Lúcas 7
7
Jesús chiqueta ore eduguéjnai rómagosi irótique
(Matéo 8:5-13)
1Mu uje Jesús chejna dacajnaquéode udojo guesi ome ayoréode ore ga jé u uje jno ga chicáji ore idai uje i u Capernaúm. 2Enga rómagotique déji ore idáidatéi tuté uje soldádode ore eduguéjna. Mu eduguéjnai tuté irótique déji uje ejnarétaque ga idógosi ujetiga toi. Enga uté chijnorapise daroi tuté. 3Mu uje soldádode ore eduguéjnai uté chudute Jesús ujnomei to uje chiqueta ayoré ejnaretade, ga chucué judíode ore angarátigo uñéngo ujetiga qué ore dobi Jesús ujetiga diape ga chiquetape uté iroi. 4-5Uje judíode angaránone ore chise Jesús ga ore chijócha ajei údi ga ore chojningame:
–Be ga ajinama yoque ga aquetape soldádode ore eduguéjna tuté iroi jne. Uje que soldádode ore eduguéjnai tuté chuseque judíode yoque to iji yocuniri udé. Uje purása quedéjna uté múñi. Ga uté imanique guiguíjnai tome yocaquiningaméone. Ga jé tiógara ujetiga atabája uté to.–
6Enga jé u uje jĩrique Jesús nóna soldádode ore eduguéjnai irógode. Mu uje e ore chirõre uté iguíjnai ga soldádode eduguéjnai jorane uñéngo ore chachai. Ga ore chojningame:
–Jesús á, yoquijõrai soldádode eduguéjna chojningame yoque que: "Aquírañope Jesús iji guesi jne uje uté suépise yibai gu." 7Jecute que chingongara raja ua ujetiga chucué ua, mu chutṍri judíode ore angaránone aja ua ujetiga ore chijócha bajei údi ujetiga aquetape uté iroi. Jecute uté chojninga: "Jé arec ujetiga Jesús changacãrape ga yiroi uté ecape jne. 8Uje jé yadi tu uje eduguéjna yu mu yoqueduguéjnapísi qué déji uje yiji uté áyipiedie. Ga isocai tu to ome yajnéone soldácho uje yiroque ore. Ga ore tangári yu. Uje a yojningárasome uñeque: 'Bo,' ga uté gosi jno. Jeoga yojningame uñeque: 'Boji te,' ga tibágui yu. Ga jé adi u to ome yirógode ore jnese uje a ore tangári yu ga ore pésu yojningane cucha jnese. Jecute angacãrape yiroi uté ga ecape jne."–
9Mu uje Jesús chudute soldádode ore eduguéjnai tuté uruode ga irasiguipise re ome uté uruode ga chojningame ayoréode ore uje ore déji gari:
–Quene yimópise ayoré agúpurai tuté to uje jé cãraque re ome danguretarétigadatéi ome yu. Uje que yurasade israélgotique isoca uté to go ujetiga changuretapise yu.–
10Mu uje soldádode ore eduguéjnai tuté iróquegatéode ore chajni aja uté iguíjnai mu ore chise soldádode eduguéjnai iroi tuqué mu e eca.
Jesús chiqueta jnacare totique uje datéraque chequé eca
11Mu udojo quigade ga Jesús chicáji ore idánique uje i tu Naín. Ga acadigode ore nóna to, jé aja ayoréburique ore. 12Mu Jesús ore chirõre ore idáidatéi uté mu ore chimo ayorérigo uje ore chijnoque ayoré totique, ujetiga ore chijóchame. Uje datéraque chequé eca uje gusúpusu chequé tuaté abi. Enga ayorébui ore nóna daté to. 13Mu Jesús chimo uaté ga chosõripise ga chojningame:
–Ca abo.–
14Jesús chose ore jnui ayoré toque yui ga chujé dajmanai aja ayoré toi pi, cajón. Enga jogadi u uje jnungórone ore cha. Jé u uje Jesús chojningame jnacare toi:
–Yingome ua ujetiga ãriji.–
15Mu ore chuninga mu ayoré toi tuté chague ga e catecã́ri ore iji dejode. Ga jé u uje Jesús chingongara aja daté. 16Enga chajuque ayorébui ore agutedie jnese. Jecute ore chicotapise Dupade. Ga uñane ore chósi tome dacotaquéode ome Dupade:
–Dupade irótique ujopíerã́tique a chiqueta raja yoque que.–
Ore chojningápo rĩ:
–Dupade gaidi upúsu ujetiga chátaja judíode uyoque.–
17Jecute Jesús ujnomei chubu ore idai tuté údode. Ga jé chuságaja ore uniri Judéa údode to rĩ, jé aja ejominórone ayoréode unirone rĩ.
