Matiye 15

Tar dɔ nɛ̂n-ji-bbeje tə̂

1 Parijinyɛje kə njê-gərəje-Ndu inje Jerujalɛm ddeeje rɔ Jeju tə̂ ngaâ n̂-dujeje nan: 2«Mba ddi bba njê-njaje goi tə̂ aw mbətəje nɛ̂n-ji-bbeje lə kajejedede wa? Mba dawje ta kusa nɛ̂n a, n̂-tokoje jide ang#15:2 Toko ji bbeê lə Jiipije to nɛ̂n-ji-bbe kə̂ ta dda. Bbo dəw ɔru nɛ̂n kə̂ to nɛ̂n-yərəw wase rɔɛ̂ ɔru marə dəw kə̂ to Jiipi ang a, maji karə n̂-toko jia ta kɔru nɛ̂n nɛ̂n-yərəw le kete bba ta nusa nɛ̂n..» 3Jeju ilade tə̂ nan: «A sese, ə-ddaje nɛ̂n kə turu Ndu lə Lubba ang, a nɛ̂n-ji-bbeje ləse â aw ddaje mba ddi wa? 4Mba Lubba pa nan: ‹Ə-wal bɔije kə kɔinje.› N̂-pa tɔ bbay nan: ‹Dəw kə̂ nanɛn kə bɔɛ̂je wase kɔɛ̂nje a, maji karə n̂-tɔlɛ̂.› 5A sese ə-paje nan: ‹Dəw kə̂ pa arə bɔɛ̂je wase kɔɛ̂nje nan: Nɛ̂n kə̂ mâ kasə ta kumain nɛ̂n le m-ngəm dang mba Lubba›, 6dəw le a kasə ta wal bɔɛ̂je wase kɔɛ̂nje le ang ngaa. Baann â aw tujuje nɛ̂n nɛ̂n lə Lubba mba nɛ̂n-ji-bbeje ləse. 7See njê-ngəmje, Ejayi ila mbər tar lə Lubba nəənn dɔse tə̂ kə dɔgɔlɛ̂. N̂-pa nan:

8‹Dəwje nəənn aw waləmje tade tə̂ baa,

a məde to dang səm.

9Polo kə̂ daw polomje

to polo kə̂ ture goto,

mba nɛ̂nje kə̂ daw tɔjuje

toje to nduje kə̂ dəwje baa â unnje.› »

Nɛ̂n kə̂ aw dda arə dəw ddee to nɛ̂n-yərəw

10Goe tə̂ a, Jeju bbar dəwje kə̂ banya le ngaâ pa arəde nan: «Ooje tar ləm kə majɛ̂ ta ə-gərəje kandɛ̂! 11Nɛ̂n kə̂ aw andə ta dəw tə̂ â aw dda arə dəw ddee to nɛ̂n-yərəw ang. Nɛ̂n kə̂ aw tee ta dəw tə̂ â aw dda arə dəw ddee to nɛ̂n-yərəw.»

12Goe tə̂ a, njê-njaje goe tə̂ ddeeje rɔɛ̂ tə̂ paje arɛ̂je nan: «Tar kə̂ ə-pa le ti wur Parijinyɛje le nya le ə-gərə njaa wa?» 13Jeju ilade tə̂ nan: «Kakə tɔyn kə̂ Bɔy kə̂ isi darâ â ula ang, dâ kɔru kə ngirɛ̂ baa. 14Inyajede. N̂-toje to njê-kəm-tɔje kə̂ aw ilaje kakə ji njê-kəm-tɔje marədəje tə̂. Bbo nje-kəm-tɔ ila kakə ji nje-kəm-tɔ marɛ̂ tə̂ a, dede joo kəm dâ kosoje mə buwa tə̂.»

15Piyɛr pa arə Jeju nan: «Ɔru gəl gusu-tar kə̂ ə-pa nəənn arəje joo.» 16Jeju ilɛ̂ tə̂ nan: «Sese kara ə-gərəje nɛ̂n ang bbay wa? 17Ə-gərəje to nɛ̂n tɔyn kə̂ andə ta dəw tə̂, aw məɛ̂ tə̂ ngaâ goe tə̂ a, tee kə muû ang wa? 18A nɛ̂n kə̂ tee ta dəw tə̂ in bbəngəre tə̂. Nɛ̂ɛnn â aw dda arə dəw ddee to nɛ̂n-yərəw. 19Mba kəjəje kə̂ maji ang aw inje bbəngərə dəw tə̂: Tɔl dəw, lo-to-majang, dda kaya, bboko, tar-naji kə̂ to kə dɔgɔlɛ̂ ang, nanɛn kə naan. 20Nɛ̂nje kə̂ baann â aw dda arə dəw ddee to nɛ̂n-yərəw. A toko ji ang a kusa nɛ̂n nɛ̂n aw dda arə dəw ddee to nɛ̂n-yərəw ang.»

