Mataayo 17

UYeesu ihambukha umuvili

(Maluko 9:2-13; Luuka 9:28-36)

1Saganile kishila nsiku mutanda, uYeesu wávatoolile uPetulo, uYaakobo nu Yohana umunangʼana wa Yaakobo. Wálutile nawo ku shidunda ishitali mandu, ukho vakhandi veene. 2Baheene pina vali pala, uYeesu wáhambukha umuvili gwakwe paveene. Uweeni waakwe wangʼaala ngaja lijuva, amenda gaakwe gaava mavalafu mandu ngaja uwuvalafu wa lijuva. 3Baaho vatwiwukha avakuwamalago uMusa nu Eliya,#17:3 UMusa nu Eliya: Awo vakhandi vakuwamalago avakhome. UMusa wávalongosaaga aVaisilaheli kihuma ku Misili, kiluta ku nyi ya Isilaheli. UEliya akhandi ihuviililwa kiija, akhatina mu nyi pina asinayinse uMesiya. Yimba mu litaafili lya Malaaki 4:5. vaava vilogola nu Yeesu. 4Baheene uPetulo wámujovela uYeesu wáaja, “Wee Mutwa, lunofu ose tive tiikhala bahanu. Lino nda wisakula, nisenje ingono sitatu. Yimo yive yaakho, yimonga ya Musa, iyinji yive ya Eliya.”

5UPetulo pina akhandi ashaanali apilogola, baaho ilifunde ilivalafu lyavagubikha woona. Baheene vapulikha ishawuti kihuma mu lifunde ilyo yiijova, “Uyu yumwene Lusawo lwangu. Nimuganile, ikinishendeefya, mumupulisaaje!” 6Avamanyisiwa vaakwe vaganile kipulikha ago, vaagwa pansi vagubama, vatungumala mandu. 7UYeesu wávejeela nkholeela, wávapyasa, wávajovela wáaja, “Yiimi, musikhatiilaji!” 8Baaho vaganile kiloleela kushaanya, vasamwajile umuunu uyunji, leelo vamwajile uYeesu mwene duguli. 9Pina vakhandi viyiikha kihuma ku shidunda shila, uYeesu wávapavila wáaja, “Musikhamujovelaji umuunu yoyoona gina mwagaaga kuno, mbakha uluhaavi luna uLusawo lwa Muunu, akhafyukha kihuma kwa vina vafwile.”

10Avamanyisiwa vala vamuposa uYeesu vaaja, “Kwashi avamanyisaaji va ndaji sa Musa viija mbakha ayinse tangusiina uEliya, baheene kuunyuma uKilisito?” 11UYeesu wávagomosesa wáaja, “Shiyooli, uEliya asilongole tangusiina, kinosa injowo soona. 12Leelo nikivajovela kiija, uEliya shi wáyinsaga,#17:12 UEliya shi wáyinsaga: UYeesu ikimulogola uYohana uMutwiniaji, yuna insengo saakwe sikhandi sihwaneene nu Eliya. Yimba mu litaafili lya Mataayo 11:13-14. avaanu vasikhamumanyile, vamugahilaga fivi. Shiisho ndeeno, uLusawo lwa Muunu vasimulemase.” 13Ndeeno avamanyisiwa vala, vamanyaga kiija uYeesu akhandi ilogola isa Yohana uMutwiniaji.

UYeesu ikimuponia umudiimi umunya lilungu

(Maluko 9:14-29; Luuka 9:37-43)

14Baheene uYeesu na vamanyisiwa vaakwe vala vatatu, pina vatinile pa shipuga shila sha vaanu, umuunu yumonga wálutile wáfugama pa Yeesu. 15Wámujovela wáaja, “Wee Mutwa, nilomba umusungupile umuswamu wangu, kwa kiiva ana wutamu wa malibisi. Uwutamu uwo, wukimulafya mandu. Wiila pina wukimukhata wukimugwisisa mu mooto na mu malenga. 16Namuleeta kwa vamanyisiwa vaakho, leelo vagombola kimuponia.”

