Matiye 5
5
Jeju tɔju nɛ̂n dəwje dɔ ddingiri tə̂
1Jeju oo dəwje kə̂ banya le a, aal dɔ marə ddingiri isi tə̂ ngaâ njê-njaje goe tə̂ awje rɔɛ̂ tə̂ tɔ. 2Nunn kutu tɔjude nɛ̂n, n̂-pa nan:
Tar kisi maji
3«Maji arəse, see dəwje kə̂ ə-gərəje to nɛ̂n ndil duse,
mba Bbe-kɔn kə̂ darâ to ləse.
4Maji arəse, see dəwje kə̂ aw nɔnje,
mba Lubba a wul məse.
5Maji arəse, see dəwje kə̂ ə-wulje pee,
mba Lubba a karəse nangə nəənn to ləse.
6Maji arəse, see dəwje kə̂ bbo nɛ̂n-dda kə̂ gatə gatə ddase nya,
mba Lubba a karəse nɛ̂n kə̂ məse ndiki.
7Maji arəse, see dəwje kə̂ aw ooje kəm-to-ndoo lə njê-marəseje,
mba Lubba a koo kəm-to-ndoo ləse tɔ.
8Maji arəse, see dəwje kə̂ məse nda kayn,
mba â kooje Lubba.
9Maji arəse, see dəwje kə̂ aw ddaje arə mə-wul-lɔm to horo dəwje tə̂,
mba Lubba a bbarse to ngannɛ̂.
10Maji arəse, see dəwje kə̂ daw dula kəmse ndoo tə̂,
mba kula-ddase kə̂ to gatə gatə,
mba Bbe-kɔn kə̂ darâ to ləse.
11Maji arəse,
sese kə̂ dəwje aw tajise,
daw dulaje kəmse ndoo tə̂,
daw paje tarje kə̂ maji ang dang dang, kə̂ to tar ngəmje baa dɔse tə̂ mbam.
12Ə-ddaje rɔ-nəəl,
arəje rɔ-nəəl ləse uta dɔɛ̂,
mba kuka ləse kə̂ darâ a bo nya.
Njê-kilaje mbər tar lə Lubba kə̂ toje kete arəse kara,
n̂-ddaje singa kə de tokə baann tɔ.»
Katə kə lo-karɛ kə̂ dɔ nangə tə̂
13«Sese â ə-toje to katə kə̂ dɔ nangə̂ tə̂ nəənn. A bbo dɔɔn lə katə le goto a, ddi bba dəw a dda karə katə le təl dɔɔn bbay wa? Marə nɛ̂n dang kə̂ ta dda nɛ̂n goto. To nɛ̂n kungu kɔrɔ̂ karə dəwje mbɔynje kə gɔlde.
14«Ə-toje to lo-karɛ kə̂ duninya tə̂ nəənn. Bbe kə̂ n̂-dda dɔ ddingiri tə̂ a kasə kiya rɔɛ̂ ang. 15Dəw ila puru lambe tə̂ a, a kaw dəbbə kə jo ang. Nâ kunda dɔ marə nɛ̂n tə̂ taar karə njê kə̂ mə kəy tə̂ le tɔyn ooje nɛ̂n lo. 16Ddəw kâra baa, arəje ndoko ləse to kəm dəwje tə̂ tɔyn. Yeenn bba dâ koo kula-ddase kə̂ maji ngaâ dâ kɔsu nɛ̂n gaji Bɔsese kə̂ isi darâ.»
Nɛ̂n-tɔju lə Jeju dɔ Ndu tə̂
17«Əjəje to m-ddee ta tuju Ndu lə Mɔyijə wase nɛ̂n-tɔjuje lə njê-kilaje mbər tar lə Lubba wa? M-ddee ta tuju nɛ̂njeenn ang. M-ddee ta dda karə dəwje gərəje kandə tarje kə̂ ndujeenn paje le kə majɛ̂. 18Tɔkɔrɔ njaa m-pa marəse, bbo dara kə nangə n̂-naynje baa bbay a, marə ngonn gɔl makəturu wase marə mbita gɔl Makəturu-Ndu a koso nangə̂ ang, ndərəng ddutu ndɔ tə̂.
