Matiye 21
21
Jeju andə Jerujalɛm
1 Jeju kə njê-njaje goe tə̂ daw dawje kə Jerujalɛm ngaâ n̂-teeje ngɔsi kə bbe kə̂ Betepaje dɔ ddingiri Olibəje tə̂ a, Jeju ula njê-njaje goe tə̂ joo nɔɛ̂n tə̂ kete. 2N̂-pa nan: «Awje ngonn bbe tə̂ kə̂ nɔnse tə̂ yoonn. Tee kə̂ a ta teeje be a, â kingaje marə kɔn kororo kə̂ n̂-tɔɛ̂ ngaâ ngonnɛ̂ ar mbɔrɛ̂ tə̂. Ə-tuteje ta ə-ddeeje kə de arəmje. 3Bbo marə dəw aw pa kə se a, ilɛ̂je tə̂ nan: ‹Əbbə-dəwje le â duju karə jaw kə kororoje le.› A njangə baa njaa nâ kinyade karəse.» 4Baann bba karə tar lə Lubba kə̂ nje-kila mbər tar laa ndaji le ddee to nɛ̂n kə̂ tɔkɔrɔ. Tar le nan:
5«Ə-paje arə dəwje kə̂ Sinyɔ:
Ooje, mbay ləse aw ddee kə rɔse tə̂,
n̂-to dəw kə̂ wul pee,
nisi dɔ kɔn kororo tə̂,
kə dɔ ngonn kororo tə̂
kə̂ to da kə̂ daw dda nɛ̂n kula.»
6 Njê-njaje go Jeju tə̂ le ɔtuje awje ngaâ ddaje nɛ̂n kə turu ndu Jeju le. 7N̂-ddeeje kə kɔn kororo kə ngonn kororo le. N̂-tilaje kubbuje ləde dɔ kororoje tə̂ le darə Jeju isi dɔɛ̂ tə̂. 8Dəwje nya horo dəwje tə̂ kə̂ banya le tilaje kubbuje ləde dɔ ddəw tə̂. Marɛ̂je tətəje kamje unguje ddəw-boô. 9Dəwje kə̂ banya kə̂ aw njaje nɔɛ̂n tə̂ kə dede kə̂ daw njaje goe tə̂, daw duruje əkii nan: «Jɔsuje gaji Ngonn lə Dabbiti! Maji karə Lubba bbar tar kə̂ maji dɔ dəw tə̂ kə̂ aw ddee kə ri Əbbə-dəwje. Jɔsuje gaji Lubba kə̂ isi ddutu dara tə̂!» 10Jeju andə Jerujalɛm a, mə bbe tɔyn yəkə. Dəwje dujuje tar nan: «Nân â nəənn wa?» 11Dəwje kə̂ banya le ilaje tə̂ nan: «Jeju kə̂ to nje-kila mbər tar lə Lubba â nəənn, nin Najarɛtə, nangə Galile tə̂.»
Jeju andə mə kəy-polo Lubba tə̂
12Goe tə̂ a, Jeju andə mə kəy-polo Lubba tə̂ ngaâ tubba dəwje tɔyn kə̂ aw labbəje nɛ̂n ddəm aw ndokoje nɛ̂n ddəm mə kəy tə̂ le. N̂-tuta tabələ lə njê-mbəlje narɛ n̂-tila. N̂-tuta nɛ̂n-kisi lə njê-labbəje dərje n̂-tila. 13N̂-pa narəde nan: «Makəturu lə Lubba pa nan: ‹Dâ bbar kəy ləm nan kəy duju Lubba.› A sese, aw ddaje to lo kiya-rɔ lə njê-bbokoje wa?»
14Njê-kəm-tɔje kə njê-mətəje ddeeje rɔɛ̂ tə̂ mə kəy-polo Lubba tə̂ le ngaâ najide narə rɔde ddee maji. 15Mbayje lə njê-poloje Lubba kə njê-gərəje-Ndu ooje nɛ̂nje kə̂ dumje dɔde kə̂ Jeju dda le kə ngannje kə̂ aw uruje əkii mə kəy-polo Lubba tə̂ nan: «Jɔsuje gaji Ngonn lə Dabbiti» le a, wungu ɔnde. 16N̂-paje darə Jeju nan: «Oo tar kə̂ daw paje nəənn wa?» Nilade tə̂ nan: «Moo njaa. A tar kə̂ n̂-dda Makəturu tə̂ lə Lubba le ə-turaje ndɔ kâra ang wa? Tar le nan: ‹Ə-dda nɛ̂n arə ngannje kə̂ tɛn kə əngutayje kara ɔsuje gajii.› »#21:16 Sɔm 8:3 17Goe tə̂ a, Jeju inyade ɔtu. N̂-tee mə bbe tə̂ le kə ddang naw Betani ngaâ n̂-to lo tə̂ənn.
