Jɛ́nɛ́sì 24
24
Áázèɛ̀ nyɔ́nɔ́-dyi-kpɔ̃-kpɔ̃
1Ti ɓɛ́ Ééɓòɖòhɛ̃́ɛ̀ ɖǎ ma nyɛ, ké ɔ zɔ̃ ɖǎ ma dyí vò mìɔ, ké Bounɓoɔ̀ ɖǎ ma ɔ mana kɔ̃ po ɖé ɖɛ ɓáún-ɓáún múɛɛ, 2púɛɛ, ɔ cɛ̃ɛ ma ɔ gbo-nì-dyù vɛ̀nɛ̀ ɓɛ́ ɔ kɔ̃̀à ɔ ɖɛ séínɔ̀ wuɖuíɛɛ gbo, ké ɔ ɖá, “Ní ɓaà m̀ ní, po nì sɔ̃ɔ̀ ɓó ní ɓoɔ̀ pṹa, ɓɛ́ ɔ ké wuɖu-ɖi-ɖi jǔ. 3Ní mɔ́ ɓɛ́ m̀ ké wuɖu ɖi ɓó Bounɓo Gèɖèpɔ́ɔ̀ kɔ̃̀à dyɔɔ̀ kè ɓóɖó-kpàà wuɖuíɛɛ dyúa kà ɓɛ́ m̀ se ní dyú-gààɔ̀ nyɔ́nɔ́ nɔ̄ Kénà-nyɔ̀ ɓě kɔ̃̀ hwìɛ̀ ḿ cĩ́à kɛɛ dyú-màà ɓěɔ̀ hwìɛ̀ zàǎ muɛ, 4kɛɛ kà ɓɛ́ nì mu ɖé ḿ ɓíɖí muùn ɖé ḿ mìɔùn nììn nyɔ ɓěɔ̀ gbo, ɓɛ́ m̀ ké ní dyú-gàà mɔ̀à Áázè kɛɛ nyɔ́nɔ́ ɖé zà kɛ.”
5Ké gbo-nì-dyùɔ̀ diè ma ɔ dyi, ké ɔ ɖá, “Ɔ jǔ ké màaɔ̀ se wɔ̃́ ɓɛ́ ɔ ké ḿ kíɖíí sí, ɓɛ́ ḿ kè ɔ ké nɔ̄ ɓóɖóɛ̀ mú dyi ní ɖé? Ɔ dyi ná nìǐn, nìí, ḿ mɛ kpa nì dyú-gààɔ̀ ɖé ɓóɖó kɔ̃̀ kɔ̃ m̀ sɔ̀ ma kà kɛɛ ɖeè?”
6Ké Ééɓòɖòhɛ̃́ɛ̀ ɖá, “Mɔ̀ǔn ɖá ɓɛ́ m̀ ké ní dyúɔ̀ ɖé ɖe kpa. 7Bounɓo Gèɖèpɔ́ɔ̀ kɔ̃̀à ɖɛ séín wuɖuí, ɓɛ́ ɔ mɔ̀ nyɔ zà ma kà ḿ ɖé ḿ ɓǎ ɓíɖí-ɓòɖòɔ̀ kɔ̃, ɓɛ́ ɔ dyiɛ ma kà ḿ nyɛ́nɛ́ín ɖáìn, ɓɛ́ ɔ dyi níiń, ‘Ní mu nì xwíníín-dyù ɓě ɓóɖó nìà kɛ nyíìn’ nyɛɛ, ɔ mɔ̀ nyɔ mu ɔ ínjàɔ̀ ɖé m̀ dyúa ɖoɓoùn, ɓɛ́ m̀ ké ɖé nyɔ́nɔ́ ɖò zà ɓó ní dyú-gààɔ̀ bìì. 8Ɔ jǔ ké màaɔ̀ se wɔ̃́ ɓɛ́ ɔ ké m̀ kíɖíí sí, ɓɛ́ m̀ kè ɔ ké dyi ní, nìí, m̀ ɖǎ wuɖu-ɖi-ɖiɛ̀ xwaún pó. Kɛɛ mɔ̀ǔn ɖá ɓɛ́ m̀ ké ní dyúɔ̀ ɖé ɖe kpa sɔ̃̀ɔ̀.” 9Ɔ jèɛɛ, gbo-nì-dyùɔ̀ po ma ɔ sɔ̃ɔ̀ ɓó ɔ gbo-nì-ɓǎ Ééɓòɖòhɛ̃́ɛ̀ ɓoɔ̀ pṹa, ké ɔ ɖi ma wuɖu ɓá ɖɛ nìà kɛ jè dyí.
