Jan 13

Jeju toko gɔl njê-njaje goe tə̂

1Nayn ndɔ kâra karə kusu Pakə asə a, Jeju gərə to kar kə̂ nâ kinya duninya nəənn ta kaw rɔ Bɔ tə̂ asə. Jeju ndiki dəwje laa kə̂ duninya tə̂ nəənn le ngaâ ndikide ndərəng tee kɔnyɛ̂ tə̂. 2Jeju kə njê-njaje goe tə̂ disije ta nɛ̂n-kusa tə̂ lo-kul tə̂. A əsu ula kəjə kila Jeju ji dəwje tə̂ mə Judas tə̂ kə̂ to ngonn lə Simɔn Iskariyotə tokə kete mban. 3Jeju gərə to Bɔ inya nɛ̂n tɔyn mə jia tə̂ ngaâ nin rɔ Lubba tə̂ bba n̂-ddee arə nâ təl kə rɔɛ̂ tə̂. 4Nin ta nɛ̂n-kusa tə̂ le nar taar, nɔru kubbu kə̂ nula dɔ marɛ̂ tə̂ ngaâ nunn marə kubbu n̂-tɔ bbəre tə̂. 5Goe tə̂ a, n̂-mbəl maann mə nɛ̂n tə̂ ngaâ nunn kutu toko gɔl njê-njaje goe tə̂ ngaâ n̂-bɔru gɔlde le kə kubbu kə̂ n̂-tɔ bbəre tə̂ le. 6N̂-tee dɔ Simɔn Piyɛr tə̂ a, Simɔn Piyɛr le pa arɛ̂ nan: «Əbbə-dəwje, əi â, â toko gɔləm wa?» 7Jeju ilɛ̂ tə̂ nan: «Kə̂ bbasinɛn nəənn, ə-gərə nɛ̂n kə̂ maw dda nəənn ang, a â gərə bbay.» 8Piyɛr pa arɛ̂ nan: «Baann ang, â toko gɔləm ndɔ kâra ang.» Jeju ilɛ̂ tə̂ nan: «Bbo m-toko gɔli ang a, nɛ̂n kâra kə̂ â kinga səm goto.» 9Simɔn Piyɛr pa arɛ̂ nan: «Əbbə-dəwje, yeenn a gɔləm njaa ə-toko a bbayɛ̂ ang, ə-toko jim ddəm dɔm ddəm.» 10Jeju ilɛ̂ tə̂ nan: «Dəw kə̂ ndoko maann mban a ndiki ta toko rɔɛ̂ tɔyn ang ngaa. Gɔlɛ̂ â nâ toko ngaa. Mba rɔɛ̂ tɔyn arɛ mban, yərəw kâra ɔrɛ̂ ang. Sese, nɛ̂n-yərəw ɔruse ang, a to sese tɔyn ang.» 11Jeju gərə dəw kə̂ a ta kunn dɔɛ̂ le. Mba yeenn bba, n̂-pa nan: «Sese, nɛ̂n-yərəw ɔruse ang. A to sese tɔyn ang.»

12N̂-toko gɔlde tɔyn ngaâ n̂-təl nula kubbu laa le a, n̂-təl nisi ta nɛ̂n-kusa tə̂ le ngaâ n̂-dujude nan: «Ə-gərəje nɛ̂n kə̂ m-dda kə se nəənn le wa? 13Aw bbarəmje Nje-nɛ̂n-tɔju ddəm Əbbə-dəwje ddəm. Yeenn to kə dɔgɔlɛ̂, mba m-to Nje-nɛ̂n-tɔju ddəm Əbbə-dəwje ddəm njaa. 14Yeenn bba bbo, əman Nje-nɛ̂n-tɔju ddəm Əbbə-dəwje ddəm m-toko gɔlse a, to maji karə sese kara, ə-tokoje gɔl naan tɔ. 15Mba to nɛ̂n-kɔju-marɛ̂ â m-dda m-tɔjuse karə sese kara ə-ddaje tokə m-dda kə se le tɔ. 16Tɔkɔrɔ m-pa marəse, dəw kə̂ to bbərə ngəng uta əbbeeje ang ddəm nje-kaw-kula ngəng uta dəw kə̂ ulɛ̂ ang ddəm. 17Bbasinɛn, ə-gərəje nɛ̂ɛnn le ngaa. Bbo ə-ddaje nɛ̂ɛnn le a rɔ-nəəl to ləse.

