Ɖúù 19

Jízɛ̀ kè Zákìɔ̀ jè

1Ti ɓɛ́ Jízɛ̀ ɖǎ ma dyéɖéín-dyi-kpè-nyɔ̀ɔ̀ dyi kánáìn nyɛɛ, ɔ dyá ma Jɛ́ɖèkóò-hwɔ̀ɖɔ̀ɔ̀, ké ɔ nì ma hwɔɖɔɔ̀ mú ziɛń. 2Tácì-kpɔ̃-nyɔ̀ vɛ̀nɛ̀ ɖò nì ma ɖé. Ɔ nyɛ́nɛ́ mɔ̀ ma Zákìɔ̀. Ɔ bã ma ní. 3Ɔ nì ma vɔ̃uń ɓɛ́ ɔ ké ma kà Jízɛ̀ nyu ma nìɛ̀ kɛɛ dyé. Kɛɛ ɔ zi ma dya xwã́uń, ké ɔ se ma Jízɛ̀ dyéɛ ɓɛ́ìn ɓó nyɔ kúɖúú ɓěɔ̀ jè. 4Ké ɔ kpa ma peɖeɛ ɖé nyɔ kúɖúú ɓěɔ̀ dyúa, ké ɔ dyá ma síkímɔ̀-cù ɖò dya, ɓɛ́ ɔ ké ma Jízɛ̀ dyé, sepóɛɖé Jízɛ̀ nì ma hwìèɔ̀ kpauń. 5Ti ɓɛ́ Jízɛ̀ nyini ma ɓóɛɛ, ɔ gmɔ̀ ma dyií, ké ɔ cɛ̃ɛ ma Zákìɔ̀ gbo, ké ɔ ɖá, “Zákìɔ̀, sí ɓíɖíi wàɖà, sepóɛɖé ḿ ɓéɖé ɓɛ́ ḿ ké ɖé m̀ ɓíɖí-gbǒ zɔ̃̌ nì ɓó zɛ̃̌ɛ̀.”

6Púɛɛ, Zákìɔ̀ sí ma ɓíɖíi wàɖà, ké ɔ kpɔ̃ ma Jízɛ̀ jè dyi múà-kà. 7Nyɔ séín ɓě dyéɛ ma kɛɛ ɖú ma hwuɖui jɛ̀ìn kpàǐ, ké wa ɖá, “Ɔ ɖǎ mu, ɓɛ́ ɔ ké nyɔ mɔ̀ nàmàǔn-nyɔ̀ kɛɛ ɖéè jǔ.”

8Sɔ̀ìn ɓóɛ gboɛɛ, Zákìɔ̀ nyànà ma ɖé ɔ ɓíɖí-taún dyi, ké ɔ cɛ̃ɛ ma Bounɓoɔ̀ gbo, ké ɔ ɖá, “Ɓɔ̌ɔ̀, ḿ ɖáo, ní mu ní kɔ̃̀ɔ̀-ɖɛ̀ ɓěɔ̀ fáún-fáún gǎ-dyé-nyɔ̀ ɓěɔ̀ nyíìn. Ḿ dyi ma nyɔ ɖò kpoɖo-ɖɛ̀ xwa zà ní, nìí, ní mu ɖɛ ḿ zàà ɔ xwaa dú hĩinyɛ ɔ nyíìn ɖe.”

9Ké Jízɛ̀ cɛ̃ɛ ma ɔ gbo, ké ɔ ɖá, “Pó-pó ɖǎ gbǒ nìà kɛ zɔ̃̌ dyi ɓó zɛ̃̌ɛ̀. Gàa nìà kɛ mɔ̀ Ééɓòɖòhɛ̃́ɛ̀ nyúà-dyú ɓěɔ̀ ɖò ɖekè. 10Sepóɛɖé mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ dyi ma, ɓɛ́ ḿ ké nyɔ ɓě sèà xwáɖáún wɛ̃ɛ dyi mɔ́, ɓɛ́ ḿ ké wa póìn.”