10Hwɛ̀ ké gbo-nì-dyùɔ̀ ɖú ma ɔ gbo-nì-ɓǎɔ̀ sǒ-nì-gbu-kɔ̃ún ɓaɖa-bùè kè ɖɛ-nɔ̀mɔ̀-kɔ̃in-dù kò-kò ɓě dyí. Ké ɔ kpá ma hwìè kɔ̃, ké ɔ mu ma ɖé Mɛ̀sɔ̀pɔ̀témìà-ɓòɖòɔ̀ kɔ̃ ɖé Néhɔ̀ ɓíɖí-hwɔ̀ɖɔ̀ɔ̀ mú. 11Ti ɔ nyini ma ɓó hwɔɖɔɔ̀ gbɔɛɛ, ɔ nyuɛ ké sǒ-nì-gbu-kɔ̃ún ɓěɔ̀ wáɖá ma ɓó ní-ɓì ɖò wĩín dyi. Púɛɛ, ɔ mɔ̀ǎ ma hwìo pɛ̀ɛ, ti ɓɛ́ màa ɓě muà ní wĩín nyɛ. 12Hwɛ̀ ké ɔ ɓaà ma, ké ɔ ɖá, “Óó, Bounɓo, mɔ̀ mɔ̀à ní gbo-nì-ɓǎ Ééɓòɖòhɛ̃́ɛ̀ Gèɖèpɔ́ɔ̀ kɛɛ, ní ɓaà m̀ ní, nyí ḿ mana ɓó zɛ̃̌ɛ̀, ɓɛ́ m̀ ké ní gbo-nì-ɓǎ Ééɓòɖòhɛ̃́ɛ̀ jĩ́á-jè dyí nyu. 13Dyéɛ kà ḿ nyànà dà níɛ̀ wĩín dyiɛ, ké kà hwɔɖɔɔ̀ nyɔ ɓěɛ̀ dyú-màà ɓěɔ̀ nì ní wĩín dyiɛń nyɛ. 14Ɔ jǔ ké wa dyi nyini ní, nìí, màa-dyù gmɔ̀ɔ̀ nyɔ ní muɛ gbo cɛ̃ìn, ɓɛ́ ḿ ké níiń, ‘Ní ɓaà m̀ ní, zà nì ní-dyààɔ̀ kɔún, ɓɛ́ ḿ ké ní ná,’ ké ɔ mu wɔ̃́ùn, ɓɛ́ ɔ ké níiń, ‘Ná ní, ké ní mu nì sǒ-nì-gbu-kɔ̃ún ɓěɔ̀ ní nyíìn ɖekèɛɛ,’ ɔ mɛ mɔ̀ nyɔ ɓɛ́ m̀ ɖǎ gã ɓó nì gbo-nì-dyù Áázè bììɛ. Dyììn ɖé ɖɛ nìà kɛ múɛɛ, ní muɛ dyí dyuòùn kà ɓɛ́ m̀ ɖǎ ní gbo-nì-ɓǎɔ̀ jĩ́á-jè dyí nyuɛ.”
15Hwɛ̀ ɓɛ́ ɔ kéá ma ɓaà hwɔɛɛ, púɛɛ, Wìɖìbɛ́kɔ̀ wóɖó ma xwáɖáún, ké ɔ ní-dyààɔ̀ nì ma ɔ kɔún. Wìɖìbɛ́kɔ̀ mɔ̀ Bɛ̀fúè mɔ̀à Míókàà dyú-gàà kɛɛ dyú-màà. Míókàɔ̀ mɔ̀ ma kà Ééɓòɖòhɛ̃́ɛ̀ ɖíí-gàà mɔ̀à Néhɔ̀ kɛɛ gmààɔ̀ kɛ̀. 16Màa-dyù gmɔ̀ mɔ̀à Wìɖìbɛ́kɔ̀ kɛɛ nɔ̀mɔ̀ ma dyíin mìɔ cá. Ɔ séè ma gàa jè dyuò ke. Ɔ mu ma ɖé níɔ̀ wĩín, ké ɔ píní ma ɔ níɔ̀, ké ɔ dyi ma ɖe. 17Púɛɛ, gbo-nì-dyùɔ̀ fṹà ma, ké ɔ mu ma ɔ wɔ̃, ké ɔ ɖá, “Ní ɓaà m̀ ní, nyí ḿ nì níɔ̀ ɖò, ɓɛ́ ḿ kéɛ náe.”
