Juan 13

Jesús churu dacadigode ore guídade

1Enga e dire chojmarai iji judíode ore jnusinamáni dire yui uje i tu Páscua. Ga jé u uje Jesús chiraja uje deréjnai e idógosi ujetiga jnoji erámone udojo ujetiga jé chicapóji dai rĩ. Jecucha Jesús chijnorapise danguresórone uje déji ore gari iji erámi, mu e idógosi ujetiga chingo dajnoraquédatéi ome ore.

2Jesús, acadigode ore taguíji ñane gari. Mu Satanás e chijocase Júdas Iscariote áyipie ujetiga tẽra Jesús ome umajosórone. Júdas uté u Simón gaté ujnacari. 3Jesús chirajapise darani uje Dupade u. Chirajápo rĩ uje a chajniápo aja Dupade gari rĩ. Enga chiraja uje dai Dupade chisi ome cuchade jnese ome ujetiga chijocase. 4Uje qué ore déji dabosode gai enga Jesús chague. Jé u uje chejñu daguidé gaimitodie enga chigaru dapajei ome borapetique. 5Jesús chojne yodi aja piéraque, enga jé u uje churu dacadigode guídade. Enga quigade ga chejñu borapei iji dapajei enga jé u uje chaguñéra dacadigode guídade gáyode.

6Uje jé chururase Simón Pédro guídade mu Pédro chetaque ga chojninga:

–Yangarádejná, que pisocai u go ujetiga pacadisónique churu dacaditique guídade.–

7Mu Jesús chajnai Simón Pédro uruode enga chojninga:

–Cáma araja yipesudi udé quigode. Mu a quene araja iji quigade.–

8Mu Pédro chajnai Jesús uruode enga chojninga:

–A ca yujuéga ujetiga aru yirídade to jne go.–

Mu Jesús chojninga:

–Ujetiga ca yuru barídade enga a jé ca toque jne ujetiga yitojmárango jne iji jnumi.–

9Enga Simón Pédro chojningame Jesús:

–Ujetiga jé ũré baruode udore enga ca gusu yirídade mu aruapo yatoi, yijmainie ore jnese rĩ.–

10Mu Jesús chojningame:

–Uje quene gosi chise dáringárique puruque enga icha gai jnese. Gusu uté guídade uje iguirode déji gáyode, jecute guídade u ujetiga purucho. Ichapise yacadigode uhuaque, mu que icha uaque jnese go.–

11Jesús e chiraja dẽrasṍri gosi jecute chojninga: "Que icha uaque jnese go."

12Uje e chejna guesi uje churu ore guídade enga chiguiápo daguidedie uquidé rĩ, enga nonapo ore iji ore atigabié mésa rĩ. Jé u uje chojningame ore:

–¿Ja arajáyo a yipesudode udojo quigode a? 13Uacojnichome yu: "Yocacadisṍri á." Uacojnichopome yu rĩ: "Yocangarádejná." Enga jé tiógara ujetiga oyo uacacadisṍri iji yu. Enga oyópo uacangarádejnai iji yu rĩ. Chamáñaje uyu u gu. 14-15Ujetiga uacangaráni, uacacadisṍri u yu mu jé yuru uacarídade. Mu beyoi enga ajnáño yijmapié enga aruyo ñane guídade to. 16Jé ũrepise yu ome yuruode uje que togome pirótique ujetiga sué darósonique gai. Enga que togápo rĩ ome putocaitique rĩ ujetiga sué datocaisṍri gai. 17Ujetiga arajáyo yacajnaquéode udojo quigode, enga beyoi quigode, jogadi u jne ujetiga anínaño uaque.

18Mu que yojningane u uaque jnese go. Yiraja yajegaidode iji uaque, mu yirajápo rĩ uje uacuñai a tẽra yu jne ome yumajosórone. Yiraja gu uje que toc ujetiga Dupade uruode quigode ca tocade. Uje ore urusarane Dupade urúo déji uje chojninga: "Yacásõrasórone uñeque a tẽra yu jne." 19Yingome uaque cucha dacadode udore bajaque ujetiga ajnusináño quigode ujetiga e tocade. Enga jogadi u jne ujetiga arajáyo uje que yãra uaque ome yúringai yojninga, enga anguretáyo yu jne. 20Jé ũrepise yu ome yuruode udojo: ujetiga gosi chimesẽre yirótique enga imoi tu uje imeserãque yu to. Enga isocai u to ujetiga gosi chimesẽre yu enga chimesẽrapo yirósõri to rĩ.–

