Jan 3

Tar lə Nikodɛm de kə Jeju

1Horo Parijinyɛje tə̂, marə dəw ria nan Nikodɛm. N̂-to marə mbay lə Jiipije. 2N̂-ddee ninga Jeju til tə̂ ngaâ n̂-pa nan: «Nje-nɛ̂n-tɔju, n-gərə to Lubba ulai ta karə ə-tɔjuje nɛ̂n. Dəw kə̂ Lubba ee saa ang a kasə ta dda nɛ̂n-mɔrije kə̂ aw dda nəənn ang.» 3Jeju ilɛ̂ tə̂ nan: «Tɔkɔrɔ m-pa mari, dəw kə̂ n̂-təl duje tokə siki ang a, a kasə koo Bbe-kɔn lə Lubba ang.» 4Nikodɛm pa arə Jeju nan: «Bbo dəw tɔkə mban a, dâ təl kuje tokə baânn wa? Nâ kasə ta təl mə kɔɛ̂nje tə̂ karə duje kə̂ gɔl joo wa?» 5Jeju ilɛ̂ tə̂ nan: «Tɔkɔrɔ m-pa mari, dəw kə̂ maann kə Ndil â uje ang, a kasə kandə mə Bbe-kɔn tə̂ lə Lubba ang. 6Dəw kə̂ duje to kuju baa to dəw da-rɔ, a dəw kə̂ Ndil â uje, to ndil. 7Bbo m-pa mari m-pa nan, maji karə dujuse tokə siki a, arə tar kə̂ m-pa le dum dɔi ang. 8Ləl aw ula lo tə̂ kə̂ məɛ̂ ndiki ngaâ aw oo kɔrɛ̂. A ə-gərə lo kə̂ nin tə̂ ang ddəm lo kə̂ naw naw tə̂ ang ddəm. Nɛ̂ɛnn to ddəw kâra baa kə dəwje tɔyn kə̂ Ndil ujude.» 9Yeenn ngaâ Nikodɛm duju Jeju nan: «Nɛ̂ɛnn a to tokə baânn wa?» 10Jeju ilɛ̂ tə̂ nan: «Ə-to nje-nɛ̂n-tɔju nangə tə̂ kə̂ Ijarayɛl, a ə-gərə nɛ̂ɛnn ang wa? 11M-pa tar kə̂ tɔkɔrɔ mari, nɛ̂n kə̂ n-gərə â jaw pa. Jaw pa tar-naji nɛ̂n kə̂ joo kə kəmje, a sese ə-mbətəje tar-naji ləje. 12Maw pa tar nɛ̂nje kə̂ dɔ nangə tə̂ marəse, a ə-ndikije tə̂ ang. A bbo m-pa tar nɛ̂nje kə̂ darâ marəse a, â ndikije tə̂ tokə baânn wa? 13Mba dəw kâra aw darâ ang. Bbayɛ̂ â to Ngonn lə dəw kə̂ in darâ ddee nangə̂. 14Ddəw kâra baa tokə Mɔyijə bbərə li kə̂ n̂-dda kə andə taar mə kɔr tə̂ kəm dəwje tə̂ tɔyn le, maji karə n̂-bbərə Ngonn lə dəw taar kəm dəwje tə̂ tɔyn tɔ. 15Baann bba dəwje tɔyn kə̂ ooje məde tə̂ saa a kisije kə təbbə kə̂ to kə ndɔ kə ndɔ.

16«Mba Lubba ndiki duninya nya. Yeenn bba nunn Ngonnɛ̂ kə̂ kâra baa narə, karə dəwje tɔyn kə̂ ooje məde tə̂ saa naynje kə kɔrɔ̂ ang, a dingaje təbbə kə̂ to kə ndɔ kə ndɔ. 17Tɔkɔrɔ, Lubba ula Ngonnɛ̂ dɔ nangə tə̂ ta kaji dəwje ddəw tə̂ laa, bbo ta gangə sariya dɔde tə̂ ang. 18Dəw kə̂ unn məɛ̂ arə Ngonn le a, sariya to dɔɛ̂ tə̂ ang. A dəw kə̂ unn məɛ̂ arɛ̂ ang, sariya to dɔɛ̂ tə̂ mban, mba noo məɛ̂ tə̂ kə Ngonn-kâra lə Lubba ang.