18Ké màa-dyùɔ̀ ɖá, “Èè, ɓɔ̌ɔ̀, níɔ̀ kɛ̀o.” Ké ɔ fṹà, ké ɔ zà ma ɔ ní-dyààɔ̀ kɔún, ké ɔ ɓéɖéɛ ma xwa, ké gàaɔ̀ ná ma ɖò. 19Ti ɓɛ́ ɔ ɖǎ ma gàaɔ̀ níɔ̀ nyíɛ hwɔɛɛ, ɔ ɖá, “Ní mu ní píníìn ɓó nì sǒ-nì-gbu-kɔ̃ún ɓěɔ̀ bìì, ɓɛ́ wa mɔ̀ùn ké ní ná ɖekè.” 20Ké ɔ fṹà, ké ɔ púè ma ní nì ma ɖé ɔ ní-dyààɔ̀ múɛɛ ɖé nyúà-ɖɛ̀ níín-náìn-ɖɛ̀ɔ̀ mú. Ké ɔ kpa ma ɖé níɔ̀ wĩín peɖeɛ, ɓɛ́ ɔ ké ma níɔ̀ ɖò píní ɖe. Ɔ nyuɛ ma náa tee, ké sǒ-nì-gbu-kɔ̃ún séín ɓěɔ̀ hwɔ ma ní náa hwɛ̀. 21Ɓó tia ɓaɖaa, gàaɔ̀ nì ma gìɖìǐ, ké ɔ dè ma màa-dyù gmɔ̀ɔ̀ nyuu-ɖɛ̀ ɓěɔ̀ dyéɖé gbo nɔ̀mɔ̀ dyíin, ɓɛ́ ɔ kéɛ dyé kɛbì Bounɓoɔ̀ nì ma ɔ dyí-nà-ɖɛ̀ɔ̀ mana kɔ̃ poɛń jǎà ní.
22Ti ɓɛ́ sǒ-nì-gbu-kɔ̃ún ɓěɔ̀ ɖǎ ma ní náa hwɔɛɛ, gàaɔ̀ ɖú ma góò máná-wĩín-ɓá-ɖɛ̀ ɖò kɔ̃̀ xwa-ku-ku ɓɛ́ìn cɛ́kò fáún-fáún nyuɛ kɛɛ dyí, ké ɔ ɓáa ma ɔ máná wĩín. Ké ɔ ɖú ma góò sɔ̃-po-ɖɛ̀ sɔ̃́ ɓě kɔ̃̀ xwa-ku-ku ɓɛ́ìn ma cɛ́kò ɓaɖa-bùè nyuɛ kɛɛ dyí, ké ɔ poɛ ma ɔ sɔ̃.#24:22 Bɛ̃̀ìn-ɖɛ̀ ɓě nìà kɛ kpa ma wíɖí ɓáún-ɓáún. Wa nììn máná-wĩín-ɓá-ɖɛ̀ɔ̀ mɔ̀ Ɓǎsɔ́ɔ̀-nyɔ̀ nììn ɖùǔn-po-ɖɛ̀. 23Ké ɔ diè ma ɔ dyi, ké ɔ ɖá, “M̀ mɔ̀ nyɛ́ɛ̀ dyúɛ́? Ní ɓaà m̀ ní, cɛ̃ɛ ḿ gbo, pá nì ɖé m̀ ɓǎ ɓíɖí-taún ɓɛ́ ḿ kè ní gbo-nì-nyɔ̀ ɓěɛ̀ kè nyúà-ɖɛ̀ ɓěɛ̀ ké ɖé pɛ̃́ɛ̀?”
