Matiye 26
26
Tɔkəje lə Jiipije ndikije ta tɔl Jeju
1 Jeju pa tarje nəənn le tɔyn tunga a, n̂-pa narə njê-njaje goe tə̂ nan: 2«Ə-gərəje tɔyn to Pakə nayn ndɔ joo baa ngaa. Dâ kila Ngonn lə dəw ji dəwje tə̂ karə n̂-tɔlɛ̂ kakə-dəsə tə̂.»
3Yeenn ngaâ mbayje lə njê-poloje Lubba kə tɔkəje lə Jiipije mbɔnje naan mə ndoko tə̂ lə Kayipi kə̂ to tɔkə nje-polo Lubba 4ngaâ dunnje ndu ta kuwa Jeju kə gusu tɔlɛ̂. 5A n̂-paje nan: «Arəje juwɛ̂je ndɔ kusu tə̂ ang, mba a kuju bula.»
Marə dɛnɛ̂n ungu yambo dɔ Jeju tə̂
6 Jeju ee Betani kəy lə Simɔn kə̂ ləw to nje-banji le a, 7marə dɛnɛ̂n ddee ngɔsi saa. Dɛnɛ̂n le uwa ku kə̂ yambo kə̂ gatɛ̂ ngəng nya ddusu jia tə̂. Ku le n̂-dda kə marə ər kə ria nan albatərə. Kar kə̂ Jeju nayn ta nɛ̂n-kusa tə̂ bbay a, dɛnɛ̂n le ungu yambo le dɔ Jeju tə̂. 8Njê-njaje go Jeju tə̂ ooje nɛ̂ɛnn le a, nəəlde ang ngaâ n̂-paje nan: «N̂-tuju yambo nəənn be mba ddi wa? 9Maji ta labbə yambo nəənn kə gatə kə̂ ngəng ta kayn narɛ̂ njê-ndooje ang wa?»
10 Jeju gərə tar kə̂ daw pa le ngaâ pa nan: «Mba ddi bba aw jɔkuje dɛnɛ̂n nəənn wa? Nɛ̂n kə̂ maji a n̂-dda səm. 11Njê-ndooje aw nayn kə se kə ndɔ tɔyn. A əman, mâ nayn kə se kə ndɔ tɔyn ang. 12Nungu yambo le rɔm tə̂ ta nginan nɛ̂n ndɔ kə̂ dâ dubbum nɛ̂n. 13Tɔkɔrɔ, njaa m-pa marəse, lo tɔyn kə̂ dâ kila mbər Tar kə̂ Maji nəənn kə tə̂, duninya tə̂ tɔyn, dâ pa tar nɛ̂n kə̂ dɛnɛ̂n nəənn dda le ngaâ dəwje a koleje məde dɔɛ̂ tə̂.»
Judas ndiki ta kunn dɔ Jeju
14Goe tə̂ a, marə nje-nja go Jeju tə̂ horo marɛ̂je tə̂ kə̂ dɔku gire joo kə̂ ria nan Judas Iskariyotə aw inga mbayje lə njê-poloje Lubba 15ngaâ pa arəde nan: «Bbo mila Jeju jise tə̂ a, ddi bba â karəmje wa?» Tɔkə njê-poloje Lubba arɛ̂je kandə narɛ dɔmota. 16Unn kute karɛ tə̂ənn, Judas aw sangə ddəw ta kila Jeju jide tə̂.
17Dɔngɔr ndɔ kusu mapa kə̂ n̂-dda kə wum ang le, njê-njaje go Jeju tə̂ ddee dujeje nan: «Lo kə̂ dda bba ə-ndiki karə jaw dda muru Pakə kə tə̂ jari wa?» 18Jeju ilade tə̂ nan: «Awje tɔkə bbe tə̂ rɔ marə ənəng tə̂. Ə-paje arɛ̂je nan: ‹Nje-nɛ̂n-tɔju pa nan: Kar ləm ddee ngɔsi ngaa. Mə kəy ləi â əman kə njê-njaje gom tə̂ ja dda kusu Pakə kə tə̂.› » 19Njê-njaje go Jeju tə̂ ddaje nɛ̂n kə̂ nunn ndu narəde karə n̂-ddaje le ngaâ n̂-ddaje nɛ̂nje mba kusu Pakə le.
