Jɛ́nɛ́sì 14
14
Éébànà póìn Ɖáà
1Ɓó tia ɓaɖaa, Àmánáfɛ̀ mɔ̀à Sínà-kã̀ǎɔ̀ kɛ kè Àwíɖíɔ̀ mɔ̀à Ɛ̀ɖásà-kã̀ǎɔ̀ kɛ kè Kɛ́dàɖàómɛ̀ mɔ̀à Éɖàùn-kã̀ǎɔ̀ kɛ ɔ kè Tíɖàò mɔ̀à Gódyììn-kã̀ǎɔ̀ kɛɛ 2kpa ma Bɛ́wàɖà mɔ̀à Sáɖɔ̀ùn-kã̀ǎɔ̀ kɛ kè Bísà mɔ̀à Gòmɔ́ɖɔ̀-kã̀ǎɔ̀ kɛ kè Sínàɓì mɔ̀à Àdámà-kã̀ǎɔ̀ kɛ kè Sɛ̀míɓɛ̀ mɔ̀à Zɛ̀ɓódyììn-kã̀ǎɔ̀ kɛ ɔ kè Bɛ́ɖà#14:2 Sáɖɔ̀ùn kè Gòmɔ́ɖɔ̀ kè Àdámà kè Zɛ̀ɓódyììn ɔ kè Bɛ́ɖà-hwɔ̀ɖɔ̀ ɓěɛ̀ mɔ̀ hwɔɖɔ ɓě nì ma kà ɖé Jɔ́nì Bɔɔ-kpà kɔ̃̀ mú Ɖáà cĩ́ ma kà kɛɛ kɔ̃ɛ̀. kɔ̃̀ nyɛ́nɛ́ ɖò mɔ̀à Zóà kɛɛ nììn kã́áɔ̀ to kɔ̃. 3Kã́á ɓě mɔ̀à Sáɖɔ̀ùn kè Gòmɔ́ɖɔ̀ kè Àdámà kè Zɛ̀ɓódyììn ɔ kè Bɛ́ɖà-kã̀ǎ ɓěɔ̀ kɛɛ poìn dyí, ké wa mu ma toɔ̀ gbo ɖé Síɖììn Bɔɔ-kpà ɓɛ́ ɔ mɔ̀ǎ kà Tɔ̃́ Dòùnɓìǎɔ̀ kɛɛ kɔ̃. 4Wa nì ma Kɛ́dàɖàómɛ̀ xwíɖíi kĩ́ín ɓó zɔ̃ ɓaɖa-bùè sè sɔ̃́ xwíníín, kɛɛ ɓó zɔ̃ɔ̀ ɓaɖa-bùè sè tã nììnɔ̀ xwíníín nyɛɛ, wa po ma kɛ́ɛ́, ɓɛ́ wa ké se ma ɔ xwíɖíi nì ɖe. 5Ké ɓó zɔ̃ɔ̀ ɓaɖa-bùè sè hĩinyɛ nììnɔ̀ múɛɛ, Kɛ́dàɖàómɛ̀ kè kã́á ɓě nì ma kà ɓó ɔ gboɛɛ mu ma, ké wa ɖu ma Wɛ́ɖɛ́fà-nyɔ̀ ɓěɔ̀ toún ɖé Àtéwòɖò-Kánáì-hwɔ̀ɖɔ̀ɔ̀ mú. Ké wa ɖu ma Zúzì-nyɔ̀ ɓěɔ̀ toún ɖé Hɛ̃́ìn-hwɔ̀ɖɔ̀ɔ̀ mú. Ké wa ɖu ma Émì-nyɔ̀ ɓěɔ̀ toún ɖé Sávè-Kíjàtáìn-hwɔ̀ɖɔ̀ɔ̀ mú. 6Ké wa ɖu ma Hówìɖì-nyɔ̀ ɓěɔ̀ toún ɖé Séì Toɖo-ɓòɖòɔ̀ kɔ̃. Ké wa kpá ma wa kíɖíí tee, ké wa nyini ma ɖé Ɛ̀páwàɖàùn-hwɔ̀ɖɔ̀ nìà ɖé Páwàɖàùn Gbǎùn-fúɖúáɔ̀ wĩín nyɛɛ mú. 7Ké wa kɔ́ìn ma ɖe, ké wa dyi ma ɖé Èmípà-hwɔ̀ɖɔ̀ kɔ̃̀ nyɛ́nɛ́ ɖò mɔ̀à Káɖɛ̀ kɛɛ mú. Ké wa ɖu ma Àmáɖɛ̀-nyɔ̀ ɓěɔ̀ ɓóɖó gànáɔ̀ kè Ámɔ̀-nyɔ̀ ɓě ɓɛ́ wa cĩ́ ma ɖé Házìzɔ̃̀-Támà-hwɔ̀ɖɔ̀ɔ̀ múɛɛ toún.
