Matiye 22

Gusu-tar dɔ kusu taa-naan tə̂

1 Jeju təl pa tar arəde bbay kə gusu-tar nan: 2«Tar Bbe-kɔn kə̂ darâ to kâra baa kə tar nəənn: Marə tɔkə mbay dda kusu taa-naan lə ngonnɛ̂ kə̂ dingaw. 3Nula njê-kulaje laa karə bbar dəwje kə̂ n̂-bbarde kusu tə̂ le. A dəwje le mbətəje ta ddee. 4N̂-təl nula marə njê-kulaje karə aw paje arəde nan: ‹M-dda nɛ̂n-kusa le mban. M-tɔl mangəje ddəm daje kə̂ əmə ddəm arə nɛ̂n-kusa to ngɔsi ngaa. Ə-ddeeje kusu tə̂ le.› 5A dəwje le ooje tar laa le to nɛ̂n ang. Marɛ̂ ɔtu aw ndɔɔ̂, a marɛ̂ aw ta labbə nɛ̂n laa. 6A marɛ̂je uwaje ngann njê-kulaje le ddajede maji ang ngaâ tɔljede. 7Wungu ɔn tɔkə mbay le ngaâ ula mbambaje laa arə n̂-tɔlje njê-tɔlje njê-kulaje laa le ngaâ n̂-roje bbe ləde. 8Goe tə̂ a, n̂-pa narə ngann njê-kulaje laa le nan: ‹Kar kusu taa-naan le asə ngaa, a dəwje kə̂ m-bbarde le to dəwje kə̂ asə ta bbarde kusu tə̂ ang. 9Aw arje tɔ-ddəwje tə̂, bbo dəw njaa kə̂ ingɛ̂je a, ə-bbarɛ̂je arə n̂-ddee kusu taa-naan tə̂ le.› 10Ngann njê-kulaje laa le unnje go ddəwje ngaâ bbarje dəwje tɔyn kə̂ dingajede, njê kə̂ maji ddəm njê kə̂ maji ang ddəm. Yeenn ngaâ dəwje kə̂ n̂-bbarde le ddusuje mə kəy le. 11Tɔkə mbay le andə kəy mba koo dəwje kə̂ n̂-bbarde le a, noo marə dingaw kə̂ ula kubbu kusu ang. 12N̂-pa narɛ̂ nan: ‹Namʼm, nan ddi bba ula kubbu kusu ang, a ə-ddee andə kəy nəənn wa?› Dingaw le ilɛ̂ tar tə̂ ang. 13Yeenn bba, tɔkə mbay le pa arə ngann njê-kulaje laa nan: ‹Ə-tɔje jia kə gɔlɛ̂ bbo ilɛ̂je ddaka lo tə̂ kə̂ ndul. Lo tə̂ənn, nâ nɔn ngaâ nâ ngəər ngangɛ̂.› » 14Ta kutu nɛ̂n dɔ tar le a, Jeju pa nan: «Tɔkɔrɔ, Lubba bbar dəwje tokə banya njaa, a njê kə̂ n̂-mbərəde banya ang.»

Tar kuka lambo kə tɔkə mbay kə̂ Rɔm

15Yeenn ngaâ Parijinyɛje aw uwaje dɔ naan ta nan Jeju mba kingɛ̂ ddəw tar tə̂ kə̂ a tee tɛɛ̂ tə̂. 16Dulaje marə njê-njaje gode tə̂ kə dəwje kə̂ unnje go Erodə rɔ Jeju tə̂ le karə n̂-paje darɛ̂ nan: «Nje-nɛ̂n-tɔju, n-gərə to aw pa tar kə̂ tɔkɔrɔ, aw tɔju ddəw lə Lubba tokə tɔkɔrɔ njaa ddəm aw bbəəl kəm dəw ang ddəm. Dəw kə̂ bo wase dəw kə̂ tɛn kara osoi tə̂ ang. 17Ə-pa arəje joo: Ndu arəje ddəw karə juka lambo jarə tɔkə mbay kə̂ Rɔm wase ndu mbətə wa?» 18Jeju gərə kəjə ləde kə̂ maji ang le ngaâ pa arəde nan: «Njê-ngəmje, mba ddi bba, aw nanʼmje wa? 19Ə-tɔjumje kandə narɛ kə̂ aw ukaje nɛ̂n lambo le arəje moo.» N̂-ddeeje kə kandə narɛ le darɛ̂je. 20Jeju dujude nan: «Əndaji dɔ dəw kə makəturu kə̂ n̂-dda narɛ tə̂ nəənn toje to le nân wa?» 21Dilaje tə̂ nan: «Toje to lə tɔkə mbay kə̂ Rɔm.» N̂-təl n̂-pa narəde nan: «Baann a, arəje tɔkə mbay kə̂ Rɔm nɛ̂n kə̂ to lə tɔkə mbay kə̂ Rɔm, a arəje Lubba nɛ̂n kə̂ to lə Lubba.» 22Dooje tar laa le a, dum dɔde ngaâ dinyɛ̂je dɔtuje.