Nɔ́ɔ́ ɓá góò-pĩ̀à ɓě jè dyíɛ

(Máfíò 25:14-30)

11Ké Jízɛ̀ po ma nɔ́ɔ́ nìà kɛ nyɔ ɓě wɔ̃́ ma ɔ wuɖuɔ̀ kɛɛ gbo, sepóɛɖé ɔ ɖǎ ma Jùɖúsɛ̀ɖɛ̀ìn-hwɔ̀ɖɔ̀ɔ̀ bũ̌in xwɛ̃́ìn, ké wa poɛ̀n ma hwìɖǐi kà ɓɛ́ Gèɖèpɔ́ɔ̀ kã́á-ɓòɖòɔ̀ nìǎ ma gbɔ dèɛ̌n muɛń nyɛ. 12Ɔ ɖá, “Nyɔ vɛ̀nɛ̀ ɖò mu ma ɓóɖó vɛ̃in ɖò kɔ̃, ɓɛ́ wa ké ma ɔ kã́á-kpè nyí, nìí, ɓɛ́ ɔ ké ma ɔ ɓíɖí ɖe dyi. 13Hwɛ̀ ɓɛ́ ɔ ké ma muɛɛ, ɔ ɖá ma ɔ gbo-nì-nyɔ̀ ɓaɖa-bùè ɓěɔ̀, ké ɔ nyí ma wa góò-wìɖì-pĩ̀à ɖò-ɖò, ké ɔ cɛ̃ɛ ma wa gbo, ké ɔ ɖá, ‘Ɓě mɛ zaìn wíɖí ɓě nìà kɛ mú, hwɛ̀ ɓɛ́ ḿ ké ɖe dyi.’ 14Kɛɛ ɔ ɓíɖí-nyɔ̀ ɓěɔ̀ nyɛ́ ma ɔ mú. Ɔ jèɛɛ, wa ɖoɓo ma nyɔ ɓě ɖé ɔ kɔ̃in, ɓɛ́ wa kéɛ ma cɛ̃, ɓɛ́ wa ké níiń, ‘À se mɔ́ ɓɛ́ gàa nìà kɛ ké à wuɖuí kɔ̃̀.’

15“Ti ɓɛ́ nyɔ vɛ̀nɛ̀ɔ̀ dyé ma ɔ kã́á-kpèɔ̀, ké ɔ mu ma ɖeɛɛ, ɔ ɖá ma gbo-nì-nyɔ̀ ɓě ɓɛ́ ɔ sè ma kà wíɖí ɓěɔ̀ gboɛ, ɓɛ́ wa ké ma ɓó ɔ dyúa dyi, ɓɛ́ ɔ kéɛ dyé kɛbì wa zaìn ɔ wíɖíɔ̀ mú ní. 16Nyɔ kĩ́ín-kĩ́ínɔ̀ dyi ma ɔ dyúa, ké ɔ ɖá, ‘Ɓɔ̌ɔ̀, góò-pĩ̀à ɓɛ́ m̀ nyí ma ḿ wɛ̃ɛ, ḿ ɖǎa mú zaìn, ké ḿ ɖǎ góò-pĩ̀à ɓaɖa-bùè ɖò dyé ɖe.’ 17Ké nyɔ vɛ̀nɛ̀ɔ̀ ɖá, ‘M̀ ɖǎ ɖɛ nɔ̀mɔ̀ dyíin nyu. M̀ mɔ̀ gbo-nì-nyɔ̀ nɔ̀mɔ̀ dyíin. M̀ mɔ̀ hwòɖǒ-kɔ̃-dè-nyɔ̀ ɖé ɖɛ tííwè mú jèɛɛ, ní muɛ nyuùn ɓɛ́ m̀ ké hwɔɖɔ vɛ̀nɛ̀-vɛ̀nɛ̀ ɓaɖa-bùè wuɖuí kɔ̃̀.’ 18Ké nyɔ sɔ̃́ nììnɔ̀ dyi ma, ké ɔ ɖá, ‘Ɓɔ̌ɔ̀, góò-pĩ̀à ɓɛ́ m̀ nyí ma ḿ wɛ̃ɛ, ḿ ɖǎa mú zaìn, ké ḿ ɖǎ góò-pĩ̀à hm̀m̌ ɖò dyé ɖe.’ 19Ké nyɔ vɛ̀nɛ̀ɔ̀ cɛ̃ɛ ma ɔ gbo, ké ɔ ɖá, ‘Ní muɛ nyuùn ɓɛ́ m̀ ké hwɔɖɔ vɛ̀nɛ̀-vɛ̀nɛ̀ hm̀m̌ wuɖuí kɔ̃̀.’