24Ké màa-dyùɔ̀ jǔ ma ɔ gɔ̃̌, ké ɔ ɖá, “Ḿ mɔ̀ Bɛ̀fúèɛ̀ dyú-màà. Ɔ mɔ̀ Bɛ̀fúè mɔ̀à Míókà kè Néhɔ̀ɛ̀ dyú-gàà kɛ. 25Ké ɓá pɛ̃́-naín jè dyíɛɛ, à ɓéɖé pɛ̃́-naín kè ɖii-ɖɛ̀ ɓáún-ɓáún ɓó ɓě kè ɓěɛ̀ nyúà-ɖɛ̀ ɓěɛ̀ bìì.”
26Púɛɛ, gàaɔ̀ taɓa ma dú hwuɖu, ké ɔ ɓiè ma Bounɓoɔ̀. 27Ké ɔ ɖá, “Ɓàìn-ɓàìn mɛ nì mɔ̀ mɔ̀à ní gbo-nì-ɓǎ Ééɓòɖòhɛ̃́ɛ̀ Gèɖèpɔ́ɔ̀ kɛɛ kɔ̃. Sepóɛɖé m̀ se nì jǎàɔ̀ kè nì jĩ́á-jèɔ̀ ní gbo-nì-ɓǎɔ̀ dyí nyuɛ ɓɔ́. Dyéɛ, m̀ ɖǎ ḿ nàìn, ké m̀ ɖǎ ḿ ní gbo-nì-ɓǎɔ̀ ɖíí ɓěɔ̀ gbo dyà.”
28Hwɛ̀ ké màa-dyùɔ̀ kpa ma peɖeɛ ɖé ɔ ɖe ɓíɖí-taún, ké ɔ zaìn ma ɖɛ séín ɓěɔ̀ kɔ̃in. 29Ɓó tia ɓaɖaa, Wìɖìbɛ́kɔ̀ ɓéɖé ma ɖíí-gàà ɖò kɔ̃̀ nyɛ́nɛ́ mɔ̀ ma Ɖéɓɛ̀ìn nyɛ. Ké Ɖéɓɛ̀ìn kpa ma peɖeɛ ɖé gàaɔ̀ gbo, ɖé níɔ̀ wĩín. 30Ɖéɓɛ̀ìn ɖǎ ma máná-wĩín-ɓá-ɖɛ̀ɔ̀ kè sɔ̃-po-ɖɛ̀ ɓěɔ̀ ɔ ɖíí-mààɔ̀ bũ̌ dyé, ké ɔ ɖǎ ma ɖɛ séín ɓě ɓɛ́ ɔ ɖíí-màà Wìɖìbɛ́kɔ̀ ɖá gàaɔ̀ cɛ̃ ma kà ɔ gboɛɛ wɔ̃́. Ɔ jèɛɛ, ɔ mu ma ɖé gàaɔ̀ gbo, ké ɔ dyɛ̀ìn ma gàaɔ̀ dyi nyànàà ɓó sǒ-nì-gbu-kɔ̃ún ɓěɔ̀ gbo, ɖé níɔ̀ wĩín. 31Ké Ɖéɓɛ̀ìn cɛ̃ɛ ma ɔ gbo, ké ɔ ɖá, “Dyi, ɓɛ́ à ké taún mu, mɔ̀ ɓɛ́ Bounɓoɔ̀ poà mana kɔ̃ɛ. Ɖɛ́ kɔ̃̀ jè m̀ nyànàà nɔ̄ píéɛ̀ dyiɛ́? Ḿ ɖǎ nì pɛ̃́-naín kè nì nyúà-ɖɛ̀ ɓěɔ̀ pá nyuɛ hwɔ.”
32Ɔ jèɛɛ, gàaɔ̀ mu ma ɖé taàɔ̀ mú. Ké Ɖéɓɛ̀ìn buɛ̀ ma sǒ-nì-gbu-kɔ̃ún ɓěɔ̀ gbɛ̌ ɓěɔ̀ kɔ̃in, ké ɔ nyí ma wa pìǐ kè ɖii-ɖɛ̀ ɖíɛ́ ɓě. Ké ɔ nyí ma ɖéè-gààɔ̀ kè ɔ gbo-nì-nyɔ̀ ɓěɔ̀ ní, ɓɛ́ wa ké ma ɓoi dèɖè. 33Kɛɛ ti ɓɛ́ wa dyà ma ɔ ɖii-ɖɛ̀ kɛɛ, ɔ ɖá, “Ḿ se ɖɛ ɖiɛ́ mu, ké ḿ cɛ̃ ɖɛ kɔ̃̀ jè ḿ ɖǎà dyiɛɛ hwɛ̀.”
