San Juan 8

Ttu nuila beyaxxuna leni attu unbiyuu subi

1Ttiaca Jesús daca lo lhilhi lána Atta Da ca ya gue Olivuhaba die. 2Betteyú dila nna besinttebe lheꞌeliꞌa gue yotuha attu libe. Iyába ca benni bedesincana atta due. Lee nna udottebe beleꞌenie cana. 3Ca nu ruleꞌe nu rá lo ca ley bocaꞌana Moisés lencana ca fariseo, uchecana ttu nuila beyaxxuquinna leni ttu unbiyuu bittu anca latselani bedúcan-na salhe gue ca nu seꞌe nía. 4Nianna ráttebacana Jesús:

—Maestro, nuila du-ni nna beyaxxuintu na leni attu unbiyuu subi. 5Lo ca ley-na rá Moisés, gattiba ca loesi nuila-na leni iyya. Lu nna ¿bila rálu?

6Lacana nna aníaba beguila lecani rácana Benniha qui ibixxie bixa innee, aníachu nna te roꞌocani udelha iyyacane. Ttiaca Jesús biachuttebe uduloe runie letra lo yu leni xbine. 7De ttu runbacana duelha rinnaba tisacane nna bedú líttebe re cana:

—Nuxale bittu tulha guele te nna primero unnuha udaxxuna iyya useꞌena nuila-na.

8Bedeyachuttebe attu libe, bededulo dacabe redeonie letra lo yu. 9Atti bienquinna nu rá Benniha nna udulottebacana ttuttu ttuttubacana deyyacana. Primero ca nu yaxxuha udulo güequi, lenla nna güequi ca uncuitiha, axta liba beacana. Atturba Jesús beꞌane nía lenie nuila bedúcana salheha. 10Bededulítteba Jesús, unnaba tise nuilaha re na:

—Xa nuila, ¿nala ca nua? ¿Si niba ttu ca nua bittu bedelha iyyacana lu gattilu?

11Lana nna rána:

—Niba ttucana, xa tata.

Jesús re na:

—Anáguaba neti bittuguaba udelhiyya lu. Nnanna nna beyya lisluha nna bitturu eyequilu unlu nu lä anca tsee.]

Jesús re: “Neti anca xieni gue ca benni seꞌe yies lo yu-ni”

12Jesús bedulottebe unnee attu libe re ca benni seꞌe nía:

—Neti anca xieni gue ca benni seꞌe yies lo yu. Benni etenalhana neti nna läga tsequi nua atta chulha, cumu gattaba xieni rute elha nabani ttu dia lii gue nua.

13Ca fariseo nna rácane:

—Lägabi daca nu rálha cumu la luba rixxiꞌalu nuxa ancalu.

14Jesús becabie guecani re:

—Nu ria-ni nna gua daca bunni, masquiba la netiba rixxiꞌaya nu anca quia, cumu gua yuba ga biríaya daya lhe ga ladu diaya lhe ttiaca lebiꞌi nna läga yule ga biríaya lhe ga ladu diaya lhe. 15Lebiꞌi nna runbale elha uxtisi gue ca benni leni elha uxtisi gue yies lo yu-ni. Neti nna läganu benni runia elha uxtisi gueni aná. 16Ttiaca gansi neti unia elha uxtisi nna unba nua attiba raxxína, cumu läga tturu neti unia elha uxtisi, irpaba tata quia Benni udhelhe neti untu nua. 17Lo ca ley guele-na rá: Gansi seꞌe chupa benni ttuba rinnecana gue nu biláquinna dacaba nu rixxiꞌa ca nua. 18Neti anca ttu nu rixxiꞌa nuxa anca. Tata quia Benni udhelhe neti nna anque attu benni rixxiꞌa nuxa anca.

19Lacana nna unnaba tisacana rácane:

—¿Nala tata gueluha?

Jesús becabie re cana:

—Lebiꞌi nna läga anca bienle neti, niguaba tata quia. Ttirca anca bienle neti nna lania nna anca biaguabinle Tata quia.

20Ca tisa-ni unne Jesús laca due ruleꞌenie ca benni lheꞌeliꞌa gue yotuha gaxxaba atta sia ca nu riguꞌucana úna lheꞌecaniha. Ttiaca ni ttucana bittu bedaxxucane cumu läga chi bisía ura guee.

