Markə 15

Daw kə Jeju rɔ Pilatə tə̂

1Kə əsindɔɔ baa njaa, mbayje lə njê-poloje Lubba mbɔnje naan kə tɔkəje lə Jiipije, njê-gərəje-Ndu kə kəsə njê-gangəje sariya tɔyn ta koo nɛ̂n kə̂ ta dda. Darə n̂-tɔ Jeju ngaâ daw saa nɔn gɔl Pilatə tə̂. 2Pilatə duju Jeju nan: «Ə-to mbay lə Jiipije wa?» Jeju le ilɛ̂ tə̂ nan: «Əi njaa ə-pa mban.»

3Mbayje lə njê-poloje Lubba undaje tarje nya dɔ Jeju tə̂. 4Pilatə təl duje bbay nan: «Ila tar tə̂ kâra ang wa? Oo tarje tɔyn kə̂ dəwje nəənn ulaje tai tə̂ nəənn.» 5A Jeju ila tar tə̂ kâra ang arə dum dɔ Pilatə.

N̂-gangə sariya-yo dɔ Jeju tə̂

6Kə ndɔ kusu Pakə kâra kâra tɔyn, ngonn mbay le aw ɔru dəw kâra kəy-kula tə̂. Dəw kə̂ dəwje kə̂ banya ndikije karə nɔrɛ̂ bba naw nɔrɛ̂. 7A marə dəw kə̂ ria nan Barabas ee kəy-kula tə̂, ne de kə marə dəwje kə̂ tɔlje dəw dɔ ndɔ tə̂ kə̂ n̂-ddaje nɛ̂n dɔ-ngəng kə njê-kɔn-bbeje. 8Dəwje kə̂ banya awje kəy lə Pilatə ngaâ dujeje karə n̂-dda nɛ̂n kə̂ naw dda kə bbal kâra kâra le narəde. 9Pilatə ilade tə̂ nan: «Ə-ndikije karə minya mbay lə Jiipije le marəse wa?»

10Mba Pilatə gərə kə majɛ̂ to mə â mbayje lə njê-poloje Lubba undaje kə Jeju bba uwɛ̂je ulɛ̂je jia tə̂ nəənn. 11A mbayje lə njê-poloje Lubba le ɔsuje kutu dəwje kə̂ banya karə dujuje Pilatə arə Barabas â ninyɛ̂ narəde. 12Pilatə təl dujude bbay nan: «Yeenn a, ddi â ə-ndikije karə m-dda kə dəw kə̂ aw bbarɛ̂je to mbay lə Jiipije le wa?» 13N̂-təlje duruje əkii nan: «Ə-tɔlɛ̂ kakə-dəsə tə̂.» 14Pilatə dujude nan: «Ddi kə̂ maji ang â n̂-dda wa?» A n̂-təlje duruje əkii darə ngəng nan: «Ə-tɔlɛ̂ kakə-dəsə tə̂.» 15Pilatə ndiki ta dda karə rɔ dəwje kə̂ banya le nəəlde. Yeenn bba nɔru Barabas kəy-kula tə̂ narəde. Narə n̂-tunda Jeju kə ndəy a nulɛ̂ ji mbambaje tə̂ karə n̂-tɔlɛ̂ kakə-dəsə tə̂.

Mbambaje kokoje Jeju

16Mbambaje awje kə Jeju mə kəy tə̂ lə ngonn mbay le ngaâ bbarje kəsə mbambaje tɔyn. 17Dulɛ̂je kubbu kə̂ kasɛ. Goe tə̂ a, n̂-peteje kula kə̂ to konn to əjɔkudɔ dundaje dɔɛ̂ tə̂. 18Goe tə̂ a, n̂-ddɛɛ̂je lapiya n̂-paje nan: «Lapiya, tɔkə mbay lə Jiipije.»

19N̂-tundaje dɔɛ̂ kə kârə mu, n̂-tije wənrə dɔɛ̂ tə̂ ngaâ dɔsu məkəjə-gɔlde nangə̂, dulaje dɔde ndərəng darə ɔsu nangə nɔɛ̂n tə̂. 20Dɔjɛ̂je n̂-kokoje nɛ̂n n̂-tunga a, duwaje kubbu kə̂ kasɛ kə̂ rɔɛ̂ tə̂ le dɔruje ngaâ n̂-təlje dulɛ̂je kubbuje laa. Goe tə̂ a, n̂-teeje saa mə bbe tə̂ le kə ddang dawje ta kaw tɔlɛ̂ kakə-dəsə tə̂.

N̂-tɔl Jeju dɔ kakə-dəsə tə̂

21Duwaje marə dingaw kə̂ in ndɔɔ̂ aw nday darə oto kakə-dəsə lə Jeju le. Ri dingaw le nan Simɔn, n̂-to dəw kə̂ bbe tə̂ kə̂ Sirɛnn, n̂-to bɔ Alɛkəjandərəje kə Rupusje. 22Dawje kə Jeju le marə lo tə̂ kə̂ daw bbar nan Gɔlogota. Kandə ri le nan «lo ka-dɔ-dəw je.» 23Darɛ̂je bɛn kə̂ dungu nɛ̂n kə̂ maji ang məɛ tə̂ karə nay, a n̂-mbətə ta kay.