Ké Ɖéɓɛ̀ìn ɖá, “Kpa nì wuɖu.”
34Hwɛ̀ ké gàaɔ̀ ɖá, “Ḿ mɔ̀ Ééɓòɖòhɛ̃́ɛ̀ gbo-nì-dyù. 35Bounɓoɔ̀ ɖǎ ní gbo-nì-ɓǎɔ̀ mana kɔ̃ po mìɔ, ké ɔ ɖǎ bã. Bounɓoɔ̀ ɖǎ ɔ ɓáɖáá kè wiɖi kè ɓìɖǐ ɓě kè séɓàɖà kè góò kè gǐì-gàà kè gǐì-màà ɓě kè sǒ-nì-gbu-kɔ̃ún kè jǎkasì ɓě nyí. 36Ti ɓɛ́ ní gbo-nì-ɓǎɔ̀ gmàà Seɖɔ́ ɖǎ ma nyɛ kɛɛ, ɔ wóɖóìn ma gàa-dyù ɖò ɓó ní gbo-nì-ɓǎɔ̀ bìì. Ké ní gbo-nì-ɓǎɔ̀ ɖǎ ɔ kɔ̃̀ɔ̀-ɖɛ̀ séín ɓěɔ̀ ɔ dyúɔ̀ nyí. 37Hwɛ̀ ké ní gbo-nì-ɓǎɔ̀ nyuɛ ké ḿ ɖi wuɖu ɓó ɔ dyúa. Ɔ ɖá, ‘Mɔ̀ǔn ɖá ɓɛ́ m̀ ké ní dyúɔ̀ nyɔ́nɔ́ nɔ̄ Kénà-nyɔ̀ ɓě kɔ̃̀ ɓóɖó ḿ nìà kɔ̃ cĩ́ɛń nyɛɛ dyú-màà ɓěɔ̀ hwìɛ̀ zà. 38Kɛɛ m̀ mɛ mu ɖé ḿ ɓǎà gbǒ-xwíníínɔ̀ gbo ɖé ní nyɔ ɓěɔ̀ gbo, ɓɛ́ m̀ ké ɖé nyɔ́nɔ́ ɖò zà ɓó ní dyúɔ̀ bìì.’ 39Ké ḿ diè ma ní gbo-nì-ɓǎɔ̀ dyi, ké ḿ ɖá, ‘Ɔ jǔ ké màaɔ̀ se wɔ̃́ ɓɛ́ ɔ ké ḿ kíɖíí sí ní ɖé?’ 40Ké ɔ cɛ̃ɛ ḿ gbo, ké ɔ ɖá, ‘Bounɓo mɔ̀ nyɔ ɓɛ́ ḿ síà kíɖííɛɛ mu ɔ ínjàɔ̀ tòùn, ɓɛ́ m̀ kè ɔ ké mu, ɓɛ́ ɔ ké nì hwìè-kpàɔ̀ nyu ɓɛ́ ɔ ké kpáná mú nì, ɓɛ́ m̀ ké ní dyúɔ̀ nyɔ́nɔ́ ɖé ní nyɔ ɓě mɔ̀à ḿ ɓǎà gbǒ-xwíníínɔ̀ kɛɛ hwìɛ̀ zà. 41Hwìè dyúáɖò kɔ̃̀ xwíníín ɓɛ́ m̀ ɓɛ́ìn póɛ sɔ̀ìn ɖé wuɖu ɓɛ́ m̀ ɖià ɓó ḿ dyúa kɛɛ xwaún wɛ̃ɛ mɔ̀, ɔ jǔ ké m̀ dyi ɖé ní nyɔ ɓěɔ̀ gbo mu, ké wa se wɔ̃́ ɓɛ́ wa ké m̀ màa-dyù gmɔ̀ ɖò nyí ní, nìí, m̀ ɖǎ wuɖu-ɖi-ɖiɔ̀ xwaún pó.’
