Markə 13
13
Jeju pa tar kəy-polo Lubba kə̂ dâ guru
1Kar tə̂ kə̂ Jeju in mə kəy-polo Lubba tə̂ aw tee kə ddaka a, marə nje-nja goe tə̂ pa arɛ̂ nan: «Nje-nɛ̂n-tɔju, Oo ərje kə̂ kura nəənn, oo tɔkə kəy nəənn!» 2Jeju ilɛ̂ tə̂ nan: «Tɔkə kəy kə̂ aw oo nəənn, marə ər kâra a nayn dɔ marɛ̂ tə̂ ang. Dâ tɔ nɛ̂nje nəənn tɔyn.»
Nɛ̂nje kə̂ a toje kete bba ddutu ndɔ a ddee
3Jeju isi dɔ ddingiri Olibəje tə̂, nɔn kəy-polo Lubba tə̂. A Piyɛr, Jakə, Jan kə Andere disije saa lo tə̂ənn kə karəde baa ngaâ n̂-dujeje nan: 4«Ə-pa arəje: Ndɔ kə̂ dda bba nɛ̂njeenn a toje wa? Ddi bba a tɔjuje kar kə̂ nɛ̂njeenn le tɔyn a ta toje ngaa wa?» 5Yeenn ngaâ Jeju pa arəde nan: «Aaje rɔse! Arəje dəw ərəse ang! 6Dəwje nya a ddeeje kə rim ngaâ a paje nan: ‹Əman â m-to Kristə le!› Dâ kərəje dəwje nya. 7Bbo ooje tar ddɔje kə̂ aw ddee ngɔsi kə tar ddɔje kə̂ nayn ddəw əw a, arəje bbəəl uta dɔse ang. Maji karə nɛ̂njeenn le toje bba. A, a to ddutu ndɔ ang bbay. 8Marə gəl-dəwje a kin ta dda ddɔ kə marə gəl-dəwje. Marə Bbe-kɔn a kin ta dda ddɔ kə marə Bbe-kɔn. Nangə a yəkə loje tə̂ dang dang, tɔkə bbo a koso. A nɛ̂njeenn tɔyn a toje tokə lə kunn-kutu nduru-ndo lə dɛnɛ̂n.»
Nɛ̂n kə̂ a kinga njê-njaje go Jeju tə̂
9«A sese, undaje kəmse dɔ rɔse tə̂. Dəwje a kawje kə se nɔn sariya tə̂. Dəwje a tundase mə kəy mbɔn-naan tə̂ lə Jiipije, dâ kawje kə se nɔn ngann mbayje tə̂ kə nɔn tɔkə mbayje tə̂ mbam ngaâ â toje to njê-tar-najije ləm. 10Mba maji karə dila mbər Tar kə̂ Maji darə dəwje tɔyn kete bba. 11Bbo daw kə se sariya tə̂ a, arəje məse sangəse kete mba tar kə̂ â paje wase gusu kə̂ â paje nɛ̂n tar le ang. Tar kə̂ Lubba a karəse karɛ̂ tə̂ənn njaa â ta ə-paje. To tar kə̂ sese njaa â paje ang. To Ndil-mə-nda â, a pa tar le.
12«Dəwje a kila ngakɔnde ji dəwje tə̂ karə n̂-tɔlde. Bɔ ngannje a ddaje tokə baann kə ngannde tɔ. Ngannje a təlje to njê-baanje lə bɔdede kə lə kɔndede ngaâ dâ karəje n̂-tɔlde. 13Dəwje tɔyn a mbətəjese mbam. A dəw kə̂ uwa arə ngəng ndərəng tee kɔnyɛ̂ tə̂ a, a kinga kaji.»
