Jɛ́nɛ́sì 26
26
Áázè kè Àbímɛ̀nɛ̀
1Ti ɓɛ́ mɔ́ vɛ̀nɛ̀ɔ̀ ɖǎ ma kpá ɓó Ééɓòɖòhɛ̃́ɛ̀ nììn tiɔ̀ múɛɛ, mɔ́ vɛ̀nɛ̀ ɖò kpá ma ɓóɖóɔ̀ kɔ̃ ɖe. Hwɛ̀ ké Áázè mu ma ɖé Géwɔ̀ɖɔ̀-hwɔ̀ɖɔ̀ɔ̀ mú, ɖé Àbímɛ̀nɛ̀ mɔ̀à Féɖésìà-nyɔ̀ ɓěɔ̀ kã́áɔ̀ kɛɛ gbo. 2Ké Bounɓoɔ̀ wóɖóìn ma ɔ dyí, ké ɔ ɖá, “Mɔ̀ǔn ɖá ɓɛ́ m̀ ké ɖé Íjè-ɓòɖòɔ̀ kɔ̃ mu. M̀ mɛ cĩ́ nɔ̄ ɓóɖó kɔ̃̀ jè ḿ cɛ̃à m̀ gboɛɛ mú. 3M̀ mɛ cĩ́ nɔ̄ ɓóɖó nìà kɛ mú, ɓɛ́ ḿ ké ɓó m̀ gbo nì kánáá pū, ɓɛ́ ḿ ké m̀ mana kɔ̃ po. Sepóɛɖé ní mu ɓóɖó séínɛ̀ m̀ kè nì xwíníín-dyù ɓě nyíìn, ké ní mu wuɖu-ɖi-ɖi ɓɛ́ ḿ nyu ma kà ɓó m̀ ɓǎ Ééɓòɖòhɛ̃́ɛ̀ gboɛɛ kɔ̃in kpɔ̃ùn kánáá pū. 4Ní mu nì xwíníín-dyù ɓěɔ̀ dúún zaìn, ɓɛ́ wa ké dyí vò kà dɛ̀nɛ̀ mɛ́nɛ́ɛ́ nìà ɖé dyɔɔ̀ dyíɛɛ nìà kɛ, ké ní mu nì xwíníín-dyù ɓěɔ̀ ɓóɖó séínɛ̀ nyíìn, ké ɓóɖó-dù séín nì ɓóɖó-kpàà kɔ̃ɛɛ mu jĩ́á-jè dyéìn dyììn ɖé nì xwíníín-dyù ɓěɔ̀ mú, 5sepóɛɖé Ééɓòɖòhɛ̃́ɛ̀ nyu ma ɖɛ séín ɓě ḿ cɛ̃ ma ɔ gboɛ, ké ɔ kpɔ̃ ma ní gma séín ɓěɔ̀ dyi jè.” 6Ɔ jèɛɛ, Áázè cĩ́ ma ɖé Géwɔ̀ɖɔ̀-hwɔ̀ɖɔ̀ɔ̀ mú.
7Ti ɓɛ́ gàa ɓě nì ma páɔ̀ múɛɛ diè ma ɔ gmààɔ̀ jè dyiɛɛ, ɔ ɖá, “Ɔ mɔ̀ ḿ ɖíí-màà,” sepóɛɖé ɔ fɛ̃̀ìn ma, ɓɛ́ ɔ ké níiń, “Ɔ mɔ̀ ní gmàà.” Ɔ cɛ̃ɛ ma ɖé ɔ hwòɖǒ bũ̌, ké ɔ ɖá, “Gàa ɓě nì pá nìà kɛ múɛɛ ɓɛ́ìn ḿ ɖáɓáa ɓó ní gmàà Wìɖìbɛ́kɔ̀ jè, sepóɛɖé ɔ mɔ̀ dyíin-nɔ̀mɔ̀-màà.” 8Ti ɓɛ́ ɔ ɖǎ ma ɓó ti goun wè nyuɛɛ, púɛɛ, wé ɖòɛ̀ ɓaɖaa, Àbímɛ̀nɛ̀ mɔ̀à Féɖésìà-nyɔ̀ ɓěɔ̀ kã́áɔ̀ kɛɛ gmɔ̀ìn ma wúɖɛ̀-wɔ̃̀ ɖò gbo, ké ɔ dyéɛ, ké Áázè kè ɔ gmàà Wìɖìbɛ́kɔ̀ nì ma xwaún dyi vɔ̃̀ǐn. 9Hwɛ̀ ké Àbímɛ̀nɛ̀ ɖá ma Áázè, ké ɔ diè ma ɔ dyi, ké ɔ ɖá, “Má, ɔ mɔ̀ nì gmààe? Nìí, ɖɛ́ kɔ̃̀ jè m̀ cɛ̃à, ɓɛ́ m̀ dyi níiń, ‘Ɔ mɔ̀ ḿ ɖíí-màào’ kɛ́?”
