Ɖúù 14
14
Jízɛ̀ kánáìn gàa ɖò dyi
1Ɓó Gèɖèpɔ́ɔ̀ fɔ̀-wè ɖò ɓaɖaa, Jízɛ̀ mu ma ɖé Fáɖòsíì-nyɔ̀ ɓěɔ̀ nyɔ vɛ̀nɛ̀ ɓěɔ̀ ɖò ɓíɖí-taún, ɓɛ́ ɔ ké ma ɖɛ ɖi. Nyɔ ɓěɔ̀ nì ma Jízɛ̀ dyéɖé gbo dèɛ̌n. 2Gàa ɖò nì ma ɖé. Ɔ sɔ̃ ɓěɔ̀ kè ɔ ɓo ɓěɔ̀ bũ̌ ma ní. 3Jízɛ̀ diè ma nyɔ-gma-tɛ̀mɛ̀ìn-nyɔ̀ ɓěɔ̀ kè Fáɖòsíì-nyɔ̀ ɓěɔ̀ dyi, ké ɔ ɖá, “Ɔ nɔ̀mɔ̀ dyíin ɓɛ́ nyɔǔn ké nyɔ ɖò dyi kánáìn ɓó Gèɖèpɔ́ɔ̀ fɔ̀-wèɔ̀ ɓaɖaà, mɔɔ ɔ se dyíin nɔ̀mɔ̀ɔ̀?”
4Kɛɛ wa se ma ɖé wuɖu zà. Ké Jízɛ̀ kpɔ̃ ma gàaɔ̀, ké ɔ kánáìn ma ɔ dyi, ké ɔ tò ma ɔ ɔ ɓíɖí. 5Ké ɔ cɛ̃ɛ ma wa gbo, ké ɔ ɖá, “Ɔ jǔ ké ɓěɛ̀ nyɔ ɖò dyi dyú-gàà ɖò mɔɔ ɓìɖǐ ɖò ɓéɖé, ké ɔ dyi ní-ɓì ɖò mú kpá ɓó Gèɖèpɔ́ɔ̀ fɔ̀-wèɔ̀ ɓaɖa ní, nìí, ɔ se ɔ ɖé zàǎ mu wàɖà ɓó Gèɖèpɔ́ɔ̀ fɔ̀-wèɔ̀ ɓaɖaà?”
6Ké wa se ma ɖé wuɖu zàà ɓɛ́ìn.
Nyɔ-mìɔùn-ɓíɖíi-dyà-dyà kè ɖéè jè dyi-kpɔ̃-kpɔ̃
7Ké Jízɛ̀ dyéɛ ma kà ɖéè ɓěɔ̀ nì ma kò-naín kpa ɖɛ ɓěɔ̀ gãuń wɛ̃. Ɔ jèɛɛ, ɔ po ma wa nɔ́ɔ́ nìà kɛ gbo, ké ɔ ɖá, 8“Nyɔ ɖò dyi m̀ nyɔ́nɔ́-dyi-kpɔ̃-hwɔ̀ ɖò kɔ̃ ɖáín, nìí, m̀ mɛ ɓɔ́ kò-naín kpa ɖɛɔ̀ dyi kòɛ̀. Ti ɖòɛ̀ ɓaɖaín, wa ɖá nyɔ kpa ɖɛ ɖò ké ɔ zi mɔ̀ùn dyíɛɛ ɖé ɖekè. 9Ké nyɔ ɓɛ́ ɔ ɖá ma kà ɓě sɔ̃́ɔ̀ kɛɛ mu m̀ gbo dyiìn, ké ɔ mu níiń, ‘Nyí gàa nìà kɛ páɔ̀.’ Ké dɛ̃ mu m̀ nyuùn, ké nì mu pá se ɖɛ kpa ɖò dyí ɖúùn. 10Kɛɛ ɔ jǔ ké wa dyi m̀ ɖáín, nìí, mu, ɓɛ́ m̀ ké pá se ɖɛ kpaɔ̀ mú kò, ɓɛ́ nyɔ ɖáà m̀ wɛ̃ɛ ké m̀ gbo dyi, ɓɛ́ ɔ ké níiń, ‘Ḿ ɓǎto, dyi nɔ̄ dà nɔ̀mɔ̀ dyíin nìà kɛ.’ Kǎà ɔ mu m̀ dya dèɛ̀ nyuùn ɖé nyɔ séín ɓě ɓɛ́ wa nìà ɓó kɛɛ dyúa. 11Sepóɛɖé nyɔǔn séín ɓě ɓɛ́ wa ɓúáìn wa mìɔùn dyíɛɛ, wa mu wa ɓíɖíi dyàùn, ké nyɔǔn séín ɓě ɓɛ́ wa dyà wa mìɔùn ɓíɖíiɛɛ, wa mu wa dyií ɖúùn.”