21Jesús re ca benni attu libe:

—Neti nna eyyaba, lebiꞌi nna eguilale neti. Ttiaca atta eyyaꞌaya nna lebiꞌi nna läga etaꞌale. Lebiꞌi nna gattibale de runle nu lä anca tsee.

22Ca benni quia ca nu Israel nna rácana:

—¿Si rulaba leni la lattebana unna qui gattina nuarca rána riꞌi atta eyyana nna riꞌi nna bittu aca etaꞌari?

23Lee nna re cana:

—Lebiꞌi nna ancale benni gue liree, neti nna anca benni gue güetsaa. Benni gue yies lo yu-niba ancale, neti nna läga benni gue yies lo yu-ni neti. 24Denuala nna ria le, gattibale de runle nu lä anca tsee, cumu gansi bittuba ria lele ria neti anca benni chi rpea le anca nna lebiꞌi nna gattibale de runle nu lä anca tsee.

25Laniala unnaba tisacana rácana:

—Lu nna ¿nú ancalu?

Jesús becabie guecani re cana:

—La unnuha xa nua ria le primeroha li nna. 26Gue nu runle-na xxeni nu tetia upea le lhe udelhiyya le lhe ttiaca Benni udhelhe netiha anque Benni rinne nu anca gualí. Nu rábe neti nna unnuhaba rpea ca benni seꞌe yies lo yu-ni.

27Ca benni seꞌe nía nna ni lä guadú lecani gue Tata guee do iyyabaahaba nua rinne Jesús re cana anía. 28Lee nna re cana:

—Gansi chi ulhidhale neti Benni unbiyuu daa iyyabaaha lo crusi nna lania liba ttedeenle neti nua anca nu chi ria le anca, bittuguaba runia nu anca quia lhe. Nu beleꞌebani tata quia neti, unnuhaba rinnea. 29Cumu tata quia Benni udhelhe neti nna len netiba due, tsa läga chi bodhaꞌane neti ttuba, de satíaba runia nu raca lee.

30Atti rá Jesús anía nna ixeru ca benni güia lecanie.

Ca xiꞌin Tata Do Iyyabaaha leni ca nu ttoꞌo lo sina gue nu lä anca tsee runcana

31Jesús re ca benni Israel chi güia lecanie:

—Gansi lebiꞌi nna usiguile udole tisa gue nu ria le-ni nna lania liba acale nu gualíga anca nu rudheti ca tisa ruleꞌa. 32Anía liba nna un biale nu anca gualí, nu anca gualíha nna unie lhále.

33Lacana nna becabicana guee rácane:

—Riꞌitu ancatu benni datía Abraham, tsa läga chi uca riꞌitu nu ttoꞌo lo sina gue nuxa benni. ¿Gasná rálu nna eseꞌe látu?

34Jesús re cana:

—Neti nna gualíbatia ria le, iyába ca nu runi nu lä anca tsee nna attiba nu ttoꞌo lo sinaba ancacana gue nu lä anca tsee runcana. 35Ttu nu ttoꞌo lo sina nna lägabi elha ralha nua dhona ttu dia lii lisi Benni bananie na, xiꞌin biyuu Benni bananie na liba nna ralhana dhona ttu dia lii nía. 36Larcala nna gansi neti xiꞌini Tata Do Iyyabaaha odiláya le nna lania liba acale nu gualíga seꞌe lále. 37Neti nna gua yuba dequi ancale benni datía Abraham, ttiaca lebiꞌi nna runlale uttile neti, cumu bittu raca lele tsia lele gue ca tisa quia-ni. 38Neti nna rinneba nu bilátia atti doa len Tata quia, lebiꞌi nna runbale nu bienbinle rá tata gueleha.

39Lacana nna rácana:

—Abrahamba anca benniola gue ca tata guetu.

Jesús re cana:

—Ttirca gualíga ancale benni datía Abraham, lania nna gua runbale ca nu tsee ben biꞌiniha. 40Ttiaca lebiꞌi runlale uttile neti de anca benni rixxiꞌa nu anca gualí, nu bienbatia rá Tata Do Iyyabaaha. ¡Abraham tsa läga ben biꞌiniha atti runle na! 41Lebiꞌi nna runbale loesi nu run tata gueleha.

