Zɔ̃̀ɔ̃́ 18
18
O Zízɛ̀ kṹ
(Máfìù 26.47-56; Máà 14.43-50; Lúù 22.47-53)
1Lɛ̀ Zízɛ̀ e nyɛ wɔ̃́ e kéa gèeè mɔ̀ɔ, wà là tòà-píé-mìà o gó yi, o yíí lɛ́ ò si Kédɔ̃̀-yììà kã́. Yílí nyɛ́nɛ̀ĩ̀ e kɛ yí. Zízɛ̀ wà là tòà-píé-mìà o ló nyɛ́nɛ̀ĩ̀ e kília mɔ̀. 2Zúdà, lɛ́ e Zízɛ̀ lé góa, e lɛ̀ e kília dɔ bèĩzɛ̀, ɓii lúó búnùzɛ̀ káa, Zízɛ̀ wà là tòà-píé-mìà waà pá o kíe mɔ̀ yi. 3Lɛ̀ e kɛ kília, Zúdà e ló yi. Zúdà wà sóyà kù, e bɛ̀i vɔ-mìà lɛ́ sálà-ɓò-Wálà-mɔ̀-mìà kpànazɛ̀, ɛ̃́ɛ̃́ Fálásíì-mìà o o vɔɔ, o ló yi. Gèlè-gɔ̃-pɔ̀ɔ̀ e kɛ o kɛ̀lɛ̀, e bɛ̀i nábò wà kpã́ã̀ nì e kɛ o kɛ̀lɛ̀, wáà lòá. 4Zízɛ̀ e wɔ̃́ séĩ́ lɛ́ e kɛ lópìà kɛɛ̀ à káa yí dɔ. A mɔ́ɔ̀ dɔ ɓo o mɔ̀ líé, áà gèè o lɛ̀ɛ, “Dé kà nàà ɓɛ?”
5Wa là nìɛ̀ kélɛ̀, “Zízɛ̀ lɛ́ è go Názàlɛ̀ɛ lɛ́ kò nààa.”
Zízɛ̀ a gèe kélɛ̀, “Ma lɛ́ m à káa.”
Zúdà lɛ́ e à lé góa, e kɛ dɔ̀á yi míáa bà. 6Lɛ̀ Zízɛ̀ a gèe kélɛ̀, “Ma lɛ́ m à káa,” míáa o ɓo o mɛ̀ĩ́, o pèlè tã́ã̀. 7Zízɛ̀ e o wɛ̃́ĩ́-lɔ̀ɔ kɛ zeĩ́ kélɛ̀, “Dé kà nàà ɓɛ?”
Wa gèe, “Zízɛ̀ lɛ́ è go Názàlɛ̀ɛ lɛ́ kò nààa.”
8Zízɛ̀ a gèe o lɛ̀ɛ, “Maà à gèe kɛ̀ɛ̀ ka lɛ̀ɛ kélɛ̀ ma lɛ́ m à káa. É kɛ̀á mɔṹ ka m naapìàa, kà à tó míá o kéa ó wà ló ɓo.” 9A gèe kíli, kɛɛ wɔ̃́ lɛ́ aà à gèea, é kɛ wánà zɛ̀. Ye lɛ́ e kélɛ̀, “M̀ḿ mia lɛ́ i o nɔ m lɛ̀ɛ doó fèle gíni nɛ́.”
10Gèlè-gɔ̃-làà e kɛ Sáímɔ̀ Pílɛ̀ kɛ̀lɛ̀. E à gã́ã́ e kéĩ́, e sálà-ɓò-Wálà-mɔ̀-mìà wũ-là-mìa là lùò yà e tóó mɔ̀, e à kɔ̀ yiè tóó e kília kã́ pɛ̃ĩ le. Lùò e kília tɔ́ lɛ́ Mákà. 11Zízɛ̀ a gèe Pílɛ̀ lɛ̀ɛ, “Ì ɓà lààa wàà e kéĩ́. Ƃàá yí dɔ kélɛ̀ ḿm̀ lo pɛ miì kɔ̀ɛ̀ lɛ́ m Dàa aà nɔ m lɛ̀ɛ yí?”
