Yoˊhan 8

1Daecti, Yesuˊ Eun hukˊ pang gong Sanlon naˊ. 2Yam cengˊ ka naˊ, Eun tang ingˊ nang kangˊhkungˊ ka nya hk'oˊ munˊ keuting naˊ baee. Peue heunˊ naˊ ce ingˊ cu ri rop Eun. Yesuˊ Eun mokˊ, Eun tangˊ ri sangsawnˊ ce. 3Peue guil leukahˊ ritroe naˊ ce maeeˊ peue Hparisaeˊ naˊ ce va beunˊ ingˊ ti peue. Kopti lenˊcu eun, peue mheutˊ eun. Ce kah eun cawng nanggalˊ ce peue cum heunˊ naˊ. 4Ce lahˊ a ri Yesuˊ Eun, “Seuraˊ, mheutˊ ye beunˊ aenˊ eun yam buih lenˊcu eun naˊ. 5Hk'aˊnaee leukahˊ ritroe eun Moˊse naˊ, kah ka eˊ dhimˊ beunˊ yeuh kuˊ yeuhkiˊ naˊ eun yeum ri meulˊ seumu, Mi ri, Mi ciˊ kaw lahˊ a yeuh saˊnhawˊ?” 6Mhaingˊ ce Eun yeuhkiˊ naˊ, meuh a kopti tungˊ ce ri kaw tangˊ mapˊ ri Heun. Daecti Yesuˊ Eun gawˊ ri hkawsˊhkaesˊ bhenˊ keuteˊ naˊ ri geunˊ tiˊ ri naˊ. 7Kopti saeˊcaeeˊ ce ri mhaingˊ Eun naˊ, Eun vuh ri lahˊ a ri ce, “Hk'aˊnaee peˊ, aˊnhawˊ ciˊ unˊ kueˊ mapˊ, kah eun meuh nang dhimˊ eun nanggalˊ reuˊ.” 8Hawcˊ koˊ, Eun tang gawˊ ri hkawsˊhkaesˊ bhenˊ keuteˊ naˊ baee.

9Yam pun ce ri mhawngˊ leukahˊ awnˊ a naˊ, a tangˊ ri nang kawt hk'aiˊ ce naˊ ce baet ti pucti heulˊ ti peue hawcˊ ti peue a heulˊ vang yawo Yesuˊ Eun maeeˊ beunˊ cu ri cawng mawnˊ naˊ eun koe. 10Yesuˊ Eun tang vuh ri mhaingˊ eun, “Beunˊ, ce ciˊ heulˊ hk'aˊnhawˊ eucˊ? Aˊnhawˊ unˊ tangˊ ce mapˊ ri mi saecˊ ti peue aw?”

11Beunˊ naˊ eun lahˊ, “Uihˊ, caˊ tangˊ ce.” Yesuˊ Eun lahˊ, “Uiˊ ku hkuinˊ kaw tangˊ mapˊ ri mi. Heulˊ reuˊ, tecla hk'aˊ aˊyu imˊ mapˊ mi naˊ reuˊ.”

Leukahˊ hkamˊ saˊhkiˊ Eun Yesuˊ naˊ yumˊ pun ka

12Yam Yesuˊ tang lahˊ Eun a ri peue cum heunˊ naˊ ce baee naˊ, Eun lahˊ, “Meuh Uiˊ kuˊ cengˊ ka bhenˊ keuteˊ naˊ. Peue hotˊ Uiˊ naˊ ce hkuinˊ kaw laee long hk'aˊnaee hk'aˊ duimˊlawng naˊ, daecti ce kaw kueˊ kuˊ cengˊ ka hk'aˊ civit naˊ.”

13Peue Hparisaeˊ naˊ ce lahˊ a ri Heun, “Keueˊ, hkamˊ Mi saˊhkiˊ pun tuˊ ri naˊ meun. Leukahˊ hkamˊ saˊhkiˊ Mi naˊ yumˊ unˊ pun ka.”