20“Púɛɛ, ɖò mɔ̀ùn dyi ma, ké ɔ ɖá, ‘Ɓɔ̌ɔ̀, nì góò-pĩ̀àɔ̀ kɛ̀. Ḿ vǐèɛ̀ ní ɖɔ-kpàǎɔ̀ mú, ké ḿ dèɛ̀ ma dyi. 21Ḿ fɛ̃̀ìn m̀ dyi, sepóɛɖé mɔ̀ǔn dyé nyɔǔn wìǐn. Nì ɖú ɖɛ m̀ se kɔ̃̀ɛɛ dyí, ké nì kpã́ ɖɛ m̀ se ɓáa.’ 22Ké nyɔ vɛ̀nɛ̀ɔ̀ cɛ̃ɛ ma ɔ gbo, ké ɔ ɖá, ‘M̀ mɔ̀ gbo-nì-nyɔ̀ nyìnììn kpeɖeín. M̀ mìɔùn nììn wuɖuɔ̀ ɖé ní mu dyí ɖúùn, ɓɛ́ ḿ ké m̀ zaa kpɔ̃̀ìn. M̀ dyuòɛ̀ kà mɔ́ún dyé nyɔǔn wìǐn nyɛ, ké ḿ ɖú ɖɛ ḿ se kɔ̃̀ kɛɛ dyíɛ, ké ḿ kpã́ ɖɛ ḿ se ɓáa. 23Ɔ dyi ná nìǐn, nìí, ɖɛ́ kɔ̃̀ jè m̀ se ma ní wíɖíɔ̀ ɖɛ-dyi-dèìn-naín poɛ́? M̀ dyiɛ ma náa nyuín, nìí, dyi ḿ dyiɔ́ kà kɛɛ, ní muɔ́ máa dyéìn, ké ɖɛ ɖò muɔ́ má ɔ kɔ̃in nììn.’ 24Ké nyɔ vɛ̀nɛ̀ɔ̀ cɛ̃ɛ ma nyɔ ɓě ɓɛ́ wa nyànà ma ɓó dyiɛɛ gbo, ké ɔ ɖá, ‘Ɓě ɖú góò-pĩ̀à nìà ɔ xwa kɛɛ dyí, ɓɛ́ ɓě kéɛ nyɔ ɓéɖéà ɔ ɓaɖa-bùè kɛɛ nyí.’ 25Ké wa cɛ̃ɛ ma ɔ gbo, ké wa ɖá, ‘Ɓɔ̌ɔ̀, má, ɔ ɓéɖé ɓaɖa-bùè kĩ́íne?’ 26Ké nyɔ vɛ̀nɛ̀ɔ̀ ɖá, ‘Ḿ cɛ̃ɛ ɓě gbo, nyɔ ɓɛ́ ɔ ɓéɖé ɖò kɛɛ, ɔ mu ɖò dyéìn ɖe, kɛɛ nyɔ ɓɛ́ ɔ se ɖò ɓéɖéɛɛ, ɔ nyɔ wè ɓɛ́ ɔ ɓéɖéà kɛɛ mu ɔ xwa sɔ̀ùn. 27Kɛɛ ní mú-nyɛ́-nyɔ̀ ɓě ɓɛ́ wa se ma kà wɔ̃́ ɓɛ́ ḿ kéà wa wuɖuí kɔ̃̀ kɛɛ, ɓě dyà nɔ̄ wa, ɓɛ́ ɓě ké wa ɖáɓá ɓó ḿ dyúa.’ ”

Jízɛ̀ dyá Jùɖúsɛ̀ɖɛ̀ìn-hwɔ̀ɖɔ̀ɔ̀ to-ɖu-kà

(Máfíò 21:1-11; Máà 11:1-11; Jɔ̃́ɔ́ 12:12-19)

