Àpɔ́sò 5
5
Ánànádyà kè Sòfádyà jè
1Ké gàa ɖò nì ma ɓó ɖe. Ɔ nyɛ́nɛ́ mɔ̀ ma Ánànádyà. Ɔ kè ɔ gmàà Sòfádyà peɖe ma waà pá ɖò. 2Ké ɔ dè ma ɔ wíɖíɔ̀ ɖò dyi. Ɔ gmààɔ̀ dyuòɛ̀ ma dyí ɖekè. Ké gàaɔ̀ dyà wíɖíɔ̀ ɖò, ké ɔ nyíɛ ma àpɔ́sò ɓěɔ̀ xwa. 3Ké Píɖɛ̀ ɖá, “Náo Ánànádyà, xwɛ̌ nyu ɓɛ́ Sétɔ̃̀ dyià kà nì hwòɖǒɔ̀ múin dyíìn cá, ɓɛ́ m̀ dyià Zùù Hwɛ̀ǐn-hwɛ̀ǐnɔ̀ se wĩin tɔ́mɔ́ìn cá, ɓɛ́ m̀ dyià wíɖí m̀ dyé nì páɔ̀ kɔ̃ún wɛ̃ɛ ɖò dyi dè kɛ́? 4Ti m̀ séèɛ̀ ma peɖe keɛɛ, ɔ se ma nì kɔ̃̀ɔ̀-ɖɛ̀ɛ̀? Ké ti m̀ ɖǎ ma kà páɔ̀ peɖeɛɛ, wíɖíɔ̀ m̀ seɛ ma nì mɔ́ɔ́-ɖɛ̀ mú nyùɛ̀n ɓɛ́ìne? Xwɛ̌ m̀ nyuà hwìɖǐi poɛ̀n ɓɛ́ m̀ kéà ɖɛ nì kàa nyuɛ́? M̀ se nyɔǔn se wĩin tɔ́mɔ́ìn, kɛɛ m̀ tɔ́mɔ́ìn Gèɖèpɔ́ɔ̀ se wĩin.” 5Ti Ánànádyà wɔ̃́ ma wuɖu ɓěɔ̀ kɛɛ, ɔ kpá ma dyi, ké ɔ mɛ́ ma. Nyɔ séín ɓě ɓɛ́ wa wɔ̃́ ma ɖɛ nìà kɛɛ, fã̀à nyu ma wa mìɔ. 6Gàa-dyù gmɔ̀ ɓě sɔ̀ dyí, ké wa bĩìn ma ɔ xwɛ́ɔ̀ ɖɔ dyi, ké wa kpaa ma píé, ké wa zàà dyóɖóún.
7Ti áɓà tã ɓɛ́ìn ma ziɛ kɛɛ, Ánànádyàà gmààɔ̀ mɔ̀ùn dyi ma. Ɖɛ ɖǎ ma kà kpá kɛɛ, ɔ seɛ ma dyuò. 8Ké Píɖɛ̀ diè ma ɔ dyi, ké ɔ ɖá, “Cɛ̃ɛ ḿ gbo, jĩ̀ kàà kɛɛ, ɖé ɓě dyé páɔ̀ kɔ̃úne?”
Ké ɔ ɖá, “Ǹdye, kà wíɖíɔ̀ jĩ̀.”
9Ké Píɖɛ̀ cɛ̃ɛ ma ɔ gbo, ké ɔ ɖá, “Ɖɛ́ kɔ̃̀ jè ɓě poìn kà wuɖu dyí, ɓɛ́ ɓě ké Bounɓoɔ̀ Zùùɔ̀ mú dɔ̃̌ɛ́? Gmɔ̀ nɔ̄, nyɔ ɓě zàà nì dyú-ɓǎɔ̀ dyóɖóún wɛ̃ɛ, waà ɓo-jĩ̌ nìà dyiɛń ɖé gbǒɔ̀ dyúa kɛ̀. Nyɔ ɓěɔ̀ mu mɔ̀ùn píé kpaùn ɖekè.” 10Wàɖà cáa, ɔ ɓùɖùìn ma Píɖɛ̀ ɓo zɔ̃̌, ké ɔ mɛ́ ma. Ti gàa-dyù gmɔ̀ ɓěɔ̀ dyá ma gbǒɔ̀ múɛɛ, wa dyé ma ɔ xwɛ́ɔ̀, ké wa kpaa ma píé, ké wa zàà ma dyóɖóún ɓó ɔ dyú-ɓǎɔ̀ xwɛ́-gmààɔ̀ wáún. 11Ké fã̀à nyu ma cɔ́cì-nyɔ̀ séín ɓěɔ̀ kè nyɔ séín ɓě ɓɛ́ wa wɔ̃́ ma ɖɛ nìà kɛɛ mìɔ.
