Márcos 13

Jesús chingome dacadigode uje Dupade iguíjnai uté a chise dáringárique eyuque jne

(Matéo 24:1-2; Lúcas 21:5-6)

1Mu uje Jesús, acadigode ore doi guesi iji Dupade iguíjna cuchábi mu acadigode uñeque chojninga:

–Yocacadisṍri á, cajire guiguíjnane udojo iji Dupade iguíjnai udé. Uje cucarané cuchábedie iji ga que chajire re go uje chijninguese dejode.–

2Mu Jesús chajnai dacadi tuté ga chósi tome:

–Baminingánone udore guiguíjna cuchábio, mu a ore chise dáringáringo pĩrocho jne. Enga a ca cucaranéraque pijógapo iji charitíguiji dojóraque cucarané gánique jne rĩ. Uje a íjnonguipíse udore jogadode jnese jne.–

Jesús chatata cucha gãrapiedie ome erámi eruei yui

(Matéo 24:3-28; Lúcas 17:22-24; 21:7-24)

3Jesús chejna cuchade udojo guesi ga jé u uje nóna dacadigode aja cucarani uje i tu Olívos. Uje cucarani uté pijóguiji Dupade iguíjna cuchábi uté. Enga Jesús chácariji dayaritique iji cucarani uté mu jé jogadi u uje Pédro, Jacóbo, Juan, Andrés ore catecã́ri dacadisṍri, mu ore ipoguiécho daru quigode udore. 4Enga ore chojningame:

–Be ga angome yoque dínique ujetiga tocade cuchade udore. ¿Chimo jóroque re uje aníri, cuchade udore gãrapiésonique ujetiga cuchade udore tocade jne?–

5Mu Jesús chajnai ore ga chósi tome ore:

–Beyoi ga ajusópise uaqueo ujetiga ca uacojórique ayoré chãra uaque ome cuchade udore yui. 6Uje a jiépisi jnanione jne ujetiga ore cho yu iji raque. Enga a ore chojninga: "Uacajnati Crísto uyu." Mu a ore chejna ayorébujnane jne aja re ome daringaquérigo.

7Mu a adúchopo jne rĩ pujnoméringo ome pocaningane rĩ iji erámone ujetiga pujnoméone udore tṍraji dajñarenie jne ome uaque. Mu ca uacagutéraque cho jora ome udore gotique. Chamáñaje a isocai jé u uté gu. Mu ca ajosópise jne eti e erámone eruei gãrapiedie jé u udire ome. 8Uje isocai a jé u jne ujetiga puníningo ore chachai ñane jne ome dajocaningáringo. Jé basa ore asutedie ore pésu dáyipiedie ome pocaningane yúode. Mu a jé isocai tupo jne rĩ ujetiga adúcho jnupe tãrarachugode ujnoméringo iji puníningo uásejnane. Mu a jé jorane upo jne rĩ ujetiga ayoréode chisa dabáningo ujetiga chaguhéningo socárome ore. Mu cuchade udojo cáma cucha gosode u gotique ujetiga socárome ayoréode ore iji erámi ujetiga pésu ore ujuredie.