Juan el Bautísta chiroque darótigo aja Jesús yui ujetiga qué ore chajmita
(Matéo 11:2-19)
18Mu Juan e chudute Jesús ujnomei to iji dáringai pujurúgai. Uje acadigode uñéngo ore chingo ujnomei ome. Ga jé u uje Juan chingome dacaditígo gárerigo ujetiga ore tibágabi Jesús. 19Uje Juan ajegaidi tupúsu ujetiga irógode ore catecãripísabi Jesús ujetiga jec ũrepise ga Crísto upúsu uje israélgosode ijnati tu uje Dupade ichagája ore nanique ujetiga chiqueta ore iji ore uniri. Ujetiga ca u go ga ore chirodape uñeque yui. 20Uje Juan irógode ore chise Jesús ga ore chojningame:
–Juan uté utocaite yoque aja ua uje garãte ayoréode aja yodi ica. Uté potapísa ujetiga chiraja ua iji báringárique cucha, ujetiga Dupade ojningai Crísto jé upúsu ua. Jeoga ca u ua, ga yirocope uñeque yui.–
21Mu Juan acadigode unojo qué ore chise Jesús iji iquetatígo ayoré ore gai. Uje ore ejnaréngone cha ñane yúode. Jé aja Satanás utocaidode píode ayoré to rĩ. Enga jiépisi iquetatígo ayoré iji edoparigode to rĩ uje ore chimópo dajirigode to rĩ. 22Jecute Jesús chajnai ore ga chósi tome ore:
–Boyo ga ajniñopója Juan gari rĩ. Ga angoñome uacamone cucha ome, uacadudigode cucha rĩ. Angoñome to uje yiqueta edoparigode ore ga e ore chimo cuchade. Yiquetápo poritade ga ore digápo rĩ. Yiquetápo lépra isagode ore rĩ ga íjnonguipíse ore udigode. Jé chopo angoronéparigóde ore rĩ. Yiqueta ore ga ore chudúdapo darade rĩ. Ga jé chopo ayoré togode rĩ. Yiringarápo ore aja gaté rĩ. Jé chopo ome ayoré gajnaréngone ore rĩ uje yujnomei chise ore uje yiqueta ore ome ore isijnaringuéone. 23Jecute angoñome Juan ujetiga ca cho caru ome danguretigai. Uje uté gosi a nínapúsu re jne ujetiga ca sosi danguretigai tiji jnumi ome yu.–
24Uje Juan utocaidode ore jnoji ore gari enga jĩrique Jesús cho quique Juan adode ome ayorébui enga catecã́ri ore enga chojninga:
–¿Ja uacacuei u gosi iji erãpetarei nanique a? ¿Ja ayoré gajnareque a nanique uje gajnui u jnacaraque bisidétique uje emi chubúchu aja quedéjnane? 25Ujetiga ca ũré udore enga ¿ja ca uacacuetique ayoré dacasuté a ujetiga ca suseque re? Que uacacuei tu gotique. Uje uacarajáyo gu uje ayoré atade que ore charidi u erã́petarétique go. Mu ore charidode u eduguéjna cuchábode ore iguíjnane. Ore chejna rángaja dáyipiedie gaidode cucha. 26¿Ja ca ũré yu a uje uacacuei tu Dupade uruode atatasónique nanique uje uaqueso erãpetarei? Jé ũrepise yu arĩ́e. Mu uacacuei tuté úringai uñai cuse uje suépise dáringai Dupade uruode atatasõre. 27Juan jé upúsu Dupade ojningai datocaite ome dajnacari diringai yui uje jnani bajade ore urusarane quigode jé upúsu uje chojninga:
A yiroque yutocaite gatérigaja baquei jne ujetiga dimane ore atígo ome baríringai yui jne.
