Jɛ́nɛ́sì 7
7
1Hwɛ̀ ké Bounɓoɔ̀ cɛ̃ɛ ma Nóà gbo ɖe, ké ɔ ɖá, “M̀ kè nì gbǒ-xwíníín-nyɔ̀ séín ɓěɔ̀ mɛ dyá ɖé méèɔ̀ mú, sepóɛɖé ḿ ɖǎa dyé kà mɔ̀ mɔ̀ dyí-sɛ́ɖɛ́ìn-nyɔ̀ ɖé nyɔ ɓě nì cĩ́ɛń ɓó kàǔn wɛ̃ɛ hwìɛ̀ kɛ. 2M̀ mɛ kpa nimiiɔ̀ nyɔ ɓě ɓɛ́ ḿ ɖá wa nɔ̀mɔ̀ dyíin ɓó sáa zàìn jè kè ɖi jèɛɛ dú mɛ̀nɛ̌ìn-sɔ̃́-mɛ̀nɛ̌ìn-sɔ̃́, wa nyɔ́nɔ́ kèɛ̀ ɓíɔ́, ké nimiiɔ̀ nyɔ ɓě ɓɛ́ ḿ ɖá wa se dyíin nɔ̀mɔ̀ ɓó sáa zàìn jè kè ɖi jèɛɛ, m̀ mɛ kpa wa sɔ̃́-sɔ̃́, wa nyɔ́nɔ́ kèɛ̀ ɓíɔ́, 3ké m̀ mɛ kpa naàɔ̀ nyɔ ɓě ɓɛ́ ḿ ɖá wa nɔ̀mɔ̀ dyíin nyɛɛ dú mɛ̀nɛ̌ìn-sɔ̃́-mɛ̀nɛ̌ìn-sɔ̃́ ɖekè, wa nyɔ́nɔ́ kèɛ̀ ɓíɔ́. M̀ mɛ nyuɛ náa, ɓɛ́ wa xwéɖé ní kɔ̃̀ ɖà níɔ wáɖá ɖé ɓóɖó-kpàɔ̀ kɔ̃. 4Sepóɛɖé wé mɛ̀nɛ̌ìn-sɔ̃́ sèǎ ɓó, ɓɛ́ ḿ kéɛ nyu ɓɛ́ ní ké ɖaɓa ɖé ɓóɖó-kpàɔ̀ kɔ̃ ɓó dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́ mú, ɓɛ́ ḿ ké ɖɛ séín ɓéɖé fɛ̀ɛ̀ ɓɛ́ ḿ ɖǎ mɛ kɛɛ ɓóɖó-kpàɔ̀ kɔ̃ dyi sámá.” 5Ké Nóà nyu ma ɖɛ séín ɓɛ́ Bounɓoɔ̀ cɛ̃ ma ɔ gboɛ.
6Ti ɓɛ́ Nóà nyu ma zɔ̃ hɔ̃dɛ̀ɖɛ̀ mɛ̀nɛ̌ìn-ɖò kɛɛ mɔ̀ ti ní-tòɔ̀ dyi ma ɓóɖó-kpàɔ̀ kɔ̃. 7Ké Nóà kè ɔ gmààɔ̀ kè ɔ dyú-gàà ɓěɔ̀ kè wa nììn gmàà ɓěɔ̀ dyá ma ɖé méèɔ̀ mú, ɓɛ́ wa ké ma ní-tòɔ̀ xwaún pó. 8Ké Nóà dyáìn ma nimii nɔ̀mɔ̀ dyíin ɓěɔ̀ kè nimii se dyíin nɔ̀mɔ̀ ɓěɔ̀ kè naà ɓěɔ̀ ɔ kè ɓíɖíi-dyi-nà-ɖɛ̀ séín ɓěɔ̀. 9Ɔ kpa ma wa nyɔ́nɔ́ kè ɓíɔ́ ɖé méèɔ̀ mú kà Gèɖèpɔ́ɔ̀ nyuɛ ma kà ɔ gbo cɛ̃ɛ kɛ. 10Sɔ̀ìn ɓó ti ɓɛ́ Nóà ɖǎ ma méèɔ̀ mú dyáa gboɛɛ, wé mɛ̀nɛ̌ìn-sɔ̃́ zi ma, hwɛ̀ ké ní-tòɔ̀ dyi ma ɓóɖó-kpàɔ̀ kɔ̃.