Dəwje a kooje ndoo nya
14«Â kooje ‹nɛ̂n kə̂ maji ang kə̂ aw tuju lo› kə̂ isi lo tə̂ kə̂ n̂-sangə dang mba Lubba, lo kə̂ asə karə nisi tə̂ ang. Maji karə dəw kə̂ aw tura makəturu nəənn gərə kandɛ̂ kə majɛ̂! Karɛ̂ tə̂ənn, maji karə dəwje kə̂ isije nangə Jude tə̂ aynje ər kə dɔ ddingirije tə̂.#13:14 Daniyɛl 9:27 15Maji karə dəw kə̂ isi dɔ kəy tə̂ ddisi aw mə kəy tə̂ mba kunn marə nɛ̂n ang.#13:15 Matiye 24:17 16Dəw kə̂ ee ndɔɔ̂ a, maji karə n̂-təl bbeê mba kunn kubbu laa ang tɔ. 17Dɔ ndɔje tə̂ənn, a to ndoo nya karə dɛnɛ̂nje kə̂ uwaje səm kə njê kə̂ ngannde aw ilje mba. 18Ə-dujuje Lubba karə nɛ̂ɛnn le to dɔ nɛyn-kul tə̂ ang. 19Mba mə ndɔje tə̂ənn, dəwje a kooje ndoo nya. Ləw baa kə̂ Lubba dda duninya ndərəng bbokənɛn, dəwje ooje ndoo tokə baann ang bbay. Goe tə̂ a, dəwje a kooje ndoo tokə baann ndɔ kâra ang ngaa. 20Bbo Əbbə-dəwje təl kə ndɔ nɛ̂njeenn le arə gɔju ang a, dəw kâra a kinga kaji ang. A n̂-təl nɛ̂n narə gɔju, mba dəwje kə̂ n̂-mbərəde tokə kete. 21Yeenn bba, bbo dəw pa arəse nan: ‹Ooje! Kristə le ee nəənn› wase: ‹Nee yoonn› a, ə-ndikije tə̂ saa ang. 22Mba kristəje kə̂ tɔkɔrɔ ang kə njê-kilaje mbər tar kə̂ tɔkɔrɔ ang a ddeeje. Dâ ddaje nɛ̂n-mɔrije kə nɛ̂nje kə̂ dum dɔ dəwje, bbo ddəw to a, njê kə̂ Lubba mbərəde kara dâ kərəjede tɔ. 23Yeenn a, sese, aaje rɔse! Mba m-ndɔru mbise kete mban.»
Ngonn lə dəw a ddee
24«Dɔ ndɔje tə̂ənn le, go nɛ̂n kəm-to-ndooje tə̂ le a, kar a tuka ndul ta nɛyn a nda ang ngaa. 25Əndɛtɛrɛndɛnje a kinje darâ gaynje nangə̂ ngaâ singa-mɔnguje kə̂ darâ a yəkəje. 26Yeenn ngaâ â kooje Ngonn lə dəw a ddee mə mum tə̂ kə singa-mɔngu laa tɔyn ddəm kə piti ddəm. 27Yeenn ngaâ nâ kula anjəje laa karə n̂-mbɔnje dəwje kə̂ n̂-mbərəde kɔyn nangə tə̂ kə̂ sɔ tɔyn ndərəng kɔyn dara tə̂.»
Nɛ̂n-kɔju-marɛ̂ kə̂ to kakə pigə
28«Ooje nɛ̂n-kɔju-marɛ̂ dɔ kakə pigə tə̂. Bbo barkəm kakə pigə unn kutu təwn ngaâ kamɛ̂ aw unju a, ə-gərəje to nɛyn nɛ̂n-dubbu ddee ngɔsi ngaa. 29Ddəw kâra baa, bbo ooje nɛ̂njeenn le a, maji karə ə-gərəje to Ngonn lə dəw nayn ngɔsi ngaa, tokə nar ta-ddəw tə̂ ta kandə bbeê ləse. 30Tɔkɔrɔ, m-pa marəse, dəwje kə̂ bbokənɛn nəənn a koyje tɔyn ang bbay a, nɛ̂njeenn tɔyn a toje. 31Dara kə nangə a ndayje, a tarje ləm a ndayje ndɔ kâra ang.»
Dəw kâra gərə ndɔ kə̂ Ngonn lə dəw a ddee nɛ̂n ang
32«A ndɔ wase kar kə̂ nɛ̂njeenn le a toje nɛ̂n le, dəw kâra gərə ang. Anjəje kə̂ darâ wase Ngonn le kara gərə ang. Bɔ kə karɛ̂ baa â gərə. 33Arəje kəmse kətərə, arje dɔ gɔlse tə̂. Mba ə-gərəje ndɔ kə̂ nɛ̂njeenn le a toje nɛ̂n ang. 34Nɛ̂ɛnn a to tokə dəw kə̂ a ta kaw kə mba tə̂ ngaâ inya nɛ̂nje mə ji njê-kulaje tə̂ laa. Narə dəw kâra kâra kula laa karə dda. Nunn ndu narə nje-ngəm ta-kəy karə tibbi ang. 35Yeenn a, arəje bbi ɔru kəmse ang, mba ə-gərəje ndɔ kə̂ nje-kəy le a ddee nɛ̂n ang. Nâ ddee lo-kul tə̂ wase til tə̂ kə̂ kar nday wase dɔbakəbbe tə̂ wase kə əndɔɔ wa kara â gərəje ang. 36Maji karə n̂-təl n̂-ddee ningase busu dɔ bbi tə̂ ang. 37Tar kə̂ m-pa marəse nəənn, m-pa marə dəwje tɔyn: Arəje kəmse kətərə.»
Currently Selected:
Markə 13: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
