Jɛ́nɛ́sì 27
27
Áázè po Jékɔ̀ mana kɔ̃
1Ti ɓɛ́ Áázè ɖǎ ma nyɛ, ké ɔ ɖǎ ma dyéɖé kɔ̃in púù, ké ɔ ní dyé ma dyi ɖeɛɛ, ɔ ɖá ma Íìsɔ́ɔ̀ mɔ̀à ɔ nyíɔ́-dyùɔ̀ kɛ, ké ɔ ɖá, “Ní dyú.”
Ké Íìsɔ́ɔ̀ ɖá, “Dyòo.”
2Ké Áázè ɖá, “Dyéɛ kà ḿ ɖǎ nyɛ kɛ. Ḿ se ní mɛ́-wèɔ̀ dyí dyuò. 3Ɔ jèɛɛ, ní ɓaà m̀ ní, ɖú nì xwáɖáún-pàìn-ɖɛ̀ ɓě mɔ̀à nì sé kè nì pɔnɔɔ̀ kɛɛ dyí, ɓɛ́ m̀ ké xwáɖá xwíɖíi mu, ɓɛ́ m̀ ké ḿ bìì suaɖɛ̀ ɖáɓá, 4ɓɛ́ m̀ ké ḿ bìì ɖii-ɖɛ̀ ɖéé-ɖéé ɓɛ́ ḿ ɖɛ̀ɓɛ̀à múɛɛ pĩ, ɓɛ́ m̀ kéɛ ḿ gbo dyà, ɓɛ́ ḿ kéɛ ɖi, nìí ɓɛ́ ḿ ké m̀ mana kɔ̃ po, hwɛ̀ ɓɛ́ ḿ ké mɛ́.”
5Ti ɓɛ́ Áázè nì ma ɔ dyú-gàà Íìsɔ́ɔ̀ ɖɛ ɓěɛ̀ gbo cɛ̃iń nyɛɛ, Wìɖìbɛ́kɔ̀ nì ma ɖùǔ tòɛ̌n. Ɔ jèɛɛ, ti ɓɛ́ Íìsɔ́ɔ̀ mɛ̀ìn ma ɖé xwáɖáɔ̀ xwíɖíi suaɖɛ̀ɔ̀ dyi mɔ́uń wɛ̃ɛ, 6Wìɖìbɛ́kɔ̀ cɛ̃ɛ ma ɔ dyú Jékɔ̀ gbo, ké ɔ ɖá, “Tò ḿ gbo ɖùǔ. Ḿ wɔ̃́ɔ ké m̀ ɓǎ cɛ̃ɔ́ máa m̀ ɖíí-gàà Íìsɔ́ɔ̀ gbo, ké ɔ ɖá, 7‘Dyà ḿ suaɖɛ̀, ɓɛ́ m̀ ké ḿ bìì ɖii-ɖɛ̀ ɖéé-ɖéé ɖò pĩ, ɓɛ́ ḿ kéɛ ɖi, ɓɛ́ ḿ ké m̀ mana kɔ̃ po ɓó Bounɓoɔ̀ dyúa, hwɛ̀ ɓɛ́ ḿ ké mɛ́.’ 8Ɔ jèɛɛ, ní dyú, m̀ mɛ nyu ɖɛ ní muà m̀ gbo cɛ̃ìn nyɛ. 9Mu ɖé dɛ̀ nyúà-ɖɛ̀ ɓěɔ̀ nìà kɛ, ɓɛ́ m̀ ké ḿ wiɖi-dyù nɔ̀mɔ̀ kɔ̃in sɔ̃́ dyà, ɓɛ́ ḿ ké ɖii-ɖɛ̀ ɓɛ́ m̀ ɓǎ ɖɛ̀ɓɛ̀à múɛɛ ɔ bìì pĩ, 10ɓɛ́ m̀ kéɛ ɔ gbo kpa, ɓɛ́ ɔ kéɛ ɖi, nìí ɓɛ́ ɔ ké m̀ mana kɔ̃ po, hwɛ̀ ɓɛ́ ɔ ké mɛ́.”