Jeju ndɔɔl kakə pigə kə̂ andə ang
18Lo-karɛ̂ tə̂ kə əsindɔɔ a, Jeju təl aw kə tɔkə bbe tə̂ ngaâ bbo ddɛɛ̂. 19Noo marə kakə pigə kə̂ ar mbɔr ddəw tə̂ ngɔsi ngaâ naw ngɔsi kə kakə le a, kamɛ̂ dɔrɔ â noo. Yeenn bba, n̂-pa narə kakə le nan: «A kandə ndɔ kâra ang ngaa.» A karɛ̂ tə̂ənn njaa kakə le oy njan. 20Njê-njaje go Jeju tə̂ le ooje nɛ̂ɛnn le a, dum dɔde ngaâ paje nan: «Dda tokə baânn bba njangə baa njaa a, kakə pigə le oy wa?» 21Jeju pa arəde nan: «M-pa tar kə̂ tɔkɔrɔ marəse. Bbo mə-kunn ləse to ngaâ əjəje tar dang ang a, â ddaje nɛ̂n kə̂ m-dda kə kakə pigə nəənn. Â kasəje ta pa karə ddingiri nəənn nan: ‹Ɔtu lo tə̂ nəənn aw oso mə ba tə̂› a, nɛ̂ɛnn a ddee to nɛ̂n kə̂ tɔkɔrɔ. 22Bbo mə-kunn ləse to ngaâ bbo ə-dujuje Lubba a, â kingaje nɛ̂n tɔyn kə̂ ə-dujuje le.»
Nân bba arə singa Jeju wa?
23Jeju andə mə kəy-polo Lubba tə̂ aw tɔju nɛ̂n. A mbayje lə njê-poloje Lubba kə tɔkəje lə Jiipije ddeeje rɔɛ̂ tə̂. N̂-paje darɛ̂ nan: «Kə ri nân njaa aw dda nɛ̂n nɛ̂ɛnn wa? Wase nân njaa bba ari singa karə ə-dda nɛ̂n nɛ̂ɛnn wa?» 24Nilade tə̂ nan: «Əman kara mâ dujuse tar kâra baa. Bbo ilamje tə̂ a, mâ bbar ri dəw kə̂ arəm singa dda nɛ̂njeenn le karəse tɔ. 25Batɛm lə Jan in dda wa? In rɔ Lubba tə̂ darâ wase in rɔ dəwje tə̂ wa?» A n̂-paje horode tə̂ nan: «Bbo jilaje tə̂ nan: ‹In rɔ Lubba tə̂› a, nâ pa nan: ‹Mba ddi bba ooje məse tə̂ saa ang wa?› 26Bbo n-paje nan: ‹Dəwje› a, a to tokə baânn wa?» Mba n̂-bbəəl kəm dəwje kə̂ banya le, mba dəwje tɔyn gərəje to Jan to nje-kila mbər tar lə Lubba. 27Yeenn a, dilɛ̂je tə̂ nan: «N-gərə ang.» Jeju pa arəde nan: «Əman kara mâ bbar ri dəw kə̂ arəm singa ta dda nɛ̂njeenn le karəse ang tɔ.»
Gusu-tar dɔ ngannje kə̂ dingaw tə̂ joo
28Jeju pa arəde bbay nan: «Ddi â əjəje dɔ tar tə̂ kə̂ mâ ta pa karəse nəənn wa? Marə dingaw, ngannɛ̂ kə̂ dingaw eeje joo. N̂-pa narə ne kə̂ tɔkə nan: ‹Ngonnəm, aw bbokənɛn aw dda kula mə ndɔɔ binyə tə̂ ləm.› 29Ngonnɛ̂ le ilɛ̂ tə̂ nan: ‹M-ndiki ang.› Goe tə̂ a, tar kə̂ nila bɔɛ̂je tə̂ le təl nəəle ang ngaâ nɔtu naw ndɔɔ le. 30Dingaw le aw rɔ ne kə̂ mbatə tə̂ pa tar kə̂ kâra baa le arɛ̂ tɔ. Ngonn le ilɛ̂ tə̂ nan: ‹An än Bɔy, mâ kaw.› A naw ang.» 31Jeju dujude nan: «Horo ngannje tə̂ kə̂ joo nəənn, ne kə̂ dda â n̂-dda nɛ̂n kə̂ bɔɛ̂je ndiki wa?» Dilɛ̂je tə̂ nan: «Ne kə̂ dɔngɔr.» Jeju pa arəde nan: «Tɔkɔrɔ njaa, m-pa marəse, njê-taaje narɛ lambo kə dɛnɛ̂n njê-kayaje a kandəje mə Bbe-kɔn tə̂ lə Lubba dɔngɔr karəse. 32Mba, ləw Jan ddee rɔse tə̂, tɔjuse ddəw dda nɛ̂n kə̂ gatə gatə, a ooje məse tə̂ kə tar laa ang. A njê-taaje narɛ lambo kə dɛnɛ̂n njê-kayaje â ooje məde tə̂ kə tar laa le. A sese, ooje nɛ̂njeenn kə majɛ̂, a kəjə ləse jɔkuse ang ddəm ooje məse tə̂ kə tar laa le ang ddəm.»