Zízɛ̀ lɛ Aná wɛlɛ líé
12Sóyà kùa wà o wũ-là-mì, é dàá vɔ-mìà yé o kɛ Zúù-mìà káa bàa, o Zízɛ̀ kṹ, wa yèlè. 13O ló à ká Aná píé bèĩzɛ̀. Aná e kília e kɛ Káyáfà, lɛ́ e kɛ sálà-ɓò-Wálà-mɔ̀-mìà wũ-là-mì ká kɛ̀ɛ̀ e kília káa, na dàa ká. 14Káyáfà e kília lɛ́ e lìè-wè dɔ Zúù-mìà lɛ̀ɛ kélɛ̀ mi doó gà mia séĩ́ wɛ̃́ĩ̀ lɛ́ɛ̀ à mɛ́ kũa.
Pílɛ̀ a gèe lɛ̀ɛ́ Zízɛ̀ dɔ
(Máfìù 26.69-70; Máà 14.66-68; Lúù 22.55-57)
15Sáímɔ̀ Pílɛ̀ wà tòà-píé-mìàa doó-mì o tó Zízɛ̀ píé. Tòà-píé-mì yé e kília sálà-ɓò-Wálà-mɔ̀-mìà wũ-là-mìa e à dɔ sɛ̀. E à mɔ́ɔ̀ tó ɓo Zízɛ̀ píé, o ló sálà-ɓò-Wálà-mɔ̀-mìà wũ-là-mìa zì dɔ-gàlàa yí. 16Pílɛ̀ e tó dɔ̀á gàlàa lé mɔ̀. Tòà-píé-mì yé sálà-ɓò-Wálà-mɔ̀-mìà wũ-là-mìa à dɔ e nyɔ́ɔ̀ɔ káa, e ɓɔ pɛlɛí, e mɛ́ĩ́ ɓo lee-nɛ̀fú lɛ́ e kɛ e nyìɛ kɛpìà gàlàa lé mɔ̀ɔ lɛ̀ɛ, e wàà gbaa Pílɛ̀ ká kɛ́ì. 17Lee-nɛ̀fú lɛ́ e kɛ gàlàa lé mɔ̀ɔ, a gèe Pílɛ̀ lɛ̀ɛ, “Ḿ gɔ̃̀, i gɔ̃́ e dĩ̀ĩa là tòà-píé-mìàa doó-mì ká?”
Pílɛ̀ a gèe kélɛ̀, “Ma wá à ká.”
18Nɛ́nɛ́ e kɛ nupìà. Yɛɓo-kɛ-mìà wà sóyà vɔ̀ɔ o sɛ̃́ĩ̀ tíé dàaà e kɛá. O dɔɔ̀ e kɛá à mɔ̀, wáà o nɛ́nɛ́ ɓò. Pílɛ̀ e ló, e dà o bà, áà e nɛ́nɛ́ ɓò.
Sálà-ɓò-Wálà-mɔ̀-mìà wũ-là-mìa e wɛ̃́ĩ́-lɔ̀ɔ yà Zízɛ̀ mɔ̀
(Máfìù 26.59-66; Máà 14.55-64; Lúù 22.66-71)
19Sálà-ɓò-Wálà-mɔ̀-mìà wũ-là-mìa e wɛ̃́ĩ́-lɔ̀ɔ kɛ Zízɛ̀ kɛ̀lɛ̀, é gbɛ̃̀á là tòà-píé-mìà ɛ̃́ɛ̃́ à zì pɛ-zɔ̃̀ɔ̃̀-kɔ̀ mɔ̀. 20Zízɛ̀ a là nìɛ̀ kélɛ̀, “M kɛ mɛ́ĩ́ ɓopìà mia séĩ́ nyìɛ mɔ̀ teele. M kɛ teele pɛ zɔ̃̀ɔ̃̀pìà Zúù-mìà zì Wálà-kàa, e bɛ̀i, sálà-ɓò-Wálà-lɛ̀ɛ-kà lɛ́ Zúù-mìà séĩ́ ò pa o kíe mɔ̀ à wìa wì. M̀ḿ gbaa wɔ̃́ dò fé gèe lùe ká. 21Mɛ́ e kɛ mɔṹ lɛ́ ì wɛ̃́ĩ́-lɔ̀ɔ kɛ̀ m kɛ̀lɛ̀? Ì wɛ̃́ĩ́-lɔ̀ɔ kɛ mia lɛ́ o m wéè maa kɛ̀lɛ̀. Ì o wɛ̃́ĩ́-lɔ̀ɔ kɛ wɔ̃́ lɛ́ ma gèe o lɛ̀ɛ mɔ́ɔ̀ wɔ̃̀ ká. Wɔ̃́ ma gèea, óò à dɔ.”