11Kɛɛ Jékɔ̀ cɛ̃ɛ ma ɔ ɖe Wìɖìbɛ́kɔ̀ gbo, ké ɔ ɖá, “M̀ dyuòɛ̀ kà ḿ ɖíí-gàà Íìsɔ́ɔ̀ mɔ̀ mí-kpɔ̃-nyɔ̀, ké mɔ́ún mɔ̀ nyɔ kɔ̃̀ dyɔɔ̀-kù nì ɓɔ̀ɖɔ̀ɔ̀-ɓɔ̀ɖɔ̀ɔ̀ kɛ. 12Ɔ jǔ ké ḿ ɓǎ dyi ḿ bũ̌in ɓɛɛ̀ ní, nìí, ní mu nyɔ-cá-nyɔ̀ jǔùn ɖé ɔ gbo, ké ɖɛ nìà kɛ muɛ nyuùn ɓɛ́ ḿ ké ḿ mìɔùn hwòɛ̌-wùɖù kɔ̃ dyà, ké ɔ se mana jǔɛ mu.”
13Kɛɛ ɔ ɖe cɛ̃ɛ ma ɔ gbo, ké ɔ ɖá, “Hwòɛ̌-wùɖù kéɔ́ kà m̀ kɔ̃ dyiɛɛ mɛ dyi ḿ kɔ̃, ní dyú. M̀ mɛ nyu ní wuɖuɔ̀ pū. Mu, ɓɛ́ m̀ ké wa ḿ gbo dyà.” 14Ɔ jèɛɛ, ɔ mu, ké ɔ kpɔ̃ ma wa, ké ɔ dyà ma wa ɔ ɖe gbo. Ké ɔ ɖe pĩ ma ɖii-ɖɛ̀ ɓɛ́ ɔ ɓǎ ɖɛ̀ɓɛ̀ ma kà múɛ. 15Púɛɛ, Wìɖìbɛ́kɔ̀ ɖú ma Íìsɔ́ɔ̀ mɔ̀à ɔ nyíɔ́-dyùɔ̀ kɛɛ mú-po-ɖɔ̀ɔ̀ nyɔ kpa ɖɛ ɓɛ́ wa nì ma ɔ xwa kɛɛ dyí, ké ɔ poɛ ma Jékɔ̀ mɔ̀à ɔ dyú dyùwèɔ̀ kɛɛ mú. 16Ké ɔ po ma wiɖi-kùɖùùɔ̀ ɔ sɔ̃ ɓěɔ̀ kè ɔ bùnù ɓɔ̀ɖɔ̀ɔ̀-ɓɔ̀ɖɔ̀ɔ̀ bũ̌in. 17Hwɛ̀ ké ɔ ɖú ma cɔ́ɔ́ ɖéé-ɖééɔ̀ kè bɛɖɛɛ̀ ɓɛ́ ɔ nyu ma kà kɛɛ dyí, ké ɔ nyíɛ ma ɔ dyú Jékɔ̀ xwa.
18Púɛɛ, Jékɔ̀ kpaa ma ɔ ɓǎ gbo, ké ɔ ɖá, “Ḿ ɓǎ.”
Ké ɔ ɓǎ ɖá, “Dyòo, ní dyú. M̀ mɔ̀ nyɛ́ɛ̌?”
19Ké Jékɔ̀ jǔ ma ɔ ɓǎ gɔ̃̌, ké ɔ ɖá, “Mɔ̄ mɔ̀ nì nyíɔ́-dyù Íìsɔ́ɔ̀o. Ḿ ɖǎ ɖɛ m̀ cɛ̃ɔ́ má ḿ gboɛɛ nyuo. Ní ɓaà m̀ ní, sɔ̀ dyí, ɓɛ́ m̀ ké ní suaɖɛ̀ɔ̀ ɖò ɖi, ɓɛ́ m̀ ké ḿ mana kɔ̃ po.”
20Ké Áázè diè ma ɔ dyúɔ̀ dyi, ké ɔ ɖá, “Xwɛ̌ nyu ɓɛ́ m̀ dyià kà ɔ dyéɛń fṹà cá kɛ́, ní dyú?”
Ké ɔ ɖá, “Bounɓo mɔ̀à nì Gèɖèpɔ́ɔ̀ kɛɛ po ḿ mana dyúa.”
