San Juan 11

Ttu benni lána Lázaro uttina

1Lheꞌesi lá Betania nua do ttu benni rani lána Lázaro. Níaguaba nua beaca lasi María lenna xilani Marta. 2María dana Lázaro nu raniha nua uluꞌuna seti rure xixxi niꞌa Jesús. Leni itsiquibani bodibisna ca niꞌa Benniha. 3Irpa xilabacani udhelhacana rasona len Jesús rácane:

—Raniba nu raca xxattinlu gueniha, xa tata.

4Atti chi bina Jesús nu rá ca nua nna ráttebe:

—Isagüee yuꞌu nua nna läga anca nua nu uttin na, delába unnuha nna ixuula isagüeha qui inná ca benni: “¡Xxeni ra le Tata Do Iyyabaaha!”, anáguaba qui uleꞌe lo neti Xiꞌinie-ni anca Benni ra xxeni leni lhe.

5Masquiba raca juisiani Jesús gue Lázaro lhe gue Marta lhe gue María lhe 6beꞌanrube atta doe a chupa ubisa dequide bine rani Lázaro. 7Dequilaha nna re ca biꞌini rudheti ca tisa ruleꞌe:

—Gualtsá tsiari attu libe deca Judea.

8Ca biꞌini rudheti ca tisa ruleꞌe nna rácabi Benniha:

—Maestro, ¿si edeyya dacabari nía attu libe? Inqui ttu sába nua uxaca ca benni Israel seꞌe nía usiacan lu iyya nna.

9Jesús becabie guecabi re:

—¿Si läba tsiꞌinu ura yuꞌu lheꞌe ttu sá nna? Nu requi resá nna läga richecu nua cumu xieni gue yies lo yu-ni nna gua rudanbe gue nua. 10Ttiaca nu requi lo rela nna ichecuba nua cumu bittu xieni yuꞌu atta diana.

11Dequide unnuha nna re:

—Lázaro nu raquinri gueniha nna chi uttaꞌadhi nua. Tsiala qui odibania na.

12Ca biꞌini rudheti ca tisa ruleꞌe Benniha nna rácabi:

—Benni bananie riꞌitu, gansi tiꞌedhiba nua nna güeyacaba nua ganna.

13Gue elhutti gue Lázaroba nua rinne Jesús, ca biꞌiniha nna ucaquinbi ga gue bisiela nu runna raꞌadhiri-nba nua rinne Benniha. 14Laniala nna utixxiꞌa tseenie ca biꞌiniha re cabi:

—Uttiba Lázaro. 15De lebiꞌi nna reꞌo lasia nuttuha du nía cumu unnuha nna ancana ttu nu tsee len lebiꞌi. Unnuha unna tsiaru lele neti. Larcala nna gualtsá sanga tsiari sagüiari na.

16Tomás biꞌini rácana Cuachiha nna ráttebabi adí ca biꞌini rudheti ca tisa ruleꞌe Jesús:

—Gualtsá guaba tsiari, qui ttuba gatti lenri Ben-na.

17Atti bisína Jesús Betania nna binattebe dequi chila uca ttapa ubisa bigatsi Lázaro. 18Lheꞌesi Betania nna gaxxaba rena leni Jerusalén, attiba nu ridá benni ttu ura. 19Ixeru ca benni Israel chi güiacana guanalhicana Marta lenna María, rutecana elha xen lasi lencana cumu seꞌe siꞌicana de utti dancaniha. 20Atti bina Marta chi daa Jesús, biríattebana diana guatsána Benniha. María nna níaba beꞌanna lheꞌe yoꞌoha. 21Marta nna rána Jesús:

—Ttirca dobalu ni, xa Benni bananie neti, lania nna läga utti danaha. 22Ttiaca neti nna yua nnanna bixaba innábalu leni Tata Do Iyyabaaha, lee nna gutebe nua lenlu.

23Jesús becabie re na:

—Eyacabani danluha attu libe.

24Marta nna rána Jesús:

—Chiba yua nna güeyacabani unná gansi chi beacani ca nu yatti-na attu libe, atti isía sá lhuxa.

25Jesús re na:

—Neti anca benni runi reacani ca nu yatti-na lhe rutea elha nabani ttu dia lii lhe. Nu tsia leni neti nna masquiba chi uttina güeyacabinna attu libe. 26Iyába ca benni anca bani ria lecani neti nna läga gatti ca nua ttu tsa. ¿Si gua ria lelu nu ria-ni?

27Marta nna rána:

—Agu, Benni bananie neti. Riaba lasia, lu ancalu Cristu, Xiꞌini Tata Do Iyyabaaha, benni chi gaꞌana isía yies lo yu-ni.

28Dequide rána anía nna, güiattebana gualisana xilani María, nianna sigába rána nua:

—Niba chi du Maestroha. Lee nna raxie lu.

29Dequide chi bina María nna, rigánina udulína diana atta du Jesús. 30Jesús läga chi uteꞌe lheꞌesiha, sna dube atta betiꞌe Marta. 31Atti biláni ca benni Israel rute elha xen lasi leni María seꞌe lenna lheꞌe yoꞌoha ruxunninina udulína biríana, lacana nna diattebacana denocana María, cumu ucaquinna ga lo baahaba dia nua sachesna. 32Bisínba María atta du Jesús, bilábinna Benniha nna bedútteba xibini loe, nianna ráne:

—Ttirca dochibalu ni, xa Benni bananie neti, lania nna läga utti benni danaha.

