Juan 6

Jesús ipesútedatéi u udé uje pésu enga chõre arurégode, jé aja oyídode

(Matéo 14:13-21; Márcos 6:30-44; Lúcas 9:10-17)

1Udojo quigade enga Jesús jno enga chicáji yote quedéjnai uéchai uje íode gare: Galiléa u i uñai, jé basa ga Tibérias u i uñai. 2Uásejna ayoréode ore uje ore chajna Jesús. Chamáña gu uje ore chimo ipesudode cucha pitijabácho gu uje chiqueta ejnaretade. 3Uje Jesús ore chise yote quedéjnai uté uéchamitó enga Jesús, acadigode ore choru cucarani ga ore chácariji te. 4Enga e idógosi judíode jnusinamáni dire uje i tu Páscua. 5Uje Jesús chajire daquigade enga chimo ayoré dipeséode uje qué ore chajna ore aja ore charidi enga chojningame Felipe:

–¿Jé yicagóji rique jne a ujetiga yicoi oré tome cucha pibotique ujetiga ayoré dipeséode udore ore tagu?–

6Mu cachi Jesús urúo ome Felipe. Gaidi u gu ujetiga qué tangári uru quitígo. Chamáñaje Jesús e chiraja gu dasocai ome cucha pibosode ome ayoré dipeséode. 7Mu Felipe chajnai Jesús uruode enga chojninga:

–Garósi yoquiplátadie erĩ́e. Mu ujetiga yoquiplátadie denário chorase 200 a yijírasi arurétigo ome ore. Mu a qué chona ore ujetiga subudé ore iji.–

8Jecute Simón Pédro jõrai Andrés uje Jesús acadigode uñai jé u to doi ga catecã́ri Jesús. 9Enga chojninga:

–Disi déji de uje arurégode déji gari enga chejna yijmanai. Uje ore ipesucho iji arroz quedéjnai uje i tu cebáda. Oyite gáreode dépoji gari rĩ. Mu qué garósi udore ome ayoré dipeséode udore.–

10Enga Jesús chojningame ore:

–Angoñome ore enga ore chácariji jnumi jnese.–

Ga ore chácariji jnacarapui. Enga 5.000 u jnanione iji ore. 11Udojo quigade enga Jesús chisa arurégode udore enga jé u uje chacãre dai Dupade gai. Enga chisi ome arurégode ome dacadigode ore. Jé u uje acadigode udore chajuguína arurégode ome ayoréode ore uje ore chácariji dayaridi. Adi jé u to ome oyite gáreode. Ore chisi ore jnese iji. Enga subudé ore iji jnese. 12Uje e subudé ore iji jnese enga Jesús chojningame dacadigode:

–Amátayo péode ujetiga ca ducarãcho.–

13Enga ore chamáta arureque quedéjnane pépitade ga ore chĩreta canástadie uje gare iji yirídai. Uje arurégode udore chejna yijmanai iji taningai. 14Uje ayoréode ore chimo Jesús ipesútedatéi uté enga ore chojninga:

–Jé ũré uje Dupade uruode atatasṍri u uté ujetiga di iji jnumone udojo.–

15Jesús chiraja ore áyipiedie uje ore ajegaidi u ujetiga ore chisa ujetiga ore cho deduguéjna cuchábi iji. Jecute jnopo rĩ enga chicáji cucarani uje idájai jnumi ujetiga chácariji uje gusu iji.

Jesús diguiji yodi gai

(Matéo 14:22-27; Márcos 6:45-52)

16Uje e dejaque enga Jesús acadigode ore doi jnumi iji cucarani enga ore chicáji yote quedéjnai yui. 17E dejaque enga topiéjna erámi mu cáma Jesús cháta raja ore. Jecute ore chacája cucoi enga ore jnome yote quedéjnai uéchai uñai ujetiga ore chicáji ore idai Capernaúm. 18Mu uje ore déji yote quedéjnai ajei enga úyujna chorei ore iji yote quedéjnai ajei. Enga yodi bayáringai chorei ore iji quedéjnane. 19E idája ore iji yote quedéjnai edógai, ga kilómetrodie chise 6. Mu ore chimo Jesús iji te uje diguiji yodi gai aja ore yui. Enga ore todópisa. 20Mu Jesús catecã́ri ore ga chojninga:

–¡Uyu u! ¡Jé ca atodóyo!–

21Uje ore chudute Jesús uruode udore enga e dimane ore ujetiga Jesús chacája ore pi cuco. Enga uje Jesús chacája cucoi enga jĩraque ore chise daqui punire.

