Juan 3

Jesús, Nicodémo ore catecã́ri ñane

1Fariséode uñai déji uje i tu Nicodémo. Enga judíode angarate obiréjnane uñai u Nicodémo. 2Dejaque uñai enga Nicodémo tibágui Jesús ujetiga catecã́ri. Enga chojninga:

–Pacadisṍri á, yirajágo uje Dupade iroque ua aja de ujetiga acate yoque. Chamáñaje bapésu bapesútedatéode ome yoque gu. Ujetiga ca Dupade iroque ua enga a ca toguírasome ua ujetiga apésu cuchade udore.–

3Jesús chajnai Nicodémo enga chojninga:

–Jé ũrepise yu ome yuruode udore: ujetiga Dupade ca chinoningase gosi enga a ca togome gosi ujetiga chimo dáringárique Dupade urása. Enga gosi chise dáringárique Dupade urása enga gajnui u ujetiga quene basosi.–

4Nicodémo catecãrápoi Jesús gaté rĩ uje que chiraja uruode quigode gu. Enga chojninga:

–Que toc ujetiga e jnani gosi enga doi enga chacápoja daté ajei rĩ ujetiga basapo rĩ. ¿Jé chorase rique ujetiga basapo gaté rĩ?–

5Jesús chajnai Nicodémo ga chojninga:

–Jé ũrepise yu ome yuruode udojo: ujetiga gosi chedu dabatiga ayorei a ca uté gosi chimo dáringárique Dupade urása jne. Mu ujetiga Dupade Ujopié chinoningase gosi enga úringai Dupade urása jogadi u. 6Jecute gosi basíji daté enga jé chopise daté ome úringai jnutiminore. Jé basa ga uje Dupade Ujopié inoningayaque gosi enga uté gosi jé chopise danoningayasṍri. 7Jecute aya baguté jora ome yuruode uje yojninga: "Ujetiga apota báringárique Dupade urása enga ajuéga ua ome babatiga ejoi." 8Uje emi chubúchu erámi aja dajesúode, mu que pirajaque garãtique enga que pirajaque quitique rĩ. Que pimo mu ore chudute jocarane. Enga Dupade Ujopié Espíritu Sánto isocai u uté ome ore uje chinoningase ore. Que ore chimo mu ore chiraja adode iji dajéode.–

9Uje Jesús chejna dacajnaquéode guesi ome Nicodémo enga Nicodémo catecãrápoi rĩ enga chojninga:

–Cáma yiraja cuchade udore quitígo.–

10Mu Jesús chojningame Nicodémo:

–Israélgosode ore acadisõre obiréjnai u ua mu ¿ja ca araja ya yojningane cucha udore quigode ome ua ya? 11Jé ũré yu uje yirajágo cuchade udore quigode, enga yocojñane u yoquimone cucha. Mu uaque, que anguretáyo yocojñane cucha. 12Ujetiga ca anguretáyo yu uje yacãra yacajnaquéode aja erámi jogonórone cucha, móitapũré ujetiga yacate uágome gatajnoquei jogonórone cucha. 13Que uñeque déji ujetiga chicáji gaté ujetiga chatata gaté jogonórone cucha ome uaque. Gusu Dupade utocaidi uyu uje yiyaridi u gatajnoquei. Enga uyu u uje yicáji jnumi nanique uje yṍraji gaté ujetiga yatata gaté jogonórone cucha ome uaque. 14Uacarajáyo uje Moisés pésu ugai gajnui nanique iji erãpe tarétigai. Enga Moisés chiringare dapesudi aja gaté nanique. Gaidi u gu ujetiga urasade chajire enga ore eca. Adi a jé u ome Dupade utocaidi uyu. A piringarãque yu jne aja gaté. 15Ujetiga udore ore changureta yu enga a ore eca iji deréjnane jnese jne. Enga jé ca ore bijnápo jne rĩ.

Dupade chijnorapise erámi jogosórone ore

16Enga Dupade chijnorapise erámi jogosórone ore. Jecute tẽra dajnacare ugurui ome ore. Ujetiga gosi changureta enga gajneque pucuecaringué eyúgojmai iji deréjnane jnese. Enga a ca chimo Dupade ujuyaquédatéi jne ome re. 17Dupade que ajéode u ujetiga chiroque dajnacari aja erámi ujetiga cho dajuñame ore. Mu chirógaja erámi gu ujetiga chiqueta ore.

