Génesis 14
14
Abram doi pocaningane ome eduguéjna purása quedéjnane ore nanique enga chijnapo dajnacare uñai Lot iji ore gari to
1,2,3,4Enga sequeredie e gare iji yirídai nanique uje elámgosode ore eduguéjna cuchábi Quedorlaomer tṍraji daniri nanique enga suépise cananéogosode ore eduguéjna cuchábode gáyode uje ore íode u Béra, Bírsa, Sínab, Seméber, jé aja eduguéjnai uñai uje idai u Béla nanique. Enga eduguéjnai Béra uté idai u Sodóma nanique, jé basa ga eduguéjnai Bírsa idai i tu Gomórra, jé basa ga eduguéjnai Sínab idai i tu Ádma. Eduguéjnai Seméber idai i tu Zebóim. Enga eduguéjnane udore ore urasade ore doi eduguéjna purása quedéjnai Quedorlaomer uté iroquéode gatuaque. Mu uje sequeredie e chirõre nanique ujetiga gadióguiji yirídai enga ore chachopise doi uté iroquéode. Enga jec u uje eduguéjnane udore uje ore chejna yijmanai ore, ore pésu dáyipiedie ome ñane ujetiga ore cho dajocaningai ome eduguéjnai Quedorlaomer. Mu uje eduguéjna cuchábi Quedorlaomer chudute uje cananéogosode ore eduguéjnane chimáta ñane ome pocaningai yui, enga jé u uje chayója dejode eduguéjna ore iji Babilónia údode ujetiga ore cháta raja ome pocaningai yui. Enga sinárgosode ore eduguéjnai Amrafel cháta raja Quedorlaomer, jé aja elasárgosode ore eduguéjnai Arioc, jé aja goímgosode ore eduguéjnai Tidal to. Enga eduguéjna gagájnione udore ore jõra ñane jnese nanique ome pocaningai yui. Enga chise diri uje cananéogosode ore eduguéjnane uje chejna yijmanai ore, ore chimáta darógode ome pocaningai yui. Enga ore chimáta ñane iji pararinguei uje i u Sidim, uje pararinguei uté déji gajño cuchábi dosadi. Ga echujna yodi iji gajño tuaté nanique, enga i jé u "Gajño Echujna" ome ore nanique. 5Mu sequeré ejo u nanique uje Quedorlaomer, jorane eduguéjna ore diapo rĩ. Enga ore chicáji refaítagosode bajaque iji ore idáidatéi Astarot Karnaím, enga ore suépise ore gai iji uté. Udojo quigade enga ore chicapóji zuzítagosode ore to rĩ iji ore uniri Ham enga ore sué ore gai to nanique, jé aja emítagosode ore to iji ore uniri Sáve-quiriataím. 6Mu que gusu ore uje Quedorlaomer, jorane eduguéjna ore pésu pocaningane ome ore nanique, mu ore pésu dajocaningane ome horéogosode ore to uje udore ore uniri Seir déji cucarani ejode. Enga horéogosode ore chayome eduguéjnane ore enga eduguéjnane ore chajna ore, chajna ore jé aja garaidatei uje i u Parán uje garaidatei tuté idógosiji tarétigai uje que cucha pibotique déji. 7Udojo quigade enga eduguéjnai Quedorlaomer, ujode eduguéjna ore chajniápo iji garáijnai rĩ aja daquigade. Ore jno ga ore chajni ga ore chise ore idai En-mispat uje i uñai u Cádes nanique. Enga purása quedéjnaringo déji ore iquei iji ore ajesui tuté uje ore i u amalecítagosode. Enga eduguéjnane ore chejna ore irengu chojmarai, enga ore jnopo rĩ enga ore chejnapo uñai te rĩ, enga ore chejna ore ugúchade to. Que gusu udojo ore mu purása quedéjnaringo e déji to uje ore i u amorréogosode enga ore chejna ore to aja dajesui. Enga ore yugode udore ore uniri i tu Hazezón-tamar nanique.
8-9Uje eduguéjnane uñane ore chudute udore ujnomei nanique enga jé u uje ore tṍraji dedáyode Sodóma, Gomórra, Ádma, Zebóim, Béla ore, enga ore chimáta ñane iji cucarani uje pararinguérique déji uté uje i u Sidim. Ore chimáta ñane gu dajocaningai yui ome eduguéjna sijnángone udore uñane uje gagájni ore enga ore íode u udojo: uñai i u Quedorlaomer, jé basa uñai i u Tidal, jé basa uñai i u Amrafel, jé basa uñai i u Arioc. Enga udore ore unirone u udojo to nanique: Élam, jé aja Goim, jé aja Sinar, jé aja Elasar ore. 10Mu Quedorlaomer, ujode eduguéjna jé ate uje ore sué ore gai. Enga eduguéjnane uñane ore chayome jnese. Mu eduguéjna gárode uje ore idáyode u Sodóma, Gomórra ore, ore chayo ga ore basája cucha otate utatai uje tṍraji jnumi enga pésu re ga gajño ga ore toi jnese. Chamáñaje jiei erugode iji cucarani pararinguei Sidim ejode uje irágu jnese gu ome cucha otate utatai. Mu ore jorane eduguéjna uñane ore chicáji cucarani enga ore choru cucarani ujetiga ore chacose ráguiji cucarani ome ore.