12Ké Jízɛ̀ cɛ̃ɛ ma gàa ɓɛ́ ɔ ɖá ma ɔ hwɔɔ̀ kɔ̃ɛɛ gbo, ké ɔ ɖá, “Ɔ jǔ ké m̀ dyi hwɔ vɛ̀nɛ̀ ɖò pĩ, ké m̀ dyiɔ́ nyɔ ɖò ɖáa mɔ́ ní, nìí, mɔ̀ǔn ɖá ɓɛ́ m̀ ké m̀ ɓǎto ɓě mɔɔ m̀ ɖíí-gàà ɓě mɔɔ nì nyɔ ɓě mɔɔ nì mǔè bã-bã ɓě ɖá. Sepóɛɖé wa mu mɔ̀ùn ɖáùn ɖe, ké ɖɛ m̀ nyuà kɛɛ, nì mu ɔ pɛ́ɛ̀-ɖɛ̀ ɖe dyéìn ɖe. 13Kɛɛ ɔ jǔ ké m̀ dyi hwɔ pa ní, nìí, m̀ mɛ ɖá gǎ-dyé-nyɔ̀ ɓě kè nyɔ ɓě ɓɛ́ wa kɔ́ɖɔ́ kɛ ɔ kè dyéɖéín-dyi-kpè-nyɔ̀ ɓě. 14Ké mana mu m̀ kɔ̃ nììn, sepóɛɖé wa se m̀ ɖɛ ɓěɔ̀ ɖò ɖe nyíɛ ɓɛ́ìn ɖe. Ti ɓɛ́ dyí-sɛ́ɖɛ́ìn-nyɔ̀ ɓěɔ̀ mu gĩɔ wóɖóùn wɛ̃ɛ, Gèɖèpɔ́ɔ̀ mu m̀ pɛ́ɛ̀ìn.”
Nɔ́ɔ́ ɓá hwɔ vɛ̀nɛ̀ ɖò jè dyíɛ
(Máfíò 22:1-10)
15Ti ɓɛ́ nyɔ ɓě kò ma téɓèɖèɔ̀ gbɔiɛɛ dyúáɖò wɔ̃́ ma ɖɛa kɛɛ, ɔ cɛ̃ɛ ma Jízɛ̀ gbo, ké ɔ ɖá, “Mana nì nyɔ ɓě ɓɛ́ wa mu ɖé Gèɖèpɔ́ɔ̀ kã́á-ɓòɖòɔ̀ mú téɓèɖèɔ̀ gbɔi kòùn wɛ̃ɛ kɔ̃.”