8Hwɛ̀ ké Sáɖɔ̀ùn-kã̀ǎɔ̀ kè Gòmɔ́ɖɔ̀-kã̀ǎɔ̀ kè Àdámà-kã̀ǎɔ̀ kè Zɛ̀ɓódyììn-kã̀ǎɔ̀ ɔ kè Bɛ́ɖà kɔ̃̀ nyɛ́nɛ́ ɖò mɔ̀à Zóà kɛɛ nììn kã́áɔ̀, wa poìn ma dyí, ké wa mu ma toɔ̀ gbo ɖé Síɖììn Bɔɔ-kpàɔ̀ kɔ̃, 9ɓɛ́ wa ké ma Kɛ́dàɖàómɛ̀ mɔ̀à Éɖàùn-kã̀ǎɔ̀ kɛ kè Tíɖàò mɔ̀à Gódyììn-kã̀ǎɔ̀ kɛ kè Àmánáfɛ̀ mɔ̀à Sínà-kã̀ǎɔ̀ kɛ ɔ kè Àwíɖíɔ̀ mɔ̀à Ɛ̀ɖásà-kã̀ǎɔ̀ kɛɛ gbo vɔ̃. Ké kã́á hĩinyɛ ɓěɔ̀ kè kã́á hm̀m̌ ɓěɔ̀ kpáìn ma toɔ̀ mú. 10Ké toɔ̀ ɖu ma Sáɖɔ̀ùn kè Gòmɔ́ɖɔ̀-kã̀ǎ ɓěɔ̀ kè kã́á séín ɓě nì ma kà ɓó wa gboɛ, ké wa gbǔ ma. Ɓó tia ɓaɖaa, mɛ-ɓì ɓáún-ɓáún nì ma ɖé Síɖììn Bɔɔ-kpàɔ̀ kɔ̃. Ké ti wa nì ma gbǔɛń nyɛɛ, wa ɖíɛ́ ɓě kpá ma ɓí ɓěɔ̀ mú, ké nyɔ ɓě sè ma ɓóɛɛ gbǔ ma, ké wa mu ma ɖé toɖo ɓěɔ̀ gbo. 11Ké kã́á hĩinyɛ ɓěɔ̀ ɖú ma ɖɛ séín ɓě nì ma ɖé Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ kè hwɔɖɔ ɓě nì ma kà ɓó ɖeɛɛ múɛ kè waà ɖii-ɖɛ̀ séín ɓěɔ̀ dyí, ké wa kpaa ma. 12Ké wa kpa ma Ɖáà mɔ̀à Éébànàà ɖíí-gàà dyúɔ̀ kɛ kè ɔ nììn kɔ̃̀ɔ̀-ɖɛ̀ séín ɓěɔ̀ ɖekè, sepóɛɖé Ɖáà cĩ́ ma ɖé Sáɖɔ̀ùn-hwɔ̀ɖɔ̀ɔ̀ mú ɓó tia ɓaɖa.
13Hwɛ̀ ké nyɔ ɖò ɓɛ́ ɔ kpá ma xwáɖáún wɛ̃ɛ dyi ma, ké ɔ cɛ̃ ma ɖɛ ɓě ɖǎ ma kà kpá kɛɛ Éébànà mɔ̀à Híìbúɖúù-nyɔ̀ɔ̀ kɛɛ gbo. Ɓó tia ɓaɖaa, Éébànà cĩ́ ma dɛ̀ ɓɛ́ Máwèɖè mɔ̀à Ámɔ̀-nyɔ̀ɔ̀ kɛɛ cu vɛ̀nɛ̀ ɓěɔ̀ nì ma kà kɛ. Máwèɖè mɔ̀ ma Ɛ́kò kè Ánɛ̀ɛ̀ ɖíí-gàà. Wa kè Éébànà po ma wuɖu ɓíín. 14Ké ti ɓɛ́ Éébànà wɔ̃́ɔ ma kà wa ɖǎ ma ɔ ɖíí-gààɔ̀ kpa, ɓɛ́ ɔ ké ma gǐì jǔɛɛ, ɔ poìn ma gàa hɔ̃dɛ̀ɖɛ̀ tã kè ɓaɖa-bùè sè mɛ̀nɛ̌ìn-tã ɓě ɓɛ́ wa sɔ̀ ma ɖé ɔ ɓíɖí-gbǒɔ̀ xwíníín, ké wa ɖǎ ma to vɔ̃ jè cɛ̃́ kɛɛ dyí. Ké wa kpá ma waà mú-nyɛ́-nyɔ̀ ɓěɔ̀ kíɖíí tee, ké wa nyini ma ɖé Dɛ̃́ìn-hwɔ̀ɖɔ̀ɔ̀ mú. 15Ɓó máaún wɛ̃ɛ, Éébànà ge ma ɔ gàa ɓěɔ̀ mú, ké wa dè ma toɔ̀ vɔ̃ɔ gbɔ. Ké wa ɖu ma waà mú-nyɛ́-nyɔ̀ ɓěɔ̀ toún. Ké wa kpá ma wa kíɖíí tee, ké wa nyini ma ɖé Hóɓà-hwɔ̀ɖɔ̀ nìà ɖé Dìmásìkɔ̀-hwɔ̀ɖɔ̀ɔ̀ ɖeín nyɛɛ mú. 16Ké Éébànà dyà ma ɖɛ séín ɓěɔ̀ kè ɔ ɖíí-gàà Ɖáà kè ɔ nììn kɔ̃̀ɔ̀-ɖɛ̀ séín ɓěɔ̀ ɔ kè nyɔ séín ɓě ɓɛ́ wa kpa ma kà, ɓɛ́ wa ké ma kà gǐì jǔɛɛ ɖe.
