Márcos 15

Ore chijna Jesús aja ore eduguéjnai rómagosi jogadi

(Matéo 27:1-2, 11-14; Lúcas 23:1-5; Juan 18:28-38)

1Mu uje e direjnipe enga sacerdóteode eduguéjnane, judíode angaránone, Moisés urusarane atatasórone ore cháta raja jnanione uje páyipiedie ipesungore ore. Ga jé u uje ore chigaru Jesús gai ga ore jno údi aja rómagosi, eduguéjnai Piláto. 2Enga jĩrique Piláto uté catecã́ri Jesús ga chósi tome:

–¿Ga jé ũré enga judíode eduguéjna cuchábi tu ua ya?–

Enga Jesús chajnai ga chósi tome:

–Jé upúsu baruode quigode udore.–

3Enga jé u uje sacerdóteode ore eduguéjnane ore chaguhéta cuchade Jesús gai jnese. 4Jecute Piláto uté qué catecãrápoi Jesús gaté rĩ ga chojningame:

–¿Gotique gu a uje que ãrarare babai to? ¿Jé ca adute bajnéone ore uru gajnarécho to a, uje jiépisi cuchade uje ore chaguhéta babai?–

5Mu que Jesús narare dabai gotique, mu cho parac. Jecute Piláto uté que chirajapise dasocáringome.

Piláto chirame dajurúgai uje i tu Barrabás

(Matéo 27:15-31; Lúcas 23:13-25; Juan 18:38–19:16)

6Mu jecucha Piláto isocabeque uje chise ore jnusinamáneméi uté uje i tu Páscua, enga chirame ore jurúgayode uñeque iji diri tuté gatuaque. Mu jecucha uté doi judíode ajegaitíguiji pujurúgayode ore ujetiga chirame. 7Mu ore jurúgarigo uñeque déji to uje i tu Barrabás. Uje uté jõráringo déji uté to rĩ uje ore chujé ayorérigo iji dajocaningai. 8Jecute ayorébui ore yore Piláto gai ga ore chijócha Piláto uté ajei údi ujetiga doi dasocabei ome dajurúgayode udore ujetiga chirame uñeque. 9Mu Piláto chajnai ore ga chojninga:

–¿Ga uacajegaidi u ujetiga yirame judíode uaqueduguéjna cuchábi a?–

10Mu Piláto áyipie déji sacerdóteode ore eduguéjnane gu uje udore ore charatáyime Jesús ome úringai pangarate ome ayorébui ore. Jecute udore ore tẽra Jesús ome que, uje que bárique cucha cusipise múñi. 11Mu sacerdóteode ore eduguéjnane ore chajo ayorébuode aja ujetiga ore utaidi tu Barrabás ujetiga Piláto chirame. 12Enga jé u uje Piláto chojningame ore:

–¿Jé uacajegaitique ujetiga yipésu ome Jesús? Uje uacojnichome uté mu 'judíode yoqueduguéjna cuchábi u udé.'–

13Mu jé u uje ore chinguíra dabijnanone aja Piláto enga ore chojninga:

–¡Ajo aja curesei!–

14Mu Piláto uté chojningame ore:

–¿Mu jé uté ipesutique cucha gajnareque que a?–

Mu qué ore chajo raja dabijnane udore ga jé u uje ore chojninga:

–¡Ajo aja curesei!–

15Mu jé jogadi tu uje Piláto que pota dáringárique petégome ayorébui ore, ga jé u uje doi ore uruode ome Barrabás, enga diga chirame. Quigade enga chiroque darógode aja Jesús ujetiga ore chaquesu údode. Ga quigade ga chirógapo ore aja rĩ ujetiga ore chajo aja curesérique.