16Ké Jízɛ̀ cɛ̃ɛ ma ɔ gbo, ké ɔ ɖá, “Gàa ɖò nì ma ɓó, ké ɔ pa ma hwɔ vɛ̀nɛ̀ ɖò, ké ɔ ɖá ma nyɔ ɓáún-ɓáún. 17Ti ɓɛ́ hwɔɔ̀ ti nyini ma ɓóɛɛ, gàaɔ̀ ɖoɓo ma ɔ gbo-nì-nyɔ̀ ɖò, ɓɛ́ ɔ kéɛ nyɔ ɓě ɓɛ́ ɔ ɖá ma kà kɛɛ gbo cɛ̃, ɓɛ́ ɔ ké níiń, ‘Ɓě dyi. Ɖɛ séín ɖǎ ti dyé.’ 18Kɛɛ wa séín ɖú ma kã̀fĩ́á tò kpàǐ ɖò-ɖò. Nyɔ kĩ́ín-kĩ́ínɔ̀ cɛ̃ɛ ma gbo-nì-nyɔ̀ɔ̀ gbo, ké ɔ ɖá, ‘Ḿ kpá wìǐn kà ɓɛ́ ḿ se dyiɛ ɓɛ́ìn nyɛ, sepóɛɖé ḿ dɔ̃ ma pá ɖò, ké ḿ ɓéɖé ɓɛ́ ḿ ké mu, ɓɛ́ ḿ ké páɔ̀ dyé.’ 19Ɖò mɔ̀ùn ɖá, ‘Ḿ kpá wìǐn kà ɓɛ́ ḿ se dyiɛ ɓɛ́ìn nyɛ, sepóɛɖé ḿ dɔ̃ ma ɓìɖǐ ɓaɖa-bùè, ké ḿ nì muɛń, ɓɛ́ ḿ ké wa bũ̌in gmɔìn.’ 20Ké ɖò mɔ̀ùn ɖá, ‘Ḿ kpɔ̃ nyɔ́nɔ́ dyi kàà-ɖɛ̀ǐn. Ɔ jèɛɛ, ḿ se dyiɛ ɓɛ́ìn.’ 21Ɔ jèɛɛ, gbo-nì-nyɔ̀ɔ̀ mu ma ɖe, ké ɔ zaìn ma ɖɛ séín ɓěɔ̀ ɔ gbo-nì-ɓǎɔ̀ gbo kɔ̃in. Ké ɔ gbo-nì-ɓǎɔ̀ kpá ma dyoɖoún, ké ɔ cɛ̃ɛ ma ɔ gbo-nì-nyɔ̀ɔ̀ gbo, ké ɔ ɖá, ‘Mu ɖé hwɔɖɔɔ̀ gboi hwìè vɛ̀nɛ̀-vɛ̀nɛ̀ ɓěɔ̀ kè hwìè-dyù ɓěɔ̀ xwíníín wàɖà, ɓɛ́ m̀ ké gǎ-dyé-nyɔ̀ ɓě kè kɔ́ɖɔ́-nyɔ̀ ɓě ɔ kè dyéɖéín-dyi-kpè-nyɔ̀ ɓě dyà.’ 22Ké gbo-nì-nyɔ̀ɔ̀ ɖá, ‘Ɓɔ̌ɔ̀, ḿ ɖǎ ɖɛ kɔ̃̀ jè m̀ cɛ̃ ma ḿ gboɛɛ nyu, kɛɛ pá nì hwɔɛ̀ kɔ̃ ke.’ 23Ké ɔ gbo-nì-ɓǎɔ̀ cɛ̃ɛ ma ɔ gbo, ké ɔ ɖá, ‘Mu hwìè vɛ̀nɛ̀ ɓě kè hwìè-dyù ɓě nì hwɔɖɔ ɓěɔ̀ pṹa dyiɛɛ xwíníín, ɓɛ́ m̀ kéɛ nyu ɓɛ́ nyɔ ɓě ké dyi, ɓɛ́ ní gbǒɔ̀ ké dyí. 24Ḿ cɛ̃ɛ ɓě gbo, nyɔ séín ɓě ɓɛ́ ḿ ɖá ma kà kĩ́ín nyɛɛ, wa dyúáɖò se ní ɖii-ɖɛ̀ ɓěɔ̀ ɖò wɔ̃ dɔ̃̌ɔ mu dyɛ mɔ̀ùn.’ ”
Ɖɛ m̀ ɓéɖé ɓɛ́ m̀ ké nyu hwɛ̀ ɓɛ́ m̀ ké ɖeín-nà-nyɔ̀ jǔɛ
(Máfíò 10:37-38)
25Wé ɖòɛ̀ ɓaɖaa, nyɔ kúɖúú ɓě kè Jízɛ̀ nì ma muɛń. Jízɛ̀ cɛ́ɛ̀ ma xwa, ké ɔ cɛ̃ɛ ma wa gbo, ké ɔ ɖá, 26“Nyɔ ɖò se ní ɖeín-nà-nyɔ̀ jǔɛ ɓɛ́ìn, ɔ sèìn ɔ nyɛ́ dyɛ ɔ ɓǎ kè ɔ ɖe kè ɔ gmàà kè ɔ dyú ɓě kè ɔ ɖíí-gàà ɓě kè ɔ ɖíí-màà ɓě ɔ kè ɔ mìɔùn nììn fɛ̀ɛ̀ɔ̀ mú hwɛ̀. 27Nyɔ mɔ̀ nyɔ ɓɛ́ ɔ se ɔ mìɔùn nììn kɔ́ɖɔ́sìɔ̀ ɓéɖé, ɓɛ́ ɔ ké ḿ kíɖíí sí kɛɛ, ɔ se ní ɖeín-nà-nyɔ̀ jǔɛ ɓɛ́ìn.