28Ti Jízɛ̀ ɖǎ ma ɖɛ ɓěɛ̀ cɛ̃ɛ, ɔ mu ma dyúa, ké ɔ xwɛ̃́ìn ma Jùɖúsɛ̀ɖɛ̀ìn-hwɔ̀ɖɔ̀ɔ̀ bũ̌in. 29Ɔ nyini ma ɖé Bɛ́fèjì-hwɔ̀ɖɔ̀ɔ̀ kè Bɛ́fènì-hwɔ̀ɖɔ̀ wĩín, ɖé Ɔ́ɖè-tòɖòɔ̀ gbo. Hwɛ̀ ké ɔ ɖoɓo ma ɔ ɖeín-nà-nyɔ̀ ɓěɔ̀ sɔ̃́ dyúa. 30Ɔ cuò ma wa, ké ɔ ɖá, “Ɓě mu hwɔɖɔ nìà ɖé ɓě dyúa kɛɛ mú. Ɓě dyiá hwɔɖɔɔ̀ dyáuń nìǐn, ɓě mu ɖé jǎkasì gmɔ̀ ɖò ɓɛ́ wa wã̀ìn dyiɛɛ dyéìn. Nyɔ ɖò séè ɔ kɔ̃ún kò ɖò. Ɓě buɛ̀ ɔ, ɓɛ́ ɓě ké ɔ dyà. 31Nyɔ ɖò dyi ɓě dyi diè, ké ɔ dyi níiń, ‘Ɖɛ́ kɔ̃̀ jè ɓě nìà nimiiɔ̀ buɛ̀ǐn nyɛ́?’ ní, nìí, ɓě mɛ ɖá, ‘Bounɓoɔ̀ mɔ́ɔ ní.’ ”

32Ké ɖeín-nà-nyɔ̀ ɓěɔ̀ mu ma, ké wa dyé ma ɖɛ séín ɓěɔ̀ kà Jízɛ̀ nyuɛ ma kà wa gbo cɛ̃ɛ kɛ. 33Ti wa nì ma jǎkasì gmɔ̀ɔ̀ buɛ̀ǐn nyɛɛ, ɔ kɔ̃̀-nyɔ̀ ɓěɔ̀ diè ma wa dyi, ké wa ɖá, “Ɖɛ́ kɔ̃̀ jè ɓě nì jǎkasì gmɔ̀ɔ̀ buɛ̀ǐn nyɛ́?”

34Ké wa ɖá, “Bounɓoɔ̀ mɔ́ɔ ní.” 35Ké wa kpa ma jǎkasìɔ̀ Jízɛ̀ gbo, ké wa gba ma waà ɖɔ ɓě jǎkasìɔ̀ kɔ̃ún dyi, ké wa kòìn ma ɓó Jízɛ̀. 36Ti ɓɛ́ Jízɛ̀ nì ma muɛń nyɛɛ, nyɔ ɓěɔ̀ soɖo ma waà ɖɔ ɓě hwìèɔ̀ kɔ̃in.

37Ti ɓɛ́ ɔ xwɛ̃́ìn ma Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyi, ké wa nì ma Ɔ́ɖè-tòɖòɔ̀ dèɖěɛń muɛń nyɛɛ, ɔ ɖeín-nà-nyɔ̀ kúɖúú ɓěɔ̀ ɖú ma múàǔn kpá kpàǐ, ké wa páná ma mú, ké wa ɓàìn ma Gèɖèpɔ́ɔ̀ ɓó ɖɛ kpa ɖɛ ɓě ɓɛ́ wa dyé ma kà kɛɛ jè. 38Ké wa ɖá, “Mana mɛ nì kã́á ɓɛ́ ɔ dyi ɖé Bounɓoɔ̀ nyɛ́nɛ́ɔ̀ múɛɛ kɔ̃. Gìɖìǐ mɛ nì ɖé dyɔún, ké ɓàìn-ɓàìn mɛ nì Gèɖèpɔ́ɔ̀ nìà ɖé dyɔún wɛ̃ɛ kɔ̃.”

39Púɛɛ, Fáɖòsíì-nyɔ̀ ɓěɔ̀ ɖíɛ́ ɓě ɓɛ́ wa nì ma ɖé nyɔ kúɖúú ɓěɔ̀ hwìɛ̀ kɛɛ cɛ̃ɛ ma Jízɛ̀ gbo, ké wa ɖá, “Nyɔ-ɖɛ-tɛ̀mɛ̀ìn-nyɔ̀, po nì ɖeín-nà-nyɔ̀ ɓěɔ̀ ɓɔ́í.”

