Lúcas 22

Júdas ate gajnaréngone ome Jesús

(Matéo 26:1-5, 14-16; Márcos 14:1-2, 10-11; Juan 11:45-53)

1E idógosi ore jnusinamáni dire uje i tu Páscua uje judíode ore tagu arurégode uje íjnoque arurégode bisidi iji. 2Mu iji dirode udore ga judíode ore asutérigui sacerdote, aja Moisés urusarane atatasóningo, ore chucué jórogui dasoca ujetiga ore chujé Jesús. Mu a ca togome ore go uje ore todo gáguedaté iji Jesús gari.

3Mu diga Satanás chacája Júdas ajei to ujetiga juéga Jesús ome ore. Júdas uté u uje i uñai u Iscariote. Jesús irógode jõra uté to uje gare ore iji yirídai. 4Enga Júdas uté jno ga chicáji judíode asutépisedie iji Dupade iguíjna cuchábi ujetiga pésu dáyipierigui ome ore. Uje uté áyipiedie u gu ujetiga juéga Jesús ome udore ore. 5Jecute ore nínapúsu raque ome Júdas áyipiedie udire. Jecute ore chojningame uté:

–A yẽcója ua jne ome plátarigui jne ujetiga ajuéga uté ome yoque.–

6Enga Júdas uté chimesẽre ore áyipiedie. Jecute chucuépisi dasoca ome Jesús ujetiga tẽrame ore ujetiga ca ayorérique chudute áyipieraque.

Jesús atiga ejoi tu uje qué chacásõra darógode ore iji to

(Matéo 26:17-29; Márcos 14:12-25; Juan 13:21-30; 1 Coríntios 11:23-26)

7Mu diga chise diri uje judíode ore ipesudi u dajñamítedatéi. Ga ore chiborátaja uje ore tagu arurégode to uje íjnoque bisidode iji. Uje ore chatapója áyasarigui rĩ ome dajñamítedatéi uté ujetiga ore tagu to iji. 8Jecute Jesús chiroque Pédro, Juan ore aja sañeque ga chósi tome ore:

–Boyo ga apéso yoquibotígo jne ome yocajñamítedatéi gajnetígo cucha.–

9Mu ore chajnai Jesús uruode ga ore chojningame:

–¿Déji rique a bajegaipítique ujetiga yipéco udore iji a?–

10Enga Jesús chajnai ore ga chósi tome ore:

–A acáyoja ore idai gajneri. Enga a eso jnanírique jne ujeta chijna dajopidéraque cojna, yodi gajnéraque. Mu ajnáño uté gosi jé aja iguíjnarique jne. 11Enga acatecãchoi uté gosi irósõri gajneri ga oyósi tome: "Yocangaráni chiroque yógaja ua que ujetiga ajuégaba baguíjnai ajénique ome yoque ujetiga yipécobu yoquibotígo iji ome yocajñamítedatéi gajnetígo." 12Jecute a chingome uaque gajneri guijnatajei cuchátique ujetiga e dimane iji uacaquei. Guijnatajei uté u uje idájai jnumi. Ga ayáyoji uté jne ga jé u ujeta apéso yoquibosode iji uté.–

13Jecute ore jno ga ore chicáji enga ore chise daqui tuté. Enga jé u Jesús urúiso ga ore pésu dabosode iji deyai iguíjnai ajei uje e dimane iji ore iquei.

14Uje chise guedé batigai ujetiga ore taque ga e dimane Jesús, irógode ore iji dagapié dosadode jnese. 15Jecute Jesús chojningame ore:

–Jecucha yáyipie déji ujetiga yacásorango ñane iji de ujetiga yajo yocujnusinamáni dire Páscua gajnéone uje cáma yitoi. 16Uje a gusu udé deréjnai uje yacásõra uaque ome yocujnusinamáni dire iji de jnumi. Enga a jé chuságaja diri uté uje e Dupade chácariji dáringai eduguéjna cuchape ome darasade ore jnese, ga a quene jogadi tu jne ujetiga yipécopo yocajñamitígo rĩ.–

17Uje Jesús chejna daruode udojo guesi ga jé u uje chisa ore jopidéraque. Mu qué chacãre dayé Dupade gai bajaque. Quigade ga jé u uje chisi ome ore ga chojninga:

–Jĩ́ca, asayo udaque. Mu ajuguínaño ñane jnese jne. 18Jecute yurúo udojo ome uaque uje a ca yójiapo cucha adie otadi to jne rĩ iji jnumi udé, jé aja jogadi uté ujetiga Dupade e chácariji dáringai eduguéjna cuchape ome darasade jnese. Iji jogadi uté ga a quene yójigo ome ñane jne rĩ.–

19Mu chejna udojo guesi ga jé u uje chisa arurétique rĩ. Mu qué catecã́ri dayé Dupade bajac. Ga cha ga jé u uje chajugája jnumi ga chisi ome darógode udore ore ga chósi tome ore:

–De dejã. Acho. Uje arurégode udojo gajnui tu yaoi ujetiga yẽra yu ome uaque jne. Acho arurégode udojo mu ca uacáyipiedie jnoji yu iji uacajéningo.–

20Ga jé isocai tu dasocai uqué ome ore jopidé tuaté. Uje ore chejna dabosode guesi ga chósi tome ore:

–De daque jã yoquijópidé. Ga gajnua tu Dupade áyipie ichadie ome uaque jne. Uje yojninganie Dupade áyipiei udaji qui tu gu ujetiga chiqueta uágome yiyoi jne, ujetiga yitoi ome uaque jne.

21Mu uñai déji de yocujade uje qué chacásõra yoque. Mu a uté u jne ujetiga tẽra yu jne ome yumajosórone. 22Dupade utocaidi uyu yajnei tu ujetiga guẽrate yu ome yumajosórone ore jne. Dupade áyipiedie jé u ome yu gu. Mu a ca Dupade chajire dajuyaquérigo ome uté gosi jne ujetiga guẽrate yu ome ore.–

23Enga jogadi jé u uje ore pésu dapregúntadie ome ñane uje ore chojninga:

–¿Chimo jóroque re jne iji yoque ujetiga uyoque gosi tẽra yocacadisṍri ome umajósoningo ore jne a?–

Jesús irógode ore ibotaquéode ome ñane ujetiga e uñeque ibijoque to

24Mu qué Jesús acadigode ore botare ñane ga ore chojninga:

–¿Chimo jóroque re ujetiga e ibijoque yocuñeque to a?–

25Mu Jesús chudute ore uruode enga chojninga:

–Uacamóño uje josipíerãque ore eduguéjnane iji punirone jnese. Ga cho ujetiga ore iroque darasade ore. Mu ore urasade ore cho ayoré areguipísi iji ore. 26Mu uaque, ca beyoi eduguéjnane udore isocade to. Mu uaque gosi ujetiga obiréjnapisiji uaque enga uté gosi doi ga cho ejopísiji re. Jé basa uacangaráni doi enga uté gosi cho piróguiji re iji uacajade. 27¿Jé yocorási ringome ujeta yicoi udore ga yoco ibijóguiji udore uñéngo a? ¿Jeoga uté u uje dimane iji dagapié ejoi ujetiga e taque? ¿Ujetiga u uté uje jno ore posode údi ome ore ujetiga yoco ibijoi tiji? A ojnichórasa: "Uté a urásu arĩ́e uje dimane iji dagapié ejoi uje chácariji. Uñai uté ga ore iroque." Mu que quigode u udore gotique. Uje uacapáñañoji yu to uje yajnui tu uacaroi tiji uacajmainie.

28Jé areguipise uaque jnese uje uacajnórañopise yu ga jecucha uacagúsoi yari ome yajnéone petingaquéo. Ga que ajíñoñome yu iji duruñeque gotique. 29Jecute a yẽrája uaque ome jne jeta eso Yapade uniri to ome uacáringáringo ibijócho jnese. Adi tu uje Yapade guẽrate yúringai ibijoque ome yu nanique. 30Ga a acásoraño yu jne iji yocatigai jne ujetiga e yibasája yúringai eduguéjna cuchape. Ga jé u ujetiga abasója uacáringáringui ayoré dacasuté jne. Ga jé u ujetiga israélgosode uáguerigui uje gare ore iji yirídai, a ore cho dacasuté cuchabé iji uaque jne.