42“Ti ɓɛ́ ḿ dyiɔ́ zɛ̃̌ɛ̀ ɓó ní-ɓìɔ̀ wĩín nyɛɛ, ḿ ɓaà má, ké ḿ ɖá, ‘Óó, Bounɓo, mɔ̀ mɔ̀à ní gbo-nì-ɓǎ Ééɓòɖòhɛ̃́ɛ̀ Gèɖèpɔ́ɔ̀ kɛɛ, ní ɓaà m̀ ní, nyí ḿ mana ɓó ní hwìè-kpà ɓɛ́ ḿ dyàà kɛɛ jè. 43Dyéɛ kà ḿ nyànà dà ní-ɓìɛ̀ wĩín dyiɛ. Ɔ mɛ kpá ná kà màa-dyù gmɔ̀ɔ̀ nyɔ mu ní wĩín dyiìn, ké ní muɛ ɔ gbo cɛ̃ìn, ɓɛ́ ḿ ké níiń, “Ní ɓaà m̀ ní, nyí ḿ nì níɔ̀ ɖò, ɓɛ́ ḿ kéɛ ná,” 44ké ɔ muɛ ḿ gbo cɛ̃ìn, ɓɛ́ ɔ ké níiń, “M̀ mɛ ná ní, ké ní mu nì sǒ-nì-gbu-kɔ̃ún ɓěɔ̀ bìì ní píníìn ɖekèɛɛ,” ɔ mɛ mɔ̀ màa ɓɛ́ m̀ ɖǎ gã ɓó ní gbo-nì-ɓǎɔ̀ dyú-gààɔ̀ bììɛ.’ 45Hwɛ̀ ɓɛ́ ḿ kéɔ́ má wuɖu jaɖa ɖé ní hwòɖǒɔ̀ bũ̌ɛɛ, púɛɛ, Wìɖìbɛ́kɔ̀ wóɖó má xwáɖáún, ké ɔ ní-dyààɔ̀ nì má ɔ kɔún. Ké ɔ muɔ́ má ɖé níɔ̀ wĩín, ké ɔ píní ní. Ké ḿ cɛ̃ɛ ɔ gbo, ké ḿ ɖá, ‘Ní ɓaà m̀ ní, tò ḿ ké ní ná.’ 46Ké ɔ fṹà, ké ɔ zà ɔ ní-dyààɔ̀ kɔún, ké ɔ ɖá, ‘Ná ní, ké ní mu nì sǒ-nì-gbu-kɔ̃ún ɓěɔ̀ ní nyíìn ɖekè.’ Ké ḿ ná má ní, ké ɔ nyí ní sǒ-nì-gbu-kɔ̃ún ɓěɔ̀ ní ɖekè. 47Hwɛ̀ ké ḿ diè ɔ dyi, ké ḿ ɖá, ‘M̀ mɔ̀ nyɛ́ɛ̀ dyúɛ́?’ Ké ɔ ɖá, ‘Ḿ mɔ̀ Bɛ̀fúèɛ̀ dyú-màà. Ɔ mɔ̀ Bɛ̀fúè mɔ̀à Néhɔ̀ kè Míókàà dyú-gàà kɛ.’ Hwɛ̀ ké ḿ ɓá má máná-wĩín-ɓá-ɖɛ̀ɔ̀ ɔ máná wĩín, ké ḿ po má sɔ̃-po-ɖɛ̀ ɓěɔ̀ ɔ sɔ̃. 48Ké ḿ taɓa má dú hwuɖu, ké ḿ ɓiè má Bounɓo mɔ̀à ní gbo-nì-ɓǎ Ééɓòɖòhɛ̃́ɛ̀ Gèɖèpɔ́ɔ̀ kɛ, ké ḿ po má ɔ zùo, nyɔ ɓɛ́ ɔ ɖǎà ḿ hwìè sɛ́ɖɛ́ìn dyíɔ̀ xwíníín nàìn, ɓɛ́ ḿ ké ní gbo-nì-ɓǎɔ̀ ɖíí ɓěɔ̀ dyú-mààɔ̀ kpa ɓó ɔ dyú-gààɔ̀ bììɛ. 49Ɔ jèɛɛ, ɔ jǔ ké ɓě dyi ní gbo-nì-ɓǎɔ̀ jĩ́á-jè dyí nyuɛ́ mu ní, ɓě cɛ̃ɛ ḿ gbo. Ɔ se ná nìǐn, ɓě cɛ̃ɛ ḿ gbo, ɓɛ́ ḿ ké ɖé ɖiaún mɔɔ kunuaún kpáìn.”