21Hwɛ̀ ké Áázè cɛ̃ɛ Jékɔ̀ gbo, ké ɔ ɖá, “Ní dyú, ní ɓaà m̀ ní, xwɛ̃́ìn ḿ bũ̌in, ɓɛ́ ḿ ké m̀ bũ̌in ɓɛɛ̀, ɓɛ́ ḿ kéɛ dyé kɛbì m̀ mɔ̀ ní dyú Íìsɔ́ɔ̀ jǎà jɛ́ɛ́ ní.” 22Ɔ jèɛɛ, Jékɔ̀ xwɛ̃́ìn ma ɔ ɓǎ Áázè bũ̌in, ké Áázè ɓɛɛ̀ ma ɔ bũ̌in, ké ɔ ɖá, “Wuɖuɔ̀ hwɔìn Jékɔ̀ɛ̀ wuɖu, kɛɛ sɔ̃ ɓěɛ̀ hwɔìn Íìsɔ́ɔ̀ sɔ̃.” 23Ɔ se ma ɔ dyí dyuò, sepóɛɖé ɔ sɔ̃ɔ̀ nì ma mí ɓáún-ɓáún bũ̌in kà ɔ ɖíí-gàà Íìsɔ́ɔ̀ sɔ̃ɔ̀ nì ma kà kɛ. Ɔ jèɛɛ, ɔ po ma ɔ mana kɔ̃. 24Kɛɛ ɔ ké ma ɔ mana kɔ̃ poɛɛ, ɔ diè ma ɔ dyi ɖe, ké ɔ ɖá, “Mɔ̀ mɔ̀ ní dyú-gàà Íìsɔ́ɔ̀ jǎà cáà?”
Ké Jékɔ̀ ɖá, “Ǹdye, ḿ mɔ̀ ɔ mɔ̀.”
25Hwɛ̀ ké Áázè ɖá, “Ní dyú, dyà ɖii-ɖɛ̀ɔ̀ nɔ̄ ḿ gbo, ɓɛ́ ḿ ké nì xwaún-sùàɖɛ̀ ɖi, nìí ɓɛ́ ḿ ké m̀ mana kɔ̃ po.” Ké ɔ dyàà ma ɔ gbo, ké ɔ ɖiɛ ma. Ké ɔ dyà ma ɔ wã́ìn ɖekè, ké ɔ náa ma. 26Hwɛ̀ ké ɔ ɓǎ Áázè cɛ̃ɛ ma ɔ gbo, ké ɔ ɖá, “Ní ɓaà m̀ ní, xwɛ̃́ìn ḿ bũ̌in, ɓɛ́ m̀ ké ní wɔ̃ nyá, ní dyú.” 27Ɔ jèɛɛ, ɔ xwɛ̃́ìn ma ɔ bũ̌in, ké ɔ nyá ma ɔ wɔ̃. Ké ti ɓɛ́ ɔ ɖǎ ma ɔ mú-po-ɖɔ̀ɔ̀ nyɔ́ wɔ̃́ɛɛ, ɔ po ma ɔ mana kɔ̃, ké ɔ ɖá,
“Dyéɛ kà xwáɖá ɓɛ́ Bounɓoɔ̀ ɖǎ mana kɔ̃ poɛɛ nyɔ́ dyi ní dyúɔ̀ múɛ.
28Gèɖèpɔ́ɔ̀ mɛ nyí m̀ kè nì xwíníín-dyù ɓě dunu ɔ kè ɓóɖóɔ̀ bã-bãɔ̀,
ɓɛ́ ɓěɛ̀ ɓáá-ɖɛ̀ ɓěɔ̀ ké dúún zaìn, ɓɛ́ ɓěɛ̀ wã́ìn ké dyí vòɛ̌n zi.
29Ɓóɖó-dù ɓě mu ɓě gbo nììn, ɓɛ́ nyɔ-dù kò-kò ɓě ké ɓě dyúa dú hwuɖu taɓa.
Ɓě mu ɓě ɖíí ɓě wuɖuí kɔ̃̀ùn, ɓɛ́ wa ké ɓě dyúa dú hwuɖu taɓa.
Hwòɛ̌-wùɖù mɛ nì nyɔ ɓě mu ɓě gboòùn wɛ̃ɛ kɔ̃,
ké mana mɛ nì nyɔ ɓě mu ɓě mana kɔ̃ poùn wɛ̃ɛ kɔ̃.”