22Lɛ̀ Zízɛ̀ e wɔ̃́ e kéa gèea, sóyà vɔ̀ lɛ́ o kɛ yía doó-mì e Zízɛ̀ mɛ̀ e kɔ̀ ká, áà gèè kélɛ̀, “Mɛ́ e kɛ lɛ́ ì wèè sálà-ɓò-Wálà-mɔ̀-mìà wũ-là-mìa lɛ̀ɛ ké ɓɛ?”
23Zízɛ̀ a gèe à lɛ̀ɛ kélɛ̀, “É kɛ̀á maà wɔ̃́ lɛ́ lɛ yɔɔ gèea, ì à kélá-wè ɓo. É kɛ̀á mɔṹ wɔ̃́ lɛ́ ma gèea lɛ gèe-wɔ̃̀ káa, mɛ́ e kɛ lɛ́ ì m mɛ̀ mɔṹ?”
24Lɛ̀ e kɛ kília, Aná e à vɔ e yèleèe zɛ̀ ká Káyáfà lɛ́ e kɛ sálà-ɓò-Wálà-mɔ̀-mìà wũ-là-mì káa píé.
Pílɛ̀ a gèe zeĩ́ lɛ̀ɛ́ Zízɛ̀ dɔ
(Máfìù 26.71-75; Máà 14.69-72; Lúù 22.58-62)
25Sáímɔ̀ Pílɛ̀ e kɛ tĩã́ dɔ̀á yi, áà e nɛ́nɛ́ ɓò. Lɛ̀ e kɛ kília, wa gèe à lɛ̀ɛ, “Ḿ gɔ̃̀, i gɔ̃́ e dĩ̀ĩa là tòà-píé-mìàa doó-mì ká nɔ́ kíli?”
Kɛɛ Pílɛ̀ a tèé ɓo. A gèe kélɛ̀, “Ma wá à ká.”
26Sálà-ɓò-Wálà-mɔ̀-mìà wũ-là-mìa là lùò doó-mì, lɛ́ e kɛ mi lɛ́ Pílɛ̀ a tóó kã́a mì káa, a gèe kélɛ̀, “Ḿ gɔ̃̀, m i gɛ̃̀ à píé yílí nyɛ́nɛ̀ĩ̀a mɔ̀?”
27Pílɛ̀ e bɛ̀i a tèé ɓo. Lɛ̀ e kɛ nɔ́ kília, tɔ̀ɔ̀ áà wèè.
Zízɛ̀ lɛ Pálɛ̀ wɛlɛ líé
(Máfìù 27.1-2, 11-14; Máà 15.1-5; Lúù 23.1-5)
28O gó Zízɛ̀ ká Káyáfà píé kɛ́ì, o ló à ká sɛ́lɛ́ wũ-là-mì yà-pìà. E kɛ làapíé tùlù pɛ̃pɛ̃ yí ká. Zúù-mìà òó gbaa wàà káa wì, ɓii wa naa o mɛ́ é kɛ e ɓɔɔ̀ɔ ká Wálà lɛ̀ɛ kɛ ó Dìè-mia-là Kpílìa pɛ̀ ɓèlè. 29Lɛ̀ e kɛ kília, Pálɛ̀ e ló o píé pɛ́lɛ̀ zèí, áà gèè o lɛ̀ɛ kélɛ̀, “Káà gèe gɔ̃́ e kéa e mɛɛ kɛ?”
30O à wéè yí zṹ kélɛ̀, “È kɛ̀á gɔ̃́ɔ lɛ̀ɛ́ gbaa kɛ kɛ-pɛ̀ yɔɔ kɛ-mì káa, kòó gɔ̃̀ nuùá i píé.”
31Pálɛ̀ a gèe o lɛ̀ɛ, “Ka dìè kà à sí, ká ló ká mɛ̀ĩ́-sà dɔ à mɔ̀ kà lɔ́ɔ̀ɔ ká.”
