Jan 10
10
Jeju to nje-ngəm nɛ̂n-kuulje kə̂ maji
1Jeju pa nan: «Tɔkɔrɔ njaa m-pa marəse, dəw kə̂ andə kə ta-ddəw dɔ batəje tə̂ ang, a aal dɔ singa lo tə̂ kə̂ dang bba andə nɛ̂n, to nje-bboko ddəm nje-taa nɛ̂n lə dəwje kə singa ddəm. 2A dəw kə̂ andə kə ta-ddəw mə singa tə̂ to nje-ngəm batəje le njaa. 3Nje-ngəm ta-ddəw ɔru tɛɛ̂ arɛ̂ ngaâ batəje ooje ndue. N̂-bbar batəje laa kə ride kâra kâra ngaâ n̂-tee kə de ddaka. 4Kar tə̂ kə̂ n̂-tee kə de ddaka tɔyn a, nɔru nɔnde ngaâ batəje laa le unnje goe, mba n̂-gərəje ndue. 5Dâ kunnje go dəw kə̂ dang ndɔ kâra ang. Kayn â dâ kaynje dəw le kaw ddəw əw, mba n̂-gərəje ndu dəwje kə̂ dang ang.»
6 Jeju pa gusu-tar nəənn, a dəwje kə̂ aw ooje tar laa le gərəje nɛ̂n kə̂ naw pa le ang.
7 Jeju təl pa bbay nan: «Tɔkɔrɔ njaa, m-pa marəse: M-to ta-ddəw singa lə batəje. 8Dəwje tɔyn kə̂ ddeeje kete arəm toje to njê-bbokoje ddəm njê-taaje nɛ̂n lə dəwje kə singa ddəm. A batəje le ooje tade ang. 9M-to ta-ddəw. Dəw kə̂ andə kə ta-ddəw kə̂ to əman le a, a kinga kaji. Nâ kandə, nâ tee ngaâ nâ kinga nɛ̂n-kusa. 10Nje-bboko ddee mba bboko nɛ̂n, mba tɔl nɛ̂n, mba tuju nɛ̂n njaa a bbayɛ̂. A əman, m-ddee ta karə dəwje ingaje təbbə tokə banya uta dɔɛ̂.
11«Əman, m-to nje-ngəm nɛ̂n-kuulje kə̂ maji. Nje-ngəm nɛ̂n-kuulje kə̂ maji ila rɔɛ̂ kɔrɔ̂ mba batəje laa. 12A dəw kə̂ to nje-ngəm nɛ̂n-kuul ang, aw dda to kula narɛ̂, mba batəje le toje to laa ang. Bbo noo ənjakəmnjar aw ddee a, n̂-tusude ninyade a nayn. Ənjakəmnjar le uwa marɛ̂je ngaâ kəseje aynje kâra kâra. 13Dəw kə̂ aw dda to kula-narɛ le, tar lə batəje le ɔɛ̂n ang. 14Əman, m-to nje-ngəm nɛ̂n-kuul kə̂ maji, m-gərə batəje ləm ngaâ batəje ləm gərəmje, 15tokə Bɔ gərəm ngaâ m-gərə Bɔ tɔ le. Munn təbbə ləm marə mba batəje ləm. 16Marə batəje ləm toje bbay kə̂ eeje mə singa tə̂ nəənn ang. Dede kara, to tar ləm ta ddee kə de. Dâ kooje ndum. Baann bba kusu batəje a to kâra baa ngaâ nje-ngəmde a to kâra baa tɔ.
17«Bɔ ndikim, mba munn təbbə ləm marə bba ta təl kinga təbbə le guku. 18Dəw kâra ɔru təbbə ləm jim tə̂ kə singa ang, əman njaa marə kə̂ mə-ndiki ləm. Masə ta karə təbbə ləm ngaâ masə ta təl kinga. Yeenn to ndu kə̂ Bɔ unn arəm.»
19 Jiipije təl tinje naan ɔju dɔ tarje kə̂ Jeju pa nəənn le. 20Marɛ̂je nya horode tə̂ paje nan: «Ndil kə̂ maji ang isi məɛ̂ tə̂. Wooy ddɛɛ̂. Aw ooje tar laa mba ddi wa?» 21A marɛ̂je paje nan: «Dəw kə̂ ndil kə̂ maji ang isi məɛ̂ tə̂ pa tar tokə be ang. Ndil kə̂ maji ang asə ta dda karə kəm dəw kə̂ tɔ təəyn wa?»
