San Lucas 5

Xxenru belha bedaxxu ca benni

(Mt. 4:18-22; Mr. 1:16-20)

1Ttu libe do Jesús roꞌo indattoo te láni Genesaret. Ca benni seꞌe nía nna ruquílhabacane de rdacacana iyienquinna ca tisa gue Tata Do Iyyabaaha rinne Benniha. 2Nianna biláni Jesús chupa ca barco seꞌecana gaxxaba roꞌo indattooha. Ca benni rudaxxu belhaha nna chila guadícana lo ca nua, güi ca yexxa guecanihaba yuꞌucana. 3Jesús gopittebe lo ttu barcoha. Unnuha nna ancana gue Simón. Lee nna unnabattebe len Simón qui usigabi nua saroꞌo lo indaha. Laniala nna udottebe lo nua. Níali doe ruleꞌenie ca benni seꞌe nía. 4Atti uluxa beleꞌenie ca benni seꞌe nía nna re Simón:

—Uchee barco-ni atta re dila inda-na, gualudelha ca yexxa-na qui udaxxule belha.

5Simón nna becabibi rábi:

—Maestro, betuelaba tsitsiba uyuꞌutu sina, nianna niba ttu belha bittu biaxxuintu. Ttiaca gansi anába rá cuinalu nna udelhaba yexxa-ni.

6Atti bealhicabi ca yexxaha nna attulade xxen tsitsia belha deyuꞌu lheꞌe ca nua. Ca yexxaha nna chitteba riseꞌe locana. 7Laniala nna bettá nácabi uxicabi ca umpanieru guecabi sia lo attu barcoha qui tsiacabi uncabi yuda. Ca biꞌiniha nna güiattebacabi. Irupaba ca barcoha bodisácabi cana belha. Denua nna chitteba tseetti ca nua lheꞌe inda. 8Atti biláni Simón biꞌini teeguaba lábi Pedro nu ucaha nna bedútteba xibibi lo Jesús rábi:

—¡Ubietta atta dua-ni Tata Xis quia, cumu neti anca nu te tulha gueni lo Tata Do Iyyabaaha!

9Aníaba rá Simón cumu rasinbi lenbi iyába ca benni seꞌe lenbiha de bedaxxucabi xxen tsitsia belha. 10Unnuhaguaba guate Jacobo lenbi Juan, ca biꞌini beaca xiꞌini Zebedeo. Lacabi riben lencabi Simón sina. Laniala rá Jesús Simón:

—Bittu gasinlu. Cumu desde nnannali unia qui acalu nu gaxi benni qui udaxxucana neda gue Tata Do Iyyabaaha.

11Dequide bebequicabi ca barcoha roꞌo indattooha nna níaba bodhaꞌancabi iyába guecabi. Lacabi nna diattebacabi len Jesús.

Jesús beonie ttu unbiyuu rácana ttu nu anca attiba yiesusu te láni lepra

(Mt. 8:1-4; Mr. 1:40-45)

12Ttu sá atti do Jesús lheꞌe ttu ca lheꞌesi seꞌe nía, nía bisíni ttu unbiyuu yuꞌuna isagüe raca cuerpu gueni nu anca attiba yiesusu te láni lepra. Atti bilen nua Jesús, bedútteba xibini axta liba binna lo xeani lo yu. Unnabana lo Benniha rána:

—Benni bananie neti, gansi cuinalu aca lelu nna guaguabalu isagüe quia-ni.

13Jesús becatteba nee utane cuerpu gue nua, atti ráttebe na:

—Guaracaba lasia. ¡Beacatte nnanna!

Snaba lania bitúa nu anca attiba yiesusu lána lepra raca unbiyuuha.