24N̂-bbəreje kakə-dəsə tə̂ le ngaâ n̂-ddɔje mbari n̂-kaynje nɛ̂n naan kubbuje laa. 25N̂-bbəre kakə-dəsə tə̂ kə kar jikara kə̂ kə əndɔɔ. 26N̂-dda marə makəturu n̂-bbərə ər dɔɛ̂ tə̂ ta tɔju nɛ̂n gəl nɛ̂n kə̂ n̂-gangə nɛ̂n sariya dɔɛ̂ tə̂ le nan: «Dəw nəənn to mbay lə Jiipije.» 27N̂-bbərəje njê-bbokoje joo kakə-dəsəje tə̂ mbɔrɛ̂ tə̂ tɔ. Marɛ̂ kâra ər kɔl, a marɛ̂ kâra ər gəl. [28Yeenn bba, tar kə̂ n̂-dda Makəturu tə̂ lə Lubba ddee to tar kə̂ tɔkɔrɔ. Tar le nan: «Dilɛ̂ horo njê-tɔl dəwje tə̂.»]

29Dəwje kə̂ aw ndayje lo tə̂ənn tukaje dɔde tajɛ̂je nɛ̂n. N̂-paje darɛ̂je nan: «Əi kə̂ ə-ndiki ta tɔ kəy-polo Lubba ta təl dda marɛ̂ ture tə̂ mə ndɔ mota tə̂ le. 30Əi njaa aji rɔi bbo in dɔ kakə-dəsə tə̂ le uru nangə̂.»

31Mbayje lə njê-poloje Lubba kə njê-gərəje-Ndu kara aw kokoje Jeju, n̂-paje horo naan tə̂ tɔ nan: «Naji marə dəwje, a nasə kaji da-rɔɛ̂ njaa ang! 32Maji karə ne kə̂ n̂-to Kristə, tɔkə mbay kə̂ Ijarayɛl le n̂-ddisi dɔ kakə-dəsə tə̂ nuru nangə̂. Yeenn bba joo a, ja kunn məje karɛ̂.» Dəwje kə̂ n̂-bbərəde dɔ kakə-dəsə tə̂ mbɔrɛ̂ tə̂ le kara aw tajɛ̂je tɔ.

Koy lə Jeju

33Gɔl kar dɔku gire joo a, lo ndul dɔ nangə tə̂ le tɔyn ndərəng gɔl kar mota kə̂ lo-kul tə̂. 34A ta tee gɔl kar tə̂ kə̂ mota a, Jeju uru əkii kə singa nan: «Ɛloyi, Ɛloyi, laman sabakatani!» Kandə tar le nan: «Lubba ləm, Lubba ləm, mba ddi bba ə-tusum inyam wa?»

35Marə dəwje kə̂ eeje lo tə̂ənn le ooje tar le a, n̂-paje nan: «Ooje, naw bbar Eli.» 36Marə dəw kâra horode tə̂ ayn kə ngɔru aw unn marə ta-kubbu ula mə maann-binyə tə̂ kə̂ masə ngaâ n̂-kə ta kârə mu tə̂ ula arə Jeju karə ay ngaâ pa nan: «Inyaje, ja koo se Eli a ddee kɔrɛ̂ dɔ kakə-dəsə tə̂ kilɛ̂ nangə̂ wa!» 37A Jeju uru əkii kə singa ngaâ oy.

38Yeenn ngaâ kubbu kə̂ n̂-tɔ n̂-gangə nɛ̂n mə kəy-polo Lubba tiir dannâ joo, in taar uru bəər. 39Nje-kɔn dɔ mbambaje kə̂ Rɔm kə̂ ar nɔn Jeju tə̂ le oo gusu kə̂ Jeju oy nɛ̂n le a, n̂-pa nan: «Dəw nəənn to Ngonn lə Lubba njaa.»

40Marə dɛnɛ̂nje eeje tə̂ənn tɔ, darje ddəw əw daw daaje lo. Mari kə̂ Magədala de kə Mari kɔn Jakə kə Jojeje kə Salome deeje horode tə̂. 41Ləw dɛnɛ̂njeenn le njaje go Jeju tə̂ ngaâ ddaje saa kar tə̂ kə̂ n̂-nayn nɛ̂n Galile. Dɛnɛ̂nje tokə banya kə̂ awje saa Jerujalɛm eeje tə̂ənn tɔ.

Jojɛpə dubbu Jeju

42Ndɔɛ̂ le to ndɔ gɔl rɔ nginan nɛ̂n ndɔ-kuwa-rɔ lə Jiipije ngaâ dɔ lo-kul ngaa. 43Jojɛpə kə̂ Arimate ddee tee. N̂-to marə tɔkə kâra horo marɛ̂je tə̂ kə̂ aw isije tɔkə lo gangə sariya tə̂ lə Jiipije. Ne kara naw nginan kɔn-mbay lə Lubba. N̂-tɔn bire to dingaw naw duju Pilatə karə arɛ̂ niinn Jeju le. 44Pilatə oo nan Jeju le oy mban a, dum dɔɛ̂. Yeenn ngaâ nula n̂-bbar tɔkə mbamba lə dəwje kə̂ Rɔm, n̂-duje se Jeju le oy ləw baa wa? 45Tɔkə mbamba kə̂ Rɔm le pa tar yo le arɛ̂. Yeenn ngaâ narə ddəw Jojɛpə karə unn niinn le. 46Jojɛpə le ndoko tɔkə bəl-kubbu kə̂ nda. Nɔru niinn le dɔ kakə-dəsə tə̂, n̂-kə kə tɔkə bəl le ngaâ nila mə buwa-yo tə̂ kə̂ narə duru mə ər tə̂. Goe tə̂ a, n̂-ndubbu marə ər nutu nɛ̂n ta buwa-yo le. 47Mari kə̂ Magədala de kə Mari kɔn Jojeje daw daaje lo kə̂ dila niinn le tə̂.

Currently Selected:

Markə 15: KabbaDkS

Highlight

Copy