave veene duguli pa luvala lwa shipata. 11Leelo, avaanu vinshi vaganaga kimanya kuna wáaluta, vamufwataga. UYeesu wávaposheela wunofu, wáyansa kivamanyisa imola isa Wutwa wa Nguluvi. Khanji wáava ikivaponia avatamu.

12Pashinyiijuva, avamanyisiwa vaakwe valutile kwa Yeesu vamujovela kiija, “Uvahwese avaanu valute mu njinji na mu magunda gina gali nkholeela, kiija vasakule ifyakiilya na pa kigona, kwa kiiva panu lunyikha hela, pagaya shiinu sha kivatanga.” 13UYeesu wávajovela wáaja, “Omwe, muvapeele yuumwe ishakiilya!” Vamugomosesa, “Ose tisiina shiinu, leelo tina makhaate gasaanu ni nswi sivili hela. Pamonga tilute tigule ishakiilya, baheene shisikwilane avaanu ava woona?” 14Vakhajovile ago, kwa kiiva avaanu vina vakhandi vakwali pala, avagoosi veene vakhandi magana mashumi gasaanu (5,000). Baheene uYeesu wávajovela avamanyisiwa vaakwe wáaja, “Vakhasi avaanu mu fipuga, vave mashumi gasaanu gasaanu ndeeni.” 15Vaagaha ngaja shina wávajovela, vavakhasa pansi avaanu woona. 16Baheene uYeesu wátoola amakhaate gala gasaanu ni nswi sila sivili wáloleela kushaanya, wámuhonjesa uNguluvi. Baheene wámenyulania wávapeela avamanyisiwa vaakwe vavagavile avaanu. 17Avaanu woona vaalya, vayikuta. Avamanyisiwa vaakwe vakungaania amamenyulanie, gaamema matunduti ishumi na gavili.

UPetulo ikimubedela uYeesu kiija Mukulusaaji

(Mataayo 16:13-19; Maluko 8:27-29)

18Ilijuva limonga, uYeesu na vamanyisiwa vaakwe, vakhandi lumo pa luvala lumonga ulwa shipata. UYeesu akhandi ifuunya kwa Nguluvi. Kuunyuma wávaposa avamanyisiwa vaakwe wáaja, “Avaanu viija one yuune naani?” 19Vamugomosesa vaaja, “Vamonga viija yuuwe Yohana Mutwiniaji, avanji viija yuuwe Eliya mukuwamalago. Avanji viija owe uli yuyuumo na vakuwamalago ava pawukuulu yuna wáfyukha.”

20UYeesu wávaposa khanji, “Omwe mwijova one yuune naani?” UPetulo wámugomosesa wáaja, “Owe yuuwe Mukulusaaji yuna uNguluvi wátahisaaga kimufilikha.”#9:20 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. 21UYeesu wávapavila na kivakhaana wáaja, vasikhamujovelaga muunu yoyoona kiija, umwene Mukulusaaji.#9:21 Mukulusaaji: Kwa Shiyunaani yiyandiikhwe Kilisito.

UYeesu itaviilila shina hambi iifwa na kifyukha

(Mataayo 16:20-28; Maluko 8:30–9:1)

22UYeesu wávajovela avavanda vaakwe wáaja, “One Lusawo lwa Muunu nisakulwa kiiva na malava minshi na kikhaanwa na vakhome va Vayahuudi, avatambule avakhome na vamanyisaaji va ndaji sa Musa. Nikhabudwa, leelo ilisiku lya wutatu, nikhafyukha.”

23Kuunyuma, uYeesu wávajovela woona wáaja, “Umuunu yoyoona nda isakula kinifwata one, aleshe gina agadobweshe, ayihumye anifwate shila lisiku hata nda yive kiifwa.#9:23 Kwa Shiyunaani yiyandiikhwe, Umuunu yoyoona yuna isakula kinifwata ayikhaanaje yumwene, asumulaje umusalaaba gwakwe wiila na kinifwata one. 24Kwa kiiva umuunu yoyoona yuna isakula kiwusaajila uwuumi waakwe, uyo asiwuyase, leelo umuunu yuna ikiwuyasa uwuumi waakwe kwa kiiva ya one, uyo asiwupate. 25Wuli, umuunu akwiliile kipata lutono lushi kwa kiwupata uwusi woona wa nyi, na kiwuyasa uwuumi wa shiluta? 26Umuunu yoyoona yuna ikiniwonela nsoni one na mamanyiso gangu, na yuune yuna nili Lusawo lwa Muunu, pina nikhava niyinsa mu wutupikho wangu, nu wa Daada lumo na vamalayikha vaakwe, nikhamuwonela nsoni umuunu uyo. 27Shiyooli nikivajovela kiija, avamonga vina vakwali panu, vasikhafwa mbakha pina vakhawaaga uWutwa wa Nguluvi.”