17UYeesu wávayankha wáaja, “Omwe vaanu va shisafi ishi muna musikinihuviilila! Wuli, nisiikhale noomwe mbakha payooli? Nisivagugumile omwe mbakha payooli? Muleeti panu umudiimi uyo!” 18Vaagana kimutwala, uYeesu wálikhajila ililungu lila, lyope lyahuma. Baaho, umudiimi yula wáapona.

19Paanyuma avamanyisiwa vaaluta kwa Yeesu pina ali mwene, vamuposa vaaja, “Kwashi ose taakunya kilidaga ililungu lila?” 20Umwene wávayankha wáaja, “Kwa kiiva ilihuuvi lyenyu lidoodo, shiyooli nikivajovela kiija, hata nda muna lihuuvi lidoodo ngaja mbeyu ya mujombe inangʼana mandu kishila soona, musishijove ishidunda ishi kiija, ‘Wuukha apa, ulute pala,’ shoope shisiwuushe. Ndeeno kusiina ishiinu shina shisivapoote. [21Leelo amalungu ndawuli ago, musikwiliile kigadaga shiishi, mbakha kwa nsila ya kimufuunya uNguluvi na kilekha kiilya kwa kiiva ya mafuunyo.]#17:21 Amaswi aga, gakusiina mu mayandikhwa agamonga amakuulu. Yimba mu litaafili lya Maluko 9:29. ”

UYeesu ilogola khanji shina hambi iifwa na kifyukha

(Maluko 9:30-32; Luuka 9:43-45)

22-23Ilisiku limonga uYeesu pina akhandi ku Galilaya lumo na vamanyisiwa vaakwe, wávajovelaga wáaja, “One Lusawo lwa Muunu nisidoolelwe na kitawulwa ku vaanu vina hambi vikinibuda, leelo ilijuva lya wutatu nikhafyukha.” Avamanyisiwa vaakwe vaganile kipulikha ago, vasugumiilwe mandu.

Kihomba ikhoodi ya nanda imbaagule iya kifuunyila

24UYeesu na vamanyisiwa vaakwe, vaganile kifikha ku Kapelinawumu, avatofya khoodi vina vakhandi viitofya kwa kiiva ya nanda imbaagule iya kifuunyila,#17:24 Avatofya khoodi vina vakhandi viitofya kwa kiiva ya nanda imbaagule iya kifuunyila: Ikhoodi iyi yikhandi yihombwa shila mwakha na Vayahuudi avagoosi. Yimba mu litaafili lya Kihuma 30:13-16. vamulutila uPetulo, vamuposa vaajova, “Wuli, umumanyisaaji weenyu woope ihomba ikhoodi iya nanda imbaagule iya kifuunyila?” 25UPetulo wávayankha wáaja, “Eena, ihomba.” Baheene uPetulo wáyinjila mu nanda. Leelo uPetulo pina asinalogole lyolyona, uYeesu wáyansa kimuposa wáaja, “Wee Petulo, owe wihiiva wuli? Avatwa va mu nyi, viitofya ikhoodi kwa vaanu vashi? Ku vaanu vaanave awu kwa vahensa?”#17:25 Avatwa vakhandi vikivatofya ikhoodi avaanu vina vakhandi vilongosa shikhooloni, leelo vasikhandi vikivatofya avakhaaya va nyi saanave. 26UPetulo wáyankha wáaja, “Viitofya kwa vahensa.” UYeesu wámujovela wáaja, “Nda luli ndeeno, viiva vavasajiile avaanu vaanave kihomba ikhoodi. 27Leelo nda tisakula tisikhavakhalasaaga avaanu ava, luta utoose indovano mu lilamba. Baheene inswi yina hambi wiitala kiyisipusa, yigabadulaga umulomo, usiyaaje ihela mukhati. Uyitoole ihela iyo, baheene ulute uhombe ikhoodi yangu ni khoodi yaakho.”

Currently Selected:

Mataayo 17: Shisangu

Highlight

Copy