14Yesuˊ Eun topˊ a, “Uiˊ saecˊ naˊ hkamˊ saˊhkiˊ pun tuˊ ri naˊ meun koˊ, daecti leukahˊ hkamˊ saˊhkiˊ Uiˊ naˊ yumˊ pun ka yeut. Kopti Uiˊ ingˊ neum tawngnhawˊ naˊ maeeˊ Uiˊ kaw heulˊ tawngnhawˊ naˊ, yawng Uiˊ a. Daecti Uiˊ ingˊ neum tawngnhawˊ naˊ maeeˊ Uiˊ kaw heulˊ tawngnhawˊ naˊ, hpaw peˊ caˊ yawng a. 15Tawsˊ peˊ aˊmu hotˊ aˊcangˊ ce peue naˊ, Uiˊ hkuinˊ tawsˊ aˊmu ri aˊnhawˊ. 16Daecti Uiˊ lawn naˊ tawsˊ aˊmu koˊ, hk'aˊ tawsˊ aˊmu Uiˊ naˊ cawpˊ ka. Kopti hpaw Uiˊ caˊ yeng ri yeuh a koe, Aˊkuiingˊ Cawoˊ cusˊ Uiˊ lih naˊ utˊ Eun maeeˊ Uiˊ. 17Saecˊ meuh hk'aˊnaee htawm leukahˊ ritroe peˊ naˊ meun, a ku temˊ ri lahˊ leukahˊ hkamˊ saˊhkiˊ ka peue lalˊ peue naˊ yumˊ pun ka yeut. 18Hkamˊ Uiˊ saˊhkiˊ pun tuˊ ri naˊ meun. Kuˊ meuh saˊhkiˊ Uiˊ kuˊ seubu ti peue naˊ a meuh Aˊkuiingˊ Cawoˊ cusˊ Uiˊ lih naˊ Eun.”

19Hawcˊ koˊ, ce mhaingˊ Eun, “Kuiingˊ Mi naˊ Eun ciˊ utˊ tawngnhawˊ” Yesuˊ Eun topˊ a, “Uiˊ ri unˊ lahˊ Kuiingˊ Uiˊ Eun unˊ lahˊ, unˊ yawng peˊ Ya. A lawn naˊ meuh yawng peˊ Uiˊ koˊ, peˊ ku naˊ yawng Kuiingˊ Uiˊ naˊ Eun.” 20Yesuˊ lahˊ Eun a yeuh keutitˊ naˊ a meuh yam sangsawnˊ Eun nang nya hk'oˊ munˊ keuting keunam ka laem uinˊ hk'eung dum ri tan naˊ. Kopti yam Eun naˊ unˊ nang rot ka naˊ, a hkuinˊ kueˊ nang mheutˊ ri ti Eun saecˊ ti peue.

21Yesuˊ Eun tang lahˊ a ri ce baee, “Kaw Uiˊ heulˊ. Peˊ kaw hotˊ ri sok Uiˊ, daecti peˊ kaw pun ri yeum hk'aˊnaee mapˊ ri naˊ. Vang heulˊ Uiˊ naˊ, peˊ hkuinˊ kaw cang heulˊ ri ka.”

22Kopti meuh a leukahˊ aenˊ a naˊ, peue Yuˊda naˊ ce mhaingˊ puri ri ka, “Kaw Eun toh meun ri aw? Naˊ chakˊ meuh kopti lahˊ Eun, ‘Vang heulˊ Uiˊ naˊ, peˊ hkuinˊ kaw cang heulˊ ri ka naˊ.’?”

23Yesuˊ Eun tang suip ri lahˊ, “Ingˊ peˊ neum hk'aˊcol. Uiˊ lih neum pang lhungˊ. Peˊ meuh isˊ ka bhenˊ keuteˊ aenˊ na. Uiˊ ri, Uiˊ hkuinˊ meuh isˊ ka bhenˊ keuteˊ aenˊ na. 24Lahˊ Uiˊ a ri peˊ hawcˊ, kaw peˊ pun ri yeum hk'aˊnaee mapˊ ri naˊ. Peˊ lawn unˊ yumˊ meuh Uiˊ Heun ri koˊ, peˊ kaw pun ri yeum hk'aˊnaee mapˊ ri naˊ neumneum.”