Íìsɔ́ɔ̀ ɓaà Áázè ɓɛ́ ɔ ké ɔ mana kɔ̃ po ɖekè
30Ti ɓɛ́ Áázè hwɔ ma Jékɔ̀ mana kɔ̃ poɛ, ké Jékɔ̀ sí ma píé nyɛ̀nɛ̀ɛ̀ kɛɛ, púɛɛ, ɔ ɖíí-gàà Íìsɔ́ɔ̀ sɔ̀ ma xwáɖá xwíɖíi, ké ɔ dyi ma. 31Ké ɔ mɔ̀ùn pĩ ma ɖii-ɖɛ̀ ɖéé-ɖééɔ̀ ɖò ɖekè, ké ɔ kpaa ma ɔ ɓǎ gbo, ké ɔ ɖá, “Ḿ ɓǎ, sɔ̀ dyí, ɓɛ́ m̀ ké ní suaɖɛ̀ɔ̀ ɖò ɖi, ɓɛ́ m̀ ké ḿ mana kɔ̃ po.”
32Ké ɔ ɓǎ Áázè diè ma ɖɛi, ké ɔ ɖá, “M̀ mɔ̀ nyɛ́ɛ̌?”
Ké ɔ ɖá, “Mɔ̄ mɔ̀ Íìsɔ́ɔ̀ mɔ̀à nì nyíɔ́-dyùɔ̀ kɛe.”
33Púɛɛ, Áázèɛ̀ dyɔɔ̀ tɛɖɛ ma ɔ gbɔi mìɔ cá, ké ɔ ɖá, “Kē! Ɔ dyi ná nìǐn, nìí, nyɛ́ mɔ̀ nyɔ dyàɔ̌ kà ḿ suaɖɛ̀, ɓɛ́ ḿ dyiàà ɖi, ɓɛ́ ḿ dyià ɔ mana kɔ̃ po, hwɛ̀ ɓɛ́ m̀ dyià dyi kɛ́? Ké mana mu ɔ kɔ̃ nììn jǎào.”
34Ti ɓɛ́ Íìsɔ́ɔ̀ wɔ̃́ ma ɔ ɓǎà wuɖuɔ̀ kɛɛ, ɔ hwòɖǒ kpá ma ɖé ɖei mìɔ, ké ɔ po ma kpé ɖé wuɖu zoo mú. Ɔ cɛ̃ɛ ma ɔ ɓǎ gbo, ké ɔ ɖá, “Éé, ḿ ɓǎ, po mɔ́ún mana kɔ̃ ɖekè!”
35Kɛɛ Áázè ɖá, “Nì ɖíí-gààɔ̀ dyi gbá-gbá-kà, ké ɔ ɖǎ nì manaɔ̀ kpa.”
36Ké Íìsɔ́ɔ̀ ɖá, “Má, Jékɔ̀-nyɛ̀nɛ̀ɔ̀#27:36 Jékɔ̀-nyɛ̀nɛ̀ɔ̀ xwíníín mɔ̀ nyɔ-cá-nyɔ̀. kpɔ̃ ɔ níe? Sepóɛɖé ɔ nyuá ḿ cáìn-kpà sɔ̃́. Ɔ zà ma ní dúí-sè-ɖɛ̀ɔ̀ ḿ xwa, ké dyéɛ, ɓó kàǔn wɛ̃ɛ, ɔ ɖǎ ní manaɔ̀ kpa ɖekè. M̀ se mana ɖò dyi dè ɓó mɔ́ún bìì?”
37Kɛɛ Áázè jǔ ma ɔ gɔ̃̌, ké ɔ ɖá, “Gmɔ̀ nɔ̄, ḿ ɖǎ ɔ nì gbo-nì-ɓǎ mú nyu, ké ḿ ɖǎ ɔ ɖíí séín ɓěɔ̀ ɔ gbo-nì-nyɔ̀ mú nyu. Ké ḿ ɖǎ ɔ mana kɔ̃ po, ɓɛ́ ɔ ɓáá-ɖɛ̀ ké dúún zaìn, ɓɛ́ ɔ wã́ìn ké dyí vòɛ̌n zi. Ɖɛ́ ḿ ɓɛ́ìn mɔ̀ùn bìì nyuɛ ɖe kɛ́, ní dyú?”
38Ké Íìsɔ́ɔ̀ diè ma ɔ ɓǎ dyi ɖe, ké ɔ ɖá, “M̀ ɓéɖéɔ́ mana-kɔ̃-po-po dyúáɖò nyɛ̀nɛ̀ɛ̀ cáà, ḿ ɓǎ? Éé, ḿ ɓǎ, po wɛ́ɛ mɔ́ún mana kɔ̃ ɖekèe.” Ké Íìsɔ́ɔ̀ ɖú ma wuɖu dyií, ké ɔ po ma kpé ɖé wuɖu zoo mú ɖe.