Zúù-mìà wa gèe à lɛ̀ɛ, “Ye wá ko mɔ̀ kɛɛ kó mi nɔ́ɔ fé zɛ.” 32Wɔ̃́ e kéa e kɛ, kɛɛ é wɔ̃́ lɛ́ Zízɛ̀ aà gèea kɛ wánà zɛ̀. Wɔ̃́ e kília lɛ́ e wɔ̃́ lɛ́ a wɔ̃̀ gèe lɛ̀ lɛ́ e ga sùu lɛ́ è lo à ɓoòa zɔ̃̀ɔ̃̀ɔ káa.
33Pálɛ̀ e ló e mɛ̀ĩ́ e píé kɛ́ì. E Zízɛ̀ súo kɛ, áà gèè à lɛ̀ɛ, “Ƃi lɛ́ i Zúù-mìà líé-sí-mì káa?”
34Zízɛ̀ a là nìɛ̀ kélɛ̀, “Wɔ̃́ e kéa ɓáà si i dìè yí lɛ́ ɓà gèea, ɛ̃́ɛ̃́ mia lɛ́ o m wɔ̃̀ gèe i lɛ̀ɛ?”
35Pálɛ̀ a gèe kélɛ̀, “Íì m gɛ̃̀ Zúù-mìàa dò ká? I dìè-tĩ́ pà-mìà, e bɛ̀i sálà-ɓò-Wálà-mɔ̀-mìà kpànazɛ̀ɛ lɛ́ o i nɔ m lɛ̀ɛ. Mɛ́ ɓa kɛ?”
36Zízɛ̀ a gèe kélɛ̀, “M zì tò-mia-là wá kpóṹ là zèe. È kɛ̀á m zì tò-mia-là lɛ kpóṹ là zèea, m̀ mia nì wáá gèlè gɔ̃ɔ̀, yékɛ̀ mia ó m nɔ Zúù-mìà lɛ̀ɛ. Kɛɛ m zì tò-mia-là wá kpóṹ là zèe.”
37Pálɛ̀ a gèe à lɛ̀ɛ, “I mɔṹ mia líé-sí-mì ká?”
Zízɛ̀ a gèe à lɛ̀ɛ, “Íì à gèe kélɛ̀ m mia líé-sí-mì ká. Wɔ̃́ nɔ́ e kéa lɛ́ à mɔ́ɔ̀ m yeè e kɛá, lɛ́ m nu kpóṹ e kéa làa. Wɔ̃́ɔ lɛ́ e kélɛ̀, kɛɛ ḿ wánà-wɔ̃̀ɔ là kélá-wè ɓo. Mi nɔ́ɔ fé lɛ́ lɛ wánà-wɔ̃̀ɔ là mi káa, lɛ́ɛ̀ e tóó dɔ m mɔ̀.”
38Pálɛ̀ a gèe à lɛ̀ɛ, “Mɛ́ ò si wánà-wɔ̃̀?”
Wa gèe Zízɛ̀ é ga
(Máfìù 27.15-31; Máà 15.6-20; Lúù 23.13-25)
Lɛ̀ e kɛ kília, Pálɛ̀ e ɓɔ pɛlɛí, e ló zeĩ́ Zúù-mìà píé, áà gèè o lɛ̀ɛ, “M̀ḿ wɔ̃́ yɔɔ lɛ́ gɔ̃́ɛɛ a kɛɛ gɛ̃̀. 39Kɛɛ ka zì wɔ̃́ kɛ-kɔ̀ dò lɛ ɓe. Ye lɛ́ e kélɛ̀, yé Dìè-mia-là Kpílìa lúó aà ɓɔɔ, ḿm̀ kã bĩ́-kɛ̀ì-mìàa doó-mì mɔ̀ ka lɛ̀ɛ, tó e là ló ɓo. Káà nàà ḿ kã́ Zúù-mìà líé-sí-mìa mɔ̀ ka lɛ̀ɛ?”
40O gbɛ́ɛ́ weeá kélɛ̀, “Gbàaò. Kòó naa gɔ̃́ e yía ká. Kóò nàà Bàlábà ká.” Bàlábà e kília e kɛ kã̀ã-mì ká.
