Àpɔ́sò 14
14
Pɔ́ɔ̀ kè Bànábà nì ɖé Àkónìà-hwɔ̀ɖɔ̀ɔ̀ mú
1Ti Pɔ́ɔ̀ kè Bànábà nì ma ɖé Àkónìà-hwɔ̀ɖɔ̀ɔ̀ múɛɛ, wa sɔ̃́ɔ̀ dyá ma Júù-nyɔ̀ ɓěɔ̀ cɔ́cì-gbòɔ̀ mú, ké kà wa nyu ma wùɖùɛ̀ kɛɛ, ɔ nyuɛ ké nyɔ ɓáún-ɓáún ɓě taɓa ma Gèɖèpɔ́ɔ̀ hwìɖǐǐ. Wa mɔ̀ Júù-nyɔ̀ ɓě kè ɓóɖó-dù kà kò ɖò ɓěɛ̀ nyɔ ɓě. 2Kɛɛ Júù-nyɔ̀ ɓěɔ̀ nyɔ ɓě se ma Gèɖèpɔ́ɔ̀ hwìɖǐǐ taɓa kɛɛ, wa po ma nyɔ ɓě se ma Júù-nyɔ̀ ɓěɛɛ vã kɔ̃. Ké wa nyuɛ ké wa kpáìn ma cɔ́cì-nyɔ̀ ɓěɔ̀ dyoɖoún. 3Kɛɛ Pɔ́ɔ̀ kè Bànábà hwèɖèìn ma ɖé hwèɖèìn, ké wa se ma fã̀à-kà wùɖù, sepóɛɖé wa dè ma Bounɓoɔ̀ hwòɖǒ kɔ̃ jè. Ké Bounɓoɔ̀ nyu ma zàse ɓó bɔ̃̌ ɓɛ́ wa nì ma kà cɛ̃iń ɓá ɔ kpeɖe nɔ̀mɔ̀ dyíin ɓě ɓɛ́ ɔ nyu nyɔ bììɛɛ jè dyíɛ. Zàse ɓɛ́ ɔ nyu ma kà kɛɛ, ɔ mɔ̀ kà ɓɛ́ ɔ wɔ̃́ ma ɓɛ́ wa ké ma ɖàɓàìn-ɖɛ̀ kè ɖɛ dĩ́ín-dĩ̀ìn ɓě nyuɛ. 4Hwɔɖɔɔ̀ nyɔ ɓěɔ̀ ge ma mú. Ɖíɛ́ ɓě zi ma Júù-nyɔ̀ ɓěɔ̀ gbo, ké wa ɖíɛ́ ɓě zi ma àpɔ́sò ɓěɔ̀ gbo.
5Púɛɛ, nyɔ ɓě ɓɛ́ wa se ma Júù-nyɔ̀ ɓěɛ kè Júù-nyɔ̀ ɓěɔ̀ ɔ kè waà wuɖuí-kɔ̃̀-nyɔ̀ ɓěɔ̀ hwòɖǒ poɛ ma gbɔ, ɓɛ́ wa ké ma àpɔ́sò ɓěɔ̀ gbà-kà kpɔ̃, ɓɛ́ wa ké ma wa sɔ́ɔ́-kpò dyi taɓaìn. 6Ti àpɔ́sò ɓěɔ̀ wɔ̃́ɔ ma kɛɛ, wa kpá ma xwáɖáún, ké wa mu ma ɖé Ɖísàɖà-hwɔ̀ɖɔ̀ɔ̀ kè Dɔ́ɓè-hwɔ̀ɖɔ̀ɔ̀ mú, ɔ kè ɖé hwɔɖɔ ɓě nì ma ɖé hwɔɖɔ ɓěɔ̀ ɖeiɛɛ mú. Hwɔɖɔ ɓě nìà kɛ nì ma ɖé Ɖìkónìà-ɓòɖòɔ̀ kɔ̃. 7Ké wa cɛ̃ ma ɖé bɔ̃̌ nɔ̀mɔ̀ dyíinɔ̀.