28“Ɔ jǔ ké nyɔ ɖò dyi gbǒ tɔ̀mɔ̀ dya ɖò poɛ mɔ́ ní, ɔ kò dyi, ké ɔ poìn wíɖí jĩ̀ kà ɓɛ́ ɔ mu gbǒɔ̀ pòìn nyɛɛ jè hwìɖǐi kĩ́ín, ɓɛ́ ɔ kéɛ dyé kɛbì ɔ mu wíɖí goun ɓéɖéìn ɓɛ́ ɔ ké gbǒɔ̀ hwɔ ní. 29Ɔ seɛ náa nyuín, nìí, ɔ dyi gbǒɔ̀ hìɖì-kpà dèǐn, nìí, ɔ se gbǒɔ̀ poɛ hwɔɔ ɓɛ́ìn. Ké nyɔ séín ɓě ɓɛ́ wa dyé ɖɛ kpá ɔ gboɛɛ mu ɔ dyɔ́ ɓaɖaùn. 30Wa mu níiń, ‘Gàa nìà kɛ dè gbǒɔ̀ po-po gbɔ, kɛɛ ɔ seɛ hwɔɔ ɓɛ́ìn.’
31“Ké kã́á ɖò dyi nyɔ-kpò táázĩ̀ìn ɓaɖa-bùè dyí ɖú, ɓɛ́ ɔ ké ɓóɖó kà kò ɖòɛ̀ kã́á ɓɛ́ ɔ kè nyɔ-kpò táázĩ̀ìn kpáɖá-nyɔ ɖò dyià, ɓɛ́ wa kéà ɔ gbo vɔ̃ɛɛ gbo vɔ̃ɔ́ mu ní, ɔ mu dyi kòùn kĩ́ín, ɓɛ́ ɔ ké hwìɖǐi poìn kɛbì ɔ ɓéɖé gana ɓɛ́ ɔ kè kã́á tɔ̀ɔ̀ ké dyéɖéín gmɔìn ní. 32Ɔ jǔ ké ɔ se kpé ɓéɖéín, nìí, ɔ mu nyɔ ɓě ɖé kã́á tɔ̀ɔ̀ gbo ɖoɓoùn, ti ɓɛ́ ɔ nì ɖé nya vɛ̃in keɛ, ɓɛ́ wa ké ɖɛ ɓě ɓɛ́ wa mu wa xwaún mɔ́ùn, hwɛ̀ ɓɛ́ wa ké toɔ̀ jè dyi táà kɛɛ jè dyi diè. 33Kà dyúáɖòɔ̀ kǎà ɓě ɖò se ní ɖeín-nà-nyɔ̀ jǔɛ ɓɛ́ìn, ɔ sèìn ɔ táà dyɛ ɖɛ séín ɓě ɓɛ́ ɔ ɓéɖéɛɛ dyi hwɛ̀.
Tɔ̃́ se ɖéèɛɛ jè
(Máfíò 5:13; Máà 9:50)
34“Tɔ̃́ nɔ̀mɔ̀ dyíin, kɛɛ ɔ jǔ ké tɔ̃́ɔ̀ ɖéé-ɖééɔ̀ dyi ɔ mú sɔ̀ ní, nìí, xwɛ̌ ɔ ɓɛ́ìn ɖéèɛ̀ nyuɛ ɖe kɛ́? 35Ɔ seɛ nyuɛ ɓɛ́ìn ɓɛ́ ɓóɖóɔ̀ ké dyíin nɔ̀mɔ̀, ké ɔ se dyíin nɔ̀mɔ̀ ɓɛ́ m̀ kéɛ sòò-nyíníín caìn, ɓɛ́ ɔ ké ɓáá-ɖɛ̀ gbo-po-ɖɛ̀ jǔ dyɛ mɔ̀ùn. Kɛɛ nyɔǔn wáɖáa xwáɖáún. Nyɔ ɓɛ́ ɔ ɓéɖé ɖùǔ ɓɛ́ ɔ ké dyi wɔ̃́ɛɛ, ɔ mɛ tò ɖùǔ.”
Currently Selected:
Ɖúù 14: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
