Juan 12

María chojne cucha ai unéri aja Jesús guídade gai

(Matéo 26:6-13; Márcos 14:3-9)

1Uje dirode chojmára iji ti iji judíode jnusinamáni dire Páscua yui enga Jesús jno enga chicáji daquetai Lázaro idai uje i u Betánia. Lázaro uté u uje Jesús chiringare iji itoringai quigade. 2Enga Márta, jorane ore nína Jesús yui. Jecute ore pésu ore pose unérone ome Jesús. Márta u uje chisi ore iji ore posode. Mu Lázaro, jorane ore u uje ore nóna Jesús aja ore atigai gai. 3Udojo quigade enga María di cucha ai unénique údi uje oidi uté cucha ai unere chajni iji pié pajénique. Uje pié uaté chome lítro chojmarai. Cucha ai unéri uté i u nárdo enga oredie jiépisi. Enga nárdo ueque. Que ore chimesa cuchade uñeque. Enga María chojne cucha ai unéri uté aja Jesús guídade enga jé u uje chaguñéra datui aja guídade. Cucha ai unéri uté chusaque ore iguíjnai ajei jnese. 4Mu Simón gaté ujnacari déji ore gari to uje i u Júdas Iscariote, uje Jesús acadigode jõra uté to. Ga uté u jne ujetiga tẽra Jesús ome damajosórone. Enga uté catecã́ri dejominórone. 5Enga chojninga:

–¿Jé gotique gu a uje que tẽra cucha ai unéri uté? Enga yisígo jmatágode ore iji orérigui. Chamáñaje oredie jiépisi gu, enga a oredie chisírase 300 denárionie.–

6¡Cho jetiga caniraque Júdas ome jmatágode! Mu áyipie qui u gu ujetiga toríarasa uñáringui ome re. Chamáñaje uté oidé Jesús, acadigode ore iplátadie pié. Enga jecucha isocabeque uje chijnime uñanie ome re. 7Jecute Jesús chojningame Júdas:

–Qué dóji, jé ca barúrique gajnaréngaja chequé uaté. Chequé uaté chañuru cucha ai unéri uté guio gu ome yu. Uje e chojne cucha ai unéri aja yirídade gai ga imoi tu uje e dimane yu ome yúringárique pijóchõre. 8Uje jé ate ome uaque iji deréjnane uje jmatágode ore charite uacajade ujetiga osṍcho ore. Jé basa uyu ga idógosi ujetiga ca yugúsapoi uacajade to jne rĩ ujetiga osṍcho yu.–

Sacerdóteode ore chimate dáyipiedie ujetiga ore chujé Lázaro

9Enga uásejna judíode ore uje ore chudute to uje Jesús déji Betánia, enga jé u uje ore chicáji. Mu que gusu ujetiga ore tibágui Jesús, mu ore ajegaidi upo rĩ ujetiga ore chimo Lázaro. Uje Jesús e chiringare iji itoringai nanique. 10Mu sacerdóteode ore eduguéjnane ore chimate dáyipiedie ujetiga ore chujé Lázaro to. 11Ore guetétigai u uje uásejna judíode ore changureta Jesús gu dapesútedatéi uje chiringare Lázaro, enga ore cha ore tangári deduguéjnane sacerdóteo ore.

Ayorébui ore icotaquéode gajnengóri u Jesús uje chacája Jerusalén

(Matéo 21:1-11; Márcos 11:1-11; Lúcas 19:28-40)

12Enga ayorébui di iji Jerusalén ome ore jnusinamáni dire uje i tu Páscua. Dire uñai enga ore chudute uje a Jesús di iji ore idai Jerusalén gajneri. 13Uje ayorébui nína Jesús yui enga jé u uje ore chaquesu ijnacojodie ujetiga ore chachai enga ore chãráji yúode. Enga ore tibidi iji dejode enga ore chojninga:

–¡Picotaguipise opejã Dupade! ¡Yocangaráni Dupade utocaite uté aja yoque é! ¡Israélgosode yoqueduguéjna cuchábi uté to é! ¡Jé tiógarapísa ujetiga Dupade chatapísaja uté é!–

14Uje Jesús chise burica quedéjnarique enga cháji gai. Enga Dupade uruode quigode jé u uje chojninga:

15Guidáidatéi Sión jogosórone uaque á, ca atodóyo.

