Maluko 7

UYeesu ikigakhaana amamanyiso aga ngʼoma sa vambuya

(Mataayo 15:1-9)

1Ilisiku limonga, aVafalisaayo na vamanyisaaji vamonga va ndaji sa Musa, vayinsile kihuma ku Yelusalemu. Vamukungaanila uYeesu. 2Vavaajile avamanyisiwa va Yeesu vamonga viilya ishakiilya na mawokho maafu kiiva vasikhayiyojile. 3AVafalisaayo na Vayahuudi woona, vakhaniilwe kiilya kuno vasiwuyiliile khanji kiyiyooga wunofu amawokho,#7:3 Kiyiyooga wunofu amawokho: AVafalisaayo vijovaga, umuunu nda apyase ishakiilya asiyiyoojile amawokho na kifuunya tangusiina, ishakiilya isho shiiva shashafukha, ndeeno shikimugaha yuna iilya ave mushaafu. AVafalisaayo vaswigaga, kiiva uYeesu asikhatunile kishafukha kwa vamanyisiwa vaakwe. shina yisakulwa mu ngʼoma ya vambuyaanave. 4Khanji umuunu nda ahumile ku munaada asiyiitikhwa kiilya kuno asiyivaleese. Gakwali amaswi aganji gina vaposheelaga na kiyinatila gaali aga kiyoosa wunofu inkhonkholo ngaja ikhoomasi, shifugo nafi finji ifya kiliila.

5Baheene aVafalisaayo na vamanyisaaji va ndaji sa Musa vamuposiise uYeesu kiija, “Kwashi avamanyisiwa vaakho vasiyinatila ingʼoma sina avambuyeesu vatuleshelaga, leelo viilya na mawokho maafu?” 6UYeesu wájovile wáaja, “Muli vamyansi omwe! UIsaaya wálogwele ga shiyooli pina wákuwiilwe amalago kwa kiiva yeenyu. Wáyandiishe kiija,

‘UNguluvi iija,

“Avaanu ava vikinitiila kwa kilogola kwene hela,

leelo inumbula saanave sisikinihiiva one.

7Woope vikinifuunya hela one,

khanji vimanyisa amamanyiso ga ndaji sa vaanu

na kiija ndaji sangu.”#7:6-7 Yimba mu litaafili lya Isaaya 29:13.’

8“Omwe musileshile indaji isa Nguluvi, musikheete ingʼoma sa vaanu.”

9UYeesu wáali apikivajovaga, “Omwe mwidobokha kityega kwa wusugu indaji sa Nguluvi, baheene mupate kikwisa ingʼoma seenyu! 10UMusa#7:10 UMusa: Yimba iliswi Musa mu Maswi aMahensa. wávajoveele kiija, ‘Uvatiilaje uwiiho nu maayi waakho.’#7:10 Kihuma 20:12; Luuju lwa Ndaji 5:16. Khanji wájovile, ‘Yoyoona yuna ikimuliga uwiihe awu umaayi waakwe, uyo wa kibudwa.’#7:10 Yimba mu litaafili lya Kihuma 21:17; Njowo sa Valaawi 20:9. 11Leelo omwe mwijova kiija umuunu akwiliile kimujovela uwiihe awu umaayi waakwe kiija, ‘Ifiinu fina naava niija nikutanje owe, naahumya kwa Nguluvi.’ 12Ndeeno, omwe mukimukhamiilisa umuunu aleshe kivatanga uwiihe awu umaayi waakwe. 13Lulwene mwisala iLiswi lya Nguluvi kiiva ingʼoma sa mamanyiso gina muyanunkhana. Khanji mwisenga amaswi minshi ngaja ago.”

Ifiinu fina fikimushafula umuunu

(Mataayo 15:10-20)

14UYeesu wáshemeelile khanji ishipuga sha vaanu wáshijovela wáaja, “Munipulisaaje woona, khanji mugamanyaje gina niijova. 15Ishiinu shina shikimuyinjila umuunu kihuma kunja, shisikwiliile kimushafula. Leelo shina shiihuma mukhati mu numbula ya muunu, shisheene shikimushafula umuunu. [16Umuunu umunya makutu ga kipulikha, apulishe.]#7:16 Amaswi aga, gakusiina mu mayandikhwa agamonga amakuulu.”