Àpɔ́sò ɓěɔ̀ nyu ɖàɓàìn-ɖɛ̀ kè ɖɛ dĩ́ín-dĩ̀ìn ɓě
12Ɓó tia ɓaɖaa, àpɔ́sò ɓěɔ̀ nyu ma ɖàɓàìn-ɖɛ̀ kè ɖɛ dĩ́ín-dĩ̀ìn ɓáún-ɓáún ɓě ɖé nyɔ ɓěɔ̀ hwìɛ̀. Cɔ́cì-nyɔ̀ séín ɓěɔ̀ poìn ma Sã́ɖómàà Gbáá wɔɖɔɔ̀ mú dyí tee. 13Nyɔ tɔ̀ɔ̀ ɓěɔ̀ fɛ̃̀ìn ma ɓɛ́ wa ké ma wa hwìɛ̀ kpá, kɛɛ cɔ́cì-nyɔ̀ ɓěɔ̀ nyɛ́nɛ́ín-nyɛ̀nɛ̀ nì ma nyɔ ɓěɔ̀ wĩín. 14Kɛɛ gàa kè màa ɓáún-ɓáún kpá ma nyɔ ɓě taɓa ma Bounɓoɔ̀ hwìɖǐǐɛɛ kɔ̃. 15Ké nyɔ ɓě ɓɛ́ wa wɛ́ ma kɛɛ, waà nyɔ ɓěɔ̀ kpa ma wa ɖé hwɔɖɔ-gboi-hwìè ɓěɔ̀ wĩin. Wa ɖíɛ́ ɓě pɛ̃́ ma gbɛ kɔ̃in, ké wa ɖíɛ́ ɓě pɛ̃́ ma kpéɖéín dyi. Wa nyuɛ ma náa, ɓɛ́ kà Píɖɛ̀ mu ziɛń nììn nyɛɛ, ɔ zùùɔ̀ ké ma wa ɖíɛ́ ɓě kɔ̃in zĩ̀ìn pū. 16Nyɔ ɓě ɓɛ́ wa nì ma hwɔɖɔ ɓě nì ma Jùɖúsɛ̀ɖɛ̀ìn-hwɔ̀ɖɔ̀ɔ̀ ɖeiɛ múɛɛ, wa poìn ma dyí ɖekè. Wa dyà wɛ́-nyɔ̀ ɓě kè nyɔ ɓě ɓɛ́ zùù gbà nyùìn ma fũ̀à-fṹá kɛ, ké wa séín káná ma dyi.
Wa dyéìn àpɔ́sò ɓěɔ̀ gǎ
17Ti ɓɛ́ àpɔ́sò ɓěɔ̀ nyu ma ɖɛ ɓěɛ̀ kɛɛ, púɛɛ, sáa-zà-nyɔ̀ vɛ̀nɛ̀ɔ̀ kè Sádyùsíì-nyɔ̀ séín ɓě ɓɛ́ wa nì ma ɓó ɔ gboɛɛ hwɛ̀nɛ̌ dyíìn ma wa múin. Ɔ jèɛɛ, wa sɔ̀ dyí, 18ké wa kpɔ̃ ma àpɔ́sò ɓěɔ̀, ké wa po ma wa kpɔɖɔ ɖeín ɖé nyɔǔn séín dyéɖé waí. 19Kɛɛ ɓó máaún-kà kɛɛ, Bounɓoɔ̀ ínjà ɖò zà ma wa ɖé kpɔɖɔɔ̀ ɖeín, ké ɔ síìn ma wa píé, ké ɔ ɖá, 20“Ɓě mu, ɓɛ́ ɓě ké ɖé Gèɖèpɔ́ɔ̀ gbǒɔ̀ mú dyi nyànà, ɓɛ́ ɓě ké ɖɛ séín ɓě ɓá fɛ̀ɛ̀ ɖìèɔ̀ dyíɛɛ jè nyɔ ɓěɔ̀ gbo cɛ̃.” 21Ti àpɔ́sò ɓěɔ̀ wɔ̃́ ma ɖɛa, ké zɔ̃ ɖǎ ma zɔ̃ɛɛ, wa dyá ma Gèɖèpɔ́ɔ̀ gbǒɔ̀ mú, ké wa tɛ̀mɛ̀ìn nyɔ ɓěɔ̀ ɖɛ.
