Jɛ́nɛ́sì 4
4
Áɖɔ̀ùn kè Íìɛ̀ dyú kĩ́ín-kĩ́ín ɓěɔ̀
1Hwɛ̀ ké Áɖɔ̀ùn kè ɔ gmàà Íì nì ma ɓó da, ké Íì nì ma zùù kɔ̃. Ké ɔ wóɖóìn ma gàa-dyù ɖò, ké ɔ jǔìn ma ɔ Kĩ́ìn-nyɛ̀nɛ̀ kɔ̃̀ xwíníín mɔ̀à Gèɖèpɔ́ɔ̀ tòɛ̀ kɛ, sepóɛɖé ɔ ɖá, “Bounɓoɔ̀ ɖǎ ḿ gàa-dyù ɖò nyí.” 2Sɔ̀ìn ɓóɛ gboɛɛ, ɔ wóɖóìn ma Kĩ́ìn ɖíí-gàà Éɓò. Éɓò mɔ̀ ma ɓáɖáá-po-nyɔ̀, kɛɛ Kĩ́ìn mɔ̀ ma geɖe-nyu-nyɔ̀.
3Wé ɖòɛ̀ ɓaɖaa, Kĩ́ìn dyà ma sáa-zàìn-ɖɛ̀ ɖò Bounɓoɔ̀ gbo. Ɔ mɔ̀ ma ɖɛ sɔ̀ ma ɖé ɔ geɖeɔ̀ gboɛɛ ɖíɛ́ ɓě. 4Kɛɛ Éɓò mɔ̀ùn dyà ma ɔ ɓáɖááɔ̀ nyíɔ́-dyù ɓěɔ̀ nyɔ kpa ɖɛ ɖíɛ́ ɓě Bounɓoɔ̀ gbo. Ké Bounɓoɔ̀ kpɔ̃ ma Éɓò nììn sáa-zàìn-ɖɛ̀ɔ̀ dyi, 5kɛɛ ɔ ɓɔ́ ma Kĩ́ìn nììn sáa-zàìn-ɖɛ̀ɔ̀ ní. Ɔ jèɛɛ, Kĩ́ìn kpá ma dyoɖoún mìɔ, ké ɔ ɖáɓá ma dyúa. 6Hwɛ̀ ké Bounɓoɔ̀ diè ma ɔ dyi, ké ɔ ɖá, “Ɖɛ́ kɔ̃̀ jè m̀ ɖáɓáà dyúa kɛ́? Ɖɛ́ poà m̀ dyoɖoún wɛ̃́? 7Má, m̀ dyi ɖɛín-ɖɛ̀ nyuín, nì mu múàǔn kpáùne? Kɛɛ m̀ se ɖɛín-ɖɛ̀ nyuín, gmɔ̀ nɔ̄, nàmàǔn gbìɖǐ ɓó nì gbǒɔ̀ wĩín, ké ɔ mɔ́ ɓɛ́ ɔ ké m̀ wuɖuí kɔ̃̀, kɛɛ m̀ mɛ ɖuɛ toún.”
8Wé ɖòɛ̀ ɓaɖaa, Kĩ́ìn cɛ̃ɛ ma ɔ ɖíí-gàà Éɓò gbo, ké ɔ ɖá, “Dyi, ɓɛ́ à ké xwáɖá xwíɖíi mu.” Ti wa nì ma ɖé xwáɖáɔ̀ xwíɖíiɛɛ, púɛɛ, Kĩ́ìn sɔ̀ ma dyí, ké ɔ ɖáɓá ma ɔ ɖíí-gàà Éɓò.
9Hwɛ̀ ké Bounɓoɔ̀ diè ma ɔ dyi, ké ɔ ɖá, “Dɛ̌ nì ɖíí-gàà Éɓò nì kɛ́?”
Ké Kĩ́ìn jǔ ma ɔ gɔ̃̌, ké ɔ ɖá, “Ḿ se dyuò. Mɔ̄ mɔ̀ ní ɖíí-gààɔ̀ dyí-gmɔ̀-nyɔ̀ɔ̀?”