Cajicho to uje uaqueduguéjna cuchábi cháji burica quedéjnarique gai aja uaque.

16Iji cuchade udojo taningai ga Jesús acadigode que ore chiraja quigode. Mu quigade u uje Jesús ecáji dáringai toque enga ore áyipiedie quene déji Dupade uruode udore úringane tocachucho.

17Ayorébui udore ore uje ore déji Jesús gari uje tibidi Lázaro iji ode, udore ore u uje ore jno cucha dacadode udore ujnomei údi. 18Jecute ayoréode ore chachai Jesús iji garani. Chamáña gu uje ore chudute ipesute cuchadatei ujnomei. 19Jecute fariséode ore chojningame ñane:

–¡Cajicho to! ¿Yoco ringome jne a? Chamáña gu uje ore íjnongaja quigade.–

Grécia jogosórone uñane chucué Jesús

20Enga gréciagosode uñéngo chicáji Jerusalén to ome judíode ore jnusinamáni dire. Chamáñaje ore chijnóra Dupade gu. 21Enga udore ore chose Felipe yui uje uté idai Betsáida déji ore uniri Galiléa. Enga ore chijócha Felipe ajei údi enga ore chojninga:

–Yocajegaidi u ujetiga yimóngo Jesús to.–

22Enga Felipe jno enga chingome Andrés. Enga ore nóna ñane ujetiga ore chingome Jesús. 23Enga Jesús chojninga:

–Deréjnai e u ujetiga Dupade utocaidi uyu yise yúringai pujnuéngaisṍre. 24Mu jé ũré yu uje a yitoi bajaque. Enga yajnua a u arroz quedéjnai ajñua. Uacamóño ujetiga ca pijóchõre cucha ajñua enga aode basíji gai enga a ca sué jne. Mu cucha ajñua chojmara iji deréjnane. Jé basa ga ujetiga pijóchõro cucha ajñunie enga jogadi u uje ore aode tarata jnumone, mu jogadi upo rĩ uje ajñugaté iji ajei sué. Quérã enga jiei adie. 25Ujetiga gosi chijnóra dacuecaringuei ome re enga a bijna gosi ucuecaringuei ome re jne. Jé basa gosi ujetiga cha danerai ome re iji erámi udé, uté u jne ujetiga chise pucuecaringué eyúgojmai ome re jne. 26Ujetiga gosi pota doi yiroquéode enga doi enga chirate yadode. Enga ujetiga gosi doi yiroquéode a chise yijogadi to. Enga a Yai Dupade chisi uté gosi gai jne ome dagaidode yiroquéo.–

Jesús chatata datoringai yui

27Jesús chiraja dagachodi yui jecute chojningame re:

–Yo yáyugu yu. Enga que togome yu ujetiga yojninga: "Yapá, ãraque yu ome cucha dacadode uje a tocade jne ome yu." Yiraja gu uje yise jnumone nanique gu ujetiga cucha dacadode udore tocade ome yu.–

28Enga Jesús catecã́ri dayé enga chojninga:

–Yapá, be bajéningo ome yu ujetiga diga picotaque opejã ua ome ore.–

Enga jé u uje ore chudute darade uje tṍraji gatajnoquei. Uje chojninga:

–E yise yúringai picotaque que, enga diga picotagapo yu jne rĩ.–

29Ayoréode ore uje ore déji uté uje ore chudute darade enga ore jos eti guéode urúo. Mu uñane ore chojninga:

–A Dupade utocaitique uñeque catecã́ri Jesús que.–

30Enga Jesús chojningame ore:

–Darade udore uje uacadúcho que, que yajnecho go mu uacajnecho. 31Enga deréjnai e u ujetiga pajirique erámi unirisórone ore adode aja quigode jnese. Enga deréjnai jé upo rĩ ujetiga erámi unirisórone ore irósõri Satanás pijócãráque. 32Adi jé u ome yu ujetiga ore chiringare yu aja gaté enga jogadi u ujetiga ore íjnongaja yu jnese.–

33Jesús uruode quigode u uje a toji curesei gai jne. 34Mu ayorébui ore catecã́ri Jesús enga ore chojninga:

–Yocajirigode Moisés urusãracho quigode u uje yoquijnati Crísto que eruénique cuse. Quedéjna baruode ome yoque uje bojninga: "Dupade utocaidi piringarãque aja gaté iji curesei."–

Enga ore chojningápo rĩ:

–¿Jé gosi te Dupade utocaidi uté?–

35Mu Jesús chojninga:

–Dupade utocaidi gajnui u dírecaringuéi. Mu deréjnane e garósi ujetiga déji uacari. Jecute aquejnáño aja uté yui to uje qué dire. Socaseti dejai chise uáguiji yui enga a ca eso jne. Enga a ca togome uaque jetiga arajáyo uacajesúode. 36Beyoi enga anguretáyo dírecaringuéi gajnui uté uje qué déji uacajade, ujetiga eso uacáringane dírecaringuéi gajnesõre.–

Jesús chejna daruode udore guesi ga jé u uje jno ga chacose re ome ore.

Judíode ore chajo raja uje que ore changureta Jesús

37Jesús ipesútedatéode cucha pitijabácho jiei iji ore ujade ujetiga ore changureta marínga, que ore chise unétique. 38Mu cucha dacadode udore tocade gu Dupade angúromei proféta Isaías urusãra cásodicáite uje chósi te:

Yocangarádejná, que uñeque déji ujetiga changureta yocatatagode barúo.

Ore chimo bapesútedatéode, mu jé ate uje que ore changureta ua.

39Enga obiréjna ome jnani bajai Isaías urusarane uje que togome ore ujetiga ore changureta.

40Uje Isaías urusãraque uñane chósi te:

Dupade ipesute ore ujetiga ore gajnúone u edoparigode.

Enga ipesute ore áyipiedie úringanie uajádei rĩ ujetiga ca ore tangári cuchárique.

Gaidi u gu ujetiga ca ore chimo cuchárique enga ca ore chiraja cuchárique quitígo.

Uje Dupade chojninga: "Jé socaseti ore chajni yibai ujetiga yiqueta ore."

41Jnani bajai Isaías urúo udore gu uje chimo Jesús ingoningájnai nanique enga uruode udore júdi u Jesús.

42Mu que anguresórojma judíode ore jnese go. Uje uásejna uñéngo uje ore changureta Jesús. Enga jé chuságaja obiréjnane iji ore. Mu udore ore que ore chingo danguretigai ome Jesús aja erámi. Ore todo fariséode ore gu ujetiga ore chijócãre ore iji daquiningamei guiguíjna. 43Chamáñaje cuchadatei u ore ujode ayoré icotaquéode ome ore gu. Jé basa que cucha ome ore Dupade irasitigade ome ore.

Jesús a chijna daru casodica ome ore jne ujetiga chajire ore adode aja quigode

44Jesús chejnapúsu daruode enga chojninga:

–Gosi ujetiga changureta yu ga que gusu angureni uyu mu changuretápo yirósõri yai Dupade rĩ. 45Ujetiga gosi chimo yu ga jogadi u to uje chimópo yirósõri to rĩ. 46Uyu u uje yajnui u dírecaringuéi. Enga yĩri iji erámone udojo icaite gu ujetiga gosi changureta yu ga jé ca cháji ijnangununie. 47Mu ujetiga gosi ca tangári yuruode enga que pésapo quigode rĩ, a pujuya mu a ca uyu u uje yo yujuñame. Uje que yise erámone gu ujetiga yo yujuñame ore, mu yigaidi u gu ujetiga ore chise dáringáringo piquetaque. 48Gosi ujetiga ca chise yunétique enga que tangári yuruode ga e dimane uté gosi gajnei pujuyaqué. Chamáñaje a yijna yuru casodica ome ore jne gu iji deréjnane erueminóri dire. 49Uje yuruode udore que garani u yu gotique mu garani u yai Dupade. Chamáñaje yuruode, yacajnaquéode ore quigode upúsu yirósõri Yai áyipiedie quigode. 50Enga yiraja ujetiga gosi tangári yacajnaquéode, Dupade urúo, enga jogadi u ujetiga gosi chise pucuecaringué eyúgojmai ome re. Jecute yedu Yai uruode udojo quigode ome uaque uje yacate uaque.–

Currently Selected:

Juan 12: Ayore

Highlight

Copy