14Jesús benie nua mandadu re na:

—Tsa nuttu nu quixxiꞌenlu. Nu unlalu nna güia guatsá du lo bixxudiha qui ugüiana lu nna chiba beacalu. Bijatte úna nu daa lolu utelu gue Tata Do Iyyabaaha, beni attiba rába lo ca ley bocaꞌana Moisés qui ugüia ca benni lu nna chiba bitúa isagüe gueluha.

15Ttiaca adíla dia runa ca benni gue nu runi Jesús. Ixe tsitsia benni ritupa qui iyienquinna ca tisa rinne Benniha, qui eyonie cana cue ca isagüe guecani lhe, 16ttiaca Benniha nna ririesttebe rie atta nuttu benni seꞌe qui rinnee len Tata Do Iyyabaaha.

Jesús beonie ttu benni daa yatti niꞌa náni

(Mt. 9:1-8; Mr. 2:1-12)

17Ttu sá nna laca do Jesús güeleꞌen ca benni, níaguaba sia ca benni fariseo lhe ca nu ruleꞌe nu rá lo ley bocaꞌana Moisés lhe. Ca unnuha nna dacana deca lheꞌe ca yiesi baba lo yu gue Galilea, lo yu gue Judea lhe lheꞌe yiesi Jerusalén lhe. Elha ra xxen le gue Tata Do Iyyabaaha due len Jesús qui reonie ca benni rani. 18Nianna, bisíntteba ca unbiyuu dia lencana ttu unbiyuu daa yatti niꞌa náni, xuaquinna nua lo breta. Lacana nna uxacacana ttaꞌa lencana nua lhiꞌu lheꞌe yoꞌoha qui quixxacan nua atta du Jesús. 19Ttiaca bittu beselquinna gaxasná uncana qui ttaꞌacana de ixeba benni seꞌe roꞌo yoꞌoha. Nianna, gopittebacana iqui yoꞌoha lencana breta atta xua nu raniha. Atti utúattebacana beo sia iqui yoꞌoha qui bedocana ttu belea. Nía ulhídacana nu raniha xuana lo breta qui utixxacana nua salhe gue ca benni seꞌe nía lhixxa lo Jesús. 20Atti biláni Jesús, gua riaba le ca unnuha guadábe eyonie nua, laniala re nu daa yatti niꞌa nániha:

—Xa unbiyuu, chiba uxía elha xen lasi gue ca tulha guelha.

21Lania nna ca nu ruleꞌe nu rá lo ca ley bocaꞌana Moisés lencana ca fariseo, udulottebacana belaba lecani rácana: “¿Nú anca unbiyuu du-ni nna rinne güena gue Tata Do Iyyabaaha leni nu rána? ¿Nú aca gueni dhína elha xen lasi gue ca tulha gue ca benni? ¿Läba sunruba Tata Do Iyyabaaha aca guee dhie elha xen lasi gue ca tulha-na?”

22Ttiaca Jesús yuxeabe nu rulaba le ca nua, nianna re cana:

—¿Biaca rulaba lele aná? 23¿Bi nua nu sattiru inne ttu benni? ¿Si innána: “Chiba uxía elha xen lasi gue ca tulha guelha” aca? ¿Si innána: “Guadha nna udátte” aca? 24Quitti uyúle nna neti Benni unbiyuu daa iyyabaaha te elha ra xxen le quia ni yies lo yu-ni qui dhia elha xen lasi gue ca tulha gue ca benni.

Nianna re nu daa yatti niꞌa nániha:

—Lu rulisa: ¡Guadha nna bodaxxutte breta xualu loenna beyyatte lheꞌe yoꞌo gueluha!

25Snaba lania guadha nu daa yatti niꞌa nániha aníba lo iyába ca nu seꞌe nía, atti bodaxxuttebana breta uxúana loniha güequina deyyana lheꞌe yoꞌo gueniha ribequi xenna rána:

—¡Xxeni ra le Tata Do Iyyabaaha!

26Iyába ca nu seꞌe nía bebanxxattaquinna nianna ulequi xenttebacana Tata Do Iyyabaaha. Itú rasbaquinna rácana:

—¡Nasá begüiari ttu nu benna bebaninri!