Marə dəwje mbətəje Jeju
22Jerujalɛm tə̂, daw ddaje kusu kunn kəy-polo karə Lubba#10:22 To kusu kole mə dɔ ndɔ tə̂ kə̂ dunn nɛ̂n kəy-polo darə Lubba mə bbal 164 tə̂ kete bba karə duju Jeju.. To dɔ nɛyn-kul. 23Jeju aw nja lo tə̂ kə̂ daw bbar nan: «baranda lə Salomɔn» mə kəy-polo Lubba tə̂. 24Jiipije gukeje ngaâ dujeje nan: «Â karə wurje ar taar baann ndərəng ndɔ tə̂ kə̂ dda wa? Bbo ə-to Mesi le a, ə-pa kə ddaka arəje joo.» 25Jeju ilade tə̂ nan: «M-pa marəse mban, a ə-ndikije tə̂ kə tar ləm le ang. Nɛ̂nje kə̂ maw dda kə ri Bɔmje ɔruje naji ləm. 26A ooje məse tə̂ ang, mba eeje horo batəje tə̂ ləm ang. 27Batəje ləm ooje ndum. Əman, m-gərəde ngaâ dunnje gom. 28Marəde təbbə kə̂ to kə ndɔ kə ndɔ, dâ koyje ndɔ kâra ang ddəm dəw kâra a kɔrude jim tə̂ ang ddəm. 29Bɔmje kə̂ arəmde bo uta tɔyn. Dəw kâra a kasə kɔrude ji Bɔ tə̂ ang. 30Əman kə Bɔmje, n-to dəwje kə̂ kâra baa.»
31 Jiipije təlje otoje ər ta tila nɛ̂n Jeju tɔlɛ̂. 32Jeju pa arəde nan: «M-dda nɛ̂nje kə̂ maji nya kə̂ inje rɔ Bɔmje tə̂ marə ooje. A horo nɛ̂nje tə̂ənn, ye kə̂ dda bba ə-ndikije ta tilam kə ər tɔləm mbɛɛ̂ wa?» 33Jiipije le ilɛ̂je tə̂ nan: «Nɛ̂n kə̂ maji â n-ndiki ta tilai kə ər tɔli mbɛɛ̂ ang. Taji kə̂ ə-taji Lubba â n-ndiki ta tilai mbɛɛ̂. Ə-to dəw, a ə-dda rɔi to Lubba.» 34Jeju ilade tə̂ nan: «N̂-dda Makəturu-Ndu tə̂ ləse nan Lubba pa nan: ‹Ə-toje to lubbaje.› 35Dəw kâra asə kɔru marə tar kə̂ Makəturu-Ndu tə̂ ang. A Makəturu-Ndu tə̂ənn, dəwje kə̂ Lubba aw pa tar arəde â naw bbarde to lubbaje. 36A əman kə̂ Bɔ undam dang ngaâ ulam dɔ nangə tə̂, m-pa nan m-to Ngonn lə Lubba a, mba ddi bba ə-paje nan maw tuju ri Lubba wa? 37Bbo m-dda kulaje lə Bɔmje ang a, maji karə ə-ndikije tə̂ kə tar ləm ang. 38A bbo maw dda kulaje le, a bbo ə-ndikije tə̂ kə tar ləm ang kara, maji karə kulaje le ə-ndikije tə̂. Yeenn bba a gərəje kə majɛ̂ to, əman kə Bɔ, n-to dəwje kə̂ kâra baa.» 39Jiipije sangəje ddəw ta kuwɛ̂ bbay, a n̂-tee mə jide tə̂ nayn. 40Jeju təl aw tura Jurdɛn tə̂, lo tə̂ kə̂ Jan dda batɛm dəwje tə̂ kə tə̂ le ngaâ nayn tə̂ənn. 41Dəwje tokə banya ddeeje rɔɛ̂ tə̂ ngaâ paje nan: «Jan dda marə nɛ̂n-mɔri kâra ang. A tar tɔyn kə̂ n̂-pa dɔ dingaw tə̂ nəənn to tar kə̂ tɔkɔrɔ.» 42Lo tə̂ənn, dəwje nya ooje məde tə̂ kə Jeju.
Currently Selected:
Jan 10: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