10Hwɛ̀ ké Bounɓoɔ̀ ɖá, “Ɖɛ́ mɔ̀ ɖɛ m̀ nyuà kɛɛ xwíníín nyɛ́? Gmɔ̀ nɔ̄, ḿ ɖǎ nì ɖíí-gààɔ̀ nyɔmɔɔ̀ dyé ɖé ɓóɖóɔ̀ kɔ̃, ké ɔ nì kà nyɔ nìà kpé poɛń nyɛɛ nɔ̄ ḿ gbo, ké ɔ ɖǎ m̀ zaa kpɔ̃̀ìn. 11Ɔ jèɛɛ, sɔ̀ìn ɓó zɛ̃̌ɛ̀ gboɛɛ, hwòɛ̌-wùɖù nì m̀ kɔ̃. Nì ɓáá-ɖɛ̀ ɖò se mú wóɖóɛ mu ɖe ɓó ɓóɖó kɔ̃̀ mú ɓɛ́ nì ɖíí-gàà nyɔmɔɔ sɔ̀à ɖé m̀ xwaún wɛ̃ɛ dèàìn nyɛɛ kɔ̃. 12Ti nì mu ɓóɖóɔ̀ kɔ̃ ɖɛ ɓáùn wɛ̃ɛ, ɖɛ ɖò se ɓó mú wóɖóɛ mu ɖe ɓó m̀ bìì. Ɔ jèɛɛ, nì muá dyi-té-nyɔ̀ kè ɓee-ɓee-nyɔ̀ jǔùn ɖé ɓóɖó-kpàɔ̀ kɔ̃.”
13Hwɛ̀ ké Kĩ́ìn cɛ̃ɛ ma Bounɓoɔ̀ gbo, ké ɔ ɖá, “Aké, ní gǎ-dyé-dyéɔ̀ ɓúá kpéín mìɔo. Ḿ seɛ xwa ɓɛ́ìn. 14Dyéɛ, sɔ̀ìn ɓó zɛ̃̌ɛ̀ gboɛɛ, m̀ nìǎ ḿ pá kɔ̃̀ kɔ̃ ɓɛ́ ɓáá-ɖɛ̀ wóɖó múɛɛ dyi kúmúɛń, ɔ kè sɔ̀ìn ɓó m̀ dyúa. Ké ní muá dyi-té-nyɔ̀ kè ɓee-ɓee-nyɔ̀ jǔùn ɓóɖó-kpàà kɔ̃, ké nyɔ séín mu ḿ dyéìn nyɛɛ, wa mu ḿ ɖáɓáa mɔ́ùn.”
15Kɛɛ Bounɓoɔ̀ jǔ ma ɔ gɔ̃̌, ké ɔ ɖá, “Ɔ se ná nì. Ɔ jǔ ké nyɔ ɖò dyi m̀ ɖáɓá ní, nìí, ní mu ɔ kpa-kɔ̃in-zàìn-kpà mɛ̀nɛ̌ìn-sɔ̃́ bũ̌ nyuùn.” Hwɛ̀ ké Bounɓoɔ̀ po ma dyí-dyuòìn-bɛ̃̀ ɖò ɔ kɔ̃, nìí, ɓɛ́ nyɔ séín mu ɔ dyéìn nyɛɛ ní kɔ̃̀ ɖà ɔ ɖáɓá. 16Ké Kĩ́ìn sɔ̀ ma ɓó Bounɓoɔ̀ dyúa, ké ɔ mu, ké ɔ cĩ́ ma ɖé Nɔ́ɖì-ɓòɖò#4:16 Nɔ́ɖì-nyɛ̀nɛ̀ɔ̀ xwíníín mɔ̀ ɓee-ɓee-ɓòɖò. hwɔà ɖé Ídɛ̃̀ìn-pàɔ̀ dyóɖó-xwáɖáún-wóɖóìn-naínɔ̀ dyíɛɛ mú.