Pɔ́ɔ̀ kè Bànábà nì ɖé Ɖísàɖà-hwɔ̀ɖɔ̀ɔ̀ kè Dɔ́ɓè-hwɔ̀ɖɔ̀ɔ̀ mú
8Gàa ɖò nì ma ɖé Ɖísàɖà-hwɔ̀ɖɔ̀ɔ̀ mú, ké ɔ kò ma dà dyúáɖò dyi tee. Ɔ ɓoɔ̀ mɛ́ ma ní. Ɔ kɔ́ ma dyí, ké ɔ wóɖó ma. Ɔ séè ma nà ɖò fɔɔ. 9Ɔ tò ma Pɔ́ɔ̀ ɖùǔ gbo. Ké Pɔ́ɔ̀ gmɔ̀ ma ɔ dya gãa, ké ti ɔ dyéɛ ma kà gàaɔ̀ ɓéɖé ma hwìɖǐǐ-taɓa-taɓa ɓɛ́ ɔ ké ma dyi kánáa, 10ɔ páná ma mú, ké ɔ ɖá, “Sɔ̀ dyí, ɓɛ́ m̀ ké nì ɓoɔ̀ kɔ̃ dyi nyànà.” Ké gàaɔ̀ wãìn ma dyií dyi, ké ɔ ɖú ma nà kpàǐ. 11Ti nyɔ kúɖúú ɓěɔ̀ ɖǎ ma ɖɛ Pɔ́ɔ̀ nyu ma kà kɛ dyéɛɛ, wa páná ma mú, ké wa cɛ̃ɛ ma ɖé Ɖìkónìà-wùɖù mú, ké wa ɖá, “À gèɖèpɔ́ɔ̀ ɓěɔ̀ ɖǎ nyɔǔn mú zɛ̃̀ìn, ké wa ɖǎ nɔ̄ à gbo ɓíɖíi dyi wà!” 12Ké wa ɖáìn ma Bànábà Zúì, ké wa ɖáìn ma Pɔ́ɔ̀ mɔ̀ùn Hɔ̀míì, sepóɛɖé ɔ mɔ̀ ma wùɖù-nyɔ̀ vɛ̀nɛ̀ɔ̀. 13Gbǒ kɔ̃̀ mú ɓɛ́ wa ɓiè ma waà gèɖèpɔ́ɔ̀ ɓɛ́ wa ɖáìn Zúì kɛɛ nì ma ɖé hwɔɖɔɔ̀ píé. Ké ɔ sáa-zà-nyɔ̀ɔ̀ po ma cu-bùè ɓìɖǐ ɓíɔ́ ɓě ɖɔ, ké ɔ dyà ma wa ɓó hwɔɖɔɔ̀ gmɔ-wɔ̃̀ɔ̀ dyúa. Ɔ mɔ́ ɓɛ́ ɔ kè nyɔ ɓěɔ̀ ké ma ɓìɖǐ ɓíɔ́ ɓěɔ̀ sáa zàìn ɓó Pɔ́ɔ̀ kè Bànábà bìì.
