Markə 6
6
Dəwje kə̂ Najarɛtə unnje məde arə Jeju ang
1Jeju ɔtu lo tə̂ənn təl bbeê laa Najarɛtə. Njê-njaje goe tə̂ ɔruje goe. 2Ndɔ-kuwa-rɔ a, Jeju aw tɔju nɛ̂n dəwje mə kəy mbɔn-naan tə̂ lə Jiipije. Nɛ̂n-tɔju laa le dum dɔ dəwje kə̂ banya kə̂ aw ooje le ngaâ paje nan: «Ninga nɛ̂nje nəənn tɔyn dda wa? Nân bba arɛ̂ kəm-karɛ kə singa dda nɛ̂n-mɔrije kə̂ be nəənn wa? 3Nje-dda kula kakə le â nəənn ang wa? N̂-to ngonn lə Mari ang wa? Ngakɔɛ̂nje â toje to Jakə kə Joje kə Judə kə Simɔn ang wa? Ngakɔn-nannɛ̂ â isije kə̂ je nəənn ang wa?» Nɛ̂ɛnn le dda arə n̂-mbətəje ta kunn məde karɛ̂. 4Yeenn ngaâ Jeju pa arəde nan: «Dəwje aw walje nje-kila mbər tar lə Lubba kəsə loje tə̂ tɔyn bbo bbe tə̂ kə̂ nisi tə̂, horo nujuje tə̂ laa wase mə kəy tə̂ laa ang.» 5Jeju asə ta dda nɛ̂n-mɔri kâra lo tə̂ənn ang. Bbayɛ̂ njaa to marə njê-rɔ-toje kə̂ nila jia dɔde tə̂ narə dajije. 6A mə-kunn ləde kə̂ goto le to nɛ̂n kə̂ dum dɔɛ̂.
Jeju ula njê-kaw-kulaje laa kə̂ dɔku gire joo
Goe tə̂ a, Jeju nja mə ngann bbeje tə̂ tɔyn kə̂ mbɔr Najarɛtə tə̂ mba tɔju nɛ̂n. 7Jeju bbar njê-kaw-kulaje laa kə̂ dɔku gire joo le. Nulade joo joo. Narəde singa tubba nɛ̂n ndilje kə̂ maji ang. 8Nunn ndu narəde nan: «Unnje nɛ̂n kâra mba nja nɛ̂n ddəw-boô ang. Unnje mapa ang ddəm bbɔl ang ddəm unnje narɛ bbərəse tə̂ ang ddəm. Bbayɛ̂ njaa to kakə â ta uwaje jise tə̂. 9Ulaje nɛ̂n-gɔl kə̂ to sandal. A awje kə kubbu-kul joo ang.» 10Jeju pa arəde bbay nan: «Bbo ə-teeje marə lo tə̂, â bbo n̂-taase kə kə̂y a, ə-naynje tə̂ənn ndərəng ɔtuje nɛ̂n. 11Bbo dəwje kə̂ marə bbe tə̂ ndikije ta taase kə kə̂y ang ngaâ dooje tar ləse ang a, bbo a ta kɔtuje lo tə̂ənn le a, ə-tundaje bum nangə kə̂ gɔlse tə̂. Nayn to naji ləse â ɔruje.»
12Njê-njaje go Jeju tə̂ le awje ngaâ ilaje mbər karə dəwje turuje məde. 13N̂-tubbaje ndilje kə̂ maji ang tokə banya, dilaje ubbu dɔ njê-rɔ-toje tə̂ darə ajije.
Tar yo lə Jan-Batisi
14Mbay Erodə oo tar lə Jeju mba ria bbar kə lo tɔyn. Marə dəwje paje nan: «Jan-Batisi kə̂ oy le â ndol! Mba yeenn bba, ninga singa dda nɛ̂n-mɔrije.» 15Marɛ̂je paje nan: «To Eli.» A marɛ̂je paje nan: «Marə nje-kila mbər tar lə Lubba tokə lə marɛ̂je kə̂ ləw â nəənn.» 16Erodə oo tarje le baann a, pa nan: «Jan nəənn kə̂ əman njaa marə n̂-gangə dɔɛ̂ le â ndol.»