33Atti biláni Jesús ribesna, anáguaba ca benni Israel dia lennaha lhe, su suba guadina itúba lhiꞌu lheꞌe lastoo Benniha, bedú guatettebane. 34Unnaba tisattebe re cana:

—¿Galiga guacatsile nua?

Lacana nna becabicana rácane:

—Utá begüia, tata.

35Jesús uresttebe. 36Ca benni Israel nna ráttebacana:

—Gualgüiarga. ¡Cattipa racanie gueonna!

37Attu lhecana nna rácana:

—Unní beni biláni nu xua loniha. ¿Si bittuba uca gueonni gaxasná unna qui bittu gatti Lázaro?

Lázaro beaquinna

38Jesús su suba bedeadina lhiꞌu lheꞌe lastooe attu libe atti bisíne roꞌo belea do lheꞌe iyyattooha. Unnuha nua ancana baa. Leni ttu iyya xeniba to roꞌo nua. 39Nianna, re:

—Gualcua iyya-na.

Marta dana nu yattiha nna ráne:

—Xa Benni bananie neti, gaxa chiba rureonna, cumu chi uca ttapa ubisa atti uttina.

40Jesús re na:

—¿Si läba ria lu, gansi tsia lelu nna gugüiabalu nu xxeni ra le Tata Do Iyyabaaha?

41Utúabacana iyyaha nna ulhidhatteba lo Jesús begüie lo bea-na, nianna re:

—Xquixarulu, xa Tata, cumu bienbinlu quia. 42Neti nna gua yuba, lu nna satíaba rieninlu quia, ttiaca de ca benni seꞌe-niba nna ria aná, qui tsia lecani gualí lu udhelhalu neti.

43Dequide re anía nna uresiꞌe idisa re:

—¡Lázaro, bería na!

44Nu yattiha nna detubiba lari niꞌani lhe náni lhe beríana, detubiguaba lari loni lhe. Jesús re ca benni seꞌe nía:

—Gualedhasi na ca lar-na, qui aca edána.

Ca nu anca nu lo gue ca nu Israel boquinna iquicani utticana Jesús

(Mt. 26:1-5; Mr. 14:1-2; Lc. 22:1-2)

45Ixeru ca nu dia leni María güia lecani Jesús atti biláquinna nu benie. 46Ttiaca attu lhecana nna güiattebacana guattixxiꞌaquinna ca fariseo gue nu beni Jesús. 47Nianna ca nu lo gue ca bixxudiha lencana ca fariseo bottupattebacana ca uxtisi gue ca benni Israel, nianna ráttebacana ca unnuha:

—¿Bila unri nnanna? Unbiyuu requina nna ixe lhaba ca milagru runi unná. 48Gansi ugüelhabari anába na requibana, iyába benni tsia leni gueonna lania nna ca nu rinnabia gue Roma nna isíaba ca nua utseꞌe locana yotu anca leꞌa gueri-ni lhe yies gueri-ni lhe.

49Ttu nu sela len lacana lána Caifás, ancana bixxudi xxeni rinnabia guecani la ida nna unnena rána:

—Lebiꞌi nna tsa läga yule, 50niguaba lä ritedeenle dequi tseerla anca len riꞌi gatti ttuba benni cuenta gue ttu yiesi, attichula iyába benni gattina.

51Caifás nna läganu yuꞌu iquini nua unnena. De ancabana bixxudi xxeni rinnabia la idaha nna rána anía. Unnebana ca tisa bete Tata Do Iyyabaaha lenna qui quixxiꞌana Jesús gattie qui quixe nu dica quixa ca benni Israel. 52Bittuguaba sunru qui lhá ca benni Israel, anáguaba gatti guabe qui ottupe iyárecha ca xiꞌini Tata Do Iyyabaaha seꞌe gatti laduba. 53Larcala nna bedaa la sá nna boquinna iqui ca nu lo gue ca benni Israel utticana Jesús.

54Denua nna lärga güequi Jesús uleꞌe loe leni ca benni Israel. Beríattebe lo yu lá Judea deyye gaxxaba daca lo yu bisi atta re ttu yiesi lá Efraín. Níaba güequie leni ca biꞌini rudheti ca tisa ruleꞌe.

55Atti chi deoba isía laní gue ca benni Israel nu te láni Pascua, ixeru benni seꞌe lheꞌe adí ca yiesi diacana Jerusalén qui eyacacana nu nari lo Tata Do Iyyabaaha attiba labicana runcana. 56Lacana nna requicana reguilacana Jesús, atti retiꞌa loescani lheꞌeliꞌa gue yotuha nna rinnaba tisatteba loescani rácana:

—¿Bi raquinle? ¿Si güitachu nua laní aca, bittuba aca?

57Ca bixxudi anca nu loha lencana ca fariseo nna chi unnabiacana rácana ca benni, gansi nuxa ttu benni yuna gaxa requi Jesús, quixxiꞌa ttena qui tsiacana sadaxxucana Benniha.

Currently Selected:

San Juan 11: zaq

Highlight

Copy