14Ti Bànábà kè Pɔ́ɔ̀ wɔ̃́ɔ ma kɛɛ, wa fáìn ma wa mìɔùn ɖɔún dyi, ké wa kpa ma nyɔ kúɖúú ɓěɔ̀ hwìɛ̀ peɖeɛ, ké wa páná ma mú, ké wa ɖá, 15“Ɖíí ɓě, ɖɛ́ kɔ̃̀ jè ɓě nìà ɖɛ nìà kɛ nyuɛń nyɛ́? À mɔ̀ ɓě mǔè-nyɔ̀ǔn-dyù ɓě, ké à ɓéɖé hwòɖǒ-dyùà dyúáɖò ɓɛ́ ɓě ɓéɖéà kɛɛ ɖò. Ké bɔ̃̌ nɔ̀mɔ̀ dyíin ɓɛ́ à dyàà ɓě gboɛɛ, ɔ cɛ̃ɛ ɓě gbo, ɓɛ́ ɓě ké ɖɛ se ɖɛ kpa ɓě nìà kɛɛ kɔ̃ín pòìn, ɓɛ́ ɓě ké nì-nì Gèɖèpɔ́ɔ̀ gbo gmɔ̀ìn. Nì-nì Gèɖèpɔ́ɔ̀ mɔ̀ nyɔ mɛà dyɔɔ̀ kè ɓóɖó-kpàà kè dyóóɔ̀ ɔ kè ɖɛ séín nì ɖé dyɔɔ̀ dyíɛ kè nɔ̄ ɓóɖó-kpàà kɔ̃ɛ ɔ kè ɖé níɔ̀ gboɛ. 16Ɖé à ɓǎ nììn ɓǎ ɓěɔ̀ nììn tiín nyɛɛ, Gèɖèpɔ́ɔ̀ wɔ̃́ ma ɓɛ́ ɓóɖó-dù séín ɓěɔ̀ ké ma hwìè ɓɛ́ wa mɔ́ kpaa dyiɛɛ kpa. 17Kɛɛ ɔ seɛ ma nyu ɓɛ́ ɓě ké se ma zàse ɖò ɓéɖé ɓó ɔ jè, sepóɛɖé ɔ nyu ma ɖɛ nɔ̀mɔ̀ dyíin, ké ɔ nyí ɓě ní sɔ̀ìn ɖé dyɔún wɛ̃ ɔ kè ɓáá-ɖɛ̀ séín ɓo-tòɖò-tì. Ɖé ɖɛ nìà kɛ múɛɛ, ɔ nyuɛ ké ɖii-ɖɛ̀ kè múà dè ɓěɛ̀ hwòɖǒ ɓěɔ̀ dyi.” 18Wa cɛ̃ ma wuɖu ɓě nìà kɛ, ɓɛ́ wa ké ma nyɔ ɓěɔ̀ ɓɔ́í po, kɛɛ ɔ sè ma ɖɛ tííwè ɓɛ́ wa ké se ma wa ɓɔ́í poɛ ɓɛ́ìn ɓó wa sáa-zàìn-ɖɛ̀ɔ̀ nyu jè.
19Sɔ̀ìn ɓóɛ gboɛɛ, Júù-nyɔ̀ ɖíɛ́ ɓě ɓɛ́ wa sɔ̀ìn ma ɖé Ã́tìà-hwɔ̀ɖɔ̀ɔ̀ kè Àkónìà-hwɔ̀ɖɔ̀ɔ̀ múɛɛ, wa kúmúìn ma Pɔ́ɔ̀ kɔ̃in. Ké wa nyuɛ ké nyɔ ɓěɔ̀ zi ma wa gbo. Ké wa taɓaìn ma Pɔ́ɔ̀ sɔ́ɔ́-kpò dyi, ké wa káɖá ma ɔ dyi, ké wa zà ma ɔ hwɔɖɔɔ̀ mú. Wa ɖáìn ɔ ɖǎ ma mɛ́. 20Kɛɛ ti nyɔ ɓě ɓɛ́ wa taɓa ma Gèɖèpɔ́ɔ̀ hwìɖǐǐɛɛ bĩ ma ɔ ɖeiɛɛ, ɔ sɔ̀ ma dyí, ké ɔ mu ma hwɔɖɔɔ̀ mú ɖe. Ké wéɔ̀ nyɔ kɔ ma ɓó dyíɛɛ, ɔ kè Bànábà mu ma Dɔ́ɓè-hwɔ̀ɖɔ̀ɔ̀ mú.