28Que yimo Dupade uruode atatasónique iji jnani bajade, jec aja diríe jogonórone rĩ ujetiga sué Juan gai, uté uje tṍra ore aja yodi nanique. Mu ujetiga Dupade e chimate darásapísode aja re ome úringai ore eduguéjna cuchape jne enga a ayoré gajnareque udore uñeque mu a jé uté gosi suépise Juan gai jne.–
29Uje ayorébui, jé aja ore eduguéjnane irógode uje utaidé ore iplátadie ore chudute udojo enga ore chajo raja uje ore chicota Dupade ome úringai areguipise. Udore ore u uje Juan chaca ore edodie iji yodi nanique. 30Jé basa ga Moisés urusarane atatasórone, fariséode ore uje ca Juan garãte ore aja yodi, ore chotigasipise Jesús acajnaquéode. Enga ore chetágapo Dupade áyipie oméringui ome ore to rĩ. 31Mu Jesús chojningame ore:
–¿Ma yacãrájarique cucha aja Juan uyoque yoquetesórone ore iji dirode udojo a? 32Udore ore gajnúone u disabode uje ore chácariji dajñaminone jogadi, ga ore chugu uje ore chetaque ñane ajéode ome dajñamitique. Ga ore chinguíra dabijnanone aja dajorane, ga ore chósi te:
"Yipéco música ga yubúchugo orubuchugode fláuta jeta beyoi báile, mu que beyoi gotique;
Quigade enga yicoi yoquiradedie, pujnusiétigade gajnei uje chijõrorase ore, mu que abóyo gotique to."
33Enga erámi jogosórone uacasocai jé cho disiode isocai uté iji dirode unojo, uje jĩraque ore chetaque ñane. Yiraja uje uacadojnóchoja Juan el Bautísta gu uje garãte ayoréode ore aja yodi nanique. Uje que tagu cucha ueratique. Ga que chójiapo yote pioi to rĩ. Mu ome uaque ga chiese Satanás utocaitique chijocase uté nanique. 34Ga jé uacasocai tu ome yu to uje uacabóyoja Dupade utocaidi uyu uje chiese acharánecojna yu ome uaque. Chiese yáta yu aja jnani sijnángone ore to iji ore atigade gáyode, jé aja eduguéjna cuchábode ore irótigo rĩ uje uaquetácho. Ga chiese yójiapo ore jotade yote piocho rĩ ome uaque. 35Mu a pijoque áyipieranguipísi iji yoque jne gu yoquipesudode cucha.–
Jesús adode u udojo uje déji fariséode uñai iguíjnai uje i tu Simón
36Mu fariséode uñeque uje i tu Simón dejéna Jesús aja daquigade ujetiga tagábiji gari. Ga Jesús jĩrique nóna uté. Mu Jesús chácariji ore agapidé ejoi iji iguíjnai ajei. 37Mu chequé ate gajnaréngueraque chudute Jesús ujnomei to uje déji fariséode uñai uté iguíjnai. Uje jé ore idáidatéi jogoto to. Jecute tibágui to ujetiga Jesús chĩro isijnaringuéone. Ga chequé tuaté chijna detique aceite iji pié ueradéraque uje uneréjna anique ujetiga tẽrája Jesús ome. 38Mu chequé tuaté chácariji Jesús guídade ejoi. Ga chosõripise re ome dapesudode cucha gajnarécho. Ga poji dejode. Ga educadode basája Jesús guídade gai. Mu chequé tuaté changuñéra datererodie aja Jesús guídade gai ujetiga cajnore. Udojo quigade ga chojne aceite ai unéningaja uté guídade gai. Ga tagu guídade uredie. 39Mu fariséo uté uje inejéramáite Jesús que, chojningame re iji dajei: "Ísega ca Dupade uruode atatasórone jõra uté jõ. Uje que chimo chequé uaté ipesute gajnaréngone. Ujetiga chiraja enga a ca juégarása ujetiga pijocayaque ome uaté. Ga a chijócãrirase uaté iji dejode." 40Mu Jesús chiraja uté áyipie quigode iji dajei. Jecute chojningame fariséo uté uje i tu Simón:
–Simón á, qué yope cuchade udojo quigome ua jne.–
Jecute fariséo uté chojningame:
–Be ga angome yu, Yacadisṍri á.–
41Mu Jesús cho quique ga chojninga:
–Jnani gárerigo qué ore chijna dajnose carutígo iji dojórique jnani. Uje uñeque oidérigui jiei. Jé jõra oidedie garósi. 42Mu a ca togome udore ore ujetiga ore chimate doidérigui udire. Mu jnani tuté doi ga cha ore ijnose carubode unerai jmete.–
Mu Jesús chojningame Simón: –¿Gosi iji jnani gáreode udore ujetiga chijnorapise déode jogosṍri?–
43Mu Simón chajnai Jesús uruode ga uté chojninga:
–A uté u uje íode sué dajõrai íode gai.–
Enga Jesús chojninga:
–Que potigayaque ua go uje quigode jé u udore.–
44Enga jé u uje Jesús e chusẽre chequé ga chojningame Simón:
–Jé bamo chequé tuaté isocai to ome yu. Uje yise baguíjnai que, mu que osõre yu go ujetiga asi ome yotique ome yu ujetiga yuru yirídade iji. Mu chequé tuaté sué babai. Uje po que ga churu yirídade iji ome deducadode. Ga changuñéra datererodie aja ujetiga cajnore. 45Mu que agu yuredie gotique uje yacája baguíjnai. Mu chequé tuaté cáma cho uja go uje tagu yirídade uredie. 46Móitapũré aceite ome yatoi uje que ójneja go. Mu chequé tuaté chojne dei aceite ai unere aja yirídade que. 47Uje yirajapise uje chequé tuaté chingo dajnoraquédatéi tome yu gu uje chiraja uje e yĩro isijnaringué cuchábode. Mu ayorérique ujetiga garósi ijnoraquei tome yu ga imoi jé u ujetiga garósi isijnaringuéone úringáringo pĩrocho to.–
48Jecute Jesús chojningame chequé tuaté:
–E yejnápise basijnaringuéone úringane pĩrocho jnese.–
49Mu Simón jorane uñéngo uje ore chácariji ore gari iji uté, uje ore dojnóngaja Jesús adode udore, ga ore chojningame ñane:
–Chimo jóroque re ujetiga jec ũré ga jnani tuté chĩrorase pisijnaringuéringo.–
50Mu que Jesús timíninga ore go mu chojningame chequé tuaté:
–E yiqueta ua iji basijnaringuéone ome banguretigai. Bo ga ca opo báyugu ua jne rĩ aja baquitígo.–
Currently Selected:
Lúcas 7: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360
Lúcas 7
7
Jesús chiqueta ore eduguéjnai rómagosi irótique
(Matéo 8:5-13)
1Mu uje Jesús chejna dacajnaquéode udojo guesi ome ayoréode ore ga jé u uje jno ga chicáji ore idai uje i u Capernaúm. 2Enga rómagotique déji ore idáidatéi tuté uje soldádode ore eduguéjna. Mu eduguéjnai tuté irótique déji uje ejnarétaque ga idógosi ujetiga toi. Enga uté chijnorapise daroi tuté. 3Mu uje soldádode ore eduguéjnai uté chudute Jesús ujnomei to uje chiqueta ayoré ejnaretade, ga chucué judíode ore angarátigo uñéngo ujetiga qué ore dobi Jesús ujetiga diape ga chiquetape uté iroi. 4-5Uje judíode angaránone ore chise Jesús ga ore chijócha ajei údi ga ore chojningame:
–Be ga ajinama yoque ga aquetape soldádode ore eduguéjna tuté iroi jne. Uje que soldádode ore eduguéjnai tuté chuseque judíode yoque to iji yocuniri udé. Uje purása quedéjna uté múñi. Ga uté imanique guiguíjnai tome yocaquiningaméone. Ga jé tiógara ujetiga atabája uté to.–
6Enga jé u uje jĩrique Jesús nóna soldádode ore eduguéjnai irógode. Mu uje e ore chirõre uté iguíjnai ga soldádode eduguéjnai jorane uñéngo ore chachai. Ga ore chojningame:
–Jesús á, yoquijõrai soldádode eduguéjna chojningame yoque que: "Aquírañope Jesús iji guesi jne uje uté suépise yibai gu." 7Jecute que chingongara raja ua ujetiga chucué ua, mu chutṍri judíode ore angaránone aja ua ujetiga ore chijócha bajei údi ujetiga aquetape uté iroi. Jecute uté chojninga: "Jé arec ujetiga Jesús changacãrape ga yiroi uté ecape jne. 8Uje jé yadi tu uje eduguéjna yu mu yoqueduguéjnapísi qué déji uje yiji uté áyipiedie. Ga isocai tu to ome yajnéone soldácho uje yiroque ore. Ga ore tangári yu. Uje a yojningárasome uñeque: 'Bo,' ga uté gosi jno. Jeoga yojningame uñeque: 'Boji te,' ga tibágui yu. Ga jé adi u to ome yirógode ore jnese uje a ore tangári yu ga ore pésu yojningane cucha jnese. Jecute angacãrape yiroi uté ga ecape jne."–
9Mu uje Jesús chudute soldádode ore eduguéjnai tuté uruode ga irasiguipise re ome uté uruode ga chojningame ayoréode ore uje ore déji gari:
–Quene yimópise ayoré agúpurai tuté to uje jé cãraque re ome danguretarétigadatéi ome yu. Uje que yurasade israélgotique isoca uté to go ujetiga changuretapise yu.–
10Mu uje soldádode ore eduguéjnai tuté iróquegatéode ore chajni aja uté iguíjnai mu ore chise soldádode eduguéjnai iroi tuqué mu e eca.