Ayorébui chucué Jesús

22Dire uñai u uje ayorébui casé uje ore déji yote quedéjnai uéchamitó uñai ore áyipiedie déji Jesús jogatique. Ore chiraja uje Jesús acadigode ore pi u cuco ugurui diríca uje ore jno. Ore chirajápo rĩ uje que Jesús nóna ore to diríca. 23Uje ore áyipiedie déji cuchade udore jé u uje cuco uñéngo di uje ore tṍraji ore idai Tibérias. Cucode udore ore tṍraji te enga ore chirõre jogadi casé uje Jesús chajuguína arurégode ome ore diríca, uje chacãre Dupade gai iji diríca. 24Uje ayorébui udore ore chimo uje Jesús que déji ore qui uté enga que acadigode dépoji rĩ, jé u uje ore chacája cucode ga ore chicáji Capernaúm yui. Uje ore ucuei u Jesús.

Jesús chacãra raja arurei

25Uje ore chise yodi uté uéchai enga ore chise Jesús iji. Enga ore catecã́ri, ga ore chojningame:

–Yocacadisṍri á, ¿jé basocárique ujetiga ese de?–

26Mu Jesús chajnai ore uruode enga chojninga:

–Jé ũrepise yu ome yuruode: uacacueyoi yu gu ome yipesútedaté casé uje uacacho yeranone arurécho diríca enga uacãretáyo uacacadie iji diríca. Mu que arajáyo quigode gotique yipesútedatéode ome uaque. 27Ayáyo uaquedójnaringuéone ome uacacuegode cucha pibose uje jĩraque íjnoque. Mu uacacuegode urásu cucha pibosode uje que eruénique cuse. Cucha pibosode udore u gu uje chisi ome pucuecaringué eyúgojmai ome uaque. Enga pibosode udore guẽrasṍri jé u Dupade utocaidi uyu ujetiga yisi ome uaque jne. Chamáñaje yai Dupade ajegaite yu ome udore gu.–

28Uje ore catecã́ri Jesús enga ore chojninga:

–¿Jé yoquisocárique ome yoque e ujetiga yipéco Dupade ajegaidode cucha?–

29Jesús chajnai ore uruode enga chojninga:

–Dupade ajegaidi u ujetiga anguretáyo utocaidi uyu.–

30Mu ore catecã́ri Jesús gaté enga ore chojningame:

–Angoba yoque bajopiédaté ujetiga yimóngo enga jé u ujetiga yanguretágo ua. ¿Jé bapesutique jne ome yoque?–

31Mu jé ate ome ore uje ore jno daruode údi ome Jesús. Enga ore chojninga:

–Yocayode jnani bajácho ore tagu arurégode nanique uje i tu maná iji erãpe eyutiguei. Dupade uruode urusãrasórone ore urusarane quigode u udé: "Dupade u nanique uje guẽracho arureque gateminórone ome ore nanique uje garani u gatajnoquei."–

32Jesús chajnai ore uruode enga chojninga:

–Jé ũrepise yu uje que Moisés u go ujetiga guẽrate arurégode udore uje tṍraji gaté ome ore nanique. Mu yai Dupade guẽracho ome ore nanique. Enga Yai e ajéode u ujetiga chisi ome arureque uñai ome uaque uje tṍraji gaté to, mu suépise arureque maná gáyode. 33Enga Dupade guerani arureque uñai u datocaidi uje garani jé u gaté to. Mu uté u uje chisi ome pucuecaringué eyúgojmai ome erámi unirisórone.–

34Enga jé u uje ore chojningame Jesús:

–Be ga jecucha asi ome yoque arurégode udore ujetiga yajo.–

35Jesús chajnai ore uruode enga chojninga:

–Arurei uté uje chisi ome pucuecaringué eyúgojmai ome ore jé u uyu. Ujetiga gosi tibágui yu ome arurei uté enga a ca chaguhénique chejnapo uté gosi rĩ. Ujetiga gosi changureta yu ga a ca gosi cajnorapóji jne rĩ.–

36Jesús jno daruode údi enga chojninga:

–E yingome uaque uje que anguretáyo yu uje uacamóño yu múñi. 37Yai Dupade a chiroque uacuñéngo aja yu jne enga a udore ore jnese chise yu jne. Enga a ca yetaque yibaguiésóningo iji uaque. 38Que yise jnumone nanique gu ujetiga yipésu yáyipierigui quitígo. Mu yiji jnumi iji gatajnoquei nanique gu ujetiga yipésu yirósõri áyipiedie quigode. 39Enga yirósõri yai Dupade ajéode u ome yu ujetiga yañurupúsu yibaguiésórone ore guio ujetiga ca uñeque bijna ome yoc. Yojningane u udore ore uje Dupade iroc ore aja yu. Ajegaidi u ujetiga yiringare udore ore jnese iji dirode erueminóri ujetiga ore chise dáringane eca iji deréjnane jnese. 40Yirósõri Dupade ajéode u to ujetiga dajnacari uyu yajirisórone ore changureta yu jnese ujetiga pucuecaringué eyúgojmai déji ore jnese. Enga yiringare udore ore jne iji dirode erueminóri.–

41Uje judíode ore chudute Jesús uruode uje chojninga: "Arurei uyu ga yarani u gatajnoquei," enga jé u uje ore dojnóngaja. 42Enga ore chojninga:

–¿Ja ca José abi Jesús uté a? Yimóngo dayé José, ga yimóngopo daté rĩ. Chiese garani u gatajnoquei.–

43Jesús chojningame ore:

–Ayáyo uacadojnóngamátigade ome yu. 44Que togome uacuñeque ujetiga chise yu ujetiga ca yirósõri yai Dupade oite uágaja yu. Enga yai Dupade oidode udore u jne ujetiga yiringare ore iji dirode erueminóri. 45Dupade uruode atatasórone ore urusarane chósi te: "Dupade u ujetiga chacate ore jnese jne." Udore quigode u ujetiga ore tangári yai Dupade acajnaquéode enga ore doi quigode, udore ore u jne ujetiga ore chose yi.

46Yirajágo uje que amóño yai Dupade. Mu imósõre ugurui u uyu uje yarani u Dupade iji gaté. 47Jé ũrepise yu ujetiga gosi changureta yu enga pucuecaringué eyúgojmai gajnesõre gosi. 48Arurei u uyu uje gosi tagu enga eca iji deréjnane jnese. 49Uacarajáyo uje uacayode jnani bajácho ore tagu arurégode maná nanique iji erãpe tarétigai. Mu ore toi jnese nanique. 50Mu yacajnaquéode júdi u arureque uecai ujetiga tṍraji gaté ujetiga gosi tagu enga que chimo pitoringai ome re. 51Enga arureque uecai uté uje tṍraji gaté jé upúsu yu. Ujetiga gosi tagu arureque uecai uté enga eca iji deréjnane jnese. Yerani uté arureque gajnui jé u yibai. Uje a yẽra yu jne ome erámi unirisórone ore jnese. Yigaidi u gu ujetiga ore chise dáringane eca iji deréjnane jnese.–

52Jecute judíode ore botare ñane ome Jesús acajnaquéode quigode. Ga ore chojninga:

–¿Jé uté isocáringome uyoque ujetiga chisi ome dabai ome yoque ujetiga yajo?–

53Uje Jesús chajnai ore uruode enga chojninga:

–Jé ũrepise yu ome yuruode: ujetiga ca acho Dupade utocaidi uyu yibai, enga ójiyopo yiyoi rĩ enga a ca aquecáyo iji deréjnane jnese. 54Jecute gosi ujetiga tagu yibai, enga chójiapo yiyoi rĩ pucuecaringué eyúgojmai déji uté gosi. Enga a yiringarápo uté gosi jne rĩ iji dirode erueminóri. 55Chamáñaje cucha pibotíguipíse yibai, enga cucha pijotáguipíse yiyoi rĩ. 56Jecute gosi uje tagu yibai enga chójiapo yiyoi rĩ enga jé u uje uté gosi, uyu yitojmárango iji jnumi. 57Pucuecaringuei garani u yirósõri Yai enga yiqueca gu uté. Adi jé u uté gosi ujetiga cho cucha pibotíji yu, uté gosi eca gu uyu. 58Yuruode udojo gajnengóri u arurei uje tṍraji gaté enga cháji jnumi udé nanique. Mu que yojningai u uacayode jnani bajácho ore posode maná. Uje ore tagu nanique mu ore topoi nanique rĩ. Mu yuruode gajnengóri u arurei uje gosi tagu enga eca iji deréjnane jnese.–

59Jesús déji judíode ore aquiningamei guiguíjna nanique iji ore idai Capernaúm uje chacate ore ome cuchade udore.

Jesús cho pucuecaringué eyúgojmai quigode ome ore

60Enga uje Jesús acajnaquéode angarásorone uñane ore chudute udojo enga ore chojninga:

–Uajácho Jesús acajnaquéode udore ujetiga ayorérique chiraja udore quigode. ¿Jé yocórase rique ujetiga yicoi quigode?–

61Jesús e chiraja uje ore cho dabuja ome ñane uje ore chetaque acajnaquéode quigode. Jecute chojningame ore:

–¿Etácho yacajnaquéode quigode a? 62Ujetiga quedéjna yacajnaquéode udojo quigode ome uaque, móitapũrérase ujetiga amóño Dupade utocaidi uyu ujetiga yicapóji yijogadi casica rĩ iji gaté. 63Dupade Ujopié u uje guẽrate pucuecaringuei ome ore. Jé basa que cuchárique tṍraji yocúringane ayoréo. Yacajnaquéode ome uaque ũréo enga ore garani u Dupade ujopié. Jecute udore guẽrate pucuecaringuei ome ore. 64Mu uacuñane qué déji uje cáma anguretáyo yu.

Uje Jesús chiraja danguresórojmane gosode jne iji taningápisi. Enga chirajápo gosi rĩ ujetiga tẽra jne ome damajosórone. 65Uje Jesús chojninga:

–Yingome uaque que: ujetiga yai Dupade ca oite uaque gosi aja yu, enga a ca toque jne ome gosi ujetiga chise yu.–

66Enga jogadi jé u uje uásejna ayoréode uje ore cha ore nóna Jesús aja quedéjnane. 67Quigade enga Jesús catecã́ri dacadigode uje gare ore iji yirídai. Enga chojninga:

–¿Jé oyo rique jne a ujetiga apótayo doi to a?–

68Mu Simón Pédro catecã́ri enga chojninga:

–Yocangaráni á, que togome yoque ujetiga yico to. Uje que pacadisṍri uñeque déji ujetiga uruode cho baruode. Ua u gu uje baruode chisi ome pucuecaringué eyúgojmai ome yoque. 69Bacadigode uyoque e yanguretágo baruode enga yirajágo uje yoquijnati Crísto u ua. Enga Dupa uecai abi upo ua rĩ.–

70Jesús chajnai ore uruode enga chojninga:

–¿Ja jé ca ũré a uje yajegaite yacadigode uaque uje gare uáguiji yirídai? Mu uñai déji uacajade uje Satanás déji ajei.–

71Jesús uruode udojo gajnengóri u Júdas Iscariote uje dai i u Simón to nanique. E chiraja uje Júdas u jne ujetiga tẽrame damajosórone. Acadigode uje gare ore iji yirídai, jé jõrai u to múñi.

Currently Selected:

Juan 6: Ayore

Highlight

Copy