Jeju tɔju dəw kə̂ a kunn dɔɛ̂
20Lo-kul a, Jeju isi ta nɛ̂n-kusa tə̂ kə njê-njaje goe tə̂ kə̂ dɔku gire joo le. 21Kar tə̂ kə̂ daw dusaje nɛ̂n a, n̂-pa nan: «Tɔkɔrɔ m-pa marəse, marə dəw kâra horose tə̂ a kilam ji dəwje tə̂.» 22Rɔ njê-njaje go Jeju tə̂ le nəəlde ang nyɔm ngaâ dede kâra kâra dunnje kutu duje nan: «Əbbə-dəwje, to əman wa?» 23Nilade tə̂ nan: «Dəw kə̂ ula jia naan tə̂ səm ka tə̂ nəənn, ne â nâ kilam ji dəwje tə̂. 24Ngonn lə dəw a koy ddəw kâra baa kə tar kə̂ Makəturu lə Lubba pa dɔɛ̂ tə̂ le. A, a to ndoo nya karə dəw kə̂ a kilɛ̂ ji dəwje tə̂. Dəw le, kuje ang maji nya uta.» 25Judas kə̂ a kilɛ̂ ji dəwje tə̂ le duje nan: «Nje-nɛ̂n-tɔju, to əman wa?» Jeju ilɛ̂ tə̂ nan: «Əi njaa ə-pa mban.»
Muru mə-kâra
26Kar tə̂ kə̂ daw dusaje nɛ̂n a, Jeju unn mapa, arə wooyo Lubba, tətə arə njê-njaje goe tə̂ ngaâ pa nan: «Ə-taaje usaje. Yeenn to da-rɔm.» 27Goe tə̂ a, nunn marə əngo maann-binyə, narə wooyo Lubba n̂-pa nan: «Sese tɔyn njaa ayje, 28yeenn to məsəm. Məsə kə̂ Lubba ɔsu nɛ̂n dɔnɔn kə dəwje kə̂ banya, məsə kə̂ kayn mba kɔru tar majangje kə ddang. 29M-pa marəse, unn kute kar tə̂ nəənn, mâ kay maann-binyə nəənn ang ngaa, ndərəng ndɔ kə̂ mâ kay nɛ̂n maann-binyə kə̂ siki kə se mə Bbe-kɔn tə̂ lə Bɔmje.»
Jeju pa tar lə Piyɛr kə̂ a mayn tar laa
30Dɔsuje pa wal Lubba ngaâ n̂-teeje dawje dɔ ddingiri Olibəje tə̂. 31Yeenn ngaâ Jeju pa arəde nan: «Til tə̂ nəənn, â tusumje tɔyn kinyamje, mba n̂-dda Makəturu tə̂ lə Lubba nan:
‹Mâ tɔl nje-ngəm batəje,
ta kusu batəje le a sanrɛ naan.›
32A bbo m-ndol go koy tə̂ ləm a, mâ kaw nginanse kete Galile.»
33Piyɛr pa arɛ̂ nan: «Le dəwje tɔyn tusije inyaije kara, əman mâ kinyai ndɔ kâra ang.» 34Jeju ilɛ̂ tə̂ nan: «Tɔkɔrɔ, m-pa mari, til tə̂ nəənn njaa, kete bba karə kuran nɔn, â pa nan ə-gərəm ang, gɔl mota.» 35Piyɛr pa arɛ̂ nan: «Le asə ta koy səi kara, karə m-pa nan m-gəri ang, mâ pa baann ndɔ kâra ang.» Njê-njaje goe tə̂ tɔyn paje tokə baann tɔ.
Jeju duju Lubba lo tə̂ kə̂ Jetesemane
36Goe tə̂ a, Jeju aw kə njê-njaje goe tə̂ le lo tə̂ kə̂ daw bbar nan Jetesemane ngaâ n̂-pa narəde nan: «Isije lo tə̂ nəənn, a əman, mâ kaw duju Lubba lo tə̂ kə̂ yoonn.» 37N̂-jin Piyɛr kə ngann lə Jebede kə̂ joo naw kə de. Rɔɛ̂ unn kutu nəəle ang ngaâ bbəəl uta dɔɛ̂ tɔ. 38Yeenn a, n̂-pa narəde nan: «Rɔm nəələm ang, tokə nɛ̂n kə̂ mâ ta koy be. Ə-naynje nəənn. Arəje bbi ɔru kəmse ang səm.» 39Goe tə̂ a, n̂-ngəsə kə kete tɛn be ngaâ n̂-tee noso kə ta məɛ̂, n̂-dəbbə kəmɛ̂ nangə̂ ngaâ n̂-duju Lubba n̂-pa nan: «Bɔy, bbo ddəw to a, uta əngo kəm-to-ndoo nəənn kə ddang. A ə-dda tokə məi ndiki bbo tokə məm ndiki ang.» 40N̂-təl n̂-ddee rɔ njê-njaje goe tə̂ kə̂ mota le a, ningade tɔyn dɔ bbi tə̂. N̂-pa narə Piyɛr nan: «Asəje ta mbətə bbi səm mba gɔl kar kâra ang wa? 41Arəje bbi ɔru kəmse ang, ə-dujuje Lubba bba karə osoje mə nɛ̂n-nan tə̂ ang. Ndil dəw ndiki ta dda nɛ̂n kə̂ maji njaa, a da-rɔ ee kə singa ang.»