Currently Selected:
Zɔ̃̀ɔ̃́ 18: MNT
Highlight
Share
Copy
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
Zɔ̃̀ɔ̃́ 18
18
O Zízɛ̀ kṹ
(Máfìù 26.47-56; Máà 14.43-50; Lúù 22.47-53)
1Lɛ̀ Zízɛ̀ e nyɛ wɔ̃́ e kéa gèeè mɔ̀ɔ, wà là tòà-píé-mìà o gó yi, o yíí lɛ́ ò si Kédɔ̃̀-yììà kã́. Yílí nyɛ́nɛ̀ĩ̀ e kɛ yí. Zízɛ̀ wà là tòà-píé-mìà o ló nyɛ́nɛ̀ĩ̀ e kília mɔ̀. 2Zúdà, lɛ́ e Zízɛ̀ lé góa, e lɛ̀ e kília dɔ bèĩzɛ̀, ɓii lúó búnùzɛ̀ káa, Zízɛ̀ wà là tòà-píé-mìà waà pá o kíe mɔ̀ yi. 3Lɛ̀ e kɛ kília, Zúdà e ló yi. Zúdà wà sóyà kù, e bɛ̀i vɔ-mìà lɛ́ sálà-ɓò-Wálà-mɔ̀-mìà kpànazɛ̀, ɛ̃́ɛ̃́ Fálásíì-mìà o o vɔɔ, o ló yi. Gèlè-gɔ̃-pɔ̀ɔ̀ e kɛ o kɛ̀lɛ̀, e bɛ̀i nábò wà kpã́ã̀ nì e kɛ o kɛ̀lɛ̀, wáà lòá. 4Zízɛ̀ e wɔ̃́ séĩ́ lɛ́ e kɛ lópìà kɛɛ̀ à káa yí dɔ. A mɔ́ɔ̀ dɔ ɓo o mɔ̀ líé, áà gèè o lɛ̀ɛ, “Dé kà nàà ɓɛ?”
5Wa là nìɛ̀ kélɛ̀, “Zízɛ̀ lɛ́ è go Názàlɛ̀ɛ lɛ́ kò nààa.”
Zízɛ̀ a gèe kélɛ̀, “Ma lɛ́ m à káa.”
Zúdà lɛ́ e à lé góa, e kɛ dɔ̀á yi míáa bà. 6Lɛ̀ Zízɛ̀ a gèe kélɛ̀, “Ma lɛ́ m à káa,” míáa o ɓo o mɛ̀ĩ́, o pèlè tã́ã̀. 7Zízɛ̀ e o wɛ̃́ĩ́-lɔ̀ɔ kɛ zeĩ́ kélɛ̀, “Dé kà nàà ɓɛ?”
Wa gèe, “Zízɛ̀ lɛ́ è go Názàlɛ̀ɛ lɛ́ kò nààa.”
8Zízɛ̀ a gèe o lɛ̀ɛ, “Maà à gèe kɛ̀ɛ̀ ka lɛ̀ɛ kélɛ̀ ma lɛ́ m à káa. É kɛ̀á mɔṹ ka m naapìàa, kà à tó míá o kéa ó wà ló ɓo.” 9A gèe kíli, kɛɛ wɔ̃́ lɛ́ aà à gèea, é kɛ wánà zɛ̀. Ye lɛ́ e kélɛ̀, “M̀ḿ mia lɛ́ i o nɔ m lɛ̀ɛ doó fèle gíni nɛ́.”
10Gèlè-gɔ̃-làà e kɛ Sáímɔ̀ Pílɛ̀ kɛ̀lɛ̀. E à gã́ã́ e kéĩ́, e sálà-ɓò-Wálà-mɔ̀-mìà wũ-là-mìa là lùò yà e tóó mɔ̀, e à kɔ̀ yiè tóó e kília kã́ pɛ̃ĩ le. Lùò e kília tɔ́ lɛ́ Mákà. 11Zízɛ̀ a gèe Pílɛ̀ lɛ̀ɛ, “Ì ɓà lààa wàà e kéĩ́. Ƃàá yí dɔ kélɛ̀ ḿm̀ lo pɛ miì kɔ̀ɛ̀ lɛ́ m Dàa aà nɔ m lɛ̀ɛ yí?”