Jesús chiqueta jnacare totique uje datéraque chequé eca
11Mu udojo quigade ga Jesús chicáji ore idánique uje i tu Naín. Ga acadigode ore nóna to, jé aja ayoréburique ore. 12Mu Jesús ore chirõre ore idáidatéi uté mu ore chimo ayorérigo uje ore chijnoque ayoré totique, ujetiga ore chijóchame. Uje datéraque chequé eca uje gusúpusu chequé tuaté abi. Enga ayorébui ore nóna daté to. 13Mu Jesús chimo uaté ga chosõripise ga chojningame:
–Ca abo.–
14Jesús chose ore jnui ayoré toque yui ga chujé dajmanai aja ayoré toi pi, cajón. Enga jogadi u uje jnungórone ore cha. Jé u uje Jesús chojningame jnacare toi:
–Yingome ua ujetiga ãriji.–
15Mu ore chuninga mu ayoré toi tuté chague ga e catecã́ri ore iji dejode. Ga jé u uje Jesús chingongara aja daté. 16Enga chajuque ayorébui ore agutedie jnese. Jecute ore chicotapise Dupade. Ga uñane ore chósi tome dacotaquéode ome Dupade:
–Dupade irótique ujopíerã́tique a chiqueta raja yoque que.–
Ore chojningápo rĩ:
–Dupade gaidi upúsu ujetiga chátaja judíode uyoque.–
17Jecute Jesús ujnomei chubu ore idai tuté údode. Ga jé chuságaja ore uniri Judéa údode to rĩ, jé aja ejominórone ayoréode unirone rĩ.
Juan el Bautísta chiroque darótigo aja Jesús yui ujetiga qué ore chajmita
(Matéo 11:2-19)
18Mu Juan e chudute Jesús ujnomei to iji dáringai pujurúgai. Uje acadigode uñéngo ore chingo ujnomei ome. Ga jé u uje Juan chingome dacaditígo gárerigo ujetiga ore tibágabi Jesús. 19Uje Juan ajegaidi tupúsu ujetiga irógode ore catecãripísabi Jesús ujetiga jec ũrepise ga Crísto upúsu uje israélgosode ijnati tu uje Dupade ichagája ore nanique ujetiga chiqueta ore iji ore uniri. Ujetiga ca u go ga ore chirodape uñeque yui. 20Uje Juan irógode ore chise Jesús ga ore chojningame:
–Juan uté utocaite yoque aja ua uje garãte ayoréode aja yodi ica. Uté potapísa ujetiga chiraja ua iji báringárique cucha, ujetiga Dupade ojningai Crísto jé upúsu ua. Jeoga ca u ua, ga yirocope uñeque yui.–
21Mu Juan acadigode unojo qué ore chise Jesús iji iquetatígo ayoré ore gai. Uje ore ejnaréngone cha ñane yúode. Jé aja Satanás utocaidode píode ayoré to rĩ. Enga jiépisi iquetatígo ayoré iji edoparigode to rĩ uje ore chimópo dajirigode to rĩ. 22Jecute Jesús chajnai ore ga chósi tome ore:
–Boyo ga ajniñopója Juan gari rĩ. Ga angoñome uacamone cucha ome, uacadudigode cucha rĩ. Angoñome to uje yiqueta edoparigode ore ga e ore chimo cuchade. Yiquetápo poritade ga ore digápo rĩ. Yiquetápo lépra isagode ore rĩ ga íjnonguipíse ore udigode. Jé chopo angoronéparigóde ore rĩ. Yiqueta ore ga ore chudúdapo darade rĩ. Ga jé chopo ayoré togode rĩ. Yiringarápo ore aja gaté rĩ. Jé chopo ome ayoré gajnaréngone ore rĩ uje yujnomei chise ore uje yiqueta ore ome ore isijnaringuéone. 23Jecute angoñome Juan ujetiga ca cho caru ome danguretigai. Uje uté gosi a nínapúsu re jne ujetiga ca sosi danguretigai tiji jnumi ome yu.–
24Uje Juan utocaidode ore jnoji ore gari enga jĩrique Jesús cho quique Juan adode ome ayorébui enga catecã́ri ore enga chojninga:
–¿Ja uacacuei u gosi iji erãpetarei nanique a? ¿Ja ayoré gajnareque a nanique uje gajnui u jnacaraque bisidétique uje emi chubúchu aja quedéjnane? 25Ujetiga ca ũré udore enga ¿ja ca uacacuetique ayoré dacasuté a ujetiga ca suseque re? Que uacacuei tu gotique. Uje uacarajáyo gu uje ayoré atade que ore charidi u erã́petarétique go. Mu ore charidode u eduguéjna cuchábode ore iguíjnane. Ore chejna rángaja dáyipiedie gaidode cucha. 26¿Ja ca ũré yu a uje uacacuei tu Dupade uruode atatasónique nanique uje uaqueso erãpetarei? Jé ũrepise yu arĩ́e. Mu uacacuei tuté úringai uñai cuse uje suépise dáringai Dupade uruode atatasõre. 27Juan jé upúsu Dupade ojningai datocaite ome dajnacari diringai yui uje jnani bajade ore urusarane quigode jé upúsu uje chojninga:
A yiroque yutocaite gatérigaja baquei jne ujetiga dimane ore atígo ome baríringai yui jne.
28Que yimo Dupade uruode atatasónique iji jnani bajade, jec aja diríe jogonórone rĩ ujetiga sué Juan gai, uté uje tṍra ore aja yodi nanique. Mu ujetiga Dupade e chimate darásapísode aja re ome úringai ore eduguéjna cuchape jne enga a ayoré gajnareque udore uñeque mu a jé uté gosi suépise Juan gai jne.–
29Uje ayorébui, jé aja ore eduguéjnane irógode uje utaidé ore iplátadie ore chudute udojo enga ore chajo raja uje ore chicota Dupade ome úringai areguipise. Udore ore u uje Juan chaca ore edodie iji yodi nanique. 30Jé basa ga Moisés urusarane atatasórone, fariséode ore uje ca Juan garãte ore aja yodi, ore chotigasipise Jesús acajnaquéode. Enga ore chetágapo Dupade áyipie oméringui ome ore to rĩ. 31Mu Jesús chojningame ore:
–¿Ma yacãrájarique cucha aja Juan uyoque yoquetesórone ore iji dirode udojo a? 32Udore ore gajnúone u disabode uje ore chácariji dajñaminone jogadi, ga ore chugu uje ore chetaque ñane ajéode ome dajñamitique. Ga ore chinguíra dabijnanone aja dajorane, ga ore chósi te:
"Yipéco música ga yubúchugo orubuchugode fláuta jeta beyoi báile, mu que beyoi gotique;
Quigade enga yicoi yoquiradedie, pujnusiétigade gajnei uje chijõrorase ore, mu que abóyo gotique to."