25Ce mhaingˊ Eun, “Mi ciˊ meuh aˊnhawˊ?” Yesuˊ Eun topˊ a, “Seunˊ a kuˊ lahˊ Uiˊ ri peˊ nanggalˊ aenˊ a naˊ. 26Kawnˊ kueˊ Uiˊ leukahˊ kuˊ kaw Uiˊ tawsˊ aˊmu ri peˊ naˊ heunˊ ceu. Daecti Cawoˊ cusˊ Uiˊ lih naˊ hk'oˊ Eun yumˊ nyawkˊ. Kuˊ pun Uiˊ ri mhawngˊ ri Heun naˊ, Uiˊ lahˊ a ri peue bhenˊ keuteˊ naˊ peue.”

27Ce hkuinˊ yawng lahˊ Eun lawng Eun Kuiingˊ ri naˊ Eun ri ti. 28Kop awnˊ na Yesuˊ Eun lahˊ, “Hawcˊ yuk peˊ Konˊ aiˊ peue naˊ Eun hukˊ pang kleumˊ rawngˊtawpˊ naˊ, peˊ naˊ kawnˊ yawng meuh Uiˊ kuˊ lahˊ Uiˊ ri meuh naˊ Eun. Hpaw Uiˊ caˊ yeng ri yeuh a meun, daecti lahˊ Uiˊ a hotˊ pal kuˊ sangsawnˊ Eun Kuiingˊ Uiˊ naˊ. 29Cawoˊ kuˊ cusˊ Uiˊ lih naˊ utˊ Eun maeeˊ Uiˊ. Kopti yeuh Uiˊ kuˊ htukˊ hpumˊ Eun naˊ laleung, Eun hkuinˊ tecla Uiˊ utˊ koe.” 30Yam lahˊ Eun leukahˊ aenˊ ce naˊ, peue heunˊ peue naˊ ce kueˊ hk'aˊ yumˊ hk'aˊnaee Heun.

Ceucat eun Abraham

31Yesuˊ lahˊ Eun a ri peue Yuˊda kuˊ yumˊ Eun naˊ ce, “Peˊ lawn jhawpˊ leukahˊ sangsawnˊ Uiˊ naˊ keutawnˊ koˊ, meuh peˊ tapaeˊ Uiˊ neumneum. 32Peˊ naˊ yawng hk'aˊ neumneum naˊ. Hk'aˊ neumneum naˊ a kaw yeuh peˊ meuh peue pon.”

33Ce topˊ a, “Meuh ye ceucat eun Abraham. Ye hkuinˊ duing meuh mhaiˊ aˊnhawˊ. Mi ciˊ kawnˊ kaw lahˊ ye meuh peue pon yeuh saˊnhawˊ?”

34Yesuˊ Eun topˊ a, “Kaw Uiˊ lahˊ a ri peˊ neumneum. Peue yeuh mapˊ naˊ ce ku peue, meuh ce mhaiˊ ka mapˊ naˊ. 35Mhaiˊ naˊ eun hkuinˊ pun ri utˊ ti nya naˊ cotˊcu ri, daecti konˊ naˊ eun meuh peue nya naˊ cotˊcu ri. 36Kop awnˊ na, Konˊ aiˊ naˊ Eun lawn teumˊkawm peˊ meuh peue pon koˊ, peˊ kaw meuh peue pon naˊ neumneum. 37Yawng Uiˊ meuh peˊ ceucat eun Abraham yeut. Daecti kopti unˊ yumˊ peˊ leukahˊ sangsawnˊ Uiˊ naˊ, peˊ rangraen ri kaw toh Uiˊ. 38Buih lahˊ Uiˊ kuˊ pun Uiˊ ri nyu yam utˊ Uiˊ maeeˊ Aˊkuiingˊ Eun naˊ ri peˊ. Peˊ ku yeuh kuˊ pun peˊ ri mhawngˊ ri aˊkuiingˊ peˊ naˊ eun naˊ.”