16Ga jĩrique soldádode ore jno Jesús údi aja ore eduguéjnai charidi guiguíjna atetai. Ga jogadi tu uje ore tibidi dajõráringo soldácho ore enga jé u uje ore yóreja Jesús ejode. 17Quigade enga ore na piguidéragaja Jesús uje gatíjna. Jé basa ga ore chiro gatoje iji ojnatígo enga ore nája gatoi. 18Enga jé jogadi u uje ore chagota tijode ome Jesús. Ga ore chinguíra dabijnanone aja. Ga ore chojninga:

–¡Be ga aqueca, uje chiese judíode eduguéjna cuchape ua arĩ́e!–

19Enga jé u uje ore doi datéringane ga ore chijna pidi ome enga ore chujé gatoi údode. Jé basa uñane ga ore chutĩ́raja. Jé basa uñane ga ore chichaga dagataidie aja jnumi iji Jesús iquei uje ore chujñieta gaté. 20Mu uje ore cha ore chujñieta ga ore chijna iguidé uaté bora caraté iji gari, enga jé jogadi upo rĩ uje ore napo uté iguidépisedie uquidé aja rĩ. Ga jé ore jno údi ujetiga ore chajo aja curesei.

Ore chajo Jesús aja curesei gai

(Matéo 27:32-44; Lúcas 23:26-43; Juan 19:17-27)

21Enga jnanírique chise ore uje tṍraji dasoráneraque mu jé u uje ore chiroque uté ujetiga jé chijnóngape Jesús gajnei curesé. Uje Alejándro, Rúfo ore dai u uté, enga ípisi u Simón. Mu uté idai tu Cirene.

22Jecute ore jno Jesús údi aja ore gajmitique uje i tu Gólgota, uje ore uruode udore qui tu patodé ajnoquéode jogadi. 23Enga ore chise daqui uté enga ore chisi ome úva otadi ome Jesús uje ore chimera pojnaque udui ome, uje udui i tu mírra. Mu Jesús que chóji go. 24Enga jé jogadi tu uje ore chajo aja curesei. Mu jĩrique soldádode ore canárapo Jesús iguidedie rĩ ujetiga ore chajire iguidedie udire yusóningo enga jé u ujetiga yusórone ore gajnei udire.

25Mu guedé qué durasé uje ore chajo Jesús aja curesei iji. 26Enga ore churúsãre Jesús bai iji pidi iji gai. Enga ore urusarane chósi tome: "Judíode ore eduguéjna cuchábi u udé." 27Enga Jesús cho dabaya jnani gárerigo to rĩ. Mu oriechoqui cuchape udore ore. Uñai dóji Jesús ãrachua. Jé basa uñai dóji arasé. 28Enga cucha dacadode udojo jé péropísiji ore urusarane Dupade urúo uje chósi te:

"Ore chopise ayoré sijnánguiji uté to uje ore cháta uté aja jnani sijnángone gu."

29Mu ayoréode ore uje ore chise Jesús tiógarei ga ore chujñieta gaté. Ga ore chijocase datoidie iji ga jé u uje ore chojningame:

–Jé bajosigode ĩ́rique uje chiese ajnangarasirase Dupade iguíjna cuchábi diríca mu chiese a jé amánapo aja gaté rĩ iji dire gadiótigo. 30¿Gotique gu a? uje que aqueta ua ga be jnumi iji curesei uté.–

31Enga jé chopome sacerdóteode eduguéjnane, jé aja Moisés urusarane atatasórone ore rĩ uje ore chagota tijode ome uté to. Enga ore chojningame ñane:

–Chiese chiquetapie yocujórigo ayoré diríca, ¿que doi ga chiquetape re a? 32Ujetiga yimóngo gajneri ujetiga doi jnumi iji dajnei curesé enga a quene jogadi tu jne ujetiga yanguretágo uté to ujetiga yoco yoquijnati Crísto iji to, enga yocópo israélgosode yoqueduguéjna cuchábi iji rĩ.–

Mu jé chuságaja Jesús bayade ore to uje ore tṍra daru gajnaréngone aja Jesús to.