19«Bbo dəw mbətə marə ngonn tar kâra kə̂ Ndu pa ngaâ tɔju dəwje arə n̂-mbətəje Ndu le a, nâ ddee to dəw kə̂ tɛn baa kuta kəsə dəwje tɔyn mə Bbe-kɔn tə̂ kə̂ darâ. A bbo dəw ngəm Ndu ngaâ tɔju dəwje karə n̂-ngəmje tɔ a, nâ ddee to dəw kə̂ bo mə Bbe-kɔn tə̂ kə̂ darâ. 20M-pa marəse: Bbo ə-ddaje nɛ̂n kə̂ gatə gatə uta njê-gərəje-Ndu wase Parijinyɛje ang a, a kandəje Bbe-kɔn tə̂ kə̂ darâ ang.»
Nɛ̂n-tɔju dɔ wungu tə̂
21«Ooje tar kə̂ n̂-pa ləw darə kaseseje nan: ‹Ə-tɔl dəw ang, mba dâ gangə sariya dɔ nje-tɔl dəw tə̂.› 22A əman, m-pa marəse: Bbo dəw dda wungu kə ngokɔɛ̂n a, asə karə n̂-gangə sariya dɔɛ̂ tə̂. Bbo dəw bbar ngokɔɛ̂n mbə a, asə karə daw saa nɔn sariya tə̂. A bbo dəw bbar ngokɔɛ̂n wooy a, asə karə dilɛ̂ kəm puru tə̂ kə̂ aw ɔn kə ndɔ kə ndɔ.
23«Bbo aw ta karə nɛ̂n-polo ləi dɔ bann tə̂ ngaâ məi ole dɔ ngokɔin kə̂ tar to hori tə̂ saa a, 24maji karə inya nɛ̂n-polo ləi le dɔ bann tə̂ le ta aw dɔngɔr rɔ ngokɔin tə̂ le, ə-gɔl saa tar bba goe tə̂ a, ə-ddee arə nɛ̂n-polo ləi le Lubba.
25«Bbo dəw kə̂ inga saa tar aw aw səi kə lo gangə sariya tə̂ a, kar tə̂ kə̂ ə-naynje ddəw-boô bbay, maji karə ə-gɔl saa tar njangə. Baann ang a, nâ kilai ji nje-gangə sariya tə̂ ngaâ nje-gangə sariya a kilai ji mbambaje tə̂ karə dilai kəy-kula tə̂. 26Tɔkɔrɔ njaa m-pa mari, bbo uka narɛ kə̂ dâ kɔju dɔi tə̂ tɔyn ə-tunga ang a, â tee kəy-kula tə̂ le ang.»
Tar dɔ lo-to-majang tə̂
27«Ooje tar kə̂ n̂-pa ləw darə kaseseje nan: ‹Ə-dda lo-to-majang ang.› 28A əman, m-pa marəse: Dəw kə̂ aa dɛnɛ̂n lə nje-marɛ̂ ngaâ dda bbo laa a, dəw le dda saa lo-to-majang ang məɛ̂ tə̂ mban. 29Bbo kəmi kə̂ kɔl a ta dda karə ə-dda majang a, ɔru ila kɔrɔ̂ ddəw əw. Mba bbo dəbbə rɔi kâra â goto a, maji uta karə da-rɔi tɔyn njaa aw kəm puru tə̂ kə̂ aw ɔn kə ndɔ kə ndɔ. 30A bbo jii kə̂ kɔl a ta dda karə ə-dda majang a, ə-gangə ila kɔrɔ̂ ddəw əw. Mba bbo dəbbə rɔi kâra â goto a, maji uta karə da-rɔi tɔyn njaa aw kəm puru tə̂ kə̂ aw ɔn kə ndɔ kə ndɔ.»
Tar tubba dɛnɛ̂n
31«N̂-pa ləw tɔ nan: ‹Bbo dingaw tubba dɛnɛ̂n laa a, maji karə dingaw le dda makəturu mbətə-naan ula jia tə̂.› 32A əman, m-pa marəse: Bbo dingaw tubba dɛnɛ̂n laa kə̂ dda kaya ang ddəm a, to ne â n̂-dda karə dɛnɛ̂n laa le dda lo-to-majang. Bbo dingaw taa dɛnɛ̂n kə̂ ngawɛ̂je tubbɛ̂ a, dingaw le dda lo-to-majang tɔ.»