17-18Dɔ ndɔɛ̂ tə̂ənn, Erodə Antipas taa Erodiyadə dɛnɛ̂n lə ngokɔɛ̂n Pilipi jia tə̂. A Jan-Batisi pa arə Erodə le nan: «Ndu ari ddəw ta karə ə-taa dɛnɛ̂n lə ngokɔin ang.» Mba yeenn bba Erodə unn ndu arə duwa Jan n̂-tɔɛ̂ dilɛ̂ kəy-kula tə̂. 19Erodiyadə ndiki Jan ang njaa nyɔm ngaâ ndiki karə n̂-tɔl Jan le, a ninga ddəw ang, 20mba Erodə aw bbəəl Jan le nya. N̂-gərə to Jan to dəw kə̂ to gatə gatə ddəm dəw kə̂ Lubba undɛ̂ dang ddəm arə naw ngəmɛ̂ kə majɛ̂. Noo tar kə̂ Jan aw pa a, n̂-gərə nɛ̂n kə̂ nâ dda ang. A dɔ ye tə̂ənn njaa kara, n̂-ndiki nya ta koo tarje laa.
21A marə ndɔ, ddəw ɔru arə Erodiyadə. To ndɔ kə̂ Erodə inga bbal kâra dɔ marɛ̂ tə̂ ngaâ n̂-dda kusu n̂-bbar nɛ̂n tɔkə dəwje kə̂ aw ddaje saa kula, tɔkə mbambaje laa kə tɔkə dəwje kə̂ Galile. 22Ngonn lə Erodiyadə kə̂ dɛnɛ̂n andə mə kəy tə̂ le ngaâ unn kutu la. A la laa le nəəl Erodə kə njê kə̂ n̂-bbarde le nya. Yeenn ngaâ tɔkə mbay Erodə pa arə ngonn kə̂ dɛnɛ̂n le nan: «Ə-dujum nɛ̂n kə̂ məi ndiki a, mâ kari.» 23Nunda yo narɛ̂ nan: «Nɛ̂n tɔyn kə̂ ə-dujum a, mâ kari. Le to dəbbə bbe-kɔn ləm njaa bba ə-duju kara mâ kari.» 24Ngonn kə̂ dɛnɛ̂n le tee aw inga kɔɛ̂nje ngaâ duje nan: «Ddi â ta m-duju wa?» Kɔɛ̂nje ilɛ̂ tə̂ nan: «Ə-duju dɔ Jan-Batisi.»
25Ngonn kə̂ dɛnɛ̂n le təl kə ngɔru aw inga tɔkə mbay le pa arɛ̂ nan: «M-ndiki ta karə arəm dɔ Jan-Batisi mə bay-sambe tə̂ bbasinɛn nəənn njaa.» 26Rɔ tɔkə mbay le nəəle ang njaa nyɔm. A mba nunda yo kəm dəwje tə̂ kə̂ n̂-bbarde mban le, nasə ta mbətə ang. 27Yeenn ngaâ njangə baa njaa nunn ndu narə marə mbamba laa karə naw gangə dɔ Jan-Batisi le kəy-kula tə̂ n̂-ddee nɛ̂n narɛ̂. 28Mbamba le aw ddee kə dɔ Jan-Batisi le mə bay-sambe tə̂. Narə ngonn kə̂ dɛnɛ̂n le ngaâ ngonn kə̂ dɛnɛ̂n le arə kɔɛ̂nje. 29Njê-njaje go Jan tə̂ le ooje tarɛ̂ a, daw dunn niinnɛ̂ n̂-dubbuje.
Jeju arə nɛ̂n-kusa dəwje doro min
30 Njê-kaw-kulaje le təlje rɔ Jeju tə̂ ngaâ paje tar nɛ̂nje tɔyn kə̂ n̂-ddaje kə nɛ̂nje kə̂ n̂-tɔjuje dəwje le darəje Jeju. 31Dəwje nya aw ddeeje, a marɛ̂je aw təlje arə nɛ̂n-kusa kara Jeju kə njê-kaw-kulaje laa le dingaje ddəw ta kusa ang. Yeenn bba Jeju pa arəde nan: «Sese, ə-ddeeje awje səm lo tə̂ kə̂ dəwje goto tə̂ ta uwaje rɔse ngaji.»
32Dunnje tɔkə to ngaâ dɔruje rɔde dawje kə lo tə̂ kə̂ dəwje goto tə̂.
33A dəwje nya oode kawde tə̂ ngaâ gɔɔnjede gərəjede. Yeenn bba, dinje tɔkə bbeje tə̂ dang dang tɔyn ngaâ daynje daw teeje lo tə̂ənn le kete darə Jeju kə njê-kaw-kulaje le.