Jesús uxie Leví

(Mt. 9:9-13; Mr. 2:13-17)

27Dequide unnuha nna beríatteba Jesús lheꞌe yoꞌoha. Nía bilánie ttu unbiyuu lána Leví. Unnuha nna ancana güequixa. Lana nna níaba dona atta ribía ca nu ruquixacana ca benni belhi nu deyya Roma. Jesús nna ráttebe na:

—¡Utá betteno neti!

28Leví nna udulíttebabi diabi len Benniha. Níaba bodhaꞌanbi itúba sina runbiha.

29Dequilaha nna bentteba Leví ttu laní xeni lheꞌe yoꞌo gueniha de do Jesús nía. Ixeru ca güequixa lhe adíba ca benni lhe siacana roꞌo mexaha go etta len ca benniha. 30Ttiaca ca fariseo sela len ca nu ruleꞌe nu rá lo ca ley bocaꞌana Moisés, udulottebacana unne güecana gue ca biꞌini rudheti ca tisa ruleꞌe Jesús, rácana:

—¿Biaca siale riꞌa role len ca güequixa-na lhe len ca nu runi nu lä anca tsee-na lhe?

31Jesús becabie guecani re cana:

—Ca benni bittu rani-na lägabi reasaquinna nuxa unna cana ramedi. Ca nu rani-na liba reasaquinna nu eyonna cana. 32Neti nna läga daya qui gaxia ca benni runi nu anca tsee, daba neti qui gaxia ca nu runi nu lä anca tsee, qui oduxiyyancana odaxxucana neda gue Tata Do Iyyabaaha.

Rinnaba tisacana Jesús gue nu utte ubina lheꞌe benni

(Mt. 9:14-17; Mr. 2:18-22)

33Laniala nna rácana Jesús:

—¿Biacala ca benni rudheti ca tisa ruleꞌe Juan satíaba rutte ubina lheꞌecani, satíaba rinnecana leni Tata Do Iyyabaaha lhe? Anáguaba run ca nu rudheti ca tisa ruleꞌe ca fariseo-na lhe, ttiaca ca benni rudheti ca tisa ruleꞌelha nna satíaba riꞌa ro cana.

34Jesús becabittebe guecani re:

—Läga dica unle utte ubina lheꞌe ca benni seꞌe atta aca laní gue unbiyuu utsá nániha, laca sna doba unbiyuuha len lacana. 35Ttiaca chi isía sá atti itúa unbiyuu utsá nániha len lacana. Laniarguaba nna cuꞌu ubina lheꞌecani.

36Utixxiꞌaguabanie cana ttu ejemplu, nianna re cana:

—Läganu benni te ichúna saroꞌo roꞌo xo cubi gueniha qui eguꞌuna atta chi bisú gue xo yaxxu gueniha. Cumu gansi unna anía nna unnittibana xo cubi gueniha, bittuguaba etoni lari yaxxuha eyoꞌo lari cubi atta bisú gueniha lhe. 37Nuttuguaba nu benni te rigaꞌana vinu cubi nu chi galala lheꞌe ca yieti yaxxu nu rixuu attiba ttu reꞌe. Cumu vinu cubiha nna unba nua isú yieti yaxxuha gansi chi dia nua ralana, lania nna ilalba vinuha, iseꞌeloguaba ca yietiha lhe. 38Larcala nna lheꞌe yieti cubi liba ttaꞌa vinu cubiha, lania nna läga tsia latti vinuha lhe yietiha lhe. 39Nuttuguaba benni te riꞌana lo vinu chi ula, lenla nna aca leni iꞌiyana vinu bittu chi ula. Cumu innáttebana: “Vinu chi ula-na, unna ancana nu tseeru.”

Currently Selected:

San Lucas 5: zaq

Highlight

Copy