42Jeju təl aw ddəw əw bbay aw nduju Lubba nan: «Bɔy, bbo əngo nəənn le to ta karə may njaa, bbo ddəw kə̂ â kɔru nɛ̂n kə ddang goto a, maji karə ə-dda nɛ̂n kə̂ məi ndiki.» 43N̂-təl n̂-ddee rɔ njê-njaje goe tə̂ le a, ningade dɔ bbi tə̂ bbay mba bbi uta dɔde arə ddəw kə̂ ta karə kəmde nayn takə baa goto. 44Ninyade a naw duju Lubba kə̂ gɔl mota laa bbay. A nɛ̂ɛnn le njaa n̂-təl n̂-duju Lubba le bbay. 45N̂-təl n̂-ddee rɔ njê-njaje goe tə̂ n̂-pa nan: «Ə-naynje aw tibbije wa? Aw uwaje rɔse bbay wa? Kar asə ngaa, dâ kunn Ngonn lə dəw kila ji njê-nɛ̂n-ddaje tə̂ kə̂ maji ang. 46Inje arəje jawje! Nje-kunn dɔm le ddee ngaa.»
Duwa Jeju
47Jeju nayn aw pa tar bbay a, marə nje-nja goe tə̂ kâra horo marɛ̂je tə̂ kə̂ dɔku gire joo kə̂ ria nan Judas le ddee kə dəwje kə̂ banya. Duwaje tɔkə kiyaje kə kakəje jide tə̂. Mbayje lə njê-poloje Lubba kə tɔkəje lə Jiipije â ulajede. 48Judas, nje-kunn dɔ Jeju le tɔjude nɛ̂n kə̂ nâ dda tokə kete mban. N̂-pa nan: «Dəw kə̂ m-to mbia a, to ne, ta uwɛ̂je.» 49Njangə baa njaa a, Judas le ddee ngɔsi kə Jeju ngaâ pa arɛ̂ nan: «Lapiya, Nje-nɛ̂n-tɔju!» Ngaâ n̂-to mbia. 50Jeju ilɛ̂ tə̂ nan: «Namʼm, nɛ̂n kə̂ ə-ddee ta dda le ə-dda.» Yeenn ngaâ dəwje le ddeeje ngɔsi kə Jeju ilɛ̂je uwɛ̂je. 51Marə nje-nja go Jeju tə̂ ɔru tɔkə kiya laa tuka nɛ̂n mbi marə nje-kula lə tɔkə nje-polo Lubba ti. 52Jeju pa arə nje-nja goe tə̂ le nan: «Ə-təl kə tɔkə kiya ləi ture tə̂, mba dəw kə̂ tɔl dəw kə tɔkə kiya, dâ tɔlɛ̂ kə tɔkə kiya tɔ. 53Ə-gərə ang wa? Masə ta bbar Bɔy karə nula kə anjəje kə̂ toje to njê-ddɔje tokə banya narəm. 54A bbo m-dda tokə baann a, tarje kə̂ Makəturu lə Lubba pa le a ddeeje to nɛ̂n kə̂ tɔkɔrɔ tokə baânn wa? Makəturu le pa nan, maji karə nɛ̂ɛnn le to tokə baann.»
55Goe tə̂ a, Jeju pa arə dəwje kə̂ banya le nan: «Ə-ddeeje kə tɔkə kiyaje kə kakəje bba ta kuwam nɛ̂n tokə nɛ̂n kə̂ m-to dəw kə̂ maji ang wa? Kə ndɔ tɔyn, maw misi kəy-polo Lubba tə̂ maw tɔju nɛ̂n, a uwamje ang. 56A nɛ̂njeenn tɔyn toje bba karə tar kə̂ njê-kilaje mbər tar lə Lubba paje Makəturu tə̂ le ddeeje to nɛ̂n kə̂ tɔkɔrɔ.» Yeenn ngaâ njê-njaje go Jeju tə̂ le tɔyn njaa aynje inyɛ̂je.
Daw kə Jeju nɔn tɔkə sariya tə̂ lə Jiipije
57Njê kə̂ uwaje Jeju le awje saa rɔ Kayipi tə̂ kə̂ to tɔkə nje-polo Lubba. Njê-gərəje-Ndu kə tɔkəje lə Jiipije mbɔnje naan lo tə̂ənn. 58Piyɛr ɔru goe a, nja ddəw əw saa ndərəng tee nɛ̂n mə ndoko tə̂ lə Kayipi kə̂ to tɔkə nje-polo Lubba le. Nandə mə ndoko tə̂ le ngaâ nisi kə njê-ngəmje ta-kəy ta koo se nɛ̂n le a kɔsu kɔyn tokə baânn wa?
