Juan 14

Dajeque ugurui u Jesús ujetiga gosi chise Dupade

1Enga Jesús chojningame dacadigode ore:

–Jé ca oyo uacáyugu uaque. Anguretáyo Dupade ome uaque enga anguretáyopo yu rĩ. 2Chamáñaje pijogadode uásejna iji Yapade idai. Ujetiga ca ũré udore enga a ca yingorása uaque. Jecute a yiji jne enga yipésu uacajogadode ome uacaríringai yui. 3Mu ujetiga yiji, enga e dimane uacajogadode ome uaque, enga a yĩriápo jne rĩ. Enga jogadi u ujetiga yiji uacádi. Yigaidi u gu ujetiga agúsoji ta to yiyaridi. 4Uacarajáyo yiqui enga uacarajayópo dajei te rĩ aja yiqui yui.–

5Tomás chojninga:

–Yocangarádejná, que yirajágo baquitique. ¿Jé yoco rique jne a ujetiga yajnángo dajei aja baqui yui?–

6Jesús chajnai uruode enga chojninga:

–Dajei jé u uyu. Enga cucha uréone, pucuecaringuei ore garani jé upo yu rĩ. Gusu panguretigai ome yu ujetiga gosi chise Yai. 7Ujetiga arajáyopise yu enga a arajayópo Yai to rĩ. Uje e uacamóño gatuaque jecute a e arajáyopise Yai iji de gajneri.–

8Enga Felipe catecã́ri Jesús enga chojninga:

–Yocangarádejná, be enga ango bayé aja yoc enga pininaquei irágu yoque jne.–

9Jesús chajnai Felipe uruode enga chojninga:

–Felipe á, e iyajmanguipise yu iji uacari mu cáma arajáyo yu. Ujetiga gosi chimo yu enga chimópo Yai to rĩ. ¿Ome gotique gu a uje bango yu ujetiga yingo Yai aja ua? 10¿Ca angureta yu a uje yugúsiji Yai gari enga Yai déji yari rĩ? Yatatagode ome uaque que garani u yu go mu garani u Yai uje déji yari. Enga angúromei tu yu uje pésu dapesudode cucha. 11Beyoi enga anguretáyo yu uje Yapade déji yari enga yugúsiji Yapade gari to. Mu ujetiga ca togome uaque ujetiga anguretáyo yu bisideque, mu anguretáyo yu gu yipesudode cucha. 12Jé ũrepise yu ome yuruode udojo: ujetiga gosi changureta yu ga a pésu dapesudode udore cucha to ujetiga chopise yipesudode quigode. Mu a uté ipesutígo uñéngo sué yipesute bajade gáyode. Chamáñaje a yicáji Yai jogadi jne. 13Cuchade jnese ujetiga atáyoji Dupade gu uacanguretigai iji yi enga a yipésu ome uaque jne. Uje yigaidi u gu ujetiga Dupade Abi uyu yingo Yai ingoningájnai aja uaque. 14Enga que cucha uñeque cus ujetiga ca yipésu ome uaque gu uacanguretigai iji yu.–

Jesús chichaga Dajopié Espíritu Sánto ujetiga chirógaja ore

15Ujetiga ajnóraño yu enga beyoi yiroquéode. 16Enga a yijócha Yai ajei údi ujetiga chiroque uacátajató aja uaque jne ujetiga cháji uacari iji deréjnane jnese enga chisi ome picasitigai ome uaque. 17Enga uacátajató uaté u Dupade Ujopié Espíritu Sánto, uje cucha uréone gãrapié tu. Que togome erámone jogosórone ore jnese ujetiga Dupade Ujopié chise ore. Chamáñaje que ore chimo to enga que ore chiraja go. Mu uaque u uje uacarajáyo. Uacaríjogoto uaté gu. Enga a chise deréjnai jne ujetiga uaté chacája uaque jne iji deréjnane jnese. 18A ca yijíñome uáguiji te jmete mu a yajniápo uacabai te jne rĩ ujetiga yugúsapóji uacari rĩ. 19Idógosi ujetiga ayoréode ca ore chimópo yu rĩ. Mu uaque u ujetiga amóñopo yu rĩ. Chamáñaje a yitoi mu a yiquecápo rĩ jecute a uacasocai u uté to jne. A aquecáyo jne iji deréjnane jnese. 20Ujetiga e yiqueca iji yitoringai enga a jogadi u jne ujetiga arajáyo uje Yai, uyu yitojmárango. Enga a arajayópo rĩ uje uhuaque, uyu yitojmárango jnese to. 21Ujetiga gosi chiraja yiroquéode quigode enga doi enga pésu, uté u uje chijnóra yu. Enga Yai chijnóra uté gosi gu ijnoraquei ome yu. Que gusu Yai uje chijnóra uté gosi mu uyu u to uje yijnóra, enga a yingo yu aja uté gosi jne.–

22Júdas uñai catecã́ri Jesús. Mu que Jesús guẽrasṍri Júdas Iscariote u go. Enga uté chojninga:

–Yangaráni á, ¿gotique gu a uje a ango ua aja banguresórone uyoque jne, jé basa que ango ua aja erámone jogosórone?–

23Jesús chajnai uruode enga chojninga:

–A gusu yingo yu aja yangarásõripísode. Uje uté gosi ujetiga chijnóra yu doi ga pésu yuruode quigode. Jecute Yai a chijnóra uté gosi jne. Enga a Yai uyoque yátago yógaja uté gosi. 24Mu gosi uje que chijnóra yu enga que doi yuruode quigode. Mu uacadudigode yacajnaquéo udojo que garani uyu go. Mu garani u yirósõri Yai Dupade.

25Uje qué yugúsiji uacari enga yingo cuchade udojo jnese aja uaque. 26Mu quigade enga Yai a chiroque Dajopié Espíritu Sánto aja uaque jne ujetiga basája yijogadi. Enga uté a chátaja uaque jne enga a chajni uacajnusiétigade jne. U to jne ujetiga chacate uágome cuchade jnese enga uté upo rĩ uje jnusinápo yacajnaquéode quigode jnese ome uaque rĩ.

27A yiji jne ome uaque mu a yijíñome yijogosṍri pajesereringa iji uaque. Mu yerani pajesereringa que cunguésõri erámone jogosórone ore irasitigai pajesereringa ome uaque, uje cachi ore urúo. Jecute ca oyo uacáyugu ome cuchade. Ca atodóyopo cuchárique rĩ. 28E uacadúcho yuruode uje yingo yicoringai aja uaque. Jé aja ujetiga yisápo uaque rĩ ujetiga yugúsapói uacari rĩ. Ujetiga jec ũré ajnóraño yu enga a pirasitigai jogadi u ome uaque uje yicáji Yai jogadi. Chamáñaje Yai sué yibai gu. 29Yingo cuchade udojo aja uaque uje cáma tocade. Yigaidi u gu ujetiga tocade, enga anguretáyo.

30Mu a jé ca yiji yuruode udojo údi ome uaque. Chamáñaje erámone jogosórone ore eduguéjnai Satanás diringai e puja yui. Mu que togome uté ujetiga etotiguérique sué yibai. 31Mu yajnéone cucha a tocade jne ome yu. Yigaidi u gu ujetiga erámone jogosórone ore chiraja yijnoraquei ome Yai. Enga u to ujetiga ore chiraja uje yipésu yirósõri Yai ojningane cucha ome yu. E gusu yacajnaquéode udojo ome uaque. Boyo, yico iji de.–

Currently Selected:

Juan 14: Ayore

Highlight

Copy