50Hwɛ̀ ké Ɖéɓɛ̀ìn kè Bɛ̀fúè zà ma ɖé wuɖu, ké wa ɖá, “Ɖɛ séínɔ̀ sɔ̀ìn ɖé Bounɓoɔ̀ gbo. Ɔ jèɛɛ, à se ɖɛ ɖò cɛ̃ɛ ɓɛ́ìn ɖe. 51À zà Wìɖìbɛ́kɔ̀ɔ̀ xwáɖáún wɛ̃ɛ, à nyí ɔ m̀ ní. Ɖú ɔ dyí, ɓɛ́ ɓě ké mu, ɓɛ́ ɔ ké nì gbo-nì-ɓǎɔ̀ dyú-gààɔ̀ gmàà jǔ kà Bounɓoɔ̀ nyuà cɛ̃ɛ kɛ.” 52Ti ɓɛ́ Ééɓòɖòhɛ̃́ɛ̀ gbo-nì-dyùɔ̀ wɔ̃́ ma wuɖu ɓěɛ̀ kɛɛ, púɛɛ, ɔ taɓa ma dú hwuɖu ɓó Bounɓoɔ̀ dyúa, ké ɔ po ma ɔ zùo. 53Ké ɔ zà ma ɖé séɓàɖà kè góò-bɛ̃̀ìn-ɖɛ̀ ɓě kè mú-po-ɖɔ̀ ɓě, ké ɔ nyí ma wa Wìɖìbɛ́kɔ̀. Ké ɔ nyí ma ɔ ɖíí-gààɔ̀ kè ɔ ɖe ɖɛ nɔ̀mɔ̀ kɔ̃in ɓě ɖekè.
54Hwɛ̀ ké gbo-nì-dyùɔ̀ kè ɔ gbo-nì-nyɔ̀ ɓěɔ̀ ɖi ma ɖɛ, ké wa ná ma ní, ké wa pɛ̃́ ma ɓó. Ti ɓɛ́ wa sɔ̀ ma dyí ɓó gànà-kṹún wɛ̃ɛ, ɔ cɛ̃ɛ ma, ké ɔ ɖá, “Ɓě cuò ḿ, ɓɛ́ ḿ ké ní gbo-nì-ɓǎɔ̀ gbo ɖe mu.”
55Kɛɛ Wìɖìbɛ́kɔ̀ ɖeɔ̀ kè ɔ ɖíí-gààɔ̀ ɖá, “Wìɖìbɛ́kɔ̀ mɛ nyu dà à gbo wé gbɛ̀ǐ-gbɛ̀ǐ ɓɛ́ìn kà wé ɓaɖa-bùè jǔɛ kɛ. Sɔ̀ìn ɓóɛ gboɛɛ, nìí, ɔ ɓɛ́ìn muɛ.”
56Kɛɛ gbo-nì-dyùɔ̀ cɛ̃ɛ ma wa gbo, ké ɔ ɖá, “Ɓě ɓɔ́ ní ti zĩ̀ɛ̀n, kà ɓɛ́ Bounɓoɔ̀ ɖǎà ní hwìè-kpàɔ̀ mana kɔ̃ poɛ. Ɓě cuò ḿ, ɓɛ́ ḿ ké ní gbo-nì-ɓǎɔ̀ gbo ɖe mu.”
57Ké wa ɖá, “À mu màa-dyù gmɔ̀ɔ̀ ɖáùn, ɓɛ́ à ké ɔ wĩín dyi wɔ̃́.” 58Hwɛ̀ ké wa ɖá ma Wìɖìbɛ́kɔ̀, ké wa diè ma ɔ dyi, ké wa ɖá, “Nì mɔ́ m̀ kè gàa nìà kɛ ké muù?”
Ké ɔ ɖá, “Ǹdye, ní mu muùn.”