Zízɛ̀ lɛ Aná wɛlɛ líé
12Sóyà kùa wà o wũ-là-mì, é dàá vɔ-mìà yé o kɛ Zúù-mìà káa bàa, o Zízɛ̀ kṹ, wa yèlè. 13O ló à ká Aná píé bèĩzɛ̀. Aná e kília e kɛ Káyáfà, lɛ́ e kɛ sálà-ɓò-Wálà-mɔ̀-mìà wũ-là-mì ká kɛ̀ɛ̀ e kília káa, na dàa ká. 14Káyáfà e kília lɛ́ e lìè-wè dɔ Zúù-mìà lɛ̀ɛ kélɛ̀ mi doó gà mia séĩ́ wɛ̃́ĩ̀ lɛ́ɛ̀ à mɛ́ kũa.
Pílɛ̀ a gèe lɛ̀ɛ́ Zízɛ̀ dɔ
(Máfìù 26.69-70; Máà 14.66-68; Lúù 22.55-57)
15Sáímɔ̀ Pílɛ̀ wà tòà-píé-mìàa doó-mì o tó Zízɛ̀ píé. Tòà-píé-mì yé e kília sálà-ɓò-Wálà-mɔ̀-mìà wũ-là-mìa e à dɔ sɛ̀. E à mɔ́ɔ̀ tó ɓo Zízɛ̀ píé, o ló sálà-ɓò-Wálà-mɔ̀-mìà wũ-là-mìa zì dɔ-gàlàa yí. 16Pílɛ̀ e tó dɔ̀á gàlàa lé mɔ̀. Tòà-píé-mì yé sálà-ɓò-Wálà-mɔ̀-mìà wũ-là-mìa à dɔ e nyɔ́ɔ̀ɔ káa, e ɓɔ pɛlɛí, e mɛ́ĩ́ ɓo lee-nɛ̀fú lɛ́ e kɛ e nyìɛ kɛpìà gàlàa lé mɔ̀ɔ lɛ̀ɛ, e wàà gbaa Pílɛ̀ ká kɛ́ì. 17Lee-nɛ̀fú lɛ́ e kɛ gàlàa lé mɔ̀ɔ, a gèe Pílɛ̀ lɛ̀ɛ, “Ḿ gɔ̃̀, i gɔ̃́ e dĩ̀ĩa là tòà-píé-mìàa doó-mì ká?”
Pílɛ̀ a gèe kélɛ̀, “Ma wá à ká.”
18Nɛ́nɛ́ e kɛ nupìà. Yɛɓo-kɛ-mìà wà sóyà vɔ̀ɔ o sɛ̃́ĩ̀ tíé dàaà e kɛá. O dɔɔ̀ e kɛá à mɔ̀, wáà o nɛ́nɛ́ ɓò. Pílɛ̀ e ló, e dà o bà, áà e nɛ́nɛ́ ɓò.
Sálà-ɓò-Wálà-mɔ̀-mìà wũ-là-mìa e wɛ̃́ĩ́-lɔ̀ɔ yà Zízɛ̀ mɔ̀
(Máfìù 26.59-66; Máà 14.55-64; Lúù 22.66-71)
19Sálà-ɓò-Wálà-mɔ̀-mìà wũ-là-mìa e wɛ̃́ĩ́-lɔ̀ɔ kɛ Zízɛ̀ kɛ̀lɛ̀, é gbɛ̃̀á là tòà-píé-mìà ɛ̃́ɛ̃́ à zì pɛ-zɔ̃̀ɔ̃̀-kɔ̀ mɔ̀. 20Zízɛ̀ a là nìɛ̀ kélɛ̀, “M kɛ mɛ́ĩ́ ɓopìà mia séĩ́ nyìɛ mɔ̀ teele. M kɛ teele pɛ zɔ̃̀ɔ̃̀pìà Zúù-mìà zì Wálà-kàa, e bɛ̀i, sálà-ɓò-Wálà-lɛ̀ɛ-kà lɛ́ Zúù-mìà séĩ́ ò pa o kíe mɔ̀ à wìa wì. M̀ḿ gbaa wɔ̃́ dò fé gèe lùe ká. 21Mɛ́ e kɛ mɔṹ lɛ́ ì wɛ̃́ĩ́-lɔ̀ɔ kɛ̀ m kɛ̀lɛ̀? Ì wɛ̃́ĩ́-lɔ̀ɔ kɛ mia lɛ́ o m wéè maa kɛ̀lɛ̀. Ì o wɛ̃́ĩ́-lɔ̀ɔ kɛ wɔ̃́ lɛ́ ma gèe o lɛ̀ɛ mɔ́ɔ̀ wɔ̃̀ ká. Wɔ̃́ ma gèea, óò à dɔ.”