18«Maw pa nɛ̂ɛnn ɔju dɔse tɔyn ang. M-gərə dəwje kə̂ m-mbərəde. A maji karə tar kə̂ Makəturu tə̂ lə Lubba nəənn ddee to nɛ̂n kə̂ tɔkɔrɔ. Tar le nan: ‹Dəw kə̂ aw usa səm nɛ̂n təl to nje-baan ləm.› 19Bbasinɛn nəənn njaa m-pa marəse kete bba karə nɛ̂n le tee. Baann bba karə ndɔ kə̂ nɛ̂n le tee a, â kooje məse tə̂ to ‹M-to ne kə̂ n̂-to.› 20Tɔkɔrɔ m-pa marəse: Dəw kə̂ taa dəw kə̂ mulɛ̂ kə rɔɛ̂ tə̂, nayn to əman njaa n̂-taam kə rɔɛ̂ tə̂ənn. Ngaâ, dəw kə̂ taam kə rɔɛ̂ tə̂ to dəw kə̂ taa dəw kə̂ ulam kə rɔɛ̂ tə̂ tɔ.»

Judas a kunn dɔ Jeju

21Go tar tə̂ kə̂ Jeju pa le a, kəjə laa to kə dannâ ang ngaâ n̂-pa kə ddaka nan: «Tɔkɔrɔ njaa m-pa marəse, dəw kâra horose tə̂ a kunn dɔm.» 22Njê-njaje go Jeju tə̂ le aaje kəm naan, a n̂-gərəje dəw kə̂ naw pa nɛ̂n tar le ang. 23Marə nje-nja go Jeju tə̂ kə̂ Jeju ndike nya isi mbɔrɛ̂ tə̂ ngɔsi. 24Simɔn Piyɛr dda jia arɛ̂ nan: «Ə-duje se nân bba naw pa tar laa wa?» 25Yeenn ngaâ nje-nja go Jeju tə̂ le ula dɔɛ̂ kə rɔ Jeju tə̂ le ngaâ duje nan: «Əbbə-dəwje, nân wa?» 26Jeju ilɛ̂ tə̂ nan: «Dəw kə̂ muku muru mɔru nɛ̂n maann nayn marɛ̂ a, to dəw le.» Yeenn ngaâ Jeju uku muru ɔru nɛ̂n maann nayn ngaâ arə Judas kə̂ to ngonn lə Simɔn Iskariyotə. 27Judas taa muru le a, Satan andə məɛ̂ tə̂. Jeju pa arɛ̂ nan: «Nɛ̂n kə̂ a ta dda le, ə-dda njangə.»

28A dəw kâra horode tə̂ kə̂ daw dusaje nɛ̂n le gərə gəl nɛ̂n kə̂ Jeju pa nɛ̂n saa tar baann le ang. 29Judas â aw ngəm bbɔl narɛ. Yeenn bba marɛ̂je nya əjəje to Jeju duje karə naw ndoko nɛ̂nje mba karə n̂-ddaje nɛ̂n kusu. Wase ta karə naw narə nɛ̂n njê-ndooje. 30Judas taa muru le ngaâ njangə baa njaa a tee ddaka. Lo ndul ngaa.

Ndu kə̂ siki

31Kar kə̂ Judas tee ddaka a, Jeju pa nan: «Bbasinɛn Ngonn lə dəw inga piti ngaâ Lubba inga piti ddəw tə̂ laa tɔ.» 32[Lubba inga piti ddəw tə̂ lə Ngonn] Yeenn a, Ngonn a kinga piti lə Lubba tɔ. Mbɔr ang baa a, nâ kinga piti le. 33Njê-buwa-njaje ləm kə̂ m-ndikise nya, m-nayn kə se bbay mba gɔju kar baa ngaa. Â sangəmje, a tokə m-pa marə Jiipije le, sese kara m-pa marəse bbasinɛn tɔ: Lo kə̂ maw maw tə̂ le, â kasəje ta kaw tə̂ ang. 34Maw munn ndu kə̂ siki marəse: Maji karə ə-ndikije naan. Əsese tɔyn ə-ndikije naan tokə əman m-ndikise. 35Bbo ə-ndikije naan a, dəwje tɔyn a gərəje to ə-toje to njê-njaje gom tə̂.

Piyɛr mayn pa nan n̂-gərə Jeju ang

36Simɔn Piyɛr pa arə Jeju nan: «Əbbə-dəwje, aw aw kə dda wa?» Jeju ilɛ̂ tə̂ nan: «Asə ta kunn gom lo tə̂ kə̂ maw maw tə̂ bbasinɛn nəənn ang. A marə ndɔ a, â kunn gom bbay.» 37Piyɛr duje nan: «Əbbə-dəwje, mâ kasə ta kunn goi bbasinɛn nəənn ang mba ddi wa? M-to ngɔsi ta kila rɔm kɔrɔ̂ mbai.» 38Jeju ilɛ̂ tə̂ nan: «Ə-to ngɔsi ta kila rɔi kɔrɔ̂ mbam wa? Tɔkɔrɔ njaa m-pa mari, kete bba karə kuran nɔn, â mayn gɔl mota pa nan ə-gərəm ang.»

Currently Selected:

Jan 13: KabbaDkS

Highlight

Copy