34Jeju in mə tɔkə to tə̂ le uru nangə̂ a, oo dəwje kə̂ banya le ngaâ, noo kəm-to-ndoo ləde mba n̂-toje tokə batəje kə̂ nje-ngəmde goto. Yeenn ngaâ nunn kutu tɔjude nɛ̂nje nya nya. 35Kar nday nya ngaâ njê-njaje go Jeju tə̂ le awje rɔɛ̂ tə̂ paje arɛ̂je nan: «Lo nəənn to mə kɔr baa ngaâ lo kara aw ndul ngaa. 36Ə-tubba dəwje nəənn arə dawje dɔ-ndɔɔ̂ kə ngann bbeje tə̂ kə̂ ngɔsi nəənn daw ndokoje nɛ̂n dusaje.» 37A Jeju ilade tə̂ nan: «Sese njaa arəjede nɛ̂n dusaje.» Njê-kaw-kulaje le dujeje nan: «Ta jaw ndoko mapa kə kandə narɛ kɔr joo jarəde dusa wa?» 38Jeju dujude nan: «Mapa baânn â to jise tə̂ wa? Aw aaje lo ooje.» Daw daaje lo ngaâ n̂-paje darɛ̂je nan: «Mapa min kə kanjije joo â to.»
39Yeenn ngaâ Jeju unn ndu arəde karə darə dəwje le tɔyn uwaje dɔ naan kə loe loe ngaâ isije dɔ muje tə̂ kə̂ təbbə. 40Dəwje le isi nangə̂ kə kulɛ̂ kulɛ̂ dɔdɔku dɔdɔku, marɛ̂je dɔmin dɔmin. 41Jeju jin mapa kə̂ min kə kanji kə̂ joo le, unn kəmɛ̂ kə darâ, arə wooyo Lubba. N̂-tətə mapa le narə njê-njaje goe tə̂ karə n̂-kaynje dəwje kə̂ banya le. Jeju kayn kanjije kə̂ joo le dəwje le tɔyn tɔ. 42Dəwje le tɔyn usaje arə məde ndann. 43Njê-njaje go Jeju tə̂ le mbɔnje kəse kə̂ nayn ddusu ngann karɛ dɔku gire joo. 44Horo dəwje tə̂ tɔyn kə̂ usaje nɛ̂n le, dingawje eeje doro min.
Jeju nja dɔ maann tə̂
45Njangə baa goe tə̂ a, Jeju ndasə njê-njaje goe tə̂ karə daal tɔkə to ta daw nginɛ̂ tura baâ ər kə Betesayida. A ne, n̂-nayn ta tubba dəwje kə̂ banya le karə n̂-təlje. 46Goe tə̂ a, naw dɔ marə ddingiri tə̂ ta duju Lubba. 47Lo-kul a, tɔkə to le tee dann maann tə̂ ngaâ Jeju nayn kə karɛ̂ baa nangə̂. 48Noo a, njê-njaje goe tə̂ le aw ddaje singa nya bba aw ləlje tɔkə to le, mba ləl ula aw tila nɛ̂n kəmde. Kar tə̂ kə̂ lo mɔngu nyɛnɛnɛ a, Jeju le nja dɔ maann tə̂ aw kə rɔde tə̂ ngaâ a ta ndayde. 49Dooeje naw nja dɔ maann tə̂ le a, dəjəje to uman. Yeenn bba duruje əkii. 50Mba dede tɔyn njaa daw dooeje ngaâ bbəəl uta dɔde. A njangə baa njaa n̂-pa kə de tar nan: «Arəje wurse oso nangə̂, ə-bbəəlje ang, əman â nəənn.»
51Naal tɔkə to le nisi mbɔrde tə̂ a, ləl le əw rɔɛ̂. Dɔ njê-njaje go Jeju tə̂ le ayn. 52Mba nɛ̂n-mɔri kə̂ Jeju dda ddəw mapa tə̂ kə̂ n̂-kayn dəwje le tɔjude marə nɛ̂n kâra ang bbay. Məde nayn aw kətərə.
Jeju aji njê-rɔ-toje nangə tə̂ kə̂ Jenejarɛtə
53Jeju kə njê-njaje goe tə̂ daalje dɔ maann le teeje mbɔr Jenejarɛtə tə̂ ngaâ duruje nangə̂. 54Dinje tɔkə to le duruje nangə̂ be a, dəwje ooje Jeju ngaâ gɔɔɛ̂nje gəreje. 55Yeenn bba dəwje awje kə ngɔru dɔ nangə tə̂ le tɔyn ngaâ lo kə̂ dooje nan Jeju le ee tə̂ a, daw kə njê-rɔ-toje darɛ̂je kə tuwaje ləde baa baa. 56Lo tɔyn kə̂ Jeju aw tə̂, tɔkə bbeje tə̂ wase ngann bbeje tə̂ kə dɔ-ndɔɔje tə̂ kara, dəwje ddeeje kə njê-rɔ-toje natâ ngaâ n̂-ddaje rɔde to ndoo rɔɛ̂ tə̂ nan: «Inyade arə ta-kubbu ləi baa njaa kara dɔruje kə jide.» Yeenn ngaâ dede kə̂ dɔruje ta-kubbu laa le dajije.
Currently Selected:
Markə 6: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