22Lɛ̀ Zízɛ̀ e wɔ̃́ e kéa gèea, sóyà vɔ̀ lɛ́ o kɛ yía doó-mì e Zízɛ̀ mɛ̀ e kɔ̀ ká, áà gèè kélɛ̀, “Mɛ́ e kɛ lɛ́ ì wèè sálà-ɓò-Wálà-mɔ̀-mìà wũ-là-mìa lɛ̀ɛ ké ɓɛ?”
23Zízɛ̀ a gèe à lɛ̀ɛ kélɛ̀, “É kɛ̀á maà wɔ̃́ lɛ́ lɛ yɔɔ gèea, ì à kélá-wè ɓo. É kɛ̀á mɔṹ wɔ̃́ lɛ́ ma gèea lɛ gèe-wɔ̃̀ káa, mɛ́ e kɛ lɛ́ ì m mɛ̀ mɔṹ?”
24Lɛ̀ e kɛ kília, Aná e à vɔ e yèleèe zɛ̀ ká Káyáfà lɛ́ e kɛ sálà-ɓò-Wálà-mɔ̀-mìà wũ-là-mì káa píé.
Pílɛ̀ a gèe zeĩ́ lɛ̀ɛ́ Zízɛ̀ dɔ
(Máfìù 26.71-75; Máà 14.69-72; Lúù 22.58-62)
25Sáímɔ̀ Pílɛ̀ e kɛ tĩã́ dɔ̀á yi, áà e nɛ́nɛ́ ɓò. Lɛ̀ e kɛ kília, wa gèe à lɛ̀ɛ, “Ḿ gɔ̃̀, i gɔ̃́ e dĩ̀ĩa là tòà-píé-mìàa doó-mì ká nɔ́ kíli?”
Kɛɛ Pílɛ̀ a tèé ɓo. A gèe kélɛ̀, “Ma wá à ká.”
26Sálà-ɓò-Wálà-mɔ̀-mìà wũ-là-mìa là lùò doó-mì, lɛ́ e kɛ mi lɛ́ Pílɛ̀ a tóó kã́a mì káa, a gèe kélɛ̀, “Ḿ gɔ̃̀, m i gɛ̃̀ à píé yílí nyɛ́nɛ̀ĩ̀a mɔ̀?”
27Pílɛ̀ e bɛ̀i a tèé ɓo. Lɛ̀ e kɛ nɔ́ kília, tɔ̀ɔ̀ áà wèè.
Zízɛ̀ lɛ Pálɛ̀ wɛlɛ líé
(Máfìù 27.1-2, 11-14; Máà 15.1-5; Lúù 23.1-5)
28O gó Zízɛ̀ ká Káyáfà píé kɛ́ì, o ló à ká sɛ́lɛ́ wũ-là-mì yà-pìà. E kɛ làapíé tùlù pɛ̃pɛ̃ yí ká. Zúù-mìà òó gbaa wàà káa wì, ɓii wa naa o mɛ́ é kɛ e ɓɔɔ̀ɔ ká Wálà lɛ̀ɛ kɛ ó Dìè-mia-là Kpílìa pɛ̀ ɓèlè. 29Lɛ̀ e kɛ kília, Pálɛ̀ e ló o píé pɛ́lɛ̀ zèí, áà gèè o lɛ̀ɛ kélɛ̀, “Káà gèe gɔ̃́ e kéa e mɛɛ kɛ?”
30O à wéè yí zṹ kélɛ̀, “È kɛ̀á gɔ̃́ɔ lɛ̀ɛ́ gbaa kɛ kɛ-pɛ̀ yɔɔ kɛ-mì káa, kòó gɔ̃̀ nuùá i píé.”
31Pálɛ̀ a gèe o lɛ̀ɛ, “Ka dìè kà à sí, ká ló ká mɛ̀ĩ́-sà dɔ à mɔ̀ kà lɔ́ɔ̀ɔ ká.”