Ké ti sáa-zà-nyɔ̀ vɛ̀nɛ̀ɔ̀ kè nyɔ ɓě nì ma ɓó ɔ gboɛɛ ɖǎ ma dyiɛɛ, ɔ ɖá ma tɔ̀ɔ̀-ɓìɔ̀ ɓě ɓɛ́ wa mɔ̀ ma Éézùɖùɛ̀-nyɔ̀ vɛ̀nɛ̀ séín ɓěɔ̀ kɛ, ɓɛ́ wa ké ma dyí poìn. Ké ɔ ɖoɓo ma nyɔ ɖé kpɔɖɔɔ̀ wuɖuí-kɔ̃̀-nyɔ̀ɔ̀ gbo, ɓɛ́ ɔ ké ma àpɔ́sò ɓěɔ̀ tò. 22Kɛɛ ti sáa-zà-nyɔ̀ vɛ̀nɛ̀ɔ̀ gbo-nì-nyɔ̀ ɓěɔ̀ nyini ma ɖé dɛ̀ wa po ma kà àpɔ́sò ɓěɔ̀ kpɔɖɔ ɖeín nyɛɛ, wa se ma ɖé wa dyé. Ké wa kɔ́ìn ma ɖe, ké wa cɛ̃ɛ ma, ké wa ɖá, 23“À dyé kpɔɖɔ gbǎ-gbǎɔ̀ jɛ́ɛ́ cá, ké ɔ dyí-gmɔ̀-nyɔ̀ ɓěɔ̀ nì gbǒ-wɔ̃̀ɔ̀ dyí gmɔ̀ǔn. Kɛɛ ti à kaà kɛɛ, à se nyɔ ɖò ɖé dyé.” 24Ti Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ wuɖuí-kɔ̃̀-nyɔ̀ɔ̀ kè sáa-zà-nyɔ̀ kpa ɖɛ ɓěɔ̀ wɔ̃́ ma wuɖu ɓá àpɔ́sò ɓěɔ̀ jè dyíɛɛ, ɖɛ ké ma ɖɛa xwíníín jǔ kɛɛ kpèìn ma wa hwìɖǐi. 25Púɛɛ, nyɔ ɖò dyi, ké ɔ cɛ̃ɛ ma wa gbo, ké ɔ ɖá, “Gmɔ̀ nɔ̄, nyɔ ɓě ɓɛ́ ɓě po ma kà kpɔɖɔ ɖeín nyɛɛ, wa nyànà ɖé Gèɖèpɔ́ɔ̀ gbǒɔ̀ mú dyi, ké wa nì nyɔ ɓěɔ̀ ɖɛ tɛ̀mɛ̀ǐno.” 26Ké Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ wuɖuí-kɔ̃̀-nyɔ̀ɔ̀ kè sáa-zà-nyɔ̀ vɛ̀nɛ̀ɔ̀ gbo-nì-nyɔ̀ ɓěɔ̀ mu, ké wa dyà ma wa pɛ̀ɛ̀-pɛ̀ɛ̀-kà, sepóɛɖé wa fɛ̃̀ìn ma, nyɔ ɓěɔ̀ ní kɔ̃̀ ɖà wa sɔ́ɔ́-kpò dyi taɓaìn.
