Jɛ́nɛ́sì 22
22
Gèɖèpɔ́ɔ̀ dɔ̃̌ ma Ééɓòɖòhɛ̃́ɛ̀ mú
1Sɔ̀ìn ɓó ɖɛ ɓěa gboɛɛ, wé ɖòɛ̀ ɓaɖaa, Gèɖèpɔ́ɔ̀ dɔ̃̌ ma Ééɓòɖòhɛ̃́ɛ̀ mú. Ɔ ɖá ma Ééɓòɖòhɛ̃́ɛ̀, ké ɔ ɖá, “Ééɓòɖòhɛ̃́ɛ̀!”
Ké Ééɓòɖòhɛ̃́ɛ̀ ɖá, “Dyòo.”
2Ké Gèɖèpɔ́ɔ̀ ɖá, “Ɖú nì dyúɔ̀ dyí, nì dyú-kpò dyúáɖò mɔ̀à Áázè ɓɛ́ m̀ ɖɛ̀ɓɛ̀à múɛ, ɓɛ́ m̀ ké ɖé Mɔ̀wíɖíà-ɓòɖòɔ̀ kɔ̃ mu, ɓɛ́ m̀ ké ɔ sáa zàìn dyììn ɖé ɔ fɔ̃-fɔ̃ mú ɖé toɖo ɖò dya. Ní mu m̀ toɖoɔ̀ da zàìn.”
3Ɔ jèɛɛ, wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Ééɓòɖòhɛ̃́ɛ̀ sɔ̀ ma dyí, ké ɔ cɛ̃ ma nyɛ ɓó sáa-zàìn-ɖɛ̀ɔ̀ jè, ké ɔ po ma ɖɛ séín ɓěɔ̀ ɓó ɔ jǎkasìɔ̀ kɔ̃ún. Ké ɔ ɖú ma ɔ gbo-nì-nyɔ̀ sɔ̃́ kè ɔ dyú-gàà Áázè dyí, ké wa mu ma ɖé pá kɔ̃̀ jè Gèɖèpɔ́ɔ̀ cɛ̃ ma kà ɔ gboɛɛ mú. 4Ɓó wéɔ̀ tã nììnɔ̀ ɓaɖaa, Ééɓòɖòhɛ̃́ɛ̀ ɖú ma dyéɖé dyií, ké ɔ dyé ma páɔ̀ ɖé nya vɛ̃in. 5Hwɛ̀ ké ɔ cɛ̃ɛ ma ɔ gbo-nì-nyɔ̀ ɓěɔ̀ gbo, ké ɔ ɖá, “Ɓě sè dà jǎkasìɔ̀ gbo. Ḿ kè dyúɔ̀ mu ɖéa muùn, ɓɛ́ à ké ɓiè, hwɛ̀ ɓɛ́ à ké ɓě gbo ɖe dyi.”
6Púɛɛ, Ééɓòɖòhɛ̃́ɛ̀ ɖú ma nyɛ wa ké ma kà sáa-zàìn-ɖɛ̀ɔ̀ fɔ̃̀ìn nyɛɛ dyí, ké ɔ nyíɛ ma ɔ dyú-gàà Áázè, ɓɛ́ ɔ kéɛ ma ɓéɖé. Ké ɔ mìɔùn ɓéɖé ma nyɛ-kpĩ̀ǐnɔ̀ kè ɖǎɔ̀. Ti ɓɛ́ wa sɔ̃́ɔ̀ nì ma muɛń nyɛɛ, 7Áázè diè ma ɔ ɓǎ dyi, ké ɔ ɖá, “Ḿ ɓǎǒ.”
Ké ɔ ɖá, “Dyòo, ní dyú.”
Ké Áázè ɖá, “Ḿ dyé nyɛɔ̀ kè nyɛ-kpĩ̀ǐnɔ̀ ní, kɛɛ dɛ̌ ɓáɖáá-dyù kéà sáa-zàìn-ɖɛ̀ɔ̀ jǔɛɛ nì kɛ́?”