Ké Áázè jǔ ma ɔ gɔ̃̌, ké ɔ ɖá, “Ɔ mɔ̀ mɔ́ún kɔ̃̀ mɛ́ ɓó ní gmààɔ̀ jè.”
10Ké Àbímɛ̀nɛ̀ ɖá, “Ɖɛ́ mɔ̀ ɖɛ m̀ nyuà à bũ̌ kɛɛ xwíníín nyɛ́? Gàa ɓěɔ̀ ɖò ɓɛ́ìnɔ̌ má nì gmààɔ̀ gbo pɛ̃́ɛ, ɓɛ́ ɔ kéɛ nyu ɓɛ́ m̀ kéɔ́ má zaa-dúún-wáɖá-wáɖá à kɔ̃ dyà.” 11Hwɛ̀ ké Àbímɛ̀nɛ̀ po ma ɔ nyɔ séín ɓěɔ̀ náún, ké ɔ ɖá, “Nyɔ ɓɛ́ ɔ mu gàa nìà kɛ mɔɔ ɔ gmààɔ̀ dyi tìnììn nyɛɛ, wa mu ɔ ɖáɓáùn wàɖà cá.”
12Sɔ̀ìn ɓó ɖɛ ɓěa gboɛɛ, Áázè nyu ma geɖe ɖé ɓóɖóa kɔ̃, ké ɔ ɓáá-ɖɛ̀ ɓěɔ̀ zi ma bãuń mìɔ cá, sepóɛɖé Bounɓoɔ̀ po ma ɔ mana kɔ̃. 13Ké Áázè dè ma bãa gbɔ, ké ɔ mu ma dyúa tee, ké ɔ mɔ̀ ma bã-nyɔ̀ vɛ̀nɛ̀. 14Ɔ ɓéɖé ma ɓáɖáá kè wiɖi kè ɓìɖǐ ɔ kè nyɔǔn-dyù ɓáún-ɓáún jèɛɛ, Féɖésìà-nyɔ̀ ɓěɔ̀ dyéìn ma ɔ hwɛ̀nɛ̌.
15Púɛɛ, Féɖésìà-nyɔ̀ ɓěɔ̀ po ma ní-ɓì séín ɓɛ́ ɔ ɓǎ Ééɓòɖòhɛ̃́ɛ̀ gǐì ɓěɔ̀ ɓúɖú ma, ti ɓɛ́ ɔ nì ma cĩ́ɛń keɛɛ ɓɔ́í dyììn ɖé wa ɓóɖó mú-dyíìn-dyíìn mú. 16Ké Àbímɛ̀nɛ̀ cɛ̃ɛ ma Áázè gbo, ké ɔ ɖá, “Sɔ̀ dà à hwìɛ̀, sepóɛɖé m̀ ɖǎ kpé ɓéɖé mìɔ ké m̀ ɖǎ à dyí zi.” 17Ɔ jèɛɛ, Áázè sɔ̀ ma ɓó, ké ɔ mu ma, ké ɔ nyànàìn ma ɔ jàɖàìn-gbò ɓěɔ̀ ɖé Géwɔ̀ɖɔ̀ Bɔɔ-kpàɔ̀ kɔ̃ dyi, ké ɔ cĩ́ ma ɖé.