11Enga jé u nanique uje eduguéjnai Quedorlaomer, ujode eduguéjna ore chejna dojode eduguéjna ga ore chajnosipise ore idáyode Sodóma, Gomórra ore. Enga ore jno ore posode údi to, jé aja cucha orerane jnese to iji guidáidatéode udore údode jnese. Enga jé u uje ore jnopise iji uté. 12Enga Abram ujnacare uñai Lot déji Sodóma nanique enga eduguéjnane udore ore jno údi to ujetiga ore cho daróguiji to. Enga ore chajnose Lot ome ugúchade jnese enga ore jno ore údi to. 13Mu Sodóma idáisõri uñeque ecáji ore jocaningai enga jé u uje chayo enga chicáji Abram ujetiga chatatame uje ore jno ujnacare uñai údi. Enga Abram déji ateta uje ateta tuaté gajnengóri u amorréogosi Mámre nanique. Enga Mámre uté desade cuse to nanique enga ore íode u udojo: uñai i tu Éscol, jé basa uñai i tu Áner. Enga Abram, jnanione udore jecucha ga ore átapi cuchade aja ñane nanique.
14Uje Abram chudute dajnacare uñai ujnomei uje eduguéjnane ore isaque ujnacare uñai, enga jé u uje chutṍri darógode ore to ujetiga ore nóna enga ore chajna ore to. Enga 318 irógode udore uje ore batigade jé u irengúone nanique. Enga ore nóna jnese, jé aja atapiésorone jnanío ore jnese. Enga ore chajna eduguéjna sijnángone ore enga ore chise ore iji ore idai Dan nanique. 15Enga Abram, jorane ore chise ore iji ore idai uté iji dejai enga ore cugujnáji ore. Ga jé u uje eduguéjnane udore chayome ore enga ore chicáji guidai Hóba yui. Uje guidai Hóba uté déji guidáidatéi Damásco dosadi iji casaque garani. 16Enga jé u uje Abram ore sué ore gai iji pijogadi tuté. Enga eduguéjnane udore uje ore chejna idáyode diríca enga ore chajnose ore diríca, e mu jé basa ga Abram chajnosipise ore to ome ore ugúcha casodé. Enga jé u uje Abram chijnapo dajnacare uñai Lot iji ore gari to rĩ enga chatirépo gajnéone cucha gai te rĩ. Enga Abram dopoi Lot ujode ore isaque rĩ iji uraque dedai Sodóma diríca, enga chijna ore aja dajesui, chequedíe aja jnanione jnese.
Melquisedec cho darúja Abram nanique ujetiga Dupade chatapísaja ome cuchade jnese
17Enga jé u uje Abram ore chujépise eduguéjna cuchábi Quedorlaomer, jorane eduguéjna ore, enga ore chajnésaru daquigade rĩ. Mu uje sodómagosode ore eduguéjnai chudute Abram ujnomei uje chujé eduguéjnai Quedorlaomer, urasade ore enga chachai iji cucarani pararinguei uje i tu Save, uje i uñai u "Eduguéjnai Gajneque Pararinguei" uté nanique. 18Enga salémgosode ore eduguéjnai Melquisedec chudute to Abram ujnomei enga chachai to. Enga chijna arurégode, cucha otate caratai ujetiga tẽrája Abram ome. Uje Dupa Pujnéngaisṍri catecãraisṍri u uté nanique ome darasade nanique. 19-20Uje e chise Abram nanique ga cho darúja. Enga chojninga:
"Yipésupú ga Dupa Pujnuéngaisṍri chátapísaja ua uje uté ipesute gaté, jnumi, jogonórone cucha jnese nanique.
Dupa picotaque opejã uté u uje juéga ome ua jetiga ejna bamajosórone ore."
Enga uje Abram chudute Melquisedec uté uruode udore uje cho darúja enga jé u uje chajuguína dasagode cucha enga chojningame darógode: "Asecãcho yocugúchade jnese uje yijnángo iji eduguéjnane udore gari. Yigaidi tu gu ujetiga yisígo Melquisedec uté iji yocugúchade péode. Ujetiga 10 déji enga yisígome chojmaráringome uté ga chijnoque jne. Ga jé ate jne ome yocugúchade jnese. Jé tiógara gu uje cho darúja yoque gu." 21Enga jé u to nanique uje sodómagosode ore eduguéjna cuchábi catecã́ri Abram to enga chojninga:
–Atireyo yocurasade ore yoquibai. Mu yocugúchade jé dóji uáguiji te.–
22-23Mu Abram chajnai eduguéjnai uruode enga chojninga:
–Úngare, que yipota yisa uacagúchade. A yatire jnese uacabáyode jne. Chamáñaje e yingome Yangarádejnai, Dupa Pujnuéngaisṍri, uje a ca yisa uacagúchade jne. Enga a ca cucha bisideque yuruode udojo jne. A ca yisa ducarigátique, jeoga yuchiédi carutíguiji uacagúchade udojo. Que yipota gu ujetiga ojnichome yu jne: 'Abram ugúcharã́que gu yocugúchade udore uje chijna.'–
24Mu Abram qué nararápo rĩ enga chojninga:
–Que yisapise uacagúcharique mu yirógode ore u uje e ore tagu uacabosode uñane. Jé chopo yatapiésorone jnanío udore, uje ore íode u Áner, Éscol, Mámre ore, jé tiógara ujetiga ore chisa dajnetígo jne iji uacagúchade. Mu jé gusupúsu ore, uje uyu ga que yipotapísa uacagúchade to.–
Currently Selected:
Génesis 14: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