33Enga erámi jogosórone uacasocai jé cho disiode isocai uté iji dirode unojo, uje jĩraque ore chetaque ñane. Yiraja uje uacadojnóchoja Juan el Bautísta gu uje garãte ayoréode ore aja yodi nanique. Uje que tagu cucha ueratique. Ga que chójiapo yote pioi to rĩ. Mu ome uaque ga chiese Satanás utocaitique chijocase uté nanique. 34Ga jé uacasocai tu ome yu to uje uacabóyoja Dupade utocaidi uyu uje chiese acharánecojna yu ome uaque. Chiese yáta yu aja jnani sijnángone ore to iji ore atigade gáyode, jé aja eduguéjna cuchábode ore irótigo rĩ uje uaquetácho. Ga chiese yójiapo ore jotade yote piocho rĩ ome uaque. 35Mu a pijoque áyipieranguipísi iji yoque jne gu yoquipesudode cucha.–
Jesús adode u udojo uje déji fariséode uñai iguíjnai uje i tu Simón
36Mu fariséode uñeque uje i tu Simón dejéna Jesús aja daquigade ujetiga tagábiji gari. Ga Jesús jĩrique nóna uté. Mu Jesús chácariji ore agapidé ejoi iji iguíjnai ajei. 37Mu chequé ate gajnaréngueraque chudute Jesús ujnomei to uje déji fariséode uñai uté iguíjnai. Uje jé ore idáidatéi jogoto to. Jecute tibágui to ujetiga Jesús chĩro isijnaringuéone. Ga chequé tuaté chijna detique aceite iji pié ueradéraque uje uneréjna anique ujetiga tẽrája Jesús ome. 38Mu chequé tuaté chácariji Jesús guídade ejoi. Ga chosõripise re ome dapesudode cucha gajnarécho. Ga poji dejode. Ga educadode basája Jesús guídade gai. Mu chequé tuaté changuñéra datererodie aja Jesús guídade gai ujetiga cajnore. Udojo quigade ga chojne aceite ai unéningaja uté guídade gai. Ga tagu guídade uredie. 39Mu fariséo uté uje inejéramáite Jesús que, chojningame re iji dajei: "Ísega ca Dupade uruode atatasórone jõra uté jõ. Uje que chimo chequé uaté ipesute gajnaréngone. Ujetiga chiraja enga a ca juégarása ujetiga pijocayaque ome uaté. Ga a chijócãrirase uaté iji dejode." 40Mu Jesús chiraja uté áyipie quigode iji dajei. Jecute chojningame fariséo uté uje i tu Simón:
–Simón á, qué yope cuchade udojo quigome ua jne.–
Jecute fariséo uté chojningame:
–Be ga angome yu, Yacadisṍri á.–
41Mu Jesús cho quique ga chojninga:
–Jnani gárerigo qué ore chijna dajnose carutígo iji dojórique jnani. Uje uñeque oidérigui jiei. Jé jõra oidedie garósi. 42Mu a ca togome udore ore ujetiga ore chimate doidérigui udire. Mu jnani tuté doi ga cha ore ijnose carubode unerai jmete.–
Mu Jesús chojningame Simón: –¿Gosi iji jnani gáreode udore ujetiga chijnorapise déode jogosṍri?–
43Mu Simón chajnai Jesús uruode ga uté chojninga:
–A uté u uje íode sué dajõrai íode gai.–
Enga Jesús chojninga:
–Que potigayaque ua go uje quigode jé u udore.–
44Enga jé u uje Jesús e chusẽre chequé ga chojningame Simón:
–Jé bamo chequé tuaté isocai to ome yu. Uje yise baguíjnai que, mu que osõre yu go ujetiga asi ome yotique ome yu ujetiga yuru yirídade iji. Mu chequé tuaté sué babai. Uje po que ga churu yirídade iji ome deducadode. Ga changuñéra datererodie aja ujetiga cajnore. 45Mu que agu yuredie gotique uje yacája baguíjnai. Mu chequé tuaté cáma cho uja go uje tagu yirídade uredie. 46Móitapũré aceite ome yatoi uje que ójneja go. Mu chequé tuaté chojne dei aceite ai unere aja yirídade que. 47Uje yirajapise uje chequé tuaté chingo dajnoraquédatéi tome yu gu uje chiraja uje e yĩro isijnaringué cuchábode. Mu ayorérique ujetiga garósi ijnoraquei tome yu ga imoi jé u ujetiga garósi isijnaringuéone úringáringo pĩrocho to.–
48Jecute Jesús chojningame chequé tuaté:
–E yejnápise basijnaringuéone úringane pĩrocho jnese.–
49Mu Simón jorane uñéngo uje ore chácariji ore gari iji uté, uje ore dojnóngaja Jesús adode udore, ga ore chojningame ñane:
–Chimo jóroque re ujetiga jec ũré ga jnani tuté chĩrorase pisijnaringuéringo.–
50Mu que Jesús timíninga ore go mu chojningame chequé tuaté:
–E yiqueta ua iji basijnaringuéone ome banguretigai. Bo ga ca opo báyugu ua jne rĩ aja baquitígo.–
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2021 Ethnos360