17Hwɛ̀ ké Kĩ́ìn kè ɔ gmààɔ̀ nì ma ɓó da, ké ɔ gmààɔ̀ nì ma zùù kɔ̃. Ké ɔ wóɖóìn ma gàa-dyù ɖò, ké wa ɖáìn ma ɔ Ínɔ̀. Hwɛ̀ ké Kĩ́ìn dè ma hwɔɖɔ ɖò, ké hwɔɖɔɔ̀ mùìn ma ɔ dyú-gàà Ínɔ̀ nyɛ́nɛ́ín. 18Ké Ínɔ̀ wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Íwàɖà kɛ. Ké Íwàɖà wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Mɛ́hùjáè kɛ. Ké Mɛ́hùjáè wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Mɛ́fùsáè kɛ. Ké Mɛ́fùsáè wóɖóìn ma gàa-dyù ɖò kɔ̃̀ nyɛ́nɛ́ mɔ̀ ma Ɖémɛ̀ kɛ. 19Ké Ɖémɛ̀ kpɔ̃ ma nyɔ́nɔ́ sɔ̃́ dyi. Ɖòɛ̀ nyɛ́nɛ́ mɔ̀ ma Áɖà, ké ɖòɛ̀ nyɛ́nɛ́ mɔ̀ ma Zíɖà. 20Áɖà wóɖóìn ma Jáɓà. Ɔ mɔ̀ nyɔ ɓě ɓɛ́ wa cĩ́ jàɖàìn-gbò ɓě mú, ké wa mɔ̀ nyúà-ɖɛ̀-po-nyɔ̀ ɓě kɛɛ ɓǎ. 21Ké ɔ ɖíí-gàà nyɛ́nɛ́ mɔ̀ ma Júɓàò. Ɔ mɔ̀ nyɔ ɓě mɔ̀ gbǎɖí kè hwǒ-kùǐ-ɓaɖa-nyɔ̀ ɓě kɛɛ ɓǎ. 22Ké Zíɖà wóɖóìn ma gàa-dyù ɖò ɖekè. Ɔ nyɛ́nɛ́ mɔ̀ ma Túɓàò-Kĩ́ìn. Ɔ mɔ̀ ma ɓé-pa-nyɔ̀ ɓɛ́ ɔ ɓaɖa bàɖàsǐ kè nɛɛ̀-kpà ɓě ɖɛ kò-kò múɛ. Ɔ ɖíí-màà nyɛ́nɛ́ mɔ̀ ma Náámà.
23Wé ɖòɛ̀ ɓaɖaa, Ɖémɛ̀ cɛ̃ɛ ma ɔ gmàà ɓěɔ̀ gbo, ké ɔ ɖá,
“Áɖà kè Zíɖà, ɓě mɔ̀à ní gmàà ɓěɛɛ, ɓě tò ḿ gbo ɖùǔo.
Ɓě wɔ̃́ ní wuɖuɔ̀o.
Ḿ ɖǎ gàa-dyù gmɔ̀ ɖò ɖáɓá.
Ḿ ɖáɓá ɔ, sepóɛɖé ɔ poà ḿ bũ̌in jè.
24Ɔ jǔ ké Gèɖèpɔ́ɔ̀ dyi Kĩ́ìn bìì kpa zàǎ mu ɓó kpa mɛ̀nɛ̌ìn-sɔ̃́ ní,
mɔ̄, Ɖémɛ̀ nà kɛ, mu kpa-zàìn-kpà kpáɖá-nyɔ tã ɓaɖa-bùè sè mɛ̀nɛ̌ìn-sɔ̃́ nyuùn.”
25Hwɛ̀ ɓɛ́ ɖɛ ɓěa ké ma kpáa, Áɖɔ̀ùn kè ɔ gmàà Íì nì ma ɓó da ɖe, ké Íì wóɖóìn ma gàa-dyù ɖò. Ké ɔ jǔìn ma ɔ Sɛ́ɛ̀-nyɛ̀nɛ̀ kɔ̃̀ xwíníín mɔ̀à nyíí-ɖɛ̀ kɛ, sepóɛɖé ɔ ɖá, “Gèɖèpɔ́ɔ̀ ɖǎ ḿ dyú ɖò nyí ɖe ɓó Éɓò ɓɛ́ Kĩ́ìn ɖáɓá ma kà kɛɛ bɛ̃̌ǐn.” 26Ké Sɛ́ɛ̀ wóɖóìn ma gàa-dyù ɖò, ké ɔ ɖáìn ma ɔ Ínɔ́sì. Ɓó tia ɓaɖaa, nyɔǔn-dyù dè ma dyí poɛ̀n gbɔ ɓó Bounɓoɔ̀ ɓiè jè.
Currently Selected:
Jɛ́nɛ́sì 4: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
