Mataayo 8

UYeesu iiponia umunya nyawulova

(Maluko 1:40-45; Luuka 5:12-16)

1UYeesu wáganaga kiyiikha kihuma ku shidunda, ishipuga ishikhome sha vaanu shamufwataga. 2Baaho umuunu umunya nyawulova, wáyinsile kwa Yeesu, wáfugama, wámulomba wáaja, “Wee Mutwa, nda widobokha, nilomba univalase.” 3UYeesu wágolosa iliwokho lyakwe, wámupyasa,#8:3 Wámupyasa: Kwa Vayahuudi yikhandi mwikho kimupyasa umunya nyawulova. Nda umuunu amupyase, yikhandi mwikho kiluta kimufuunya uNguluvi. wámujova wáaja, “Nidobokha uvalale!” Baaho umuunu yula wávalala uwutamu waakwe uwa nyawulova, wáapona. 4UYeesu wámukhaana umuunu yula wáaja, “Usikhajelaga kimujovela muunu yoyoona imola isi! Lino, lutaga uyiwonense kwa mutambule. Khanji, uhumye ishadanda isha kiwonensa kiija waapona, ngaja shina yiijova indaji ya Musa.”#8:4 Kilingana ni ndaji sa Musa, umutambule yumwene akhandi iijinia kiija, umuunu wáapona inyawulova. Yimba mu litaafili lya Njowo sa Valaawi 13:45-46; 14:1-31.

Ilihuuvi lya muyimililaaji wa vasulukhali

(Luuka 7:1-10; Yohana 4:43-54)

5UYeesu pina wáyinjiile mu lijumbi lya Kapelinawumu, umuyimililaaji yumonga wa vasulukhali va Shiluumi wálutile kunyaakwe wámulomba umutango, 6wáaja, “Wee Mutwa, umuvanda wangu atengelemwishe, mutamu mandu.” 7UYeesu wámugomosesa wáaja, “Nisiyinse nimuponie.” 8Leelo umuyimililaaji yula wámujovela wáaja, “Mutwa, usikhayilafyaga kiyinjila mu litembe lyangu, kwa kiiva nisikwiliile kitiilwa ngaja ndeeno. Lino, nikikulomba ulogole iliswi hela, umuvanda wangu asiipone. 9Kiiva, na yuune nina vakhome vangu. Khanji, na yuune nina vasulukhali vina vali mu wutawulilwa wangu. Nda yumo nimujove, ‘Luta!’ iiluta. Khanji uyunji nimujove, ‘Yinsa!’ iyinsa. Umuvanda wangu nda nimujove kiija, ‘Gaha ndeeni!’ iigaha.”

10UYeesu wáganaga kipulikha injowo iso, wáswigaga mandu. Wáshijova ishipuga sha vaanu shina shikhandi shikimufwata, wáajova, “Shiyooli nikivajovela kiija, hata mu Vaisilaheli woona, nisinamwagaje umuunu umunya lihuuvi ndawuli ili! 11Nikivajovela kiija, avaanu vinshi vakhayinsa kihuma mbali soona isa nyi, vakhava viilya lumo na vambuyeesu uAbulahamu, uIsaaka nu Yaakobo mu Wutwa wa Nguluvi. 12Leelo aVaisilaheli vinshi vina vasaviilwe kiija vave va Wutwa uwo, awo vakhataagwa kunja ku nshiisi, kuna vakhakhoola na kigegejula ameeno kwa kiiva ya wuvafi wukhome.”

13Baheene uYeesu wámujovela umuyimililaaji yula wáaja, “Lutaga! Yive ngaja shina uhuviliile.” Baaho, umuvanda waakwe yula, wáapona kwa luhaavi luulo.

UYeesu iiponia avatamu vinshi

(Maluko 1:29-34; Luuka 4:38-41)

14Uluhuma apo, uYeesu wáyinjila mu nanda ya Petulo yina yikhandi nkholeela. Wámwaga umukweye uwa shidala uwa Petulo, agonile pa wusaga, mutamu insegema. 15UYeesu wámupyasa iliwokho, luhaavi luulo insegema yamuleshela. Woope wáyiima wáyansa kimusunga.