59Ɔ jèɛɛ, wa cuò ma wa ɖíí-màà Wìɖìbɛ́kɔ̀ kè ɔ gmɛ̀ìn-ɖèɔ̀ kè Ééɓòɖòhɛ̃́ɛ̀ gbo-nì-dyùɔ̀ kè ɔ gbo-nì-nyɔ̀ ɓěɔ̀. 60Ké wa po ma Wìɖìbɛ́kɔ̀ mana kɔ̃, ké wa ɖá,
“À ɖíí-màà, nì mu dúún zaìn, ɓɛ́ m̀ ké nyɔ táázĩ̀ìn deìn táázĩ̀ìn kɔ̃in jǔ.
Ké nì xwíníín-dyù ɓě mu waà mú-nyɛ́-nyɔ̀ ɓěɛ̀ hwɔɖɔ ɓě wuɖuí kɔ̃̀ùn.”
61Hwɛ̀ ké Wìɖìbɛ́kɔ̀ kè ɔ gbo-nì-màà-dyù ɓěɔ̀ sɔ̀ ma dyí, ké wa kpá ma sǒ-nì-gbu-kɔ̃ún ɓěɔ̀ kɔ̃ún, ké wa sí ma gbo-nì-dyùɔ̀ kíɖíí. Kǎà gbo-nì-dyùɔ̀ nyu ma Wìɖìbɛ́kɔ̀ dyí ɖúɛ, ké wa mu ma wa ɖɛ.
62Áázè cĩ́ ma ɖé Nɛ́gà-ɓòɖòɔ̀ kɔ̃ ɓó tia ɓaɖa. Ti ɓɛ́ Ééɓòɖòhɛ̃́ɛ̀ gbo-nì-dyùɔ̀ nìǎ ma dyi xwɛ̃́ǐn nyɛɛ, Áázè nì ma ɖé Béè-Ɖàháí-Wòɖòì-nì-ɓìɔ̀ wĩín sɔ̀ǐn, 63ké ɔ nì ma ɖé geɖeín muɛń ɓó hwìo-kà, ɓɛ́ ɔ ké ma ɓaà. Ké ɔ ɖú ma dyéɖé dyií, ké ɔ dyé ma sǒ-nì-gbu-kɔ̃ún ɓě dyiɛ. 64Ké Wìɖìbɛ́kɔ̀ ɖú ma dyéɖé dyií, ké ɔ dyé ma Áázè, ké ɔ sɔ̀ ma sǒ-nì-gbu-kɔ̃únɔ̀ kɔ̃ún. 65Ké ɔ diè ma gbo-nì-gààɔ̀ dyi, ké ɔ ɖá, “Gàaɔ̀ nyɛ́ dyàà ɖé nàà, ké ɔ nìà à hwìǐ dyiɛń nyɛ́?”
Ké gbo-nì-gààɔ̀ ɖá, “Ɔ mɔ̀ ní gbo-nì-ɓǎɔ̀.” Púɛɛ, Wìɖìbɛ́kɔ̀ ɖú ma ɔ ɖɔɔ̀ dyí, ké ɔ wáɖáa ma dúi.#24:65 Wìɖìbɛ́kɔ̀ wáɖá ma ɖɔ dúi. Ɔ xwíníín mɔ̀ kǎà wa tò kpéín-dyé-dyé ɖé wa ɓíɖí-kpèɖèɔ̀ mú. Kǎà màa ɓɛ́ wa dyà dyia kɛɛ nyuɛ ma.
66Ké gbo-nì-gààɔ̀ cɛ̃ ma ɖɛ séín ɓě ɔ nyu ma kɛɛ Áázè gbo. 67Hwɛ̀ ké Áázè dyà ma Wìɖìbɛ́kɔ̀ ɖé ɔ ɖe Seɖɔ́ɛ̀ jàɖàìn-gbòɔ̀ mú. Ké ɔ kpɔ̃ ma ɔ dyi, ké ɔ mɔ̀ ma ɔ gmàà. Ké ɔ ɖɛ̀ɓɛ̀ ma ɔ mú. Hwɛ̀ ké Áázèɛ̀ hwòɖǒ dèǎ ma dyi sɔ̀ìn ɓó ti ɔ ɖe ɖǎ zɔ̃̌ɔ̀ mɛ́ kɛ.
Currently Selected:
Jɛ́nɛ́sì 24: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