8Ké Ééɓòɖòhɛ̃́ɛ̀ jǔ ma ɔ gɔ̃̌, ké ɔ ɖá, “Ní dyú, Gèɖèpɔ́ɔ̀ mìɔùn mu ɓáɖáá-dyùɔ̀ tòùn ɓó sáa-zàìn-ɖɛ̀ɔ̀ jè.” Ké wa sɔ̃́ɔ̀ mu ma.
9Ti ɓɛ́ wa ɖǎ ma pá kɔ̃̀ jè Gèɖèpɔ́ɔ̀ cɛ̃ ma kà Ééɓòɖòhɛ̃́ɛ̀ gboɛɛ mú nyiniɛɛ, Ééɓòɖòhɛ̃́ɛ̀ po ma ɓó sáa-kɔ̃-zàìn-gbàà ɖò, ké ɔ kɔìn ma nyɛɔ̀ dyí ɓóɛ kɔ̃, kɛɛ ɔ seɛ ma dyí kpɔ̃̀ìn. Púɛɛ, ɔ sã ma ɔ dyú Áázè, ké ɔ pɛ̃́ìn ma ɔ sáa-kɔ̃-zàìn-gbààɔ̀ kɔ̃ dyi ɓó nyɛɔ̀ kɔ̃. 10Hwɛ̀ ké ɔ pɛ́ɛ̀ ma sɔ̃, ké ɔ ɖú ma ɖǎɔ̀ dyí, ɓɛ́ ɔ ké ma ɔ dyúɔ̀ ɖáɓá. 11Kɛɛ Bounɓoɔ̀ zɛ̃̀ìn ma ínjà ɖò mú, ké ɔ ɖá ma ɔ sɔ̀ìn ɖé dyɔún, ké ɔ ɖá, “Ééɓòɖòhɛ̃́ɛ̀, Ééɓòɖòhɛ̃́ɛ̀!”
Ké Ééɓòɖòhɛ̃́ɛ̀ ɖá, “Dyòo.”
12Ké ɔ ɖá, “Mɔ̀ǔn ɖá ɓɛ́ m̀ ké gàa-dyùɔ̀ sɔ̃ dya po. Mɔ̀ǔn ɖá ɓɛ́ m̀ ké ɔ ɖɛ gbà ɖò bũ̌ nyu. Ɓó kàǔn wɛ̃ɛ, ḿ ɖǎa dyé kà m̀ fɛ̃̀ìn ḿ dyi kɛ, sepóɛɖé m̀ se nì dyú-kpò dyúáɖòɔ̀ ḿ ɓùɖùìn.”
13Púɛɛ, Ééɓòɖòhɛ̃́ɛ̀ gmɔìn ma dyi, ké ɔ dyé ma ɓáɖáá ɓíɔ́ ɖò ɖé ɔ ɖeín. Ɔ gmɛ̌ɔ̀ ɓá ma ɓó kpɔ̀ɔ̌ ɖò mú. Ké ɔ mu, ké ɔ kpɔ̃ ma ɓáɖáá ɓíɔ́ɔ̀, ké ɔ zàìn ma sáa dyììn ɖéɛ fɔ̃-fɔ̃ mú ɓó ɔ dyú-gààɔ̀ bɛ̃̌ǐn. 14Ké Ééɓòɖòhɛ̃́ɛ̀ ɖáìn ma páɔ̀, “Bounɓoɔ̀ muɛ tòùn.” Ɔ jèɛɛ, wa nìɛ̀ cɛ̃iń ke ɓó zɛ̃̌ɛ̀, ké wa ɖá, “Ɖé Bounɓoɔ̀ toɖoɔ̀ dyaa, ɖéɛ̀ ɔ muɛ tòìn.”