Mə-kunn lə dɛnɛ̂n kə̂ to Jiipi ang

21 Jeju ɔtu lo tə̂ənn aw ər kə nangə tə̂ kə̂ Tir kə Sidɔn. 22Marə dɛnɛ̂n kə̂ Kanaan, kə̂ in nangə tə̂ənn ddee rɔ Jeju tə̂ uru əkii nan: «Əbbə-dəwje, ngonn lə Dabbiti, oo kəm-to-ndoo ləm! Ndil kə̂ maji ang aw ula kəm Ngonnəm kə̂ dɛnɛ̂n ndoo tə̂ nya.» 23A Jeju le ilɛ̂ tar tə̂ ang. Njê-njaje goe tə̂ ddeeje rɔɛ̂ tə̂, paje nan: «Ə-tubba dɛnɛ̂n nəənn kə ddang, mba naw nuru əkii naw ndole nɛ̂n goje.» 24A Jeju ilade tə̂ nan: «Ngann Ijarayɛlje kə̂ toje tokə ngann batəje kə̂ naynje kɔrɔ̂ â Lubba ulam mbade a bbayɛ̂.» 25A dɛnɛ̂n le ddee ɔsu məkəjə-gɔlɛ̂ nangə̂ nɔn Jeju tə̂, pa nan: «Əbbə-dəwje, umanʼm!» 26Nilɛ̂ tə̂ nan: «Maji ta kunn nɛ̂n-kusa lə ngannje kila karə bisije ang.» 27Dɛnɛ̂n le ilɛ̂ tə̂ nan: «Ye njaann, Əbbə-dəwje! A bisije aw usaje buru nɛ̂n-kusaje kə̂ aw gaynje kɔ tabələ tə̂ lə əbbədede tɔ.» 28Yeenn ngaâ Jeju pa arɛ̂ nan: «Dɛnɛ̂n, mə-kunn ləi bo nya. Maji karə Lubba ari nɛ̂n kə̂ aw duju le.» A kar tə̂ənn njaa ngonnɛ̂ kə̂ dɛnɛ̂n le aji.

Jeju aji njê-rɔ-toje dang dang

29Goe tə̂ a, Jeju ɔtu lo tə̂ənn aw kar tɔkə dangə tə̂ kə̂ Galile. Naw naal marə ddingiri nisi tə̂. 30Dəwje kə̂ banya ddeeje rɔɛ̂ tə̂ kə njê-mətəje, njê-gɔl-gotoje, njê-kəm-tɔje, dəwje kə̂ mbide utu ddəm tade utu ddəm kə marə njê-rɔ-toje nya nya. Dungude nɔn Jeju tə̂ ngaâ najide. 31Dəwje kə̂ banya le ooje njê-mətəje kə̂ mətə ləde le goto, nje-gɔl-gotoje kə̂ gɔlde ddee maji, njê-kəm-tɔje kə̂ ooje lo kə dəwje kə̂ mbide utu ddəm tade utu ddəm kə̂ aw paje tar le a, dɔde ayn ngaâ dɔsuje gaji Lubba lə Ijarayɛl.

Jeju arə nɛ̂n-kusa dəwje doro sɔ

32 Jeju bbar njê-njaje goe tə̂ pa arəde nan: «Dəwje kə̂ banya nəənn ddamje ndoo, mba ndɔ mota njaa ngaa kə̂ n̂-naynje səm lo tə̂ nəənn, a dingaje nɛ̂n-kusa ang. M-ndiki ta tubbade karə n̂-təlje məde bbo baa ang, mba dâ kosoje labbə kə ddəw.» 33Njê-njaje go Jeju tə̂ paje arɛ̂je nan: «Lo kə̂ dda bba mə kɔr tə̂ nəənn, ja kinga nɛ̂n-kusa tə̂ tokə bo karə dəwje kə̂ banya nəənn usa arə məde ndann wa?» 34Jeju dujude nan: «Mapa baânn â to jise tə̂ wa?» Dilɛ̂je tə̂ nan: «Mapa siri kə marə ngann kanjije tɔ.»

35Yeenn ngaâ Jeju duju dəwje kə̂ banya le karə disije nangə̂. 36N̂-jin mapa kə̂ siri kə kanjije le, narə wooyo Lubba ngaâ n̂-tətə narə njê-njaje goe tə̂ ngaâ njê-njaje goe tə̂ arəje dəwje kə̂ banya le. 37Dede tɔyn dusaje nɛ̂n darə asəde ngaâ n̂-mbɔnje kəse kə̂ nayn ddusu karɛ siri. 38Kɔr dəwje kə̂ usaje nɛ̂n le doro sɔ, dɛnɛ̂nje kə ngannje n̂-turade ang. 39Goe tə̂ a, Jeju tubba dəwje kə̂ banya le arə dɔtuje, a naal tɔkə to naw nangə tə̂ kə̂ Magadan.

Currently Selected:

Matiye 15: KabbaDkS

Highlight

Copy