39Hwɛ̀ ké ɔ ɓǎ Áázè jǔ ma ɔ gɔ̃̌, ké ɔ ɖá,
“Gmɔ̀ nɔ̄, ɓóɖóɔ̀ dɛ̀ se bãa kè dɛ̀ ɓɛ́ dunu se ɓuɖuɛɛ,
ɖéɛ̀ m̀ kè nì xwíníín-dyù ɓě mu cĩ́ìn.
40Ké ɓě mu cĩ́ìn dyììn ɖé ɓěɛ̀ gàsíà-dyèɖè mú.
Ké ɓě mu ɓěɛ̀ ɖíí-gàà ɓěɔ̀ xwíɖíi nììn.
Kɛɛ ti ɓɛ́ ɓě mu saùn wɛ̃ɛ, nìí, ɓě mu waà gɛ̀ɛ̀ɔ̀ ɓě mìɔùn ɖɔ zàùn.”
41Púɛɛ, Íìsɔ́ɔ̀ nyɛ́ ma Jékɔ̀ mú ɓó mana ɓɛ́ wa ɓǎ po ma kà ɔ kɔ̃ɛɛ jè. Ké Íìsɔ́ɔ̀ cɛ̃ɛ ma, ké ɔ ɖá, “Ḿ ɓǎà mɛ́-tìɔ̀ ɖǎ dyi xwɛ̃́ìn. Ti ḿ ɓǎà xwɛ́ jè mu dyi ziìn nyɛ̀nɛ̀ɛ̀ kɛɛ, nìí, ní mu ḿ ɖíí-gàà Jékɔ̀ ɖáɓáùn.”
42Ti ɓɛ́ Wìɖìbɛ́kɔ̀ wɔ̃́ ma ɔ nyíɔ́-dyù mɔ̀à Íìsɔ́ɔ̀ kɛɛ wuɖuɔ̀ kɛɛ, ɔ ɖá ma nyɔ dyùwè mɔ̀à Jékɔ̀ kɛ. Ké ɔ cɛ̃ɛ Jékɔ̀ gbo, ké ɔ ɖá, “Tò ɖùǔ, Íìsɔ́ɔ̀ mɔ́ m̀ ɖáɓáa dyi. 43Ɔ jèɛɛ, ní dyú, wɔ̃́ ɖɛ ní muà m̀ gbo cɛ̃ìn nyɛɛ múin. Kpá xwáɖáún, ɓɛ́ m̀ ké ɖé Háwàɖàùn-hwɔ̀ɖɔ̀ɔ̀ mú mu ɖé ḿ ɖíí-gàà Ɖéɓɛ̀ìn gbo, 44ɓɛ́ m̀ ké ɖé ɔ gbo ti wè nyu, ɓɛ́ m̀ ɖíí-gààɔ̀ dyoɖo-hwòɖòɔ̀ ké wáɖá hwɛ̀. 45Ti ɓɛ́ nì ɖíí-gààɔ̀ dyoɖo-hwòɖòɔ̀ mu wáɖáùn ɓó m̀ gbo, ɓɛ́ ɖɛ m̀ nyuà ɔ bũ̌ɛɛ ké ɔ hwìɖǐi hwɛ̀ɛ, nìí, ní mu m̀ ɖe ɖáùn. Ɖɛ́ kɔ̃̀ jè ɓě sɔ̃́ɔ̀ kéà ḿ xwa sɔ̀ ɓó wé dyúáɖò múɛ́?”
Áázè tò Jékɔ̀ ɖé Ɖéɓɛ̀ìn gbo
46Hwɛ̀ ké Wìɖìbɛ́kɔ̀ cɛ̃ɛ ma Áázè gbo, ké ɔ ɖá, “Ḿ ɖǎ Hítì-màà-dyù ɓěɛ̀ jè dyí sa.#27:46 Gmɔ̀ ɖé Jɛ́nɛ́sì 26:34-35 mú. Ɔ jǔ ké Jékɔ̀ mɔ̀ùn dyi nyɔ́nɔ́ ɖò nɔ̄ ɓóɖóɛ̀ dyú-màà ɓě mɔ̀à Hítì-nyɔ̀ ɓěɛɛ hwìɛ̀ zà ɖekè ní, nìí, ɖɛ́ mɔ̀ kpáná ɖò mu ní cĩ́-cĩ́ɔ̀ mú nììn nyɛ́?”
Currently Selected:
Jɛ́nɛ́sì 27: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