18Hwɛ̀ ké Áázè ɓúɖú ma ní-ɓì ɓě ɓɛ́ ɔ ɓǎ Ééɓòɖòhɛ̃́ɛ̀ ɓúɖú ma kà, ti ɓɛ́ ɔ nì ma kà cĩ́ɛń nyɛɛ ɖe, ké ɔ jǔìn ma wa nyɛ́nɛ́ dyúáɖò ɓě ɓɛ́ ɔ ɓǎ jǔìn ma kà wa kĩ́ín nyɛɛ ɖe. Ɔ mɔ̀ ní-ɓì ɓě ɓɛ́ Féɖésìà-nyɔ̀ ɓěɔ̀ ɖǎ ma kà ɓɔ́í po dyììn ɖé wa ɓóɖó mú-dyíìn-dyíìn mú, ti ɓɛ́ Ééɓòɖòhɛ̃́ɛ̀ ɖǎ ma kà mɛ́ɛ. 19Ké Áázèɛ̀ gǐì ɓěɔ̀ ɓúɖú ma ní-ɓì ɖìè ɖò ɖé bɔɔ̀ kɔ̃, ké wa dyɛ̀ìn ma ní pɛ̀ɛ̀. 20Ké Géwɔ̀ɖɔ̀-nyɔ̀ ɓěɔ̀ nyúà-ɖɛ̀-dyí-gmɔ̀-nyɔ̀ ɓěɔ̀ nyu ma Áázè nììn nyúà-ɖɛ̀-dyí-gmɔ̀-nyɔ̀ ɓěɔ̀ zàǔn-zàǔn gbo, ké wa ɖá, “À kɔ̃̀ níɔ̀.” Ɔ jèɛɛ, Áázè jǔìn ma ní-ɓìɔ̀ Ésɛ̀-nyɛ̀nɛ̀ kɔ̃̀ xwíníín mɔ̀à zà-ɖɛín nyɛ, sepóɛɖé wa nyu ma ɔ zàǔn-zàǔn gbo jè. 21Hwɛ̀ ké wa ɓúɖú ma ní-ɓìɔ̀ ɖò ɖe, ké wa nyu zà-ɖɛín ɓá dyɛ mɔ̀ɔ̀ jè dyí ɖekè. Ɔ jèɛɛ, ɔ jǔɛ̀n ma Sítànà-nyɛ̀nɛ̀ kɔ̃̀ xwíníín mɔ̀à vɔ̃ gbo kɛ. 22Ké ɔ jaɖa ma ɓó, ké ɔ mu ma pá kà kò ɖò mú. Ké ɔ ɓúɖú ma ní-ɓì ɖò ɖe, ké wa se ma ɖɛín zà ɓó dyɛ mɔ̀ɔ̀ jè. Ɔ jèɛɛ, ɔ jǔɛ̀n ma Wìɖìhóɓò-nyɛ̀nɛ̀ kɔ̃̀ xwíníín mɔ̀à pá kɛ, sepóɛɖé ɔ ɖá, “Ɓó kàǔn wɛ̃ɛ, Bounɓoɔ̀ ɖǎ pá ɖò nyu ɓó à bìì, ké à ɖɛ séín muá dúún zaìn nɔ̄ ɓóɖóɛ̀ mú.”
23Sɔ̀ìn ɓó ɖɛ ɓěa gboɛɛ, ɔ sɔ̀ ma ɓó páɔ̀ mú, ké ɔ mu ma ɖé Bèsíɓà-pàɔ̀ mú. 24Ké Bounɓoɔ̀ wóɖóìn ma ɔ dyí ɓó wé kɔ̃̀ ɓaɖa ɔ nyini ma ɖé Bèsíɓà kɛɛ nììn máaún-hwùɖùɔ̀ mú, ké ɔ ɖá, “Mɔ̄ mɔ̀ m̀ ɓǎ Ééɓòɖòhɛ̃́ɛ̀ Gèɖèpɔ́ɔ̀. M̀ mɛ ɓɔ́ fɛ̃̀ìn, sepóɛɖé ḿ nì ɓó m̀ gbo. Ní mu m̀ mana kɔ̃ poùn, ké ní mu nì xwíníín-dyù ɓě dúún zaìn ɓó ní gbo-nì-dyù mɔ̀à Ééɓòɖòhɛ̃́ɛ̀ kɛɛ jè.” 25Hwɛ̀ ké Áázè po ma ɓó sáa-kɔ̃-zàìn-gbàà ɖò, ké ɔ ɓièìn ma ɓó Bounɓoɔ̀. Ké ɔ nyànàìn ma ɓó ɔ jàɖàìn-gbò ɓěɔ̀ dyi, ké ɔ gǐì ɓěɔ̀ ɓúɖú ma ɓó ní-ɓì ɖò.