Gusu-tar dɔ njê-kulaje tə̂ kə̂ məde maji ang
33«Ooje marə gusu-tar nəənn bbay. Marə nje-ndɔɔ dda ndɔɔ binyə laa. Nila ndoko n̂-guku nɛ̂n dɔɛ̂. Nuru buwa mə ər tə̂ mba kore nɛ̂n maann-binyə le. N̂-dda marə lo taar karə dəw ar dɔɛ̂ tə̂ mba kaa nɛ̂n dɔ ndɔɔ le. Goe tə̂ a, ninya ndɔɔ le ji marə njê-ddaje kula binyə tə̂ le a nɔtu naw mba tə̂. 34Kar kuja kandə binyə le asə a, nula ngann njê-kulaje laa rɔ njê-ddaje kula binyə tə̂ le karə dulaje kə kandə binyə laa darɛ̂je. 35A njê-ddaje kula mə ndɔɔ binyə tə̂ le uwaje ngann njê-kulaje le. N̂-tundaje marɛ̂, n̂-tɔlje marɛ̂ ngaâ n̂-tilaje marɛ̂ kə ər n̂-tɔlɛ̂je. 36N̂-təl nula marə ngann njê-kulaje laa le tokə banya bbay. A njê-ddaje kula binyə le ddaje kə de nɛ̂n kə̂ n̂-ddaje kə̂ njê kə̂ dɔngɔr le bbay. 37Dɔbɔnyɛ̂ a, nje-ndɔɔ le ula ngonnɛ̂ rɔ njê-ddaje kula mə ndɔɔ tə̂ le, mba nəjə n̂-pa nan: ‹A du ang, bbo Ngonnəm a, dâ bbəəleje.› 38A koo kə̂ njê-ddaje kula binyə le ooeje a, n̂-paje nan: ‹Nje-kuwa nɛ̂n-ndubba le â nəənn! Arəje n-tɔlɛ̂je jarəje nɛ̂n-ndubba le təl to ləje.› 39Duruje dɔɛ̂ tə̂, n̂-ndɔrɛ̂je n̂-teeje saa mə ndɔɔ tə̂ le kə ddang, n̂-tɔlɛ̂je.» 40Jeju təl dujude nan: «Bbo nje-ndɔɔ binyə le ddee a, ddi â nâ dda kə njê-ddaje kula binyə le wa?» 41Dilɛ̂je tə̂ nan: «Nâ koo kəm-to-ndoo lə njê-mə-majangje nəənn le ang ta nâ tɔlde. Goe tə̂ a, nâ kinya ndɔɔ le ji marə njê-ddaje kula tə̂ kə̂ dang karə ndɔɛ̂ asə a, n̂-ddeeje kə ko-ndɔɔ laa darɛ̂je.»
42Goe tə̂ a, Jeju dujude nan: «Ə-turaje tar kə̂ Makəturu lə Lubba pa nəənn ndɔ kâra ang bbay wa? Tar kə̂ nan:
‹Ər kə̂ njê-kɔsuje kəy mbətəje,
təl ddee to singa gɔl kəy kə̂ dungu nangə̂.
To nɛ̂n kə̂ in rɔ Əbbə-dəwje tə̂
ngaâ to nɛ̂n-mɔri kəmje tə̂.›
43Mba yeenn bba, m-pa marəse: Lubba a kɔru Bbe-kɔn laa jise tə̂ karə marə gəl-dəwje kə̂ a ddaje kula kə̂ maji. 44Dəw kə̂ oso dɔ ər tə̂ le a, a guru rɔɛ̂ ngaâ dəw kə̂ ər le oso dɔɛ̂ tə̂ a, a nyarɛ̂.»
45Mbayje lə njê-poloje Lubba kə Parijinyɛje ooje tar le be a, gərəje to dede â Jeju aw pa gusu-tar nəənn dɔde tə̂. 46N̂-sangəje ddəw ta kuwɛ̂je, a n̂-bbəəlje kəm dəwje kə̂ banya, mba dəwje le gərəje to Jeju to marə nje-kila mbər tar lə Lubba.
Currently Selected:
Matiye 21: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