18Uté gosi ujetiga changureta Dupade ape ugurui enga a jé ca chimo dáringárique pujuya jne. Mu gosi ujetiga ca changureta enga e chimate ujetiga e chise dáringai pujuya. Chamáñaje que changureta Dupade ape ugurui gu. 19Udore ore uje que ore changureta Dupade abi enga e dimane ore gajnéone pujuyaquéo ome ore jne. Chamáñaje dírecaringuéi e chise erámone gu, mu ore irasigode u ijnangununie enga que ore chise dírecaringuéone unétique. Chamáñaje jé ore déji date gajnaréngone gáyode gu. 20Jé ate uje cucha gajnaréngone ipesungórone ore chetaque dírecaringuéone. Enga idája ore iji dírecaringuéi. Ore ajéode u gu ujetiga ca pijoque ore ipesudode cucha gajnarécho. 21Mu udore ore uje ore gaidode u Dupade uru uréone quigode jĩraque ore chose dírecaringuéi yui. Ore ajéode u gu ujetiga ore ujode ayoréo chiraja uje Dupade déji ore gari iji ore ipesudode udore.–

Juan el Bautísta chatatapo Jesús adode ome ore rĩ

22Udojo quigade ga Jesús nóna dacadigode ore enga ore chicáji ore uniri Judéa. Enga dirode orocoi ome ore iji ore uniri uté. Enga ore chaca ore edodie iji yodi iji ore uniri uté. 23Adi jé u ome Juan uje chaca ore edodie iji yodi to iji deréjnane udore. Enga Juan déji jogadi uje i tu Enón uje idógosiji ore idai uje i tu Salim. Enga gajño cuchabé idógosiji. Enga uásejna yodi iji gajño uaté. Jecute ore chise Juan iji te ujetiga chaca ore edodie iji to. 24Cucha dacadode udore tocade uje cáma pujurúgai Juan.

25Iji udore quigade enga Juan acadigode uñane botare judíode uñane. Enga ore ibotaquéode gajnengórone u Juan, Jesús ore ujetiga gosi iji ore ujetiga ayorérique chise dáringárique ayoré icha ome udore uñeque isocade. 26Juan acadigode ore tibágui Juan enga ore chojninga:

–Pacadisṍri á, jé ca adute to a uje jnacari uje chise ua iji tié Jordán uéchamitó e chaca ore edodie iji yodi to. Yocojningai u uté uje bacate yógome ica. Enga ore jnese e ore tangári uté.–

27Enga Juan chajnai ore uruode enga chojninga:

–Jé dóji. Uje que toque ujetiga uñeque chimo dáringárique Dupade utocaite ujetiga ca Dupade guẽrate úringai utocaite ome.–

28Juan chojningame ore:

–Uacaduchopise yuruode diríca uje yojningame uaque: "Dupade utocaidi Crísto que u yu gotique. Mu yajnei u ujetiga yimate cucha dacadode iji uté diringai iquei." 29Jecucha pijoque jnacari úringai gapua gajmasõre. U gu uje ore déji ñane ejode. Uje gajmasṍri ujoi jnacare chudute dajõrai arecujaidie enga pininaquei irágu. Adi jé u iji deréjnai udé to uje yirasitigai irágu yu uje yudute yujoi Dupade utocaite ujnomei to. 30Uje yajéode u ujetiga jnacari uté obiréjnapise iji dirode jnese. Yajéode upo rĩ ujetiga yúringai obiréjna e bijna ome yu.–

Pujnuéngaisṍri uté gosi uje garani u gaté

31Juan jno dacajnaquéode údi enga chojninga:

–Ore uje ore garani u jnumi enga ore júdode u erámone jogonórone cucha. Mu ujetiga gosi garani u gaté enga uté gosi u uje sué yoquibáyode iji de jnumi. 32Enga uté júdode u damone cucha iji gaté. Jé aja dadudigode cucha iji gaté rĩ. Mu que uñeque changureta atatagode cucha quigode. 33Mu ujetiga uñeque changureta uruode quigode enga chajo raja uje ũrepise Dupade. 34Jecute Dupade utocaidi uté chatata Dupade uruode. Enga Dupade chĩretapise uté áyipie ome dajopié Espíritu Sánto. 35Jecute Dupade chijnorapise dabi uté enga chisi ome cuchade jnese ome ujetiga chijocase cuchade. 36Ujetiga gosi changureta Dupade Abi uté gosi gajneque pucuecaringué eyúgojmai. Mu gosi ujetiga ca pota changureta Dupade Abi a ca uté gosi chimo dacuecaringué ichai uté jne. Mu uté gosi a chimo Dupade ujuyaquédatéi ome re jne.–

Currently Selected:

Juan 3: Ayore

Highlight

Copy