Zúù-mìà wa gèe à lɛ̀ɛ, “Ye wá ko mɔ̀ kɛɛ kó mi nɔ́ɔ fé zɛ.” 32Wɔ̃́ e kéa e kɛ, kɛɛ é wɔ̃́ lɛ́ Zízɛ̀ aà gèea kɛ wánà zɛ̀. Wɔ̃́ e kília lɛ́ e wɔ̃́ lɛ́ a wɔ̃̀ gèe lɛ̀ lɛ́ e ga sùu lɛ́ è lo à ɓoòa zɔ̃̀ɔ̃̀ɔ káa.
33Pálɛ̀ e ló e mɛ̀ĩ́ e píé kɛ́ì. E Zízɛ̀ súo kɛ, áà gèè à lɛ̀ɛ, “Ƃi lɛ́ i Zúù-mìà líé-sí-mì káa?”
34Zízɛ̀ a là nìɛ̀ kélɛ̀, “Wɔ̃́ e kéa ɓáà si i dìè yí lɛ́ ɓà gèea, ɛ̃́ɛ̃́ mia lɛ́ o m wɔ̃̀ gèe i lɛ̀ɛ?”
35Pálɛ̀ a gèe kélɛ̀, “Íì m gɛ̃̀ Zúù-mìàa dò ká? I dìè-tĩ́ pà-mìà, e bɛ̀i sálà-ɓò-Wálà-mɔ̀-mìà kpànazɛ̀ɛ lɛ́ o i nɔ m lɛ̀ɛ. Mɛ́ ɓa kɛ?”
36Zízɛ̀ a gèe kélɛ̀, “M zì tò-mia-là wá kpóṹ là zèe. È kɛ̀á m zì tò-mia-là lɛ kpóṹ là zèea, m̀ mia nì wáá gèlè gɔ̃ɔ̀, yékɛ̀ mia ó m nɔ Zúù-mìà lɛ̀ɛ. Kɛɛ m zì tò-mia-là wá kpóṹ là zèe.”
37Pálɛ̀ a gèe à lɛ̀ɛ, “I mɔṹ mia líé-sí-mì ká?”
Zízɛ̀ a gèe à lɛ̀ɛ, “Íì à gèe kélɛ̀ m mia líé-sí-mì ká. Wɔ̃́ nɔ́ e kéa lɛ́ à mɔ́ɔ̀ m yeè e kɛá, lɛ́ m nu kpóṹ e kéa làa. Wɔ̃́ɔ lɛ́ e kélɛ̀, kɛɛ ḿ wánà-wɔ̃̀ɔ là kélá-wè ɓo. Mi nɔ́ɔ fé lɛ́ lɛ wánà-wɔ̃̀ɔ là mi káa, lɛ́ɛ̀ e tóó dɔ m mɔ̀.”
38Pálɛ̀ a gèe à lɛ̀ɛ, “Mɛ́ ò si wánà-wɔ̃̀?”
Wa gèe Zízɛ̀ é ga
(Máfìù 27.15-31; Máà 15.6-20; Lúù 23.13-25)
Lɛ̀ e kɛ kília, Pálɛ̀ e ɓɔ pɛlɛí, e ló zeĩ́ Zúù-mìà píé, áà gèè o lɛ̀ɛ, “M̀ḿ wɔ̃́ yɔɔ lɛ́ gɔ̃́ɛɛ a kɛɛ gɛ̃̀. 39Kɛɛ ka zì wɔ̃́ kɛ-kɔ̀ dò lɛ ɓe. Ye lɛ́ e kélɛ̀, yé Dìè-mia-là Kpílìa lúó aà ɓɔɔ, ḿm̀ kã bĩ́-kɛ̀ì-mìàa doó-mì mɔ̀ ka lɛ̀ɛ, tó e là ló ɓo. Káà nàà ḿ kã́ Zúù-mìà líé-sí-mìa mɔ̀ ka lɛ̀ɛ?”
40O gbɛ́ɛ́ weeá kélɛ̀, “Gbàaò. Kòó naa gɔ̃́ e yía ká. Kóò nàà Bàlábà ká.” Bàlábà e kília e kɛ kã̀ã-mì ká.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Mann New Testament © Bible Society in Liberia, 1978.