Wa kɔ́ìn ɖé Ã́tìà-hwɔ̀ɖɔ̀ nìà ɖé Síwíɖíà-ɓòɖòɔ̀ kɔ̃ɛɛ mú ɖe
21Ti Pɔ́ɔ̀ kè Bànábà ɖǎ ma bɔ̃̌ nɔ̀mɔ̀ dyíinɔ̀ ɖé Dɔ́ɓè-hwɔ̀ɖɔ̀ɔ̀ mú cɛ̃, ké wa ɖǎa ma nyu ké nyɔ ɓáún-ɓáún ɖǎ ma Gèɖèpɔ́ɔ̀ hwìɖǐǐ taɓa kɛɛ, wa kɔ́ìn ma ɖe ɖé Ɖísàɖà-hwɔ̀ɖɔ̀ɔ̀ kè Àkónìà-hwɔ̀ɖɔ̀ɔ̀ ɔ kè Ã́tìà-hwɔ̀ɖɔ̀ɔ̀ mú ɖe. 22Wa kùìn ma nyɔ ɓě ɓɛ́ wa taɓa ma Gèɖèpɔ́ɔ̀ hwìɖǐǐɛɛ hwòɖǒ-dyùà ɓěɔ̀ dyi. Wa po ma wa náún, ɓɛ́ wa ké hwìɖǐǐ-taɓa-ɖɛ̀ ɓěɔ̀ hwòɖǒ kɔ̃ dè kánáá pū. Wa cɛ̃ɛ ma wa gbo kà hwɛ̀ ɓɛ́ à ké ɖé Gèɖèpɔ́ɔ̀ kã́á-ɓòɖòɔ̀ mú muɛɛ, à ɓéɖé ɓɛ́ à ké gǎ-dyé-dyé ɓáún-ɓáún mú mùìn kĩ́ín nyɛ. 23Ké wa gã ma wa bìì nyɔ vɛ̀nɛ̀ ɓě ɖé cɔ́cì séín ɓěɔ̀ mú ɖekè. Ké wa ɓaà, ké wa hwèɖè ma wɔ̃ kɔ̃, ké wa zàìn ma nyɔ vɛ̀nɛ̀ ɓěɔ̀ Bounɓo ɓɛ́ wa taɓa ma kà hwìɖǐǐɛɛ xwáɖáún.
24Ti ɓɛ́ Pɔ́ɔ̀ kè Bànábà zĩ̀ìn ma ɖé Pìsíɖìà-ɓòɖòɔ̀ kɔ̃ɛɛ, wa mu ma ɖé Pã̀fíɖídyà-ɓòɖòɔ̀ kɔ̃. 25Ké wa cɛ̃ ma bɔ̃̌ nɔ̀mɔ̀ dyíinɔ̀ ɖé Pɔ́gà-hwɔ̀ɖɔ̀ɔ̀ mú, ké wa mu ma ɖé Àtáɖìà-hwɔ̀ɖɔ̀ɔ̀ mú. 26Ké wa sɔ̀ ma ɓó dyí ɖe, ké wa mùìn ma dyóóɔ̀ kɔ̃, ɓɛ́ wa ké ɖé Ã́tìà-hwɔ̀ɖɔ̀ɔ̀ mú mu. Ɖéɛ̀ nyɔ ɓěɔ̀ nyíìn ma kà wa Gèɖèpɔ́ɔ̀ xwa kĩ́ín, ɓɛ́ ɔ ké ma wa dyí gmɔ̀ ɓó kũ̀à ɓɛ́ wa ɖǎ ma kà nyuɛ hwɔɛɛ bìì kɛ̀.
27Ti wa nyini ma ɖéɛɛ, wa poìn ma cɔ́cì-nyɔ̀ ɓěɔ̀ dyí, ké wa cɛ̃ ma ɖɛ séín ɓɛ́ Gèɖèpɔ́ɔ̀ ɖǎ ma wa gbo kpá ké wa ɖǎ ma nyuɛɛ jè wa gbo. Wa cɛ̃ɛ ma kà ɓɛ́ Gèɖèpɔ́ɔ̀ ɖǎ ma hwìè ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ mɔ̀ùn ké ma ɔ hwìɖǐǐ taɓa kɛɛ kaà kɛ. 28Ké wa nyu ma wé goun wè ɓó ɖeín-nà-nyɔ̀ ɓěɔ̀ gbo.
Currently Selected:
Àpɔ́sò 14: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