16Ilijuva pina likhandi liisota, avaanu woona ava mu lijumbi lila, vamuleteele avatamu na vanya malungu vinshi. UYeesu wávaponiaga avatamu woona na kigadaga amalungu kwa liswi lyakwe. 17Ago gasenjekhaga baheene iliswi lila likwilane, lina uNguluvi wálilogolaga kwa nsila ya mukuwamalago uIsaaya kiija,

“Wátoolile amatamu geesu, wágasumula.”#8:17 Yimba mu litaafili lya Isaaya 53:4.

Amaswi gina gisakulwa kwa vina vikimufwata uYeesu

(Luuka 9:57-62)

18UYeesu wáganaga kiwona kiija avaanu vinshi vikimupilima, wávalajisaaga avamanyisiwa vaakwe kiija, valowoshe ku mwambwa yila iya lilamba ilikhome ilya Galilaya. 19Baheene umumanyisaaji yumonga uwa ndaji sa Musa wávejeelile kwa Yeesu, wámujovela wáaja, “Mumanyisaaji, one nisakula kiiva mumanyisiwa waakho, nisikufwate kokoona kuna hambi wiiluta.” 20UYeesu wámugomosesa wáaja, “Insheve sina malindi, inyuni sina fiwanso, leelo one Lusawo lwa Muunu#8:20 Lusawo lwa Muunu: Yimba iliswi ili mu Maswi aMahensa. nimungaya litembe!”

21Baheene umumanyisiwa uyunji wámujovela uYeesu wáaja, “Wee Mutwa, unitawule tangusiina niwuye kukhaaya, nimuhepelese uwiheesu mbakha afwe nimusiile.” 22UYeesu wámugomosesa wáaja, “Owe nifwataga! Valekha vina vafwile, vavasiile vina vafwile vaanave.”

UYeesu ivatamya ilipepo ilikhome na mavingu

(Maluko 4:35-41; Luuka 8:22-25)

23Baheene uYeesu wáyinjila mu shipugo, avamanyisiwa vaakwe woope vamufwata mumula. 24Pina vilowokha ililamba, baaho ilipepo ilikhome lyayansa kipuga na kiviikha amavingu makhome. Amalenga gayansa kimema mu shipugo, leelo uYeesu akhandi agonile utulo. 25Baheene avamanyisiwa vaaluta kwa Yeesu, vamulamusa, vaaja, “Wee Mutwa weesu! Tikulusa! Tiifwa!”

26Woope wáaja, “Kwashi mutiila, omwe vaanu vanya lihuuvi lidoodo?” Baheene wáyiimile, wálikhajila ilipepo ilikhome lila, baaho kwavatama kwava tototo. 27Avamanyisiwa vaakwe vaswigaga, vaajova, “Uyu yu naani yuna hata ilipepo na mavingu fyona fikimutiila?”

UYeesu iiponia avaanu vavili avanya malungu

(Maluko 5:1-20; Luuka 8:26-39)

28UYeesu na vamanyisiwa vaakwe wáganile kilowokha ililamba ilikhome ilya Galilaya, wáfishile ku nyi ya Vagadala. Wátangaanile na vaanu vavili avanya malungu vina vahumile uluvala lwa majooja. Avaanu ava vakhandi vakhali mandu mbakha kusiina umuunu yuna akhandi akwiliile kishila insila yila, kiiva vakhandi vitiila kiyalushilwa na vanya malungu vala.

29Baheene galyova ilyowo gaajova, “Wee Lusawo lwa Nguluvi, wisakula shi kunyeesu? Wuli, wayinsa kitulafya hata luhaavi lushaanali lusinaafishe?” 30Kwa kutali kukhandi kuna shidiimilo shikhome sha ngubi shidiimwa. 31Lino, amalungu gala gamubembelesa uYeesu gaajova, “Nda ukitudaga, tutawula tihulute ku shidiimilo ishikhome shila, isha ngubi.”

32Woope wáajova, “Lutaji!” Baaho amalungu gawuukha kwa vaanu vala, gayinjila kwa ngufu mu ngubi sila. Baheene ingubi soona sayiikha luvilo ku munjeema, sagwila mu lilamba ilikhome na kiifwa.

33Avadimaaji va ngubi sila vaganaga kigaaga ago, vasijile luvilo, vaaluta mu lijumbi. Vayansa kivataviilila avaanu goona gina gasenjekhaga kwa vanya malungu. 34Avaanu woona va lijumbi lila valutile kwa Yeesu. Vaganile kimwaga vamubembelesa mandu kiija, awuushe mu nyi yaanave.

Currently Selected:

Mataayo 8: Shisangu

Highlight

Copy