15Hwɛ̀ ké ínjà mɔ̀à Bounɓoɔ̀ kɛɛ ɖá ma Ééɓòɖòhɛ̃́ɛ̀ sɔ̀ìn ɖé dyɔún ɖe, 16ké ɔ ɖá, “Sepóɛɖé m̀ se nì dyú-kpò dyúáɖòɔ̀ ḿ ɓùɖùìn jèɛɛ, mɔ̄ mɔ̀à Bounɓoɔ̀ kɛɛ, ḿ gboò ní kpéɔ̀ dyí 17kà ní mu m̀ mana kɔ̃ poùn jǎà kɛ. Ní mu nì xwíníín-dyù nyuùn, ɓɛ́ wa ké dyí vò kà dɛ̀nɛ̀ mɛ́nɛ́ɛ́ ɓě nìà ɖé dyɔɔ̀ dyíɛ kè kà pĩ́ɔ nìà dyóóɔ̀ wĩin nyɛɛ jĩ̀à kɛ. Ké nì xwíníín-dyù mu waà mú-nyɛ́-nyɔ̀ ɓěɔ̀ hwɔɖɔ ɓě wuɖuí kɔ̃̀ùn. 18Ké dyììn ɖé nì xwíníín-dyù ɓěɔ̀ múɛɛ, ɖéɛ̀ ɓóɖó-dù séín nì ɓóɖó-kpàɔ̀ kɔ̃ɛɛ mu jĩ́á-jè dyéìn. Nì mu jĩ́á-jè séín ɓěɛ̀ dyéìn, sepóɛɖé m̀ ɖǎ ní wuɖuɔ̀ nyu jè.” 19Ti ɓɛ́ ɖɛ ɓěa ɖǎ ma dyi ziɛɛ, Ééɓòɖòhɛ̃́ɛ̀ dyi ma ɔ gbo-nì-nyɔ̀ ɓěɔ̀ gbo ɖe, ké wa séín kpá ma hwìè kɔ̃, ké wa mu ma ɖé Bèsíɓà-pàɔ̀ mú ɖe. Ké Ééɓòɖòhɛ̃́ɛ̀ cĩ́ ma ɖé Bèsíɓà-pàɔ̀ mú.
Néhɔ̀ɛ̀ dyú-gàà ɓěɔ̀
20Sɔ̀ìn ɓó ɖɛ séín ɓěa gboɛɛ, wa cɛ̃ɛ ma Ééɓòɖòhɛ̃́ɛ̀ gbo, ké wa ɖá, “Gmɔ̀ nɔ̄, Míókà kè m̀ ɖíí-gàà Néhɔ̀ wóɖóìn gàa-dyù ɓě ɖekè. 21Waà nyíɔ́-dyù-gààɔ̀ nyɛ́nɛ́ mɔ̀ Dyúzè, ké ɔ ɖíí-gàà ɓěɔ̀ nyɛ́nɛ́ mɔ̀ Búzè kè Kɛ̀múè ɓɛ́ ɔ mɔ̀ Áwàɖàùn ɓǎ kɛ 22kè Kɛ́sɛ̀ kè Házò kè Píóɖà kè Jídàɖà ɔ kè Bɛ̀fúè 23ɓɛ́ ɔ mɔ̀ Wìɖìbɛ́kɔ̀ ɓǎ kɛ.” Míókà kè Néhɔ̀ mɔ̀à Ééɓòɖòhɛ̃́ɛ̀ ɖíí-gààɔ̀ kɛɛ wóɖóìn ma gàa-dyù mɛ̀nɛ̌ìn-tã ɓěa. 24Ké Néhɔ̀ɛ̀ gmaɖe-nyɔ̀nɔ̀ kɔ̃̀ nyɛ́nɛ́ mɔ̀à Wɛ̀ɖɛ̀dyúmà kɛɛ mɔ̀ùn wóɖóìn ma gàa-dyù ɓě ɖekè. Waà nyɛ́nɛ́ mɔ̀ Téɓà kè Gáhã̀ kè Táhà ɔ kè Máákà.
Currently Selected:
Jɛ́nɛ́sì 22: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