27Ti wa dyà ma wa kɛɛ, wa nyànàìn ma wa tɔ̀ɔ̀-ɓìɔ̀ ɓěɔ̀ dyúa dyi. Ké sáa-zà-nyɔ̀ vɛ̀nɛ̀ɔ̀ ɖú ma wa dyi diè kpàǐ, 28ké ɔ ɖá, “À cɛ̃ɛ ma ɓě gbo kóɖó-kóɖó, ɓɛ́ ɓě ní kɔ̃̀ ɖà nyɔ ɖò ɖɛ tɛ̀mɛ̀ìn ɖé Jízɛ̀ɛ̀ nyɛ́nɛ́ɔ̀ mú ɖe. Ké dyéɛ, ɓě ɖǎ ɓěɛ̀ ɖɛ-tɛ̀mɛ̀ìn-tɛ̀mɛ̀ìnɔ̀ nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ múin dyíìn, ké ɓě nì vɔ̃uń ɓɛ́ gàaɔ̀ nyɔmɔɔ̀ ké à dúún nì.”
29Kɛɛ Píɖɛ̀ kè àpɔ́sò tɔ̀ɔ̀ ɓěɔ̀ ɖá, “À ɓéɖé à ké Gèɖèpɔ́ɔ̀ wuɖu nyu, ké ɔ zi ɓɛ́ à ké nyɔǔn wuɖu nyuɛɛ dyí. 30Jízɛ̀ ɓɛ́ ɓě ɓá ma kà cuɔ̀ dya dyií, ké ɓě ɖáɓá ma kà ɔ kɛɛ, à ɓǎ ɓěɛ̀ Gèɖèpɔ́ɔ̀ ɖǎ ɔ gĩɔ zà. 31Ké Gèɖèpɔ́ɔ̀ ɖú ma ɔ dyií, ɓɛ́ ɔ ké ma ɔ ɖiaún nì, ɓɛ́ ɔ ké Nàìn-nyɔ̀ kè Póìn-nyɔ̀ jǔ. Gèɖèpɔ́ɔ̀ nyuɛ ma náa, ɓɛ́ Jízɛ̀ ké Éézùɖùɛ̀-nyɔ̀ ɓěɔ̀ ti nyí, ɓɛ́ wa ké waà nàmàǔn-kpèɖèɔ̀ dyi táà, ɓɛ́ Gèɖèpɔ́ɔ̀ ké waà nàmàǔn ɓěɔ̀ kɔ̃in zĩ̀ìn ɖekè. 32Ké à mɔ̀ ɖɛ ɓěa zàse. Zùù Hwɛ̀ǐn-hwɛ̀ǐn ɓɛ́ Gèɖèpɔ́ɔ̀ ɖǎ nyɔ ɓě nyu ɔ wuɖuɛ nyíɛɛ mɔ̀ ɔ zàse ɖekè.”
33Ti tɔ̀ɔ̀-ɓìɔ̀ ɓěɔ̀ wɔ̃́ ma ɖɛa kɛɛ, cɛ̃́ dyá ma wa mìɔ, ké wa mɔ́ wa ké wa ɖáɓá. 34Kɛɛ Fáɖòsíì-gàà ɖò nì ma ɖé tɔ̀ɔ̀-ɓìɔ̀ ɓěɔ̀ hwìɛ̀. Ɔ nyɛ́nɛ́ mɔ̀ Gàmɛ́ɖìè. Ɔ mɔ̀ ma Gèɖèpɔ́ɔ̀-cèè-ɖɛ̀ dyuò-nyɔ̀ ɖò. Nyɔ séín ɓěɔ̀ dyé ma ɔ kpéín. Ɔ nyànà ma dyi, ké ɔ cɛ̃ɛ ma nyɔ ɓěɔ̀ gbo, ɓɛ́ wa ké ma àpɔ́sò ɓěɔ̀ píé síìn ɖɛ wè. 35Ké ɔ cɛ̃ɛ ma wa gbo, ké ɔ ɖá, “Ḿ mǔè Éézùɖùɛ̀-gàà ɓě, ɓě ma mú ɓá ɖɛ ɓě mu hwìɖǐi poìn, ɓɛ́ ɓě ké gàa ɓěa mú nyùìn nyɛɛ jè dyí. 36Ti ɖòɛ̀ ɓaɖaa, Túdà wóɖóìn