Mɛ̀kízɛ̀ɖɛ̀ po Éébànà mana kɔ̃
17Sɔ̀ìn ɓó ti Éébànà ɖǎ ma Kɛ́dàɖàómɛ̀ kè kã́á séín ɓě kpá ma kà ɔ gboɛɛ toún ɖu, ké ɔ nìǎ ma ɖe dyiɛń nyɛɛ, Sáɖɔ̀ùn-kã̀ǎɔ̀ dyi ma ɔ hwìǐ, ké ɔ kè Éébànà gmɔ̌ìn ma ɖé Sávè Bɔɔ-kpà kɔ̃̀ nyɛ́nɛ́ ɖò mɔ̀à Kã́á Bɔɔ-kpà kɛɛ kɔ̃. 18Ɓó ti dyúáɖòɔ̀ múɛɛ, Mɛ̀kízɛ̀ɖɛ̀ mɔ̀à Sáɖèìn-kã̀ǎɔ̀ kɛɛ dyà ma bɛɖɛɛ̀ kè wã́ìn Éébànà gbo. Gàa nìà kɛ mɔ̀ ma sáa-zà-nyɔ̀ ɓó Ɖɛɓíɔ́ Gèɖèpɔ́ɔ̀ bìì. 19Ké ɔ po ma Éébànà mana kɔ̃, ké ɔ ɖá, “Ɖɛɓíɔ́ Gèɖèpɔ́ɔ̀ ɓɛ́ ɔ mɛà dyɔɔ̀ kè ɓóɖó-kpàɔ̀ kɛɛ mɛ po m̀ mana kɔ̃. 20Ɓěà ɓàìn Ɖɛɓíɔ́ Gèɖèpɔ́ɔ̀ mɔ̀ nyɔ ɓɛ́ ɔ poà nì mú-nyɛ́-nyɔ̀ ɓěɔ̀ ɖé m̀ xwaún dyi kɛ.” Hwɛ̀ ké Éébànà nyí ma ɔ ɖɛ séín ɓě ɔ zà ma kà ɖé toɔ̀ gboɛɛ ɓàɖàìn-bùèɔ̀.
21Ké Sáɖɔ̀ùn-kã̀ǎɔ̀ cɛ̃ɛ ma Éébànà gbo, ké ɔ ɖá, “Tò ní nyɔ ɓěɔ̀ ɖe, ɓɛ́ m̀ ké ɖɛ ɓě ɓɛ́ m̀ zà ɖé toɔ̀ gboɛɛ dyí ɖú.”
22Kɛɛ Éébànà cɛ̃ɛ ma Sáɖɔ̀ùn-kã̀ǎɔ̀ gbo, ké ɔ ɖá, “Ḿ ɖǎ wuɖu ɖi kóɖó-kóɖó ɖé Bounɓo Ɖɛɓíɔ́ ɓɛ́ ɔ mɛà dyɔɔ̀ kè ɓóɖó-kpàɔ̀ kɛɛ gbo 23kà ɓɛ́ ḿ se nì kɔ̃̀ɔ̀-ɖɛ̀ ɓěɔ̀ ɖò mɔ́ kɛ, kɛbì ɔ mɛ mɔ̀ dyèě-ɖúú mɔɔ bǎ-ɖúú dyɛ mɔ̀ùn wɛ̃, nìí, mɔ̀ǔn kɔ̃̀ ɖàà cɛ̃, m̀ kɔ̃̀ níiń, ‘Mɔ̄ nyuɛ ké Éébànà bãà kɛ̀.’ 24Ḿ se ɖɛ ɖò mɔ́ fɔɔ cá, ɔ sèìn ɖɛ ɓě ɓɛ́ ní gàa ɓěɔ̀ ɖǎ ɖiɛɛ ɖòùn. Kɛɛ gàa ɓě mɔ̀à Ánɛ̀ kè Ɛ́kò ɔ kè Máwèɖè, ɓɛ́ ḿ kè wa muà toɔ̀ gboɛɛ mɛ dyé ɖɛ wa ɓéɖé wa ké dyéɛ.”
Currently Selected:
Jɛ́nɛ́sì 14: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