Lacana nna rácana:

—Riꞌitu nna läga ancatu xiꞌini attu nu subi, ttuba tata guetu do. Xiꞌini Tata Do Iyyabaahaba riꞌitu.

42Jesús re cana:

—Gansi gualíga ancale xiꞌini Tata Do Iyyabaaha nna gua racabinle quia cumu neti nna atta do Benniha biríaya delha dua-ni, läga titú neti delha, labe udhelhe neti. 43¿Biacala bittu ritedeenle gue nu rpeale-ni? Lebiꞌi nna bittu ritedeenle cumu läga raca lele udo nagale gue nu ria. 44Lebiꞌi nna nu xxegüihaba anca xxudile. Nu ruꞌu le tata guelehaba reꞌo lele runle. Lana nna atti uduloli ure yies lo yu-ni ancana nu runi elhutti, läga runna nu anca gualí cumu läga rinnena nu gualí. Gansi chi rinnena run leni nna rinnebana nu ancabana, cumu ancana nu run leni lhe xxudi ca nu run lecani lhe. 45Neti nna ganna de rinnea nu anca gualí nuarca bittu ria lele quia. 46¿Núle cuequilíle dequi anca nu te tulha gueni? Gansi rinneba nu anca gualí nna ¿biacala bittu ria lele quia ganna? 47Benni anca gue Tata Do Iyyabaaha nna ca tisa gue Bennihaba rudo naga nua, ttiaca lebiꞌi nna läga ancale gue Tata Do Iyyabaaha, nuarca bittu raca lele udo nagale ca tisa gue Benniha.

Jesús re, lee nna chila doe atti uli Abraham

48Ca nu Israel nna becabicana rácana Jesús:

—Gualíbintu rátu lu, nu Samariaba lu, nu xxegüihaba yuꞌu lheꞌelu.

49Jesús becabie guecani re:

—Läganu nu xxegüi yuꞌu lheꞌe neti, nu runba nna rapa tata quia respeto, lebiꞌi nna bittu rapale neti respeto. 50Neti nna läga runia qui cuequi xen ca benni neti, gua doba ttu benni runie aca nu ra xxeni leni. Leonna runi elha uxtisi. 51Neti nna gualíbatia ria le, benni udona tisa gue nu ria nna tsa läga gatti nua.

52Ca nu Israel nna becabicana rácana:

—Nannarguaba nna chi yu tseetu, lu nna nu xxegüihaba yuꞌu lheꞌelu. Abraham uttiba biꞌiniha, anáguaba ca biꞌini uca profeta lhe lu nna rálu: “Nu udona tisa gue nu ria nna tsa läga gatti nua.” 53Lu nna ¿si xxenrula rá lelu atti benniola guetu Abraham? Biꞌiniha nna uttibabi, anáguaba ca biꞌini uca profeta. Lu nna ¿núnna runlu dequi ancalu?

54Jesús becabie re:

—Gansi la netiba unia anca nu ra xxeni leni nna tsa lägabi daca nua. Ttiaca tata quia benni rále anca Tata Do Iyyabaaha guele-na runie anca nu ra xxeni leni. 55Lebiꞌi nna läga anca bienle Benniha, netirguaba nna anca biatie. Gansi innía bittu anca biatie nna lania nna anca ttu nu run leni attiba lebiꞌi, ttiaca gualíba anca biatie lhe rudoa tisa gue nu re lhe. 56Abraham biꞌini uca tata gue ca tata gueleha nna bedáquinbi de ilenbi sá isíaya. Atti bilenbi bisía sá nna beꞌolhaba lebi.

57Ca nu Israel nna bequicana rácana Jesús:

—Nila medi gayua (50) ida lati aquinlu nna gua rálu dequi bilenlu Abraham.

58Jesús re cana:

—Neti nna gualíbatia ria le, atti antisla gali Abraham, chila doa lania.

59Lania nna bedaxxuttebacana iyya uxacacana usiacana Jesús. Lee nna becatsitteba loe sigába betee lagüi gue ca benni seꞌe nía beríe lheꞌeliꞌa gue yotuha deyye.

Currently Selected:

San Juan 8: zaq

Highlight

Copy