Áázè kè Àbímɛ̀nɛ̀ dè wuɖu
26Ti wa nì ma ní-ɓìɔ̀ ɓúɖúɛń nyɛɛ, Àbímɛ̀nɛ̀ kè ɔ náún-po-nyɔ̀ mɔ̀à Àhúzà kɛ kè Fíkò mɔ̀à ɔ sójà ɓěɔ̀ nyɔ vɛ̀nɛ̀ kɛɛ sɔ̀ ma ɖé Géwɔ̀ɖɔ̀-hwɔ̀ɖɔ̀ɔ̀ mú, ké wa dyi ma Áázè gbo. 27Ké Áázè diè ma wa dyi, ké ɔ ɖá, “Má, ɓě nyɛ́ ma ḿ mú, ké ɓě kúmú ma ḿ sɔ̀ìn ɖé ɓě hwìɛ̀e? Ɓó kàǔn wɛ̃ɛ, ɖɛ́ kɔ̃̀ jè ɓě dyià nɔ̄ ḿ gboɛ́?”
28Ké wa jǔ ma ɔ gɔ̃̌, ké wa ɖá, “À dyéɛ wáɖáá kà Bounɓoɔ̀ nì ɓó m̀ gboɛ. Ɔ jèɛɛ, à ɖá wuɖu-ɖi-ɖi mɛ nì ɓó à kè mɔ̀ pṹa ɓó kàǔn. À kè mɔ̀ mɛ dè wuɖu 29kà ɓɛ́ m̀ se à ɖɛ gbà ɖò bũ̌ nyuɛ́ mu kà à seà m̀ dyi tìnììn nyɛ, mɔɔ ké à seà m̀ ɖɛ gbà ɖò bũ̌ nyu, ɔ sèàìn ɖɛín-ɖɛ̀ kɛ. À cuò m̀, ké m̀ sɔ̀ ma à hwìɛ̀ ɖé gìɖìǐ mú. Ɓó kàǔn wɛ̃ɛ, mɔ̀ mɔ̀ nyɔ ɓɛ́ Bounɓoɔ̀ ɖǎ mana kɔ̃ poɛ.” 30Ké Áázè nyu ma hwɔ ɖò ɓó wa bìì, ké wa ɖi ma ɖɛ, ké wa ná ma ní. 31Ké wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, wa sɔ̀ ma dyí, ké wa ɖiìn ɖììn ma wuɖu dyúa. Hwɛ̀ ké Áázè cuò ma wa, ké wa mu ma ɖe ɖé gìɖìǐ mú.
32Ɓó wéa ɓaɖaa, Áázèɛ̀ gǐì ɓěɔ̀ dyi, ké wa cɛ̃ ma ɔ ní-ɓì ɓɛ́ wa nì ma kà ɓúɖúɛń nyɛɛ jè gbo, ké wa ɖá, “À ɖǎ ní dyɛ̀ìno.” 33Ɔ jèɛɛ, ɔ jǔɛ̀n ma Síɛ́ɓà-nyɛ̀nɛ̀ kɔ̃̀ xwíníín mɔ̀à dèè-wùɖù kɛ.#26:33 Nyɛ́nɛ́ nìà kɛ mɔ̀ nyɛ́nɛ́ dyúáɖò ɓɛ́ Áázè ɓǎ Ééɓòɖòhɛ̃́ɛ̀ jǔìn ma kà ní-ɓìɔ̀ kɛ. Ɔ jèɛɛ, wa ɖáìn hwɔɖɔɔ̀ Bèsíɓà ke ɓó zɛ̃̌ɛ̀.
34Ti ɓɛ́ Íìsɔ́ɔ̀ ɖǎ ma zɔ̃ kpáɖá-nyɔ sɔ̃́ nyuɛɛ, ɔ kpɔ̃ ma Júɖì ɓɛ́ ɔ mɔ̀ ma Bééwìɖì ɓɛ́ ɔ mɔ̀ ma Hítì-nyɔ̀ ɖò kɛɛ dyú-màà kɛ kè Bàsímà ɓɛ́ ɔ mɔ̀ ma Éɖɔ̀ùn ɓɛ́ ɔ mɔ̀ ma Hítì-nyɔ̀ ɖò kɛɛ dyú-màà kɛɛ dyi, ɓɛ́ wa ké ma ɔ gmàà ɓě jǔ. 35Ké Íìsɔ́ɔ̀ gmàà ɓěɔ̀ nyuɛ ké wìì nyu ma Áázè kè Wìɖìbɛ́kɔ̀ mìɔ cá.
Currently Selected:
Jɛ́nɛ́sì 26: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
