Lúcas 13

Jesús chaquĩ́ra yógome yocáyipie gajnarénguenie jnese

1Jesús qué déji dacajnaquéode gai mu jnanione uñane ore chisíji. Ore chingo Jesús uje quene Piláto chujé Galiléa jogonórone uñéngo que, uje qué ore déji degode cuchiso gai uje ore gueranome Dupade. Mu Piláto yugode ucode jnanío ore iyojnanie cháta raja degode cuchiso iyode aja jnumi. 2Mu Jesús chajnai ore enga chojninga:

–¿Uacajéningo cho rique ome jnanione udore ore, galiléagosode? ¿Cucha dacadode udore chise ore gu a uje sijnanguipise ore ome dojode jnanío iji uacaniri? 3Mu yojningame uaque uje que quigode u udore go. Mu ujetiga ca ecãcho uacáyipie quigode, uacasocárigo ome Dupade enga a eso uaqueruénique to jne. 4E uacadúcho jnese uje jnanione uñane uje gadioc ore iji yirídai uñai ore toi to uje ore ora cototé gajnua péro ore gai diríca iji Siloé. A ajoso ati ore úringane máraque sué jerusaléngosode uñane ore gai. Jecute cucha dacadode udore chise ore. 5Mu yojningame uaque uje que quigode u udore go. Mu ujetiga ca ecãcho uacáyipie quigode, uacasocárigo udore, enga a eso uaqueruéningo to jnese jne.–

Jesús pésu ejémplo ga chacãra dacajnaquéode aja pojnaque uje que pésu dáraque go

6Jesús chacãra dacajnaquéode aja pore pacáraque enga chojninga:

–Jnani déji nanique uje chaca daca pore uje i tu higuéra, ga tibágui daca pore ujetiga árigui cus. Mu chise mu que áraque cusipise go. 7Jecute jnani tuté chojningame daroi uje irodique acade cucha: "Gadioque sequeredie uje yibágui poria tuaté mu que togome poria tuaté ujetiga yise ga árigui cuse. Arei jé u ujetiga paquesu poria uaté. Cachi charite iji dojodie pori ajei bisidec. Que cuchárique tõrapísiji go." 8Mu jnani uje chirote acadie pori ga chojningame: "Jé dobíji jé aja sequeré tudaque. Ga a yijóchape ero ejode jne. Ga a yijóchame aquirájnanie uchade iji ejode to jne rĩ. 9Jé soca isocai u a, ujetiga árigui cuse. Mu jeta ca pésu dáraque ga a jé cachodi u jne ujetiga paquesu."–

Jesús chiqueta chequé porita iji dire puyátique

10Uje chise dire puyátique ga Jesús déji ore gari iji ore aquíningárique, enga chacate ore iji. 11Enga chequéraque déji ore gari to uje ejnareté. Ga ejnarei guejnanie sequeré gadióguiji yirídai uñai. Uje Satanás utocaidode chajnongose ira aja ñane, enga que togome uaté ujetiga chipotingare re. 12Mu uje Jesús chimo chequé tuaté ga tibidi, ga chojningame:

–Chequé á, angarami yu á. Uje e bejnaréngone cha ua.–

13Ga Jesús chicha dajmainie aja chequé gai, enga jĩrique chequé chipotingare re. Ga chequé uaté jĩrique tija Dupade ome ipesudode ome re. 14Mu judíode ore angarátique ájningaránguipísome Jesús uje chiqueta chequé tuaté iji dire puyai. Ga uté chojningame ayorébui ore:

–Uacarajáyo uje dirode chojmára iji ti ujetiga pipesucho cuchárigo iji, ujetiga acueyoi uacaquetangóningo iji ome uaquejnarétigo. Mu que pujuegate ujetiga pipesute cucháriguiji dire puyátique.–

15Jecute Jesús chajnai uruode ga chósi tome:

–Táquechoquíode uaque á, ¿ga uacuñeque dérasi a? ujetiga ca chosõre dachidéraque aquirájna, jeoga búrro iji dire puyátique ujetiga chijnája yodi jeta chaningare. 16Mu chequé tuaté tagúripísi gai ujeta piqueta iji dire puyai. Uje Satanás utocaidode chigaru údode. Ga jé tiógara ujeta piqueta iji dire puyai. Uje uacarajáyo uje yocai jnani bajai Abraham ape disi ejo uaté to. Ga chequé tuaté ejnaréngone e iyajmácho iji uje guejnanie sequeré e gadióguiji yirídai uñai uje chisa. Ga cucha ueradi tu ujeta piqueta iji dire puyátique.–

17Uje Jesús urúo udojo daruode ga chinguíra dipoi taja damajosórone ore. Mu ayoréode uñéngo iji ore ujade ore nína raque ome Jesús ipesútedatéode iji ore ujade.

Dupade isocai gajnua tu cucha ajñu atíãtaque uje i tu mostáza

(Matéo 13:31-32; Márcos 4:30-32)

18Jesús chacate ore enga chojningame ore:

–Qué yucué yisocáringome ujetiga yacate uaque ga arajáyope to Dupade isocade ujetiga chamáta danguresórone aja re ujeta ore cho deduguéjna cuchape iji uté. 19Mu e yiraja ore gajnui cucha. Uje Dupade isocai gajnua tu cucha ajñu atíãtaque ujetiga quene pacape. Mu sué ga poredaté iji jogadi. Ga jé u uje pijoque. Ga poredaté iji ejoi ga chugúperone basája ga pésu daguíjnane iji jmanecade.–

Jesús chacãra dacajnaquéode aja arurégode bisidi uje i tu levadúra

(Matéo 13:33)

20Enga Jesús chojningápome ore rĩ:

–A qué yacãra yacajnaquéode aja cucha uñeque rĩ ujetiga arajáyopise Dupade isocade quigode ome danguretasórone ujetiga chamáta ore aja re ome uté úringai ore eduguéjna cuchape. 21Uje jé gajnui tu arurégode bisite garósabi to ujeta chequéraque chimera harína uje 20 kílos, bisidi ore aja ñane ome dapesutique ga jé jogadi tu uje nóña ga quérã.–

Que toc ome ayorérique ujetiga chacája Dupade idai ujetiga ca chacája piago ajámi aja

(Matéo 7:13-14, 21-23)

22Mu Jesús qué jno dáringai urugu údi uje chicáji Jerusalén. Ga chise ayoréode idáyode iji yui ga chacate ore iji. Mu que gusu iji idáyode mu Jesús chacate ore iji deyade guiguíjna to iji Jerusalén yúode. 23Mu ayorérique chojningame Jesús iji duruñeque:

–Yocangaráni á, a garósi baquetatígo jõ. ¿Jeoga jiei ore?–

24Mu Jesús chajnai uruode ga chojningame:

–Que toc ome ayorérique ujetiga chacája Dupade idai ujetiga ca chacája piagoi aja. Uje a jiépisi ore jne ujetiga ore pota jóroga ore chacája ajei. Mu a ca togome ore uje que ore chise piago ajámi uté gu. Jecute acueyopísi uacasoca ome ujetiga eso piagoi uté ujetiga acáyoja ajei to. 25Jé isocai u to ome guiguíjnai iguíjnasónique. Ujetiga doi ga suru piagoi ga qué ayorébui déji guesi. Ga ayorébui ore chujérase piagoi ga ore chojningárasa: "Yocangaráni á, achẽre babai ga yacágoja to. Cachi baraja uyoque to a." Mu guiguíjnai gajnengóri a chojningárasome ore: "Que yiraja uaque to go. Que yirajápo uacajogatique rĩ. Jecute que yuchẽre yibai ome uaque." 26Mu a ayorébui ore chojningárasa: "Cachi yajo iji bari diríca. Enga bacadápo yoque rĩ iji yoquidai ujade." 27Mu a guiguíjnai gajnengóri uté chajnárasi ore ga chojningame ore: "E yingome uaque que, uje que yiraja uaque to go. Ga boyóji yejode ome uacapesudode cucha gajnarécho." 28Ga a jogadi tu jne ujetiga ore po jóroque ga ore chigasi jóroque dajúode ujetiga ore pañaji jnani bajade Abraham, Isaac, Jacob, jé aja Dupade uruode atatasórone uñane ore uje ore déji Dupade gari iji dirode udojo ome uté úringai ore eduguéjna cuchape. Jé basa ga Dupade gueteque ore ome dari. 29Uje qué Dupade chamáta danguresórone iji erámi údode jnese, ga ore tṍraji guedé garani yui, jé aja guedé cacadi yui, jé aja casaque garani yui, jé aja umusoi garani yui. Ga a ore tṍraji dajñarenie ome jne jeta ore chise iji atigai enga ore chacásõra uté iji jogadi uté uje qué chácariji dáringai ore eduguéjna cuchape.

30Mu Jesús chojningame ore:

–Adójnacho uje a uacuñéngo déji jne ujetiga ibijoque uaque iji udé, mu a ca ibijoque uaque to iji jogadi uté jne. Jé basa ga uñéngo ore déji jne uje que ibijoque ore to, mu a ibijoque ore jne jeta ore chise Dupade iji úringai eduguéjna cuchape jogadi uté.–

Jesús poji guidáidatéi Jerusalén ejode

(Matéo 23:37-39)

31Uje Jesús cha chacate ore mu fariséode ore uñéngo ore catecã́ri Jesús. Enga ore chojningame:

–Boji de uje ore eduguéjna cuchábi Heródes potapísa ujetiga chujé ua gu.–

32Mu Jesús chajnai ga chojningame ore:

–Boyo ga angoñome jnani josipíerãquedatéi uté uje qué yigaidedie u Dupade áyipiedie ome yu uje qué yiqueta ayoréode aja yiqui ome ore piésorone Satanás utocaicho iji ore údode. Jé upome ore ejnaréngone uñéngo rĩ. Uje jé yajnei tu gu. 33Mu qué yiqui tu Jerusalén yui ujetiga ore chicha yigachotígaja jne uje qué dirode amirone gadióguiji yui ujetiga yise ta. Mu que pisoca gotique ujetiga chuque Dupade uruode atatasónique iji guetique ome Jerusalén.–

34Mu Jesús cho dáyugu re ome jerusaléngosode ore. Ga chojninga:

–Gotique chimo jóroque re uje jerusaléngosode uacoyo uacamajo Dupade uruode atatasórone proféta iji uacajade. Ga jé chopome Dupade irógode aja uaque rĩ uje uacamitingácho ore údode ome cucaranenie. Uje jecucha ga yáyipie quigode u ujetiga yamáta uágaja ñane ga uacajnúone u yabode. Ga yajnua tu cochagájnaraque uje chamáta dababode aja dajnóngone údode. Mu que apótayo yu gotique. 35Jecute adójnacho uje a ca Dupade dépoji uacajéode jne rĩ. Ga a uacajnui tu guiguíjna noñimérique jne, uje que ayorérique déji.

Ga yingopome uaque rĩ uje a quene amóñopo yu rĩ ome yúringárique picotaque ujetiga oyo uacangarádejnai iji yu ga a ojnichome yu jne: "Yocangarádejnai u uté uje Dupade utocaidi tu ome yoque."–

Currently Selected:

Lúcas 13: Ayore

Highlight

Copy