Juan 9

Jesús chiqueta jnani uje edoparique aja guesi iji daté

1Uje Jesús jno dáringai urugu údi enga chise jnanírique to uje edoparique aja guesi iji daté. 2Uje Jesús acadigode ore chimo jnani uté to enga ore catecã́ri Jesús ome. Enga ore chojninga:

–Yocacadisṍri á, ¿gotique gu a uje jnani uté edoparique aja guesi iji daté nanique? A dayé, daté ore isijnaringuéone u jõ, jeoga uté isijnaringuéone jé u.–

3Mu Jesús chajnai ore uruode enga chojninga:

–Que uté isijnaringuéone u go. Que dayé, daté ore isijnaringuéone upo gotique rĩ. Mu Dupade ajéode u ujetiga pijoque ujopié ome úringai piquetaque. 4Uje qué dire enga yajéode u ujetiga yejnape yiguesi jne ome yirósõri iroquéode. Chamáñaje qué dire gu. Mu uje e dejaque enga que togome ayorérique ujetiga chisa dejode iji dejai. 5Uje qué yugúsiji erámone udojo enga yajnui u dírecaringuéi iji erámone udojo.–

6Uje Jesús chejna daruode udore guesi enga jé u uje chutĩ́raja jnumi ga pésu pacataringué garósi ome datĩrai. Jé u uje chaguñéra edopari edodie. 7Enga jé u uje Jesús chojningame edopari:

–Bo ga aru bedodie iji ore esãrapié uje i tu Siloé.–

Ore uruode Siloé qui u uje ore chiroque ore aja cuchade. Jé u uje edopari jno enga churu dedodie enga jogadi u uje chimo dajirigode. Enga chajnésaru dayaridi. 8Enga jnani uté chise dejominórone ayoré uñane ore mu ore chirajaque enga ore chojninga:

–¿Ja ca uté u uje utaidé yoquiplátadie ica?–

9Enga uñane ore chojninga:

–Jé uté u.–

Uñane chojninga:

–Que u gotique, cachi jé cho.–

Mu jnani uté chingo re ome ore enga chojninga:

–Uyu jé u erĩ́e.–

10Jecute ore catecã́ri enga ore chojninga:

–¿Jé go uje bamo bajirigode?–

11Enga uté chajnai ore uruode enga chojninga:

–Jnani uté uje i u Jesús chutĩ́raja jnumi enga pésu pacataringuei enga jé u uje chaguñéra yedodie. Enga chojningame yu: "Bo, ga acáji ore esãrapié uje i tu Siloé enga aru bedodie iji." Ga yiji uruode. Yuru yedodie iji. Jé u uje yimo yajirigode.–

12Jé ore ate uje ore catecã́ri enga ore chojninga:

–¿Jé déji rique jnani uté?–

Mu uté chojninga:

–Que yiraja jogatique.–

Fariséode catecã́ri Jesús iquetai edoparique

13Enga ore jno uté údi enga ore chijna aja fariséode. 14Uje dire puyai u uté uje Jesús pésu pacataringuéone aja ñane enga chaguñéra edopari edodie. Enga jé u uje chiqueta edopari. 15Enga fariséode ore catecãrápoi jnani uté rĩ ome isocárique uje e chimo dajirigode. Enga jnani chajnai ore enga chojninga:

–Yiquetangóri pésu pacataringuei enga chaguñéra yedodie. Uje yuru yedodie enga jogadi u uje yimo yajirigode.–

16Mu fariséode ore chajuque uñane ajéode uje uñane ore chojninga:

–Que toc ujetiga jnani uté iquetasṍri tṍraji Dupade. Sijnaque uté uje pésu dapesudode iji dire puyai.–

Jé basa uñane ore chojninga:

–¿Ja toguírase ome ayoré sijnátique ujetiga cho uté ome ipesútedatéode?–

17Jecute ore catecã́ri jnani edopari gaté enga ore chojninga:

–Boji te é. Yangácoi báyipierigui quitígo ome baquetangóri jnani uté.–

Jnani edopari chojninga:

–Ome yajéode, ísega Dupade uruode atatasórone jõra, ¡jõ!–

18Mu judíode ore chotigase úringai casé edoparique. Chamáñaje e chimo dajirigode gu. Jecute ore tibidi dayé, daté ore ujetiga ore catecã́ri ore. 19Enga ore chojninga:

–¿Jec ũré uacape udé uje chiese edoparique aja guesi nanique iji daté? Ujetiga jec ũré udore enga ¿ome gotique gu a uje e chimo dajirigode?–

20Enga dayé ore chojningame ore:

–Yirajágo uje yocabi casica jé u uje basíji daté ica ga edoparígaja guesi. 21Mu que yirajágo gotique uje e chimo dajirigode. Que yirajágopo iquetangónique gosi te rĩ uje chuchẽre edodie gáyode. Mu beyoi ga acatecãchoi uté. Uté e chise dáringai jnani. Jé tiógara ujetiga chatata datígo ome uaque.–