Tar ndol lə dəwje kə̂ oyje

23Ndɔɛ̂ tə̂ənn njaa Sadusinyɛje ddeeje rɔ Jeju tə̂. Sadusinyɛje le toje to dəwje kə̂ paje nan dəwje kə̂ oyje a ndolje ang. N̂-dujuje tar Jeju nan: 24«Nje-nɛ̂n-tɔju, Mɔyijə pa nan: ‹Bbo dəw uju ngonn ang ngaâ oy a, maji karə ngokɔɛ̂n taa dɛnɛ̂n-ndubba le uju nɛ̂n ngannje arɛ̂.› 25Ləw, marə ngakɔn-naanje siri eeje horoje tə̂ nəənn. Ne kə̂ n̂-to dərə n̂-taa dɛnɛ̂n ngaâ nuju saa ngonn ang, a noy. Ninya dɛnɛ̂n laa le narə nje-goe. 26Nɛ̂n kə̂ kâra baa le njaa təl inga nje-goe le. Nɛ̂ɛnn inga ne kə̂ n̂-to mota ləde ndərəng inga ne kə̂ n̂-to siri ləde. 27Gode tə̂ tɔyn a, dɛnɛ̂n le oy tɔ. 28Yeenn, ndɔ ndol lə dəwje kə̂ oyje a, nân horode tə̂ a to nje-dɛnɛ̂n le wa? Mba dede siri tɔyn njaa n̂-taaje dɛnɛ̂n le.» 29Jeju ilade tə̂ nan: «Ə-ndəəmje ddəw, mba ə-gərəje Makəturu lə Lubba ang ddəm tar singa-mɔngu lə Lubba ang ddəm. 30Tɔkɔrɔ, ndɔ kə̂ dəwje kə̂ oyje ndolje a, dɛnɛ̂n a taa ngaw ang ddəm dingaw a taa dɛnɛ̂n ang ddəm. Dâ kisije tokə anjəje kə̂ darâ. 31A tar kə̂ ɔju dɔ ndol lə dəwje kə̂ oyje le, ə-turaje tar kə̂ Lubba pa arəse ang wa? N̂-pa nan: 32‹M-to Lubba lə Abaraham, Lubba lə Ijakə, Lubba lə Jakobbo.› N̂-to Lubba lə dəwje kə̂ isije kəm baa, bbo Lubba lə dəwje kə̂ oyje ang.» 33Nɛ̂n-tɔju laa le dum dɔ dəwje kə̂ banya kə̂ ooje tar laa le.

Ndu kə̂ ngəng uta marɛ̂je

34 Parijinyɛje ooje nan Jeju uwa ta Sadusinyɛje a, Parijinyɛje le uwaje dɔ naan. 35Marɛ̂ kâra horode tə̂ kə̂ to nje-gərə-Ndu duju tar Jeju mba nɛɛ̂n nɛ̂n. N̂-pa nan: 36«Nje-nɛ̂n-tɔju, Ndu kə̂ dda bba ngəng uta kəseje wa?» 37Jeju ilɛ̂ tə̂ nan: «Maji karə ə-ndiki Əbbə-dəwje kə̂ to Lubba ləi kə məi tɔyn kə kəwn ləi tɔyn kə kəjə ləi tɔyn.» 38Yeenn le â to ndu kə̂ ngəng uta marɛ̂je. 39Ndu kə̂ to joo laa kə̂ ngəng uta marɛ̂je â nəənn: «Maji karə ə-ndiki nje-mari tokə dâ rɔi njaa.» 40Ndu lə Mɔyijə kə nɛ̂n-tɔjuje lə njê-kilaje mbər tar lə Lubba inje mə nduje tə̂ kə̂ joo nəənn le.

Tar lə Kristə de kə Dabbiti

41 Parijinyɛje mbɔnje naan le ngaâ Jeju dujude nan: 42«Tar ddi bba aw əjəje dɔ Kristə tə̂ le wa? N̂-to ngonn lə nân wa?» Dilɛ̂je tə̂ nan: «N̂-to ngonn lə Dabbiti.» 43Jeju pa arəde nan: «Yeenn a, tokə baânn bba Dabbiti Ndil dduse a, təl bbar Kristə le to ‹Əbbeeje› wa? Dabbiti le pa nan:

44‹Əbbə-dəwje Lubba pa arə Əbbəmje nan:

Isi dɔ ji-kɔləm tə̂, ndərəng ndɔ kə̂ mâ kungu njê-baanje ləi kɔ gɔli tə̂.›

45«Â bbo Dabbiti bbar Kristə le to Əbbeeje a, Kristə le a to ngonnɛ̂ tɔ bbay tokə baânn wa?» 46Dəw kâra horode tə̂ asə kilɛ̂ tar tə̂ ang. Unn kute dɔ ndɔɛ̂ tə̂ənn, dəw kâra tay duje tar ang ngaa.

Currently Selected:

Matiye 22: KabbaDkS

Highlight

Copy