19«Sariya le tokə be: Lo-karɛ ddee dɔ nangə tə̂, a dəwje mbətəje lo-karɛ le, a lo ndul â n̂-ndikije, mba kula-ddade maji ang. 20Dəwje tɔyn kə̂ aw ddaje majang ndikije lo-karɛ ang arə n̂-ddeeje kə lo-karɛ tə̂ ang mba kin karə dəwje ooje nɛ̂n-ddaje ləde kə̂ maji ang. 21A dəwje kə̂ aw ddaje nɛ̂n ddəw tar tə̂ kə̂ tɔkɔrɔ ddeeje kə lo-karɛ tə̂. Baann bba karə dəwje ooje nɛ̂nje kə̂ mə Lubba ndiki kə̂ daw ddaje.»

Tar lə Jeju de kə Jan-Batisi

22Goe tə̂ a, Jeju kə njê-njaje goe tə̂ dawje nangə tə̂ kə̂ Jude. N̂-nayn kə̂ de lo tə̂ənn ngaâ naw dda dəwje batɛm. 23Jan kara aw dda dəwje batɛm lo tə̂ kə̂ Enɔn tɔ, ngɔsi kə lo kə̂ Salim, mba maannje toje lo tə̂ənn le nya. Dəwje ddeeje rɔɛ̂ tə̂ arə naw ddade batɛm. 24Kar tə̂ənn, dila Jan kəy-kula tə̂ ang bbay.

25Yeenn bba, marə njê-njaje go Jan tə̂ aw maynje tar kə marə Jiipi dɔ tar toko nɛ̂n-yərəw tə̂. 26N̂-ddee dingaje Jan ngaâ n̂-paje darɛ̂je nan: «Nje-nɛ̂n-tɔju, dəw kə̂ isi səi tura Jurdɛn tə̂ kə̂ aw pa tar-naji laa le, aw dda dəwje batɛm arə dəwje tɔyn awje kə rɔɛ̂ tə̂.» 27Jan ilade tə̂ nan: «Nɛ̂n kə̂ dara arə bba dəw a kasə ta kinga. 28M-pa marəse mban to, m-to Mesi le ang arə sese kara ə-toje to njê-tar-najije, mba m-pa nan: ‹M-to dəw kə̂ Lubba ulam kete nɔɛ̂n tə̂.› 29Dəw kə̂ ee kə dɛnɛ̂n, to nje-dɛnɛ̂n le. A dəw kə̂ to nje-buwa-kura lə nje-dɛnɛ̂n le isi mbɔrɛ̂ tə̂. Naw noo tar laa ngaâ rɔɛ̂ nəəle nya mba ndue kə̂ naw noo le. Rɔ-nəəl nəənn le to ləm tɔ. To rɔ-nəəl kə̂ bo nya. 30Maji karə n̂-ddee to dəw kə̂ bo kə kete kete, a əman m-təl m-ddee ngaji.

31«Dəw kə̂ in darâ bba ddee uta dəwje tɔyn. Dəw kə̂ dɔ nangə tə̂ to dəw kə̂ nangə̂ ngaâ naw pa tar to dəw kə̂ dɔ nangə tə̂. A dəw kə̂ in darâ uta dəwje tɔyn. 32Naw pa tar-naji nɛ̂nje kə̂ noo kə mbia ddəm kə kəmɛ̂ ddəm. A dəw kâra ndiki tə̂ kə tar-naji laa le ang. 33Dəw kə̂ ndiki tə̂ kə tar-naji laa le tɔju kə ddaka to Lubba aw pa tar kə̂ tɔkɔrɔ. 34Dəw kə̂ Lubba ulɛ̂ aw pa tarje lə Lubba, mba Lubba aw arɛ̂ Ndil arə dduse.

35«Bɔ ndiki Ngonn arə ninya nɛ̂n tɔyn jia tə̂. 36Dəw kə̂ oo məɛ̂ tə̂ kə Ngonn ee kə təbbə kə̂ to kə ndɔ kə ndɔ. A dəw kə̂ mbətə ta koo məɛ̂ tə̂ kə Ngonn a kinga təbbə le ang. Wungu lə Lubba nayn dɔɛ̂ tə̂.»

Currently Selected:

Jan 3: KabbaDkS

Highlight

Copy