22Jnani uté dayé urúo udore gu uje ore todo judíode ore angaránone. Ore chudute gu uje judíode angaránone e ore chimate dáyipiedie gu ujetiga ore chãraque daquiningamei guiguíjna ome udore ore uje ore changureta Jesús úringai pijnati Crísto. 23Jecute jnani uté dayé uruode u udore gu ome ore uje chojninga:

–Uacamóño uje e jnani uté, jecute angoñome iquetangóri gosi.–

24Jecute judíode angaránone ore tibidápoi edopari gaté rĩ ujetiga ore catecã́ri enga ore chojninga:

–Be ga angopísa báringai piquetaque quigode ome yoque iji Dupade iquei. Uje e yirajagopise jnani uté uje sijnanguipise.–

25Jnani edopari chojninga:

–Que yiraja go ujetiga sijnaque yiquetasṍri. Mu yirajai u uje edoparique yu ica mu e yimo yajirigode.–

26Mu jé ate uje ore catecã́ri. Ga ore chojninga:

–¿Jé isocáringome ua diríca ya, uje chuchẽre bedodie gáyode?–

27Enga jnani edopari chojninga:

–E yingome uaque erĩ́e. Mu que angáchoi yuruode. ¿Ome gotique gu a ujetiga yingopome uaque gaté rĩ? ¿Uacajegaidi u panguretigai ome uté to a?–

28Jecute judíode ore pojna edopari údode enga ore chojninga:

–Bajegaidi u ujetiga be uté uruode quigode. Jé basa uyoque ga yicoi jnani bajai Moisés iroquéode. 29Que potigayaquérique déji yoc uje Dupade catecã́ri yocai jnani bajai Moisés nanique. Mu que yirajagopise baquetangóri jnani uté garãtique.–

30Jnani edopari chojninga:

–¡Quedéjnapise uacaruode udore! Uje que arajáyo uté garani uje uté ujopié cuse ga chuchẽre yedodie gáyode. 31Mu yirajágo jnese uje Dupade que doi sijnángone ore uruode quigode. Mu tangaripísi dajnorasórone ore uruode uje ore u gu uje ore doi áyipiedie quigode. 32Que yudúco uté gajnúrique to jé iji taningápisi ujetiga uñeque doi enga chuchẽre edoparitique edórigui gáyode ujetiga edoparígaja guesi iji datéraque. 33Ujetiga jnani uté ca garani u Dupade enga a ca pesurásu cucha pitijabátique.–

34Mu ore chojningame edopari uruode:

–Basijnaringuéone u uje pésu ua ica enga edoparique ua aja guesi iji baté. ¿A ca ajéngome yoque to a? Uje bapota jeta acate yoque to ome cuchade.–

Jé u uje judíode ore angaránone ore tṍra edopari aja guesi iji daquiningamei guiguíjna.

Jesús chatata uje parique fariséode ore áyipiedie

35Jesús e chiraja uje judíode ore tṍra edopari aja guesi iji daquiningamei guiguíjna. Jecute uje Jesús e chise edopari enga chojninga:

–¿Jé ũré uje bangureta Dupade Abi a?–

36Mu jnani edopari chajnai Jesús enga chojninga:

–Yocangaráni á, ango yu uté gosi ujetiga yangureta uté to.–

37Jecute Jesús chingo raja enga chojninga:

–E bamo Dupade Abi que erĩ́e. Uyu u uje bacatecã́ri yu iji de.–

38Jec u uje jnani edopari uté doi ga chichaga dagataidie aja jnumi iji Jesús iquei enga chojninga:

–E yangureta ua, Yangaráni á.–

39Udojo quigade ga Jesús chojninga:

–Yise erámone udojo nanique gu ujetiga yipésu cuchade aja quigode. Jecute yuchẽre edoparigode ore edodie gáyode ujetiga ore chimo dajirigode. Jé basa yujuru dicotárechoquíode ore áyipiedie gáyode. Enga a ore gajnúone u edoparigode.–

40Jecute fariséode uñéngo ore chudute Jesús uruode enga ore chojningame:

–¿Ja edoparique yoque to a ome ua ya?–

41Uje Jesús chajnai ore uruode enga chojninga:

–Ujetiga jec ũré enga agúpurai uaque ome Dupade uruode quigode, enga jogadi jé urásu ujetiga uacajnui urásu edoparigode. Enga a ca tiógararása ujetiga pujuya uaque ome uacate gajnaréngone. Mu uacojnicho: "Yirajágo Dupade uruode quigode." Jecute jé tiógara ome uacáringane pujuya.

Currently Selected:

Juan 9: Ayore

Highlight

Copy