9Mu uaque ga ajusópise uaqueo ome uacajnéone pocaninga yúode to. Uje diga ore jno uacádi aja ore asutedie jne. Enga a jogadi u jne ujetiga uacagachodi u ujetiga ore chujé uacádode iji judíode ore aquiningaméone. Mu que gusu udore mu dépoji rĩ ujetiga ore chijna uágaja ore eduguéjnapísode. Mu udore quigode u gu uje uacabade u yadode. Mu a piotiguei tu jne ujetiga angoño yadode jne ome eduguéjnane udore ore. 10Mu cuchade udore a ca chise deruénique jne ujetiga jé ca patata yuruode ome ayoréode ore ome ore úringáringo piquetacho iji punirone jnese. 11Mu diga a ore jno uacádi aja deduguéjna cuchábode jne. Mu ca oyópise uacáyugu uaque jne ome uacapesutígo uacaru jne ome udore. Uje Dupade a guẽrapáicho uacarúrigo ome uaque jne ujetiga jĩrique ajnicho uacarúrigo ome ore jne. Mu que cho ujetiga uacaruode udore, mu Dupade Ujopié Espíritu Sánto guẽrapáicho uacaru quitígo ome ore. 12Mu diga cucha uñéngo a tocadepo jne rĩ. Ujetiga jnanírique doi enga tẽra dajõráringo ome pocaningárique ujetiga ore chujé uté. Jé isocai tupo ome uñeque danique rĩ ujetiga juéga dajnacari ome chutique. Mu jé basa ga a gosi ujnacarode ore chajni dayé, daté ore gai jne enga ore tẽra ore ujetiga chuque ore. 13A dequetéquedaté uágome erámi unirisórone ore iji erámi údode jnese jne. Mu uacaba cuchábode u yadode gu. Mu ujetiga uaque gosi chejnápise raja yadode udojo, jé aja dáringárique ducañerájma eruei, mu a jé u jne ujetiga uaque gosi chimate raja dáringai piquetaque jne ome Dupade.

14Dupade uruode atatasṍri Daniel urusãratígo déji uje chĩ́care cucha puyaguipísi ujetiga picháji pijogate quedéjnarique jne uje que gajnei tu mu ujetiga jogadi u uté. Mu ujetiga chise dayaridi uté ga a jé jogadi u jne ujetiga e íjnoque udore charidode jnese. –Cuchade udore ajirisórone uaque á, ajusópise udore guio, ujetiga ajichopise udore quigode jnese aja quigode.– Mu ujetiga cuchade udore tocade jne ga Judéa jogonóningo iji uaque, jĩrique boyo ga ayóyome ga beyoi cucaranone enga echo. 15Mu ujetiga qué diga uacuñeque cho dajñare iji daguíjnarique ójoraque, mu uaque gosi ca chacája daguíjnarique ujetiga chijnime dagúcharique iji, mu uaque gosi jĩrique jno to. 16Mu uacuñeque ujetiga qué déji dasoráneraque iji erã́tique ca chajni dagúcharigo gánique ujetiga chiqueta. Mu jĩrique uaque gosi jno to. 17Yosõripísi jóroque chequé icamasuguérigui iji dirode udore. Jé aja udire ore to uje qué ore chumuñási dababode. 18Beyoi ga ajóchayo Dupade ajei údi ome uaque ujetiga ca uacagajñunie udire ca chise uáguiji tejnuringáringo jne. 19Uje a ca uacajnéone pujuyaquéo udore chajire re ome uaque jne. Uje cáma pimo pujuyaquédatérique to ujetiga cho uacajnéone udore. Jé iji erámone taningápisi uje Dupade pésu nanique, jé aja deréjnane udojo. Mu a jé isocai tupo rĩ uje a ca pimo uté gajnúrique to jne rĩ jé aja yoquiquei. 20Ujetiga uacangarádejnai Dupade ca chaquĩ́ra pujuyaquéode udore enga a ca toguírase jne ujetiga ayorérique qué chapite. Mu a chaquĩ́ra jne gu dosongaquéode ome danguresórone uje ajegaite ore gu.

21Mu ujetiga uñéngo narare jne ome uaque enga chojninga: "Cajire to, yoquijnati Crísto de ti," jeoga chojninga, "Yoquijnati Crísto déji ta," mu jé ca ajire udore ore gosode uruode yui. 22Mu a jé isocai tu ome jnani aringácachoquíode uje a ore chise uaque to jne. Mu a jnanione udore chopise Crísto iji re jne. Jé basa uñéngo a ore chopise Dupade uruode atatasõripísode iji re jne rĩ. Mu a ore pésu dapesute pitijabátigo ome doitígo daringaquéo. Mu ore ipotigádi u jórogu jne ujetiga ore chãra Dupade anguresõripísode uje Dupade ajegaidode u ore. 23Mu ujetiga cuchade udore tocade jne, mu ca jnopise uacajénique jne uje e yimanipise quigode ica uje yingome uaque ica.