UYeesu ihambukha umuvili

(Mataayo 17:1-8; Maluko 9:2-8)

28Pina sashilile ngaja nsiku munaana kihuma ajove injowo iso, uYeesu wávatoola uPetulo, uYohana nu Yaakobo, wátaana na woope ku shidunda kifuunya. 29Pina ifuunya, wáhambukha uweeni, amenda gaakwe gaava mavalafu gingʼaala mandu. 30-31Uluhaavi luulo, vatwiwukha vagoosi vavili vingʼaala mu wutupikho wa Nguluvi. Avagoosi awo vakhandi vava Musa nu Eliya,#9:30-31 Musa nu Eliya: Awo vakhandi vakuwamalago avakhome. UMusa wávalongosaaga aVaisilaheli kihuma ku Misili, kiluta ku nyi ya Isilaheli. UEliya akhandi ihuviililwa kiija, akhatina mu nyi pina asinayinse uMesiya. vakhandi vilogola nu Yeesu. Vakhandi vilogola nu mwene shina hambi iimala gina uNguluvi akhandi agulumiile, imola isa kiifwa kula ku Yelusalemu.

32UPetulo na vayine vakhandi vagonile utulo. Leelo pina vilamukha, vakhamwajile uYeesu ingʼaala. Khanji vakhavaajile avagoosi vavili vayiimile lumo nu mwene. 33Avaanu vala vavili pina vakhandi viwuukha, uPetulo wámujovela uYeesu wáaja, “Wee Mutwa, lunofu ose tive tiikhala bahanu. Lino tisenje ingono sitatu. Yimo yive yaakho, yimonga ya Musa, iyinji yive ya Eliya.” UPetulo asikhamanyile iijova shishi.

34UPetulo pina iijova injowo iso, lyayinsa ilifunde lyavagubikha. Apo vatiila mandu. 35Ishawuti yapuliisikha kihuma mu lifunde yiija, “Uyu yumwene Lusawo lwangu yuna nimubagwile, mumupulisaaje!” 36Ishawuti iyo pina yasisimaga kipuliisikha, uYeesu wáwonekha ali mwene duguli. Ago goona gina vagaagaga apo avamanyisiwa vaakwe, kusiina muunu yuna vamutavililaga mu nsiku iso.

UYeesu ikimuponia umudiimi umunya lilungu

(Mataayo 17:14-18; Maluko 9:14-27)

37Ilijuva lya wuvili, uYeesu na vamanyisiwa vala vatatu pina viyiikha kihuma ku shidunda, vatangaana ni shipuga sha vaanu vinshi. 38Kihuma mu shipuga shila umuunu yumonga wákhosiise mandu ishawuti wáaja, “Wee Mumanyisaaji, nikikulomba umutanje umwanangu, kwa kiiva ninawo yuuyu hela. 39Ililungu ilyo, pina liiva likimukhata, baaho ilyova ilyowo mandu. Khanji likimudegensa na kimugwisa pansi iiva ngaja munya malibisi, kuno ilimfulu likimuhuma mu mulomo. Ililungu ilyo lisikimuleshela nyangu likiyitenekha kimulafya mandu. 40Navalomba avamanyisiwa vaakho kiija validaje, leelo vagombola.” 41UYeesu wávayankha wáaja, “Omwe vaanu va shisafi ishi muna musikinihuviilila! Wuli, nisiikhale noomwe mbakha payooli? Nisivagugumile omwe mbakha payooli? Muleeta umwanaakho panu.”

42Umwana yula pina iiluta, ililungu lila lyamugwisa pansi, lyamudegensa. Baheene uYeesu wálikhajila, wámuponia umwana yula, wámugomosa kwa wiihe. 43Avaanu woona pina vasaagaga ingufu inkhome sa Nguluvi ngaja shina sishwali, vaswigaga mandu.

UYeesu itaviilila khanji isa kiifwa umwene

(Mataayo 17:22-23; Maluko 9:30-32)

Avaanu vala pina viswigaga goona gina akhandi isenga uYeesu, wávajovela avamanyisiwa vaakwe wáaja, 44“Pulisaaji wunofu gina nisakula kivajovela! One Lusawo lwa Muunu, nisidoolelwe na kitawulwa ku valugu.” 45Leelo avamanyisiwa vaakwe, vasamanyaga uluganulo lwa gala gina akhandi iijova, kwa kiiva vakhandi vafihiilwe, kiija valeshe kigamanya. Woope vaava vitiila kimuposa.