17UYeesu na vamanyisiwa vaakwe vashileshile ishipuga, vayinjila mu nanda yimonga. Baheene vamuposiise uluganulo ulwa shihwano shila. 18UYeesu wávajovela wáaja, “Wuli, na yuumwe mushaanali musiimanya? Wuli, musimeenye kiija ishiinu shina iilya umuunu shisikwiliile kimushafula umuunu? 19Umuunu pina iilya ishakiilya shisiiluta mu numbula leelo shiiluta mu wutumbu, baheene paanyuma shiihuma kunja.” UYeesu wáganile kilogola ndeeno wáyitiishe kiija ifyakiilya fyona finofu.

20UYeesu wáyonjelesa wáaja, “Ishiinu shina shiihuma mu numbula, isho shisheene shina shikimushafula umuunu. 21Kiiva mu numbula ya muunu mumwene muna giihuma amahiiva amavi, uwushemi, uwuhiiji, uwubudaaji, 22uwaafu uwa kijenda na vadala va kunja, uwushooyo, amaleefi, uwujanjilisaaji, uwiifu, kitofola, uwuhonje nu wuyasu. 23Uwunansi woona uwu wiihuma mukhati mu numbula ya muunu, gageene gina gikimushafula umuunu.”

Ilihuuvi ilya washimaayi yuna asili Muyahuudi

(Mataayo 15:21-28)

24UYeesu wáwuukha pala, wáaluta ku mbali isa Tiilo ni Sidoni. Wáyinjila mu nanda yimonga, akhandi asidobweshe umuunu yoyoona amanye kiija akwali pala, leelo hata ndeeno avaanu vamanyaga. 25Uwashimaayi yumonga yuna wáali nu mwali umunya lilungu, wápuliishe imola sa Yeesu. Baaho, wáyinsa wáfugama pa Yeesu. 26Uwashimaayi yula yuna asili Muyahuudi, wahumile ku booma ya Foyinike mu nyi ya Siliya. Wámulomba uYeesu kiija, alidaje ililungu lina lili mwa mwali waakwe.

27Baheene uYeesu wámujovile wáaja, “Uleshe tangusiina avaana valye vayikute, kiiva lusili lunofu kitoola ishakiilya sha vaana na kisitoosesa imbwa.”#7:27 Vaana: Uluganulo lwakwe, Vayahuudi. Imbwa: Uluganulo lwakwe, vina vasili Vayahuudi. 28Umwene wámuyanshile wáaja, “Shiyooli Mutwa, leelo nasi mbwa sina sili pansi pa meesa siilya fina avaana valageese pansi.” 29UYeesu wámujovile wáaja, “Kiiva iliswi lina wáajova, wuyaga kukhaaya. Ililungu lyamuleshela umwaliwo.” 30Uwashimaayi yula wáganile kifikha kukhaaya yaakwe, wámwajile umwali agonile pa wusaga, lila ililungu limuhumile.

UYeesu ikimuponia umuunu umbwibwi khanji mudinde

31UYeesu wáwuukha uluvala ulwa ku Tiilo kishilila ku Sidoni, wáfishile ku lilamba ilikhome ilya Galilaya, mu booma ya Dekapoli.#7:31 Dekapoli: Uluganulo lwakwe, ikhaaya sili ishumi. 32Ukho vamuleteele umuunu umbwibwi, khanji mudinde amakutu. Vamulomba uYeesu kiija amuviishile amawokho, amuponie.

33UYeesu wámubagwile umuunu yula mu shipuga sha vaanu, wáaluta nawo palubali. Wáfuunyila amata indole saakwe, wámupyasa ulumili wáyinjisa indole mu makutu. 34Baheene wáloleelile kushaanya ku wulanga wátuuya kwa ngufu, wáaja, “Efata!” Uluganulo lwakwe, “Dindukha!” 35Baaho amakutu gaakwe gadindukha na ulumili lwahogokha, baheene wáyansa kilogola wunofu.

36UYeesu wávakhaanile kiija, musikhamujovelaji muunu sina wámusenjela. Pina wáshilile kivakhaana, baheene aveene vashilile kiyalaalisa imola iso ku vaanu woona. 37Avaanu vaswigaga mandu vaajova, “Insengo sina isenga soona nofu mandu! Umwene avapeelile avadinde kipulikha na vambwibwi vilogola wunofu.”

Currently Selected:

Maluko 7: Shisangu

Highlight

Copy