39Ce topˊ a, “Abraham meuh eun kuiingˊ ye.” Yesuˊ Eun lahˊ, “Peˊ lawn naˊ meuh konˊ eun Abraham koˊ, peˊ ku naˊ yeuh seunˊ kuˊ yeuh eun naˊ yeut. 40Daecti Uiˊ meuh nang lahˊ ris peˊ mhawngˊ hk'aˊ neumneum Eun Peucawoˊ naˊ, peˊ vaeeˊ saeˊcaeeˊ sok ri yeuh ri kaw pun ri toh Uiˊ. Abraham caˊ yeuh eun koˊ. 41Lakˊ yeuh meun peˊ seunˊ kuˊ yeuh eun kuiingˊ ri naˊ.” Ce lahˊ, “Hpaw ye caˊ meuh konˊ jangˊ. Kueˊ ye kuiingˊ ti peue koe. A meuh Peucawoˊ Eun.”

Konˊ seucaˊ rai

42Yesuˊ Eun lahˊ a ri ce, “Peucawoˊ Eun lawn naˊ meuh kuiingˊ peˊ koˊ, peˊ ku naˊ leumeusˊ Uiˊ ri yeut, kopti puc Uiˊ ri lih neum Heun ri naˊ. Maetˊmaenˊ, utˊ Uiˊ maenˊ hawcˊ. Hpaw Uiˊ caˊ yeng ri lih meun, daecti cusˊ Eun Uiˊ lih. 43A ciˊ meuh kop keunhawˊ, peˊ vaeeˊ unˊ cengˊ ri kuˊ lahˊ Uiˊ na? Meuh a kopti unˊ cang eutˊ peˊ hpumˊ ri leuceng kuˊ lahˊ Uiˊ naˊ. 44Meuh peˊ isˊ eun seucaˊ rai kuiingˊ ri naˊ eun. Peˊ sumˊ hotˊ ri yeuh alo eun kuiingˊ ri naˊ. Seucaˊ rai naˊ meuh eun nang toh peue tangˊ neum yamla ka naˊ. Kopti hk'aˊ neumneum naˊ unˊ kueˊ a hk'aˊnaee eun seucaˊ rai naˊ, eun unˊ jhawpˊ ri ti hk'aˊ neumneum naˊ. Yam lahˊ eun leukahˊ chiˊlai naˊ, eun lahˊ a hotˊ seunˊ kuˊ kueˊ nang hpumˊ ri naˊ, kopti seucaˊ rai naˊ meuh eun nang chiˊlai naˊ maeeˊ eun meuh kuiingˊ ka hk'aˊ chiˊlai naˊ. 45Daecti kopti lahˊ Uiˊ hk'aˊ neumneum naˊ, peˊ unˊ yumˊ Uiˊ. 46Hk'aˊnaee peˊ, aˊnhawˊ ciˊ cang tuhˊ peˊ nyu kueˊ Uiˊ mapˊ? Uiˊ lawn naˊ lahˊ hk'aˊ neumneum naˊ koˊ, a ciˊ yeuh keunhawˊ, peˊ vaeeˊ unˊ yumˊ Uiˊ? 47Peue meuh isˊ Eun Peucawoˊ naˊ, leuceng eun kuˊ lahˊ Eun Peucawoˊ naˊ. Unˊ leuceng peˊ ri ti naˊ meuh a kopti unˊ meuh peˊ isˊ Eun Peucawoˊ naˊ.”