ma à dyí, ké ɔ nìɛ̀ ma cɛ̃iń kà ɔ mɔ̀ ma nyɔ vɛ̀nɛ̀ kɛ. Ké nyɔ kúɖúú ɓɛ́ wa ɓɛ́ìn ma hɔ̃dɛ̀ɖɛ̀ hĩinyɛ jǔɛ kɛɛ kpá ma ɔ gbo. Kɛɛ ti ɓɛ́ wa ɖǎ ma ɔ ɖáɓá kɛɛ, nyɔ séín ɓě ɓɛ́ wa wɔ̃́ìn ma kà ɔ wuɖuɔ̀ gboɛɛ, wa ɓeìn ma dyi, ké wa ɖò se ma ɓíɖíi sè. 37Ké nyɔ kɔ ma ɓó dyíɛɛ, ɔ mɔ̀ ma Júdà mɔ̀à Gáɖàɖíì-nyɔ̀ɔ̀ kɛ. Ɔ wóɖóìn ma à dyí, ti wa nì ma nyɔǔn dyí gbɛ̌ǐn nyɛ. Ɔ nyuɛ ké nyɔ ɓěɔ̀ ɖíɛ́ ɓě vɔ̃ ma gɔ̌mànàɔ̀ gbo. Kɛɛ ɔ mɔ̀ùn mɛ́ ma ɖekè. Ké nyɔ séín ɓě ɓɛ́ wa wɔ̃́ìn ma kà ɔ wuɖuɔ̀ gboɛɛ, wa ɓeìn ma dyi. 38Ɔ jèɛɛ, kàǔn wɛ̃ɛ, ḿ cɛ̃ɛ ɓě gbo, ɓě sɔ̀ nyɔ ɓě nìà kɛ bũ̌. Ɓě táà wa dyi, sepóɛɖé ɔ jǔ ké waà dyí-sɔ́-ɖɛ̀ɔ̀ kè ɖɛ nìà kɛ dyi nyɔǔn-dyù mú sɔ̀ìn ní, nìí, ɔ se ɖɛ ɖò gbo wóɖóɛ mu. 39Kɛɛ ɔ jǔ ké ɔ dyi Gèɖèpɔ́ɔ̀ mú sɔ̀ìn ní, nìí, ɓě se wa ɖuɛ́ mu. Ɓě táà wa dyi, ti ɖòɛ̀ ɓaɖaín, ɓě ní kɔ̃̀ ɖà Gèɖèpɔ́ɔ̀ mìɔùn gbo vɔ̃.”
40Ɔ jèɛɛ, wa kpɔ̃ ma ɔ náún-po-wùɖùɔ̀ dyi. Ti wa ɖǎ ma àpɔ́sò ɓěɔ̀ ɖáa, wa ɓaɖa ma wa, ké wa cɛ̃ɛ ma wa gbo, ɓɛ́ wa ké Jízɛ̀ɛ̀ nyɛ́nɛ́ɔ̀ mú wùɖùɛ̀n ɓɔ́. Ké wa táà ma wa dyi. 41Ké àpɔ́sò ɓěɔ̀ sɔ̀ ma tɔ̀ɔ̀-ɓìɔ̀ ɓěɔ̀ dyúa. Wa kpá ma múàǔn, sepóɛɖé Gèɖèpɔ́ɔ̀ poɛ gbɔ kà wa ɓɛ́ìn kpé, ɓɛ́ dɛ̃ ké wa kɔ̃ dyi ɓó Jízɛ̀ɛ̀ nyɛ́nɛ́ɔ̀ jè. 42Ké wa tɛ̀mɛ̀ìn ma nyɔ ɓěɔ̀ ɖɛ ɖé Gèɖèpɔ́ɔ̀ gbǒɔ̀ mú kè ɖé wa ɓíɖí-taún, ɓó wé séín ɓaɖa. Wa se ma bɔ̃̌ nɔ̀mɔ̀ dyíin ɓá kà Jízɛ̀ mɔ̀ Kɛ́ɖɛ́ìɔ̀ kɛɛ jè dyíɛɛ cɛ̃ɛ ɓɔ́.
Currently Selected:
Àpɔ́sò 5: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