Jesús chatata uje Júdas u jne ujetiga tẽra

(Matéo 26:20-25; Márcos 14:17-21; Lúcas 22:21-23)

21Uje Jesús chejna daruode udore guesi enga chise áyipie uje acadigode uñai a tẽra jne. Enga jé u uje chingopísa daruode aja dacadigode ore. Enga chojninga:

–Jé ũré yu uje a uacuñeque tẽra yu jne ome yumajosórone ore.–

22Enga acadigode ore chajire ñane mu que ore chiraja Jesús ojningai iji ore. 23Jesús acadigode uñai déji Jesús ejoi iji ore atigabié mésa uje Jesús ijnorai u uté. 24Enga Simón Pédro toji dajõrai uté gai enga cho dabujame ujetiga catecã́ri Jesús ome ojningai gosi. 25Jecute Jesús ejominóri uté chose yui enga chojninga:

–Yangaráni á, ¿gosi u bojningai?–

26Ga Jesús chajnai uruode enga chojninga:

–A yaca arureque petíguiji yoquibosode otadi, enga yojningai uté u uje yisi ome.–

Uje chejna daruode udore guesi enga Jesús chaca arureque pei iji ore posode otadi enga chisi ome Simón gaté ujnacari Júdas Iscariote. 27Uje Júdas chisa Jesús guerani arureque pei enga jĩraque Satanás chijocase Júdas áyipie ujetiga tẽra Jesús. Jecute Jesús chojninga:

–Aguito, bo gajneri enga jĩraque apésu bajéningo.–

28Mu que Jesús acadigode uñeque chiraja Jesús uruode udore quigode, uje ore déji mésa gai. 29Júdas uté u uje chañuru Jesús, acadigode ore iplátadie pié bólsa guio. Jecute ore jos eti Jesús uruode qui u ujetiga Júdas doi dajegaitígo cucha ome ore jnusinamáni dire yui. Jeoga chisi jmatágode ore iji dajnunguenie plátai. 30Uje Júdas e chisa Jesús guerani arureque pei enga jnoji ore gari. Enga e dejaque.

Jesús chisi ome daroqué ichai ome dacadigode ore

31Uje Júdas e jno enga Jesús catecã́ri daríjogosórone ore enga chojninga:

–Deréjnai udé e u ujetiga pijoque Dupade utocaidi uyu yingoningájnai. Enga Dupade ingoningájnai pijógapo iji yu to rĩ. 32Ujetiga Dupade utocaidi uyu yingome Dupade ingoningájnai aja ore enga jogadi a jé u to ujetiga Dupade chingo yingoningájnai aja ore to. Enga a jĩraque yuruode udore tocade jne.–

33Enga Jesús chojningápome ore rĩ:

–Yababode uaque á, a ca diyajmaque yu iji uacari jne. A acueyoi yu jne mu a ca eso yu. Adi jé u yuru casodica ome judíode ore uje yojninga ica ome ore enga jé yingome uaque to: uje a ca togome uaque jne ujetiga eso yijogadi. 34Mu yijíñome yiroqué ichai udé iji uacari: ujetiga beyoi ga ajnóraño ñane. Adi jé u ome yu uje yijnóra uaque, enga beyoi yijmapié uaté to enga ajnóraño ñane. 35Ujetiga ajnóraño ñane enga jogadi a u jne ujetiga erámi unirisórone ore chiraja jnese uacáringane yacadicho.–

Jesús chatata uje Pédro a chotigase jne

(Matéo 26:31-35; Márcos 14:27-31; Lúcas 22:31-34)

36Enga Simón Pédro catecã́ri Jesús enga chojninga:

–Yangarádejná, ¿acáji rique jne a?–

Enga Jesús chajnai uruode enga chojninga:

–A ca togome ua ujetiga ajína yu aja yijogadi, mu quigade enga a ese yijogadi jne.–

37Mu Pédro catecãrápoi Jesús rĩ enga chojninga: Yangarádejná, ¿ome gotique gu a ujetiga ca togome yu ujetiga yijína ua jne? Chamáñaje dimane yu ujetiga yẽra yu ome ua.–

38Jesús chajnai uruode enga chojninga:

–¿Jé ũrepise ua ya ome baruode udore ujetiga ẽra ua ome yu a? Jé ũrepise yu ome yuruode udojo: ujetiga cáma adute cochagájnai agoyedie dirome, mu a otigase yu jne enga ga gadioque.–

Currently Selected:

Juan 13: Ayore

Highlight

Copy