Jesús e toi

(Matéo 27:45-56; Lúcas 23:44-49; Juan 19:28-30)

33Uje guedé e déji gatócoro ga jé u uje jnumi topiéjna. Ga jé chuságaja uje guedé chopise jñuque. 34Mu guedé batigai jé u uté uje Jesús chinguíra dabijnani aja dejode. Ga uruode quigode u udojo:

–Elói, Elói, ¿láma sabactáni?– uje uruode udore quigode u: Dupa yajnengóri á, Dupa yajnengóri á, ¿gotiguipise uje ajíñome yu iji de que a?

35Mu uñéngo iji uté ore chudute uruode to ga ore chojningame ñane:

–Cangáchoi to á. Qué tibidi jnani baja casicaite Elías.–

36Enga jé jogadi tu uje udore uñeque chayóji uté yui, ga chijna cuchárique ujetiga chacáji úva otatique uje sujnapise. Ga chicháji pojnaque eruénique ujetiga chisi ome Jesús ujetiga chóji otadi uté. Ga jé u uje chojninga:

–Jé dóji ga yajico jne ujetiga jnani bajai Elías díji uté ga chiramurase uté.–

37Enga jé u uje Jesús etoguipise pijnane ga jogadi e u uje toi. 38Uje Jesús toi ga borapeque cuchábi iji Dupade iguíjna cuchábi ajei dajúguiji gatócoro. Uje dajúguiji gaté, ga jé chuságaja jnumi te rĩ ome dajugupétigai. 39Mu soldádode ore asutéraque uje rómagose idógosi Jesús ga e pañaji Jesús adode uje etoguipíso pijnane ga jé u uje toi. Ga uté chojninga:

–A jé ũrepise yu ga jnacari uté Dupade ujnacaripísi u que.–

40Enga jé chopome chequérigui rĩ uje ore toji Jesús gai mu idájapise udire ore iji. Uñáraque i tu María Magdaléna. Jé basa uñáraque i tu María rĩ uje José, Jacóbo ore daté u. Enga qué jnacare gatode Jacóbo uté. Jé basa chequedíe udire uñáraque i tu Salomé. 41Chequedíe udire jé ore jõra Jesús aja tijode to diríca. Ga ore cháta Jesús isagode aja to iji ore uniri Galiléa. Mu jé chopise uñáringui rĩ uje jiépisi ore to iji ore gari uje jé ore jõra uté to aja Jerusalén yui diríca.

José arimatéagosi chutai Piláto ujetiga juégame ga chijóchame Jesús uté uje e toque gu

(Matéo 27:57-61; Lúcas 23:50-56; Juan 19:38-42)

42Enga judíode ore socárome dapesudode cucha. Chamáñaje e dejai chirõre gu, uje dire puyaque dirome ujetiga ore cho dajñare iji uté. 43Mu Josérique di uje arimatéagose uté. Enga jnanione páyipie ipesungóredatéode uña uté to. Ga uté edójnari Dupade ome úringárique purása to. Jecute uté a ca chagutu rome ore eduguéjnai Piláto ga jĩrique chacája gari iji charidi. Enga jĩrique chutai ujetiga chijóchame Jesús, uje e toque gu. 44Mu Jesús ujnomédatéi chajuque Piláto aguté uje José chingome uje e toi. Ga jé u uje qué tibidi soldádode ore asutéraque ujetiga jé chingopome gaté rĩ ujetiga jé ũrepise ujetiga Jesús e topísi. 45Uje soldádode ore eduguéjnai chojninga: "Jé ũré," enga jé u uje Piláto juéga Jesús ome José uté ujetiga chijóchame. 46Jecute José uté doi oré ome borapetique uje ueradipise. Ga jé u uje chiramurase Jesús iji curesei gai ga chipocásu gai iji borapei uté. Mu jĩrique jno uté údi, ga chicháji cucarãtique edóraque, uje ore jocha. Enga doi ga chaco cucarané cuchabé Jesús ode gai. 47Enga María Magdaléna jé aja José udore ore daté María ore chimo Jesús ode jogadi to.

Currently Selected:

Márcos 15: Ayore

Highlight

Copy