Tar yo-kunda
33«Ooje tar kə̂ n̂-pa darə kaseseje ləw nan: ‹Dang bba unda yo baa ang. Nɛ̂n kə̂ unda yo kəm Əbbə-dəwje tə̂ ta dda le, maji karə ə-dda nɛ̂n le.› 34A əman, m-pa marəse: Dang bba undaje yo ang. Undaje yo kə ri dara ang, mba dara to ngende-mbay lə Lubba. 35Undaje yo kə ri nangə ang tɔ, mba nangə to lo kungu gɔlɛ̂. Undaje yo kə ri Jerujalɛm ang, mba Jerujalɛm to bbe lə tɔkə mbay. 36Unn dɔi unda nɛ̂n yo ang, mba asə ta dda karə biin dɔi kâra nda wase ndul ang. 37A maji karə ə-paje nan: ‹Ye njaa, ye njaa› wase ‹Ye ang, ye ang›. A bbo ilaje marə tar dɔɛ̂ tə̂ a, to tar kə̂ in rɔ Nje-Mə-Majang tə̂#5:37 Nje-mə-majang to marə ri Əsu â nəənn..»
Tar kila barə
38«Ooje tar kə̂ n̂-pa ləw nan: ‹Bbo dəw tɔ kəm nje-marɛ̂ a, maji karə n̂-tɔ kəmɛ̂ tɔ. Bbo dəw guru ngangə nje-marɛ̂ a, maji karə n̂-guru ngangɛ̂ tɔ.›
39«A əman, m-pa marəse: Bbo dəw dda səi majang a, ila barɛ̂ ang. Bbo dəw unda ka-mbɔri a, ə-turu dəbbe kə̂ kâra arə nunda tɔ. 40A bbo dəw aw səi sariya tə̂ ta taa kubbu ləi kə̂ to dɔɛ̂ a, inya kubbu-kul ləi arə n̂-taa tɔ. 41Bbo dəw uwai kə singa karə ə-nja saa kilometere kâra a, ə-nja saa kilometere joo.#5:41 Naw pa tar dɔ nɛ̂n-ddaje tə̂ lə mbambaje lə Rɔmɛnje kə̂ aw ddaje singa kə Jiipije. 42Bbo dəw duji nɛ̂n a, arɛ̂. Ngaa bbo dəw duju ta tunain nɛ̂n a, ɔkɛ̂ ang.»
Tar ndiki njê-baanje
43«Ooje tar kə̂ n̂-pa ləw nan: ‹Maji karə ə-ndiki nje-mari. A ə-mbətə nje-baan ləi.› 44A əman, m-pa marəse: Ə-ndikije njê-baanje ləse ngaâ ə-dujuje Lubba mba dəwje kə̂ aw ulaje kəmse ndoo. 45Yeenn bba â toje to ngann lə Bɔsese kə̂ isi darâ. Mba narə kar laa aw ɔsu dɔ dəwje tə̂ kə̂ majije ang ddəm dɔ dəwje tə̂ kə̂ majije ddəm. Naw narə ndi aw ərə dɔ dəwje tə̂ kə̂ toje gatə gatə ddəm dɔ dəwje tə̂ kə̂ toje gatə gatə ang ddəm. 46Bbo njê kə̂ ndikise dɔrɔ bba ə-ndikijede a, kuka ddi bba â kingaje ji Lubba tə̂ wa? Njê-taaje narɛ lambo kara ddaje tokə baann tɔ. 47Â bbo ngakɔnse njaa bba ə-ddajede lapiya a, ddi kə̂ dang boy â ə-ddaje wa? Dəwje kə̂ gərəje Lubba ang kara aw ddaje tokə baann tɔ. 48Yeenn a, maji karə ə-ddeeje to dəwje kə̂ maji tɔyn tokə Bɔsese kə̂ isi darâ kə̂ maji tɔyn le.»
Currently Selected:
Matiye 5: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