A pipañaite Dupade utocaidi Crísto ujetiga diga nóna gue abujárigui aja jnumi

(Matéo 24:29-35, 42-44; Lúcas 21:25-36)

24Mu pujuyaquéode udore quigade ga a jé jogadi tu jne ujetiga diga deréjnaringo chise uaque uje guedé edo a toi jne ga topiéjna. Jé basa guedoside ca chijñanápo uacabai jne rĩ. 25Mu jé basa ga a jogadi tu jne ujetiga guédodie base uacabáyode iji gaté. Mu jé basa ujórigo cucha iji gaté a ca chajire detotiguérigo ujetiga tãrara iji uacabai. 26Mu udojo quigade a jogadi tu jne ujetiga pimo Dupade utocaidi uyu ujetiga yiji jnumi iji gue abujárigui. Enga a yoidé tu yujopié aja jnumi te jne enga a ca yajire yingoningájnarique jne ome ore. 27Mu diga a jogadi tu jne rĩ ujetiga yiroque yirógode gateminóño aja jnumi eruéode jnese, jé aja gaté eruéode jnese rĩ, ujetiga yamáta yajegaidode udore ore jnese.

28Adójningachopísa jne poria higuéra uaté gajnúringui cucha uje a qué yingome uaque jne: a arajáyopise higuéra uaté isocade. Uje jmanecade sosi riji guesode ga jé u uje acarane garanone u. Mu udore imoi tu uje e idógosi sequeré iji uaté. 29Mu jé isocai tu ome yatatagode udore cucha ome uaque que. Ujetiga ore chisípise dáringáringo tocachucho enga ca jnoji uacajéode uje cuchade udore eruéode idógosi iji uaque enga ujápisaja uacabáyode. 30Enga jé ũré yojñane uje cuchade udore jnese a tocade jne uje cáma ore toi iji deréjnane udojo. 31Jnumi, jé aja gaté rĩ, a ore chise dáringáringo eyúcho jne. Mu a gusúpusu yuruode jne ujetiga ca chise deruénique to ujetiga ca cha dáringáringo tocachucho jnese.

32Mu que pijoguipise deréjnarique, guedé batigárique ore rĩ, ujetiga cuchade udore tocadepísiji. Jé chopome Dupade iroque gateminórone rĩ. Jé chopome Dupade ujnacari uyu rĩ. Mu gusúpusu Dupade uje chiraja dínique ujetiga cuchade udore tocade iji.

33Jecute ãrijínañopísa uaquejode, ga ajusópise uaqueo ga ca oyo uja ujetiga acatecãchoi Dupade ome uaque. Uje que pimo dínique gu ujetiga yise uáguiji yiríringárique. 34Cuchade udore isocai tu jnanírique uje chiraja dacoringárique yui ujetiga idájapise quitique ga qué cho quique darógode ore ome ore isatígo iji uté quigade. Enga pésu jnanírique to ujetiga cháji iguíjnai piagoi ujetiga timíninga cuchade jnese aja quigode iji. 35Jecute oyo uté ga amíningachó cuchade jnese aja quigode to. Uje que pimópise uacarósõri uyu yiríringárique gu. Jeoga quene dejaque, jeoga dejnínga gatócoro, jeoga dirájnai uje cochagájnane poji, jeoga direjnipe. 36Jé socaseti uacanínaño mu yiyague uacabai iji uacamótigo ujetiga e ayáyo amíningachó cuchade aja quedéjnane. 37Que gusu uje yuruode udojo gajnengórone u uaque mu yojningane upo yududisórone uaque jnese to rĩ ujetiga ãrijínañopísa uaquejode gatuaque to.–

Currently Selected:

Márcos 13: Ayore

Highlight

Copy