40Ké Jízɛ̀ zà ma ɖé wuɖu, ké ɔ ɖá, “Ḿ cɛ̃ɛ ɓě gbo, ɔ jǔ ké wa se wùɖùǐn, nìí, sɔ́ɔ́-kpò ɓěɔ̀ mɔ̀ùn mu mú pánáùn.”

Jízɛ̀ vĩ̌ ɓó Jùɖúsɛ̀ɖɛ̀ìn-hwɔ̀ɖɔ̀ɔ̀ nyɔ ɓěɔ̀ jè

41Ti Jízɛ̀ xwɛ̃́ìn ma Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyi, ké ɔ dyéɛ ma kɛɛ, ɔ vĩ̌ ma ɓó hwɔɖɔɔ̀ nyɔ ɓěɔ̀ jè, 42ké ɔ ɖá, “Nyɛ́ ɖá ɓě dyuòɔ̌ ɖɛ ɓě ɓɛ́ ɓě kéɔ́ ɓéɖé ní, ɓɛ́ ɓě kéɔ́ gìɖìǐ ɓéɖé ɓó zɛ̃̌ɛ̀ kɛɛ dyíɛ́? Kɛɛ ɓě se wa dyéɛ ɓɛ́ìn ɓó kàǔn. 43Sepóɛɖé ti ɖò mu dyiìn, ké ɓěɛ̀ mú-nyɛ́-nyɔ̀ ɓěɔ̀ mu ɓě wɔ̃ gbǎìn, ké wa muɛ nyuùn ɓɛ́ ɓě ké se síɛ ɓɛ́ìn. 44Wa mu ɓě kè ɓěɛ̀ hwɔɖɔɔ̀ kè nyɔ ɓě nìà ɖé ɔ múɛɛ mú gbɔɔ̀ùn. Sɔ́ɔ́-kpò ɖò se ɔ mǔè ɖò kɔ̃in sèɛ̌ mu. Sepóɛɖé ɓě se ti ɓɛ́ Gèɖèpɔ́ɔ̀ dyi ma ɓě gboɛɛ dyí dyuò.”

Jízɛ̀ mu ɖé Gèɖèpɔ́ɔ̀ gbǒɔ̀ mú

(Máfíò 21:12-17; Máà 11:15-19; Jɔ̃́ɔ́ 2:13-22)

45Ti ɓɛ́ Jízɛ̀ dyá ma Jùɖúsɛ̀ɖɛ̀ìn-hwɔ̀ɖɔ̀ɔ̀ kɛɛ, ɔ mu ma ɖé Gèɖèpɔ́ɔ̀ gbǒɔ̀ mú, ké ɔ dè ma nyɔ ɓě ɓɛ́ wa nì ma ɖé ɖɛ peɖeɛń nyɛɛ kúmúɛ gbɔ. 46Ɔ cɛ̃ɛ ma wa gbo, ké ɔ ɖá, “Gèɖèpɔ́ɔ̀-cèè-ɖɛ̀ɔ̀ ɖá, ‘Wa mu ní gbǒɔ̀ ɓaàìn-naín ɖáìn.’ Kɛɛ ɓě nyuɛ ké ɔ mɔ̀ǎ sṹún-gɔ̀-nyɔ̀ ɓěɛ̀ cĩ́-naín gàná cá.”

47Sɔ̀ìn ɓóɛ gboɛɛ, Jízɛ̀ tɛ̀mɛ̀ìn ma nyɔ ɓěɔ̀ ɖɛ ɖé Gèɖèpɔ́ɔ̀ gbǒɔ̀ mú wé séín ɓaɖa. Ɔ jèɛɛ, sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɔ kè nyɔ ɓěɔ̀ nàìn-nyɔ̀ ɓěɔ̀ mɔ́ ɓɛ́ wa ké ma ɔ ɖáɓá. 48Kɛɛ wa seɛ ma dyuò kà wa kéɛ ma nyuɛ, sepóɛɖé nyɔ séín ɓěɔ̀ tò ma ɔ wuɖu ɓěɔ̀ ɖùǔ gbo cá.

Currently Selected:

Ɖúù 19: ƁB02

Highlight

Copy