Jesús chatata uje Pédro u jne ujetiga chotigase uje chimo Jesús to

(Matéo 26:31-35; Márcos 14:27-31; Juan 13:36-38)

31Uje Jesús chejna daruode udojo guesi ome ore ga catecã́ri Pédro mu chĩ́care i gatei aja ga chojningame:

–Simón á, Simón á. Cajirape to gojni uje Satanás e catecã́ri Dupade ujetiga juégabá ua ome ujetiga chetingarape ua. Uje a chetingaripise ua dirome. 32Mu jecucha yijócha Dupade ajei údi ome ua arĩ́e ujetiga ca ayápusu banguretigai ome uté. Mu ujetiga amate ua aja bajnei tuté petingaqué uéchai ga ajnusi ua ome bajorane ujetiga acate ore ujetiga ore puja danguretigade.–

33Mu jĩrique Simón chajnai Jesús arecujaidie ga chósi tome:

–Yocangaráni á, cachi dimane yu arĩ́e, ujetiga yijínama ua aja baquitique erãpe. Ujetiga ore suru babai ga a ore suru yibai to. Jeoga ore yuque ua ga a jé yo yibaya ua jne ujetiga yipatĩ́ora ua to.–

34Mu Jesús chojningame Pédro:

–Pédro, que esípise bajei gotique. Uje a jé deréjnai tudé u jne ujetiga otigásape bojórique ayoré ome yu, ga cho ujetiga cáma amóño yu to go. Ga a botigayaquéode udore a gadiógaja guesi jne ujetiga otigase bojórique ayoré ome yu. Ujetiga cáma cochagájnai po marínga, cuchade udore a tocade jnese iji dejai tudé jne.–

Jesús cho dacadigode quique ujetiga dimane ore ome cucha dacadode yúode

35Jesús cho quique darógode ga chósi tome ore:

–¿Ga ajnusináño to a uje yiroque uágaja erámi nanique? Ga yojningame uaque nanique: "Ca ajnócho uaquepétique, ga jé aja uacaplátaraque. Jé aja uacachiétigo uñane ujetiga boyo yujnomei údi." Uje uacaboyo nanique iji uacajesui tuté erãpe ¿ga cuchárique chona uaque a?–

Mu ore chojningame:

–Úngare, que cuchárique chona yoque gotique.–

36Enga Jesús chojningápome ore rĩ: A qué yécãrape yuru quitígo ome uaque jne. Ujetiga uacuñeque guipétique ga gosi chijócãra dagúcharigo aja ga uaque gosi chijnoque. Jé basa ujetiga uacuñeque qué jmáta ome quesérique ga uaque gosi tẽrame daguidéraque ga uacuñeque doi oréraque ome. 37Uje yuruode qui tu gu uje é idógosipise ujetiga jnani bajade urusarane quigode tocade ome yu ujetiga yise yúringárique ducujuya ome ore. Uje ore urusarane isocai u uté: "A erámi unirisórone cho jnani sijnanguipísiji Dupade utocaidi Crísto jne." Ga cuchade udore quigode jnese a tocade jne ome yu.–

38Jecute Jesús irógode ore chojningame:

–Yocangaráni á, quesé gáreode déji de yocari.–

Mu Jesús chajnai ore ga chojninga:

–Gome, ga gusu udore gáreode.–

Jesús icatecãraipítique uje catecã́ri dayé iji cucarãtique ójoraque

(Matéo 26:36-46; Márcos 14:32-42)

39Jecute Jesús jnopo rĩ ga doi dasocabei uje jecucha chicai cucarãtique uje i tu Olívos. Mu acadigode ore chajna uté aja qui. 40Mu uje ore chise Jesús iji cucarani ójo ga chojningame ore:

–Acatecãchoi Dupade ujetiga ca petingaquérique chibote uaque jne.–

41Enga jĩrique Jesús jno ome daquitique iji siñeque uje ujánique cus ome ore. Mu chise siñeque ga jé u uje chichaga dagataidie aja jnumi ujetiga catecã́ri dayé Dupade. 42Ga chósi te:

–Yapá, ujetiga bajéo ga aquetape yu jne iji yajnei tuté pujuyaqué uje a chise yu jne. Mu que yipota yipésu yajéningo gotique. Mu yajéode u ujetiga yiji báyipie quitígo ome yu.–

43Enga jé u uje jĩrique Dupade iroguipítique chiqueta raja Jesús uje garani tu gaté ujetiga tẽráma petotiguei tome. 44Mu Jesús chopise dáyugu cuchade udore uje a tocade ome jne. Jecute jnusi rome dacatecãraitigade. Ga chejnápise daguesi ome dacatecãraitigade ga gajnetui yore gai ome dacatecãraitigade. Mu gajnetui tuté ayedie gajnunie u diquiyojnáraque ujetiga basája jnumi.

45Uje chejna dacatecãraitigade guesi ga chague ga jé u uje tibágui dacadigode ore. Mu uje chise ore mu qué ore mo. Uje ore áyuguhebátigade na ore aja jnumi gu, aja ore jnusiétigade. 46Jecute Jesús chojningame ore:

–¿Jé gotique gu a uje uacamóño a? Ãrijínaño uaquejode ga acatecãchoi Dupade ujetiga etoguipise uáguiji uacanguretigai ujetiga ca petingaquérique chibote uaque jne.–

Ore jno Jesús údi ome úringárique pujurúgai

(Matéo 26:47-56; Márcos 14:43-50; Juan 18:2-11)

47Uje cáma Jesús chejna daruode udore guesi, mu ore chudute ayoréburique adode uje e ore díji ore. Ga ore ijñai tu Júdas uje Jesús acadigode jõra to nanique uje gare ore iji yirídai. Uje ore chise ore ga Júdas sose Jesús yui ujetiga tagábu Jesús uredie. 48Jecute Jesús chojningame:

–Júdas, cachi yiraja bajéode quigode arĩ́e. Uje bapota bagu yuredie gu ujetiga ore chiraja uyu gosi ome ua. Bajegaidi u ujetiga ẽra Dupade utocaidi uyu ome ore.–

49Mu Jesús irógode uje qué ore déji gari ore chimo Jesús catecãraisórone ga ore chojningame:

–Yocangaráni á ¿ga yisago queséode ome udore ore a?–

50Enga Jesús irógode uñeque chisa quesérique ga charosa judíode ore eduguéjnai uñeque irógode uñeque angoronérac iji ãrachua. 51Mu Jesús chaquĩ́ra darógode ore ga chojningame ore:

–Ayáyo uacájningai ome ore. Ga goñome uacájningai.–

Enga jé u uje Jesús doi ore iroi uté ga chisa angoroné ga ore iroi tuté angoroné ueradépo rĩ uje Jesús pésu. 52Mu jĩrique Jesús catecã́ri judíode ore eduguéjnane sacerdóteo ore, jé aja ore angaránone uje ore déji Dupade iguíjnai iji dirode jnese. Enga chósi tome ore:

–A abáchoi yoque gu ujetiga ajnáño queséode ore ome yoque que. Jeoga pidode ore. ¿Ga oriechoqui yoque ome uacadode udore gotígo a? 53¿Jé gotique gu a uje uacamóño yu iji deréjnane múñi uje jecucha yiyaridi tu Dupade iguíjna cuchábi diríca, uje cucha marínga ajocáso yu ica? Mu qui tu gu uje Satanás áyipiedie e déji uacajéode jnese gu. Ga gajnui tu ujetiga e agúsoi ijnangununie ajéode. Jecute uacapótayo uacasayo yu iji de.–

Pédro chotigase Jesús úringai imósõre to

(Matéo 26:57-58, 69-75; Márcos 14:53-54, 66-72; Juan 18:12-18, 25-27)

54Enga jé u uje ore chisa Jesús ga ore chijna aja sacerdóteode ore eduguéjna cuchábi iguíjnai. Mu Pédro chajna quigade uje idájapise múñi. 55Uje ore chise uté iguíjnai ga ayoré uñéngo ore pésu daquetátique pioque iji guesáringarique iji ore ajã́roraque. Mu ayoréode uñéngo ore chaparu gai, ore iquetai tuté, ga Pédro déji udore ore ujade to. 56Mu jĩrique ore irógueraque uje déji ore gari to chimo Pédro ga toji gai. Enga gapua tuaté chojninga:

–Cachi yiraja uté ga uté jõra Jesús to diríca arĩ́e.–

57Mu Pédro chotigasipise ga chósi tome:

–Cachi que ũré ua gotique arĩ́e. Cáma yimo uté gosi to go.–

58Enga jé isocai tu ome jnani uñeque. Uje dicase uqué múñi uté gosi chise ore to ga chojningame Pédro to:

–Yiraja ua ga bajõra Jesús ore to diríca.–

Mu Pédro chojninga:

–Jnani á, cachi bo paraque arĩ́e. Uje a ca uyu u gotique.–

59Enga a jé chorase una hóra iji udojo quigade uje uñeque chirajápo rĩ, ga chósi tome:

–Jé ũrepise uje uté jõra ore to diríca. Uje galiléagosi Jesús urása uté to.–

60Mu Pédro qué chajo raja uje chotigase ore ga chojninga:

–Jnani á, que yirajapise bojningai tuté gotique.–

Mu uje cáma Pédro chejna daruode guesi iji uté ga jé u uje cochagájnai tuqué agoyé jogadi tu. 61Jecute ore angaráni Jesús chiguísãre Pédro gai ga chajire. Ga jĩrique Pédro jnusina Jesús uru qui casodé uje chojninga:

–A cáma cochagájnarique po iji dejai tudé jne mu a otigase yu ga gadiógaja guesi jne.–

62Jecute Pédro ajengopísome dadode ga jnoji ore gari ga chopise dáyugu re ga po ga chisa dabade aja daqui.

Ore chujñieta Jesús

(Matéo 26:67-68; Márcos 14:65)

63Udore quigade ga Jesús isasórone uje ore irodique que ore ajéngome gotique. Ga ore chujñieta ga ore pojnapo údode rĩ. Ga ore chujépo údode rĩ. 64Jec u uje ore suru Jesús edodie ome borapetique ujetiga ca chimo cuchárigaja re. Ga uñeque chujé uredie ga jé u uje ore chojningame:

–Arajape uté gosi ujetiga uté gosi yuque ua que á.–

65Enga jiépisi ore isoca uñéngo rĩ ome ujetiga ore chujñieta gaté mu ore idojnóngamátiga.

Ore jno Jesús údi aja judíode ore eduguéjna cuchábode

(Matéo 26:59-66; Márcos 14:55-64; Juan 18:19-24)

66Uje quene direjnipe ga judíode ore eduguéjnane sacerdóteo, ore asutépisedie ore chamáta ñane, jé aja Moisés urusarane atatasórone eduguéjnane ore rĩ. Ga ore jno Jesús údi aja ore uáguedaté jogadi uje ore gaidi tu gu ujetiga ore catecã́ri Jesús údode ome bárigo cucha uje ore chisa.

67Mu Jesús déji ore gatócoro ga ore chojningame:

–¿Ga jé Dupade utocaidi Crísto tu ua ya?– Mu Jesús chajnai ore ga chósi tome ore:

–Ujetiga yojninga: "Ejẽ́, upúsu yu," mu a ca anguretáyorase yu gotique. 68Ujetiga yicatecã́ri uaque ome cuchárique, mu a ca achajnáñorasi yuruode. A ca arañopórasome yu jne rĩ. 69Idógosi ujetiga Dupade utocaidi uyu yácariji Dupa pujnuéngaisṍri ãrachua enga a jé yijogadi u.–

70Uje ore chudute Jesús uruode udojo ga jĩrique ore catecã́ri ga ore chojningame:

–¿Ga jé Dupade abipísi tu ua ya?–

Jecute Jesús chajnai ore ga chósi te:

–Ejẽ́, cachi qui tu uacaruode udore.–

71Jecute udore ore, ore chojningame ñane jnese:

–E yipáñangoji uté bai jnese uje bai u uje cho Dupade iji re. A jé ca togome yoque ujetiga yangácoi ayoré uñeque ome ojñáringo go ome uté. Uje jé uyoque upúsu gu uje yudúcopise uté ojñane ome bai ome re.–

Currently Selected:

Lúcas 22: Ayore

Highlight

Copy