11Ɓó Nóà zɔ̃ hɔ̃dɛ̀ɖɛ̀ mɛ̀nɛ̌ìn-ɖò nììnɔ̀ dɛ̀nɛ̀ sɔ̃́ nììnɔ̀ wé ɓaɖa-bùè sè mɛ̀nɛ̌ìn-sɔ̃́ nììnɔ̀ ɓaɖaa, ní-dù séín ɓěɔ̀ gè ma wɔ̃, ké dyɔɔ̀ kaà ma wɔ̃. 12Ké níɔ̀ ɖaɓa ma ɓóɖó-kpàɔ̀ kɔ̃ ɓó dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́ xwíníín. 13Ɓó tia ɓaɖaa, Nóà kè ɔ gmààɔ̀ kè ɔ dyú-gàà ɓě mɔ̀à Cɛ̃́ìn kè Hɛ̃́ìn kè Jéfɛ̀ kɛ kè wa nììn gmàà ɓěɔ̀ dyá ma ɖé méèɔ̀ mú. 14Ké Nóà kpa ma ɖɛ séín ɓéɖé fɛ̀ɛ̀ mɔ̀à nimii kè ɓíɖíi-dyi-nà-ɖɛ̀ kè naà kɛɛ dú kò-kò séín ɖé méèɔ̀ mú. 15Ɔ kpa ma wa sɔ̃́-sɔ̃́. 16Ɖɛ séín ɓéɖé fɛ̀ɛ̀ ɓɛ́ ɔ kpa ma kà ɖé méèɔ̀ múɛɛ mɔ̀ ma nyɔ́nɔ́ kè ɓíɔ́. Ɔ nyu ma ɖɛ séín ɓěɔ̀ kà Gèɖèpɔ́ɔ̀ nyuɛ ma kà ɔ gbo cɛ̃ɛ kɛ. Hwɛ̀ ké Bounɓoɔ̀ kã ma méèɔ̀ gbǒ-wɔ̃̀ɔ̀. 17Ké níɔ̀ gã̀ ma ɖaɓauń dyi tee ɓó wé kpáɖá-nyɔ sɔ̃́ mú, ké níɔ̀ nì ma dyáuń. Ké ɔ ɖú ma méèɔ̀ dyií, ké ɔ fúɖú ma níɔ̀ kɔ̃in. 18Ké níɔ̀ nì ma kɔ̃ kpáuń kánáá pū ɓóɖó-kpàɔ̀ kɔ̃. Ké méèɔ̀ fúɖú ma níɔ̀ kɔ̃in, ti ɓɛ́ níɔ̀ nì ma mú tɔ̀mɔ̀ǔn wɛ̃. 19Ké níɔ̀ gã̀ ma dyáuń dyi tee, ké ɔ mana ma toɖo vɛ̀nɛ̀ séín ɓě nì ma ɓóɖó-kpàɔ̀ kɔ̃ɛ. 20Níɔ̀ mú-tɔ̀mɔ̀-tɔ̀mɔ̀ɔ̀ mɔ̀ ma ɓáɖáa tã kè ɓɛ́ìn-hwìɛ̀ ɖé toɖo vɛ̀nɛ̀ ɓěɔ̀ kɔ̃in. 21Ké ɖɛ séín ɓéɖé fɛ̀ɛ̀ ɓóɖó-kpàɔ̀ kɔ̃ mɔ̀à naà kè nyúà-ɖɛ̀ kè xwáɖá-xwíɖíi-nìmìì kè ɓíɖíi-dyi-nà-ɖɛ̀ kè nyɔǔn wɛ̃ɛ mɛ́ ma nyɛ̀nɛ̀ɛ̀. 22Ɖɛ kã̀ìn séín ɓéɖé fɛ̀ɛ̀ ɓɛ́ wa nì ma ɓóɖó-kpà dyɛ-dyɛɔ̀ kɔ̃ɛɛ mɛ́ ma nyɛ̀nɛ̀ɛ̀. 23Kǎà Gèɖèpɔ́ɔ̀ nyu ma ɖɛ séín cĩ́ ma ɓóɖó-kpàɔ̀ kɔ̃ mɔ̀à nyɔǔn kè nimii kè ɓíɖíi-dyi-nà-ɖɛ̀ kè naà ɓěɔ̀ kɛɛ ɓóɖó-kpàɔ̀ kɔ̃ dyi sámáa. Nóà kè nyɔ ɓě nì ma ɖé ɔ gbo méèɔ̀ múɛɛ ɖòùn kɔ̃̀ fɛ̀ɛ̀ pó ma. 24Níɔ̀ dyíìn ma ɓóɖó-kpàɔ̀ kɔ̃in ɓó wé hɔ̃dɛ̀ɖɛ̀ ɖò kè kpáɖá-nyɔ sɔ̃́ ɓaɖa-bùè xwíníín.
Currently Selected:
Jɛ́nɛ́sì 7: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