Yesuˊ ris Eun lawng tuˊ ri naˊ meun

48Peue Yuˊda naˊ ce topˊ a ri Heun, “Seunˊ lahˊ ye Mi meuh peue Samariˊ maeeˊ meuh peue seucaˊ lec naˊ, cawpˊ ka yeut, unˊ meuh ka aw?”

49Yesuˊ Eun topˊ a, “Seucaˊ hpaw a caˊ lec Uiˊ. Daecti tuilˊ Uiˊ munhpungˊ Eun Kuiingˊ Uiˊ na. Peˊ ri, peˊ yeuh munhpungˊ Uiˊ naˊ lu. 50Hpaw Uiˊ caˊ sok ri tuilˊ tuˊ meun ri naˊ isˊ munhpungˊ, daecti a kueˊ nang sok ri tuilˊ a ri Uiˊ ti peue. Eun meuh nang tawsˊ aˊmu. 51Uiˊ lahˊ a ri peˊ neumneum, aˊnhawˊ lawn hotˊ ri yeuh kuˊ lahˊ Uiˊ naˊ koˊ, eun hkuinˊ kaw laee pun ri yeum.”

52Yam peue Yuˊda naˊ pun ce ri mhawngˊ aenˊ ce naˊ, ce taˊulˊ ri lahˊ, “Maetˊmaenˊ yawng ye meuh Mi peue seucaˊ lec hawcˊ. Abraham yeum eun hawcˊ. Peue suip leukahˊ Eun Peucawoˊ naˊ ce ku yeum hawcˊ. Mi vaeeˊ kawnˊ lahˊ, ‘Aˊnhawˊ lawn hotˊ ri yeuh kuˊ lahˊ Mi naˊ koˊ, eun hkuinˊ kaw laee pun ri yeum.’ 53Keuting Mi hk'aiˊ kuiingˊ eˊ Abraham eun aw? Yeum eun hawcˊ. Saecˊ meuh peue suip leukahˊ Eun Peucawoˊ naˊ ce ku yeum hawcˊ. Mi ciˊ hteumˊ ri meuh aˊnhawˊ?”

54Yesuˊ Eun topˊ a, “Uiˊ lawn tangˊ tuˊ ri naˊ kueˊ munhpungˊ meun koˊ, munhpungˊ awnˊ a kaw meuh kuˊ hk'oˊhk'awngˊ. Kuiingˊ Uiˊ kuˊ lahˊ peˊ meuh Peucawoˊ ri naˊ meuh Eun kuˊ tuilˊ munhpungˊ Uiˊ naˊ Eun. 55Daecti peˊ saecˊ naˊ unˊ yawng Eun, Uiˊ yawng Eun. Uiˊ lawn lahˊ ri unˊ yawng Eun koˊ, Uiˊ ku naˊ meuh peue chiˊlai seunˊ peˊ ri yeut. Daecti yawng Uiˊ Eun. Uiˊ hotˊ ri yeuh kuˊ lahˊ Eun naˊ. 56Kuiingˊ peˊ Abraham renˊkawn eun maeeˊ kaw ri pun ri nyu seunyi yam Uiˊ naˊ. Eun pun ri nyu a hawcˊ, eun ku renˊkawn.”

57Peue Yuˊda naˊ ce lahˊ a ri Heun, “Aˊyu Mi a hkuinˊ nang pun hpawnˊkulˊ neum, Mi caˊ vaeeˊ nyu Abraham eun aw?” 58Yesuˊ Eun topˊ a, “Uiˊ lahˊ a ri peˊ neumneum, tangˊ neum yam Abraham unˊ nang keutˊ eun naˊ, kueˊ meuh Uiˊ hawcˊ.” 59Yam pun ce ri mhawngˊ leukahˊ aenˊ a naˊ, ce seutˊ meulˊ seumu kaw ri dhimˊ Eun naˊ, daecti Yesuˊ Eun lhawtˊlhaetˊ ri pucti heulˊ hk'aiˊ nya hk'oˊ munˊ keuting naˊ.

Currently Selected:

Yoˊhan 8: blrPL

Highlight

Copy