59Mbayje lə njê-poloje Lubba kə njê-gangəje sariya lə Jiipije le tɔyn daw sangəje marə tar ta kunda dɔ Jeju tə̂ bba ta gangə nɛ̂n sariya-yo dɔɛ̂ tə̂. 60Njê-tar-najije kə̂ toje to njê-ngəmje ddeeje tokə banya ulaje tar tɛɛ̂ tə̂. A dingaje nɛ̂n kə̂ ta kunda nɛ̂n tar dɔɛ̂ tə̂ ang. Dɔbɔnyɛ̂ a, marə dəwje joo ddee paje nan: 61«Dəw nəənn pa nan: ‹Masə ta tɔ kəy-polo Lubba ta təl dda ture tə̂ mə ndɔ mota tə̂.› » 62Tɔkə nje-polo Lubba le in taar ngaâ duje nan: «Tar kə̂ â kila tə̂ goto wa? Tar kə̂ dəwje aw paje dɔi tə̂ nəənn, tar ddi â, â pa dɔɛ tə̂ wa?» 63A Jeju pa tar ang. Yeenn ngaâ tɔkə nje-polo Lubba pa arɛ̂ nan: «M-duji kə ri Lubba kə̂ nje-kisi kəm baa karə ila tar tə̂ nəənn: Ə-to Kristə, Ngonn lə Lubba wa?» 64Jeju ilɛ̂ tə̂ nan: «Əi njaa ə-pa mban. A m-pa marəse, bbasinɛn nəənn njaa â kooje Ngonn lə dəw kə̂ isi dɔ ji-kɔl Lubba tə̂ kə̂ nje-singa-mɔngu. A kooeje kar tə̂ kə̂ nâ kin darâ ta ddee mə mum tə̂ tɔ.» 65Yeenn ngaâ tɔkə nje-polo Lubba le tiir kubbuje kə̂ rɔɛ̂ tə̂#26:65 Bbeê lə Jiipije, bbo marə dəw kə̂ bo tir kubbu laa a, yeenn tɔju to wungu ɔɛ̂n nya. Yeenn to nɛ̂n kə̂ ngəng nya. Tɔkə nje-polo Lubba ee kə ddəw ta tiir kubbu kə̂ rɔɛ̂ tə̂ ang tɔ. ngaâ pa nan: «N̂-taji Lubba. Ddi â ta koo tar lə njê-tar-najije dda nɛ̂n bbay wa? Sese njaa ooje taji kə̂ n̂-taji Lubba nəənn kə mbise mban. 66Tar ddi â əjəje dɔɛ̂ tə̂ wa?» Dilɛ̂je tə̂ nan: «Nasə yo.» 67Yeenn ngaâ n̂-tije wənrə kəmɛ̂ tə̂, n̂-bbirije jide n̂-tundɛ̂je nɛ̂n. Marɛ̂je tundaje ka-mbɔrɛ̂ 68ngaâ paje nan: «Kristə, ə-pa arə joo, nân â undai wa?»
Piyɛr mayn tar lə Jeju
69Karɛ̂ tə̂ənn, Piyɛr isi ddaka mə ndoko tə̂ le. Marə nje-kula kə̂ dɛnɛ̂n ddee ngɔsi saa ngaâ pa nan: «Əi kara ə-nja kə Jeju kə to dəw kə̂ Galile nəənn le tɔ.» 70A Piyɛr mayn kəm dəwje tə̂ tɔyn nan: «M-gərə tar kə̂ ə-ndiki ta pa nəənn ang.» 71Nunn ddəw ta kɔtu ngaâ n̂-tee ta-ndoko tə̂ le a, marə nje-kula kə̂ dɛnɛ̂n dang ooe ngaâ pa arə njê kə̂ isije lo tə̂ənn nan: «Dəw nəənn nja kə Jeju kə̂ Najarɛtə le tɔ.» 72Piyɛr unda yo ngaâ mayn bbay nan: «M-gərə dingaw nəənn ang.» 73Ngaji goe tə̂ a, njê kə̂ eeje tə̂ənn le awje ngɔsi kə Piyɛr le ngaâ paje arɛ̂ nan: «Ee horo dəwje tə̂ lə Jeju njaa. Tar pa ləi njaa tɔju.» 74Yeenn ngaâ nunn kutu kunda yo pa nan: «M-gərə dingaw nəənn ang. Bbo mərə ngəm a, maji karə ndu-ndɔɔl lə Lubba to dɔm tə̂.» Karɛ̂ tə̂ənn njaa kuran nɔn. 75Piyɛr ole məɛ̂ dɔ tar tə̂ kə̂ Jeju pa arɛ̂ nan: «Kete bba karə kuran nɔn, â mayn tar ləm pa nan ə-gərəm ang gɔl mota» le. Ngaâ n̂-tee ddaka n̂-nɔn nya.
Currently Selected:
Matiye 26: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