Yu naani yuna mukhome mu Wutwa wa Nguluvi

(Mataayo 18:1-5; Maluko 9:33-37)

46Avamanyisiwa va Yeesu vayansa kikhaanania kiija yu naani yuna mukhome mu veene. 47UYeesu wáamanya amahiiva gaanave. Baheene wámutoola umwana umunangʼana, wámuvejeesa nkholeela nu mwene, 48wávajovela wáaja, “Umuunu yuna ikimusaajisa umwana umunangʼana ngaja uyu kwa litaawa lyangu, iiva ikinisaajisa one. Khanji yuna ikinisaajisa one, iiva ikimusaajisa yuna wánifilikha one. Kwa kiiva yuna mudoodo ku omwe woona, uyo yu mukhome.”

Umuunu yuna asili mulugu weesu ali lubali lwesu

(Maluko 9:38-40)

49UYohana wámujovela uYeesu wáaja, “Wee Mutwa, tamwaga umuunu yumonga ikigadaga amalungu kwa litaawa lyakho, leelo ose tamukhaana, kiiva asili mumanyisiwa waakho lumo noose.” 50UYeesu wámugomosesa wáaja, “Musikhamukhaanaji, kwa kiiva umuunu yoyoona yuna asili mulugu weenyu, uyo ali lubali lwenyu.”

AVasamaliya vamonga vikhaana kimuyanushila uYeesu

51Insiku sa Yeesu isa kiluta kushaanya pina saali nkholeela, umwene wálamwile kiluta ku Yelusalemu. 52Baheene wávafilikha avaanu valongole ku lujinji lwa Vasamaliya kiija, vamunosese uluvala ulwa kifishila. 53Leelo avaanu va kula vakhaana kimuyanushila, kwa kiiva akhandi iiluta ku Yelusalemu.#9:53 AVayahuudi na Vasamaliya vakhandi vasipulinkhana uluvala lwa kiluta kimufuunya Nguluvi. AVayahuudi vahiivaga kiija ku Yelusalemu kukwene kuna kusakulwa kimufuunya uNguluvi. Leelo, aVasamaliya vahiivaga kiija ku shidunda shina shikhandi shitambulwa Gelisimu kukwene kuna kusakulwa kimufuunya uNguluvi. Yimba mu litaafili lya Yohana 4:20-24. 54Avamanyisiwa vaakwe, uYaakobo nu Yohana, vaganaga kilyaga ilyo vaaja, “Wee Mutwa weesu, wisakula tilajise umooto guyiishe kihuma kushaanya guvanyaanye, [ngaja uEliya shina wágahile]?”#9:54 Amaswi aga, gakusiina mu mayandikhwa agamonga amakuulu. Yimba mu litaafili lya 2 Vatwa 1:9-16. 55Leelo uYeesu wávasetushila, wávakhajila. [Wáajova, “Musimeenye kiija omwe muli vaanu va wuli wuli, kwa kiiva uLusawo lwa Muunu asikhayinsile kibuda, leelo akhayinsile kivakulusa avaanu.”]#9:55 Amaswi aga, gakusiina mu mayandikhwa agamonga amakuulu. 56Vawuukha vaaluta ku lujinji ulunji.

Amaswi gina gisakulwa kwa vina vikimufwata uYeesu

(Mataayo 8:19-22)

57UYeesu na vamanyisiwa vaakwe pina vakhandi mu nsila vishuula, umuunu yumonga wámujovela uYeesu wáaja, “Nisikufwate kokoona kuna hambi wiiluta!” 58UYeesu wáaja, “Insheve sina malindi, inyuni sina fiwanso, leelo one Lusawo lwa Muunu, nimungaya litembe.”

59UYeesu wámujovela umuunu uyunji, wáaja, “Unifwataje!” Umuunu yula wáajova, “Wee Mutwa, unitawule tangusiina niwuye kukhaaya, nimuhepelese uwiheesu mbakha afwe nimusiile.” 60UYeesu wámuyankha wáaja, “Valekha vina vafwile vavasiile vina vafwile vaanave. Leelo owe, ulute kikhoma imola sa Wutwa wa Nguluvi.”

61Woope uyunji wámujovela uYeesu wáaja, “Wee Mutwa, nisikufwate. Lino unitawule tangusiina nilute nivahwese ava kukhaaya.” 62UYeesu wámujovela wáaja, “Umuunu yoyoona, yuna wáyansa kilima ni ngʼombe, nda aseetushe aloleele kunyuma, uyo asifwaya kiiva muvanda wa Wutwa wa Nguluvi.”

Currently Selected:

Luuka 9: Shisangu

Highlight

Copy

Want to have your highlights saved across all your devices? Sign up or sign